¿Anoujüshiiche nünain Jesuu na aküjüliikana pütchi nüchiki Jeʼwaa?

ANOUJÜINJANA WAYA NÜNAIN JESUU

Antoonio: ¿Anayaashijeʼe pia Luii?

Luii: Aniʼiya, anashi.

Antoonio: Anuu talüʼüjüin pümüin tü rewiisütakat Aapiria Wayuu sümaa ¡Despertad! Aainjünaka jekenainka. Aneerü maʼin pümüin aashajeʼeraa tü pütchi yalakat suluʼu.

Luii: Anashi süka müin taya putuma. Waʼle, eesüleʼe wanee kasa tasakireeka anain pia.

Antoonio: Ajaa.

Luii: Yootushinka taya nümaa wanee wayuu aʼyataakai tamaa, shiasaʼa taküjaka nümüin anashaatain maʼin tü kasa ashajünakat suluʼu tü rewiisüta jaapawaikat tamüin. Shiasaʼa nümaka tamüin nnojoluin anain taashajeʼerüin tia rewiisütakalüirua süka nnojoliin junoujüin nünain Jesuu. «Tasakireechi nia teʼrapa nüchikuaʼa» tamaka nümüin. Waʼle, ¿shiimain nnojoliin junoujüin nünain Jesuu?

Antoonio: Anashijaʼa süka paapirüin taya süchiki tia. Pansaaleejeeria tatuma süka nnojolin niain aküjüin pümüin wanee wayuu yalejeechiki.

Luii: Shiimainsaʼaya.

Antoonio: Wayakana aküjüliikana pütchi nüchiki Jeʼwaa, anoujüshii waya nünain Jesuu. Jamüshiijaʼa nnojoliire wanoujüin nünain, nnojoleena waya oʼttaain.

Luii: Shiajaʼa tamaka. «¿Shiimainchejeʼe eera?» müshijaʼa taya sutuma müitpain nünüiki chia wayuukai. Nnojotsü jamüinjatüin tanüiki nümüin sutuma nnojolin tatüjaain saaʼu. Piʼrüinche nnojoluin waashajaain süchiki tia...

Antoonio: Shiimainpajaʼa tü pümakat. Taleejeein pümüin waneeirua wetsiikulo suluʼujee tü Wiwüliakat aküjaka jamüin choʼujaaka anoujaa nünain Jesuu. Waashajeʼerawalin waneepia tia wetsiikulokalüirua namüin na wayuu waküjakana amüin pütchi.

Luii: Anakajaʼa.

Antoonio: Waleeja palajana tü nümakat Jesuu nümüin wanee aluwataaushi. Tia nümakat, yaasü suluʼu Juan 14:6: «Tayakai, taya chi süntajachikai akajee wayuu nünainmüin Maleiwa, süka tayain eeʼiyatüin sümüin tü shiimüinkat nüchikikat Maleiwa süpüla shiiʼiranajaainjatüin saaʼin tatüma süpüla eeinjatüin nümaa waneepia. Chi eʼraajirakai Maleiwa, taya tayakai tamüiwa». ¿Jarai chi warütkaakai akajee nünainmüin Maleiwa, saashin wetsiikulokot tüü?

Luii: Nia Jesuu.

Antoonio: Ajüüsa paajüin. Shiaʼaya maʼin tü wanoujakalü anain wayakana tia. Waʼle, ¿jaraika süntajachin akajee wayuu nünainmüin Maleiwa suʼuraajapa saashin tü Wiwüliakat?

Luii: ¿Nnojoishi niain Jesuu?

Antoonio: Niaʼaya. Sutuma tia «paapaja tanüiki saaʼu nünülia Jesuu» maʼwaishi taya nümüin Maleiwa sajaʼttiamüin tanüiki sünain oʼuraajaa nümüin. Maʼleesia natuma napüshuaʼa na aküjüliikana pütchi nüchiki Jeʼwaa.

Luii: Müsülan sukuwaʼipa.

Antoonio: Waleeja jooluʼu tü pütchi suluʼukat Juan 3:16 (NM). Wetsiikulokot tüü, süküjüin kasapülajachin nüntüin Jesuu yaa mmapaʼamüin. Eeshii eekai pütchichon nüchikimaajatü Jesuu namüin sümüin tia wetsiikulokot. Paashajeʼera maa tü pütchikat.

