¿Anasüche nümüin Maleiwa nükaijüle wanee wayuu?

Nnojotsü süküjüin tü Wiwüliakat süchiki tü akaijaakat, müshiijeseʼe eein na wayuu asakitkana sünain tia. ¿Kapüleesüche maʼin süpüla watüjaain saaʼu anale nümüin Maleiwa tü akamüjaakat? Nnojotsü kapüleein tia.

Nümaʼanajeejatü Maleiwa tü Wiwüliakat (2 Timoteo 3:16). Suluʼu tü Wiwüliakat nüküjüin wamüin Maleiwa watta saalin pütchi sünainpünaaka tü waaʼinrajatkat süpüla nnojoluin ayuulin waya. Wekirajaa palajana sünain tü alatakat namüin na akaijüliikana otta jarat tü pütchi suluʼujeejatkat tü Wiwüliakat aashajaaka süchiki tia.

Ayuuisü jee ouktüsü wayuu sutuma akaijaa. Ouktüsü maʼin wayuu chaa Estados Unidos sutuma tü akaijaakat. Saashin Instituto Nacional sobre el Abuso de Drogas, kojuyaleeshii maʼin na wayuu ouktakana juyawai sutuma akaijaa noulialeʼeya na ouktakana sutuma asaa yootshi, sutuma kokaiina, na oʼutünakana aaʼin, na oʼuniraakana aaʼin, na pasiruwaakana sutuma neʼejena otta na ouktakana sutuma sida.

Ayuuisü wayuu sutuma tü sümüsainkat. Mojusü asanalaa sümüsain tü akaijuushikat, jaʼitainna wattaluʼuin waya suulia, mojusia neʼe shia wamüin. Jaʼitaichi nnojoluin nükaijülin wanee wayuu, eesü süpüla kanserüin nüsoso otta ayuulin tü naaʼinkat sutuma sümüsain nainma na akaijüliikana. Naashin na tottootkana eeʼiyalaasü maʼin waneeirua kasa mojusü eeka sutuma sümüsain tü akaijuushikat. Ayuuisü wayuu sutuma tü seejuu apütaakat sünain kuluulu, einasee, sutuʼupünaa miichi otta yalasü kakalia sünain leeyatüin shia. Eeshii süpüla ayuulin jee ichein nekii na tepichi asanatkana sümüsain tü akaijuushikat.

Kiʼrasü wayuu sünain. Müshi achepchieekai naaʼin wanee wayuu sutuma tü nükaijainkat. Naashin na wayuu ekirajaakana sünain sukuwaʼipa tia, kapüleesü nümüin wanee wayuu nuuʼulaain suulia akaijaa sutuma kaʼakain shia wanee kasa kanüliaka nikotiina.

¿Jarat tü pütchi suluʼujeejatkat tü Wiwüliakat sünainpünaakat tia? Wekiraja sünain waneeirua sukuwaʼipa:

Kojutü wamüin katüin woʼu nutuma Maleiwa. Naashin Maleiwa keeʼireere naaʼin na Israeliitakana aneein naya noʼuluʼu, kojutüinjatü namüin katüin noʼu nutuma (Deuteronomio 5:17). Na Israeliitakana namaiwa, nakumajüin tü nepiakat sünain müin aka saaʼin wanee piiso süraloʼu, eere yootopuʼuin naya, nekaain otta naainjüin waneeirua kasa, makalaka kasepüinjatüin shia natuma suulia sujutuuin wayuu saaʼujee (Deuteronomio 22:8). Otta jülüjüinjatü naaʼin na Israeliitakana tü namüʼlüinkat suulia keewain shia wayuu (Éxodo 21:28, 29). Nnojoishii oonooin na wayuu akaijüliikana sümaa pütchikat tüüirua, mayaapejeʼe natüjaain saaʼu eein süpüla ayuulin naya sutuma otta ayuulin na wayuu asanatkana sümüsain tü nainmakat.

Alinjachi wapüla Maleiwa otta na wayuukana. Nüküjüin Jesukürisüto noonooinjanain na nikirajüinkana sümaa tü piamasükat pütchi alanaʼaleeka maʼin: alinjachi Maleiwa napüla süka süpüshuaʼa naaʼin, jülüjüinjachi nia naaʼin waneepia otta alinjana napüla na wayuukana napüshuaʼa maʼaka alin naya napülajiraa (Marcos 12:28-31). Nia Maleiwa kataka atuma woʼu. Na wayuu akaijüliikana neeʼiyatüin mojutüin namüin tü kataakalü oʼu otta maalin Maleiwa napüla (Aluwataaushikana 17:26-28). Süka ayuulin wayuu sutuma tü sümüsainkat nainma na akamüjüliikana, neeʼiyatüin maaliin napüla na waneeinnua mayaainjeʼe alin naya napüla naashin.

Nnojotsü nücheküin Maleiwa kiʼrain waya sünain wanee kasa mojusü. Müsü tü Wiwüliakat namüin na anoujüshiikana: «Anakaja wooʼulaale suulia tü yarüttakat atüma waaʼin, tü mojukat atüma wakuaippa» (2 Corinto 7:1). Shiimain sünain yarüttüin nakuwaʼipa na wayuu akaijüliikana. Na wayuu ooʼulaweekana suulia tü akaijaakat süpüla naʼyataain nümüin Maleiwa, kapüleejeerü maʼin namüin nooʼulaain shia. Akanasaʼa nükaaliinjeenain naya Maleiwa süpüla nooʼulaain suulia akaijaa.