¿Sajaʼtteetche wayuu tü atkawaakat otta tü kasachikikat?

Wainma tü kasa natkaajiraakalü achiirua na wayuukana. Eesüjaʼa shiale shiiʼiree neeʼiratünüin na süʼlaülashiikana mma, süpüla nnojoluin kojutuin kasa süpüshuaʼa jee shiale shiiʼiree anainjatüin sukuwaʼipa wayuu. Eeshii na atkaajiraakana süchiirua saapünüin namüin wanee mma jee shiale süwashirüin tia mmakat jee akooʼomüinraasü tü atkawaakat sutuma naatain sukuwaʼipapala wayuu jee tü nanoujakalü anain. ¿Kasa aainjünaka maaʼulu yaa shiiʼiree anajiraainjatüin wayuu süchikuaʼa? ¿Nounteetche anajiraainjatüin wayuu natuma?

Nayaakua waneinnua wayuu akumajakana wanee edificio. Yootushii naya. Achatajaasü tü ayaakuaakat.

NACHAJAAIN SUKUWAʼIPA SÜPÜLA NNOJOLUIN KOJUTUIN MAʼIN TÜ KASAKALÜIRUA

Tü keeʼireekat naaʼin: Nnojoluinjatüin maʼletsein wayuu, jama shiain tü nneetkat sütkaajiraaka maʼin achiirua wayuu.

Tü ataʼülakat sukuwaʼipa: Nnojoishii paaʼinwajiraain na süʼlaülashiikana mma sünain tü nakataajüinjatkat anain tü nneetkat. Jamüsüjaʼa soʼu juyakat 2022 nakataajüin 34.100 miyoone dólares süpüla eeinjatüin anajirawaa. Wainmaleepejeʼe nakataajaka süpüla nayaʼlajüin naʼapüla na surulaatkana.

«Wainma nneerü wakataajaka sünain wanee atkawaa suulialeʼeya tü wakataajaka süpüla eeinjatüin anajirawaa» (António Guterres, secretario general de las Naciones Unidas).

Tü sümakat tü Bibliakat: Mayaainjeʼe nachajaain sukuwaʼipa na süʼlaülashiikana mma süpüla nakaalinjain na maʼletsekana isasü nachiki najaʼttirüin tü maʼletseekat (Deuteronomio 15:11; Mateo 26:11).

Nayaakua najapü piamashii wayuu süchikijee napansaajüin nanüiki. Achatajaasü tü ayaakuaakat.

NACHAJAAIN SUKUWAʼIPA SÜPÜLA EEINJATÜIN ANAJIRAWAA

Tü keeʼireekat naaʼin: Yootiraashii naya süchiirua tü aainjünajatkat süpüla sukumajüin sukuwaʼipa wanee kasa shiiʼiree paaʼinwain naya jee nnojoluinjatüin eein atkawaa.

Tü ataʼülakat sukuwaʼipa: Eeshiijaʼa eere na nnojoliikana anain amüin anajiraain naya jee eesüjaʼa nnojorüle nekeraajüin nanüiki süchiki tü aainjünajatkat süpüla anajiraain naya.

«Mayaainjeʼe yootojiraain maʼin na wayuukana süchiirua sukumajünüin sukuwaʼipa wanee kasa eeshiijaʼa nnojoliire paaʼinwajiraain naya. Shiasaʼa mapa shia eeka atkawaa sutuma tü kasa naneekakat, jama nnojoluin anain maʼin shia» (Raymond Smith, American Diplomacy).

Tü sümakat tü Bibliakat: «Püchajaa anajirawaa» (Salmo 34:14). Anuu nakuwaʼipa na wayuukana saashin tü Bibliakat: Nnojoishii «naya waneepiain namaa na waneinnua», nnojotsü «anashiin namüin anajiraain naya» jee naainjain «kasa mojusü namüin naʼaleewainyuu» (2 Timoteo 3:1-4). Sutuma tia isasü nachiki na süʼlaülashiikana mma eein anajirawaa natuma mayaainjeʼe nachajaain sukuwaʼipa tia.

Shiyaakua wanee aʼapüla ashatünaka. Achatajaasü tü ayaakuaakat.

NACHAJAAIN SUKUWAʼIPA SÜPÜLA NNOJOLUINJATÜIN WAINMAIN NAʼAPÜLA

Tü keeʼireekat naaʼin: Najaʼttireein naʼapüla jee shiale paliʼireein shia maʼaka saaʼin tü bomba outaka atuma watta saalii wayuu.

Tü ataʼülakat sukuwaʼipa: Eesü nnojorüle anain namüin na süʼlaülashiikana mma najaʼttirüin naʼapüla, jama mojuteenain naya amüinñü saaʼin namüin otta mmoluin naya seema sushutunuin saaʼu noumain. Mayaainjeʼe najaʼttirüin na süʼlaülashiikana mma naʼapüla natkaayakat nnojoleerü anajiraain wayuu sutuma, jama ayatüin ichein naya süchiirua tü natkaajiraakat aaʼujee.

Mayaainjeʼe naapüin nanüiki na süʼlaülashiikana mma sünain najaʼttirüinjatüin naʼapüla soʼu tü juyakat 1991 nnojotsü nekeraajüin nanüiki. Apansaajünüsü wanee pütchi suulia jamajüinjatüin wayuu atumawaa suulia eeinjatüin atkawaa jee shiiʼiree anajiraainjatüin wayuu mapeena (Asegurar nuestro futuro común: una agenda para el desarme).

Tü sümakat tü Bibliakat: «Tü chajaruuta natkaayakat, shiʼicheerü tü naawajiakat mma». Tü süküjeekat achiki tü Bibliakat yala shia nnojoluin anain kaʼapülain wayuu (Isaías 2:4). Nunouteerüinjatpejeʼe wanee wayuu tü suluʼukat naaʼin, jama sukumajüin suluʼu naaʼin kasa eeka mojuin (Mateo 15:19).

Nayaakua waneinnua süʼlaülashiikana mma, jutkatiraashii naya. Achatajaasü tü ayaakuaakat.

PAAʼINWASHII WANEINNUA SÜʼLAÜLASHII MAA EEJAʼALA SÜMÜLE WANEE ATKAWAA

Tü keeʼireekat naaʼin: Maʼaka sushutunule saaʼu wanee mma eeshii na akaalinjakana naya. Naaʼinruʼu na süʼlaülashiikana mma, paaʼinwale naya nnojoleena ashutuin naʼünüü saaʼu noumain saaʼujee mmoluin naya neema.

Tü ataʼülakat sukuwaʼipa: Nnojoleerü anajirawaa sutuma paaʼinwain waneinnua süʼlaülashii mma eejaʼala sümüle wanee atkawaa. Eesüjaʼa nnojorüle nekeraajüin nanüiki na süʼlaülashiikana mma jee eeshii nnojoliire paaʼinwain naya sünain tü naaʼinrajatkat eejaʼala sümüle wanee atkawaa.

«Mayaainjeʼe shiain naashajaain maʼin achiki na süʼlaülashiikana mma paaʼinwainjanain naya sünain Pacto de la Sociedad de Naciones jee süshajünüin shia suluʼu Carta de las Naciones Unidas nnojotsü nekeraajüin na süʼlaülashiikana mma tü namakat» (Encyclopedia Britannica).

Tü sümakat tü Bibliakat: Mayaainjeʼe paaʼinwain na süʼlaülashiikana mma jee paaʼinwain na wayuukana isasü nachiki eeinjatüin anajirawaa natuma saaʼu tü mmakat (Eclesiastés 4:12). «Nnojo punoujain tü namakat na aluwataaliikana otta nnojo punoujain sünain tü sümakat wayuu süka isain nachiki oʼtteʼeraa wayuu. Yüüʼülaa müsü naaʼin. Mmashi nüchikuaʼa; nnojoluitpa kasain jülüjain naaʼin» (Salmo 146:3, 4).

Mayaainjeʼe süchajaain sukuwaʼipa wayuu süpüla eeinjatüin anajirawaa ayatüsia eein atkawaa sainküin mmakat.