Eesü süpüla jimatüin waaʼin soʼunnaa wanee atkawaa
Anuu nünüiki wanee wayuu surulaatpuʼukai, Gary nünülia: «Nnojoliiwaʼaya tekirajaain sünain tü Bibliakat tasakireʼerapuʼuin taaʼin sünain jamüin joutka maʼin tü kasachikikat jee jamüin mojulaaka maʼin wayuu. Anapejeʼe taaʼin maaʼulu yaa süka tatüjaain saaʼu aneerüin sukuwaʼipa tü mmapaʼakat nutuma Jehová otta aneena waya nutuma».
Anasü naaʼin watta naalii wayuu sutuma tü sümakat tü Bibliakat maʼaka naaʼin Gary.
TÜ SÜMAKAT TÜ BIBLIAKAT: «Anamia maʼin pia Jehová jee motusü paaʼin naainjala wanee wayuu» (Salmo 86:5).
¿JAMÜSÜ WAAʼIN SUTUMA?: «Jimatüsü taaʼin jama tatüjaain saaʼu anamia maʼin Jehová jee motusü naaʼin tü taainjapuʼukat soʼunnaa tü atkawaakat» (Wilmar, Colombia).
TÜ SÜMAKAT TÜ BIBLIAKAT: «Eeinjatü tatuma wanee sirumatuʼu jeketü jee müsia wanee mma jeketü. Nnojoleerü sotuin jaaʼin tü kasa alatüitpakat» (Isaías 65:17).
¿JAMÜSÜ WAAʼIN SUTUMA?: «Shapaakuʼu müsü taaʼin otta mojusü taaʼin, jama tekiiruʼuin waneepia tü teʼrakat wanaa sümaa surulaalüin taya. Tatüjaa aaʼu sutuma wetsiikulokot tüü nnojoleerü jülüjain taaʼin piantua tü alatakat tamüin. Nüsünneʼereerü tia Jehová suluʼujee tekii» (Zafirah, Estados Unidos).
TÜ SÜMAKAT TÜ BIBLIAKAT: «Soʼu tü nükaliakat, wainmeena na lotokana akuwaʼipaa otta eejeerü jimataa aaʼin waneepia maʼaka eein waneepia chi kashikai» (Salmo 72:7).
¿JAMÜSÜ WAAʼIN SUTUMA?: «Jülüjasü taaʼin waneepia tia pütchikat. Nnojoleerü müliain saaʼin wayuu sutuma tü atkawaakat jee nnojoleerü mmotkuʼu müin saaʼin wayuu seema sülatajatüin kasa mojusü namüin na napüshikana» (Olexandra, Ucrania).
TÜ SÜMAKAT TÜ BIBLIAKAT: «Kateerü noʼu nachikuaʼa na püpüshi anaajaakana [...]. Jüchijiraa jee juʼwaata sümaa talatüin jaaʼin jiakana sümamülakana mma» (Isaías 26:19).
¿JAMÜSÜ WAAʼIN SUTUMA?: «Wanaa sümaa noʼutunuin aaʼin na wayuu kanüliakana tutsis, ajaʼttüsü tapüshi. Palitchon neʼe na apütakana. Sutuma tia wetsiikulokot tatüjaa aaʼulu asoʼiraajeerü naaʼin na tapüshi outuinnapakana jee teʼreena naya nachikuaʼa. Taapajee amüin nanüiki nasoʼiraapeena aaʼin» (Marie, Ruanda).
TÜ SÜMAKAT TÜ BIBLIAKAT: «Soʼu palitchon kaʼi nnojoleechi eein chi mojulaashikai [...]. Akanasaʼa na wayuu anamiakana namüinjeerü tü mmakat otta shiimain talateenain naya süka aneerüin nakuwaʼipa» (Salmo 37:10, 11).
¿JAMÜSÜ WAAʼIN SUTUMA?: «Nnojoluitpa atkawaa yaʼayaa. Ayatapejeʼe eein wayuu mojulaain. Akatchinraapejeʼe taaʼin sutuma tatüjaain saaʼu niʼrüin Jehová süpüshuaʼa tü alatakat tamüin jee nüküjain tamüin najaʼttireerü süpüshuaʼa tü müliakalü atuma taaʼin jee nnojoleerü sotuin taaʼin tia piantua» (Daler, Tajikistán).
Na wayuu ashajünakana achiki suluʼu rewiisütakat tüü, noʼutkushii naya na aküjaliikana pütchi nüchiki Jehová anakana aaʼin sutuma tü sümakat tü Bibliakat. Ooʼulaashii naya suulia nalerajüin wayuu jee wanaawasü wayuu süpüshuaʼa namüin maaʼulu (Éfeso 4:31, 32). Na aküjaliikana pütchi nüchiki Jehová nnojoishii naya sünainpünaain política jee atkawaa (Juan 18:36).
Paaʼinwajiraashii na Aküjaliikana pütchi otta akaalinjiraashii naya, jama pawalaawajiraain naya (Juan 13:35). Jamüsüjaʼa Olexandra, tü achuntunakat anülia paala aʼluwataasü shia suumainpaʼajee sümaa tü suwalakat sutuma tü atkawaa eejatkat chayaa. Anuu tü sümakat: «Wantapa suluʼumüin tü wane mma naʼatapajüin waya na aküjaliikana pütchi nüchiki Jehová. Sutuma nakaalinjain maʼin waya mapüleesat wamüin wekiʼralaain suluʼu tia mmakat».
Anashii puutkajaale namaa na aküjaliikana pütchi nüchiki Jehová süpüla pikirajaain sooʼomüin süchiki tü paaʼinrajatkat süpüla jimatüin paaʼin maaʼulu yaa otta süchiki tü jimataa aaʼin eeinjatkat mapeena sainküin mmakat ashajünaka achiki suluʼu tü Bibliakat. Püchajaa suluʼu jw.org eere noutkajaain na Aküjaliikana pütchi pejeka pünain jee puchunta ekirajawaa sünain tü Bibliakat. Nikirajeechika pia wanee aküjai pütchi nüchiki Jehová sükajee tü karaloʼutakat Anainjatka atuma pukuwaʼipa waneepia.