Éxodo
5 Upéi Moisés ha Aarón oho faraón rendápe ha heʼi chupe: “Péicha heʼi Jehová, Israel Jára: ‘Epoi che puévlogui ojapo hag̃ua chéve peteĩ fiésta cheadora hag̃ua pe desiértope’”. 2 Péro faraón heʼi chupe: “¿Máva piko aipo Jehová+ cheñeʼẽrendu hag̃ua chupe ha apoi hag̃ua umi israelítagui?+ Che ndaikuaaiete voi Jehovápe, ha ndapoimoʼãi avei umi israelítagui”.+ 3 Moisés ha Aarón katu heʼi faraónpe: “Umi hebreokuéra Jára ningo oñeʼẽ kuri orendive. Upévare rojerure ndéve permíso roviaha hag̃ua 3 día pe desiértope, ha upépe rojapóta sakrifísio ore Jára Jehovápe.+ Ndorojapóiramo upéicha haʼe ipochýta orendive, ha ikatu voi ogueru ore ári mbaʼasy térã ojevale ore enemigokuérare orejuka hag̃ua espádape”. 4 Pe rréi de Egipto heʼi chupekuéra: “Moisés ha Aarón, pejemína chéve ¿mbaʼére piko peẽ peiko pemboliga umi héntepe oheja hag̃ua itraváho? ¡Tapeho jey katu pembaʼapo!”.+ 5 Ha faraón heʼi avei: “Pemañamína mbaʼeichaitépa heta umi israelita ko lugárpe, ha peẽ katu peju pemboperdese chupekuéra itiémpo”.
6 Upe diaitépe faraón heʼi umi kapatás ha umi enkargádo israelítape: 7 “Anivéma pemeʼẽ kapiʼi* umi héntepe ojapo hag̃ua ladríllo.+ Haʼekueraite voi toheka ha tombyaty pe kapiʼi oikotevẽva. 8 Péro osegi vaʼerã ojapo hikuái la mísma kantida de ladríllo, aníke pejapoka chupekuéra saʼive. Pórke iñateʼỹguinte heʼi hikuái oikóvo: ‘Emeʼẽna oréve permíso. Rohose ningo rojapo sakrifísio ore Járape’. 9 Pejopyve hendivekuéra ha pemombaʼapo pohyive chupekuéra. Péicha ndahekoreimoʼãi ha ndoikomoʼãi ojapysaka umi japu ojeʼévare chupekuéra”.
10 Upévo umi kapatás+ ha umi enkargádo israelita heʼi umi héntepe: “Péicha heʼi faraón: ‘Noñemeʼẽmoʼãvéima peẽme kapiʼi pejapo hag̃ua ladríllo. 11 Peẽ voi peho vaʼerã peheka ha pembyaty pe kapiʼi peikotevẽtava. Péro pesegi vaʼerã pejapo la mísma kantida de ladríllo’”. 12 Upémarõ umi hénte isarambi oparupiete Egíptope, ha oho umi kokuére ombyaty hag̃ua umi kóga rakãngue ipirupámava oipuru hag̃ua kapiʼi rangue. 13 Ha umi kapatás ombyapura chupekuéra ha heʼi: “¡Dáleke, tapeho katu pembaʼapo! Káda día pekompleta vaʼerã pende traváho. Peprodusi vaʼerã la mísma kantida de ladríllo pe kapiʼi oñemeʼẽha tiémpope guaréicha peẽme”. 14 Upéi umi kapatás faraón omoĩ vaʼekue, oñepyrũ oinupã+ umi enkargadokuérape ha heʼi chupekuéra: “¿Mbaʼére ndapejapopái pe kantida de ladríllo ojeʼe vaʼekue peẽme? Kuehéma voi ndapejapopái ha koestedía upéichante avei”.
15 Upévare umi enkargádo israelita oho ojekeha faraónpe ha heʼi: “Ore ningo nde siérvo, ¿mbaʼére piko oretrata péicha? 16 Noñemeʼẽi ningo oréve la kapiʼi ha lomímonte rojapo vaʼerã la mísma kantida de ladríllo. Ha norokompletáirõ, umi nde kapatás orembyepoti ha heʼi oréve: ‘¡Pejapo katu la ladríllo!’. Ore ningo ndorofallái, nde siervokuéra hína la ofalláva”. 17 Péro faraón heʼi chupekuéra: “¡Peẽ ningo la penearagánva ha napembaʼaposéiva!+ Upévare la peje peikóvo: ‘Emeʼẽna oréve permíso. Rohose ningo rojapo sakrifísio Jehovápe’.+ 18 ¡Tapeho katu pembaʼapo! Noñemeʼẽmoʼãi peẽme kapiʼi, péro pesegi vaʼerã pejapo la mísma kantida de ladríllo ojeʼe haguéicha peẽme”.
19 Upépe umi enkargádo israelita ohechakuaa ivaiveha la isituasionkuéra, pórke ojapo vaʼerã hikuái la mísma kantida ladríllo káda día, ojapo haguéicha ymave. 20 Upéi ojotopa hikuái Moisés ha Aarón ndive. Haʼekuéra oñemboʼy hína kuri