Luii: Anakajaʼa. «Süka alin maʼin nüpüla Maleiwa na wayuukana, naapüin chi waneeshikai Nüchon süpüla nnojoliinjanain ouktüin na eʼitaakana naaʼin nünain otta süpüla katüinjatüin noʼu waneepia».

Antoonio: Ajaa. ¿Paashajeʼerapuʼuin pütchikat tüü sümaiwa paala?

Luii: Taapapuʼuin neʼe suluʼu tü iküleesia kaluʼukat taya.

Antoonio: Wainma wayuu atüjaaka saaʼu pütchikat tüü. Anashii wekirajaale sünain. Naashin Jesuu, süka alin wayuu nüpüla Maleiwa katüinjatü noʼu waneepia nutuma. ¿Kasakaʼa waaʼinrüinjatüin süpüla müinjatüin wakuwaʼipa nutuma Maleiwa?

Luii: Anoujüinjana waya.

Antoonio: Müsian. Anoujüinjana waya nünain Jesuu, chi waneeshikai Nüchoin Maleiwa. Tia shia aküjünaka suluʼu tü rewiisütakat Aapiria Wayuu taapaka pümüin, suluʼusü süpana 2. Aküjünüsü sünain tia pütchikat «nunoujünüinjachin anain Jesuu, chi Aluwataakai suluʼu Nuluwataaya Maleiwa, chi ouktakai süpüla katüinjatüin woʼu waneepia».

Luii: Shiaʼaya tia. Anuʼusa shia ashajünüin sünain tü karalouktakat. Shiimain junoujüin nünain Jesuu.

Antoonio: Müsüsaʼaya.

Luii: ¿Jamakaʼa «nnojoishii anoujüin naya nünain Jesuu» sümaka wayuu jüchiki?

Antoonio: Wainma kasa kaluʼujeekat tia. Eeshii eekai noonooin sümaa sünüiki wayuu yalapünaa. Jee eeshii eekai nekirajünüin sünain tia suluʼu tü iküleesia kaluʼukat naya.

Luii: ¿Shiataaka sutuma nnojoliin aküjülii pütchi nüchiki Jesuu jümünüin?

Antoonio: Eesüjaʼa süpüla shiain tia.

Luii: Waʼle, ¿jamakaʼa niaka jikirajüin maʼin achiki Jeʼwaa?

«TAKÜJÜITPA NAMÜIN KASAICHIN PÜNÜLIA»

Antoonio: Jeʼwaa, shia tü nünüliakat Maleiwa. Otta choʼujaasü waküjüinjatüin shia sümüin wayuu. Jaʼitakajeʼe Jesuu nüküjüin süchiki nünülia Maleiwa. Anuu wanee nünüiki Jesuu sünain oʼuraajaa nümüin Maleiwa, yaasü suluʼu Juan 17:⁠26 (NM). Paashajeʼera maa waʼle.

Luii: Anakajaʼa. «Taküjüitpa namüin kasaichin pünülia otta ayateechi taya sünain taküjüin shia namüin süpüla aijiraainjanain naya napüla maʼaka alin taya püpüla jee süpüla saʼaniraain takuwaʼipa namaa.»

Antoonio: Ajaa. Naashin Jesuu, nüküjüin kasaichin nünülia Maleiwa. ¿Jamüsüche nüküjaka sümüin wayuu kasaichin nünülia Maleiwa?

Luii: Jamüin paajüin.

Antoonio: Anashii waleejüle wanee wetsiikuloʼoya aküjaka jamüin naainjaka Jesuu tia. Shia tü karalouktakat Aluwataaushikana 2:21 (NM). Müsü mayaa: «Oʼtteʼenneena napüshuaʼa na wayuu achuntakana nünülia Jeʼwaa». Anuu aküjünüin choʼujaain wachuntüinjatüin nünülia Maleiwa süpüla woʼtteʼennüin. Nütüjaa aaʼu Jesuu tia.

Luii: Nütüjaa aaʼulujaʼa.

Antoonio: Müsüjeseʼe choʼujaashaatain natüjaain saaʼu na nikirajüinkana Jesuu jaralin tü nünüliakat Maleiwa sümaa nachuntüin shia. Süka jamüin, choʼujaain tia süpüla noʼtteʼennüinjanain. Sutuma tia waküjüin sümüin wayuu tü nünüliakat Maleiwa. Keeʼireesü waaʼin niʼnnaajünüin sümaa süchuntünüin nünülia.

Luii: Sütüjaapejeʼe aaʼu wayuu tü nukuwaʼipakat Maleiwa, jaʼitairü nnojoluin sütüjaain aaʼu kasaichin nünülia sümaa nnojoluin suchuntüin shia.

Antoonio: Eesüjaʼa süpüla müin shia. Nüküjapejeʼe Maleiwa tü nünüliakat wamüin süpüla mapüleeinjatüin wamüin arütkawaa nünainmüin.

Luii: ¿Suluʼu jamüin shia? Nnojotkai tayaawatakai saaʼu pünüiki.

Antoonio: Ajaa, anuu sukuwaʼipa. Watta naalii wayuu atüjaaka naaʼu chi wayuu alatakai pasanainpünaa sünain tü palaa ishosükat otta ashajünüsü nümüin sünain wanee ipa tü Poloosükat Pütchi. Iraata joo chi akumajakai wanee anua miyoʼushaata süpüla suʼttaainjatüin nüpüshi otta tü mürütkalüirua. Jee müshia eeshi wanee wayuu antakai sirumatuʼujee süpüla naapajiraain nikii saaʼu wayuu. Nnojorüle watüjaain saaʼu nanülia naya wayuukana, nnojoleena waya jamajüin ¿aashimüin?

Luii: Shiimainsaʼaya tü pümakat.

Antoonio: Nüchajaapejeʼe sukuwaʼipa Maleiwa süpüla watüjaainjatüin saaʼu tü nünüliakat Moisés, Noé otta Jesuu. Sutuma nüküjüin kasaichin nanülia naya wayuukana, watüjaa aaʼu eepuʼuin naya namaiwa.

Luii: Üümm, müsüla sukuwaʼipa.

Antoonio: Wayakana aküjüliikana pütchi waküjüin nünülia Jeʼwaa süpüla neʼitaainjatüin naaʼin na wayuukana nünain Jeʼwaa, süpüla natüjaain saaʼu eein nia otta aleewain naya nümaa. Otta taasia watüjaa aaʼu choʼujaain weʼitaainjatüin waaʼin nünain Jesuu süpüla woʼttaainjanain. Anuu teeʼiyatüinjatü pümüin wanee wetsiikulo aküjaka shiimain tia.

Luii: Ajaa, piiʼiyata maa tamüin.

Antoonio: Soto paaʼin nümüin Jesuu suluʼu Juan 14:​6: «Tayakai, taya chi süntajachikai akajee wayuu nünainmüin Maleiwa, süka tayain eeʼiyatüin sümüin tü shiimüinkat nüchikikat Maleiwa süpüla shiiʼiranajaainjatüin saaʼin tatüma süpüla eeinjatüin nümaa waneepia». Tü waleejüinjatkat jooluʼu shia Juan 14:⁠1 yala sajaʼttiamüin. Paashajeʼera maa waʼle.

Luii: Müsü mayaa: «Anakaja ayatüle jia sünain jünoujain nünain Maleiwa maaʼaya aka tanaʼinya».

Antoonio: Ajaa. ¿Jaraika wanoujüinjachin anain, Jeʼwaa jee niataapa Jesuu?

Luii: Naashin Jesuu, anoujüinjana waya nünain Maleiwa otta nünain niakai.

Antoonio: Shiaʼaya tia, pansaasü pünüiki. ¿Aashin waaʼinrüinjatüin wanee kasa süpüla shiyaawatüinüinjatüin aaʼu tü wanoujakalü anain?

Luii: Müsüsaʼaya.

Antoonio: Waʼle, seechi taya tachikuaʼa süpüla yootuin waya süchiki tia.a

Luii: Ajaa, anakajaʼa.