1 Crónicas
17 David oiko riremi ipalásiope, heʼi proféta Natánpe:+ “Che ningo aiko peteĩ óga iporãvape, ojejapóvape sédrogui,+ péro Jehová Árka del Pákto katu oĩ óga kárpapente”.+ 2 Ha Natán heʼi Davídpe: “Ñandejára tee ningo oĩ nendive, upévare ikatu rejapo upe rejaposéva”.
3 Péro upe pyharépe voi Ñandejára heʼi Natánpe: 4 “Tereho che siérvo David rendápe ha ere chupe: ‘Jehová heʼika ndéve: “Ndahaʼemoʼãi hína nde upe ojapótava chéve che rogarã aiko hag̃ua pype.+ 5 Aguenohẽha día guive Israélpe Egíptogui che ndaikóiva peteĩ ógape, síno peteĩ óga kárpape ha pe tavernákulope, pyʼỹi ojeguerováva peteĩ lugárgui ótro hendápe.*+ 6 Upe tiémpo aha aja umi israelita ndive, che amoĩ vaʼekue umi hués de Israel, haʼekuéra oñangareko che puévlo Israel rehe umi pastorkuéra ojapoháicha. ‘¿Ha nde piko rehendúva che ajerure hague peteĩva umi huéspe ojapo hag̃ua chéve che rogarã sédrogui?’”’.
7 Ha koʼág̃a ere che siérvo Davídpe: ‘Jehová, umi ehérsito yvagapegua ruvicha heʼika ndéve: “Nde reiko kuri reñangareko umi ovecháre umi pastotýpe, ha upégui che roiporavo regoverna hag̃ua che puévlo Israélpe.+ 8 Che aiméta nendive reho rehohápe,+ ha ahundíta enterove ne enemigokuérape ne renonderãgui.+ Che ambotuicháta nde réra, ha opárupi ko yvy ape ári ojekuaáta nde réra, ojekuaaháicha umi hénte iñimportánteva réra.+ 9 Che aiporavóta che puévlo Israélpe g̃uarã peteĩ lugár ipyenda porãva. Ha oikóta hikuái trankílo ha avave nomolestamoʼãi chupekuéra. Umi hénte aña ndaikatumoʼãvéima ojapo hesekuéra mbaʼeve ivaíva* yma ojapo haguéicha,+ 10 amoĩrõ guare umi hués che puévlo Israélpe.+ Che amoĩta nde poguýpe umi ne enemígope,+ ha haʼe avei ndéve: ‘Jehová omopuʼãta ndéve g̃uarã peteĩ rréino’.*
11 Ág̃a nde remano ha reñeñotỹ vove umi nde tuakuéra ypykuéndi, che ajapóta rréi ne familiarégui, peteĩva umi nde raʼýgui,+ ha amombaretéta igoviérno.+ 12 Haʼe hína pe omopuʼãtava peteĩ óga chéve g̃uarã,+ ha amombaretéta itróno pára siémpre.+ 13 Che haʼéta itúa ha haʼe katu haʼéta che raʼy.+ Che siémpre ahayhuetereíta*+ chupe ha ndajapomoʼãi hese ajapo haguéicha pe oĩ vaʼekuére nde mboyve.+ 14 Haʼe oguapýta che trónope opa ára g̃uarã,+ ha siémpre oĩta igoviérno ha ifamiliare ogovernáva”’”.+
15 Natán oho omombeʼupaite Davídpe koʼã mbaʼe ha entéro mbaʼe ohecháva ko visiónpe.
16 Upéi rréi David oho oguapy Jehová renondépe, ha heʼi: “Ñandejára Jehová, ¿máva piko che ha che família rejapo hag̃ua hetaite mbaʼe porã orerehehápe?+ 17 Ha ndahaʼéi voi upévante Ñandejára, koʼág̃a reprometéma che família ogovernataha heta tiémpore,+ ha nde che Jára Jehová remaña cherehe ku amereseramoguáicha chembotuichave umi ótrogui.* 18 ¿Mbaʼe piko la haʼevétava ndéve? Nde ningo chembotuichaitereíma, che ningo nde siérvo ha nde chekuaa porãiterei.+ 19 Jehová, nde rejapo koʼã mbaʼe iporãitéva nde siérvo rehehápe, pórke upéva la nde reipotáva ha la repromete vaʼekue ha reikuaauka ndepoderosoha.+ 20 Jehová, ndaipóri ningo Dios ndeichagua,+ umi ótro dios ndaikatúi oñekompara nderehe.+ Entéro mbaʼe rohendúva ndehegui ohechauka siertoha upéva. 21 Ko yvy ape ári ndaipóri ótra nasión ikatúva oñekompara nde puévlo Israel rehe.+ Ñandejára tee, nde resalva vaʼekue chupekuéra oiko hag̃ua chuguikuéra nde puévlo.+ Nde rejapo vaʼekue heta milágro tuichaitereíva ikatu hag̃uáicha opárupi ojekuaa nde réra.+ Nde remosẽ heta tetãme nde puévlo renonderãgui.+ Ko puévlope nde resalva Egíptogui. 22 Nde reiporavo Israélpe nde puevlorã opa ára g̃uarã,+ ha koʼág̃a Jehová, nde hína Israel Jára.+ 23 Jehová, che ningo nde siérvo, toñekumplíkena pe repromete vaʼekue chéve ha che famíliape opa ára g̃uarã, ha ejapo repromete hagueichaite.+ 24 Ñandejára, hiʼãite nde réra opyta pára siémpre* ha oñembotuicha+ opa árare. Péicha umi hénte heʼíta: ‘Jehová, umi ehérsito yvagapegua ruvicha, Israel Jára, haʼe hína Dios Israélpe g̃uarã’. Ha nde siérvo David família togoverna ha taimbareteve ohóvo ne renondépe.+ 25 Che Jára, nde ningo reikuaauka nde siérvope remopuʼãtaha chupe peteĩ rréino.* Upévare nde siérvo ndokyhyjéi oñemboʼe hag̃ua ndéve. 26 Jehová, nde hína Ñandejára tee ha nde repromete koʼã mbaʼe porã oñekumplítava nde siérvore. 27 Upévare, evendesína che rréino ikatu hag̃uáicha osegi ne renondépe pára siémpre. Pórke nde, Jehová, revendesíma ha resegíta revendesi che rréino pára siémpre”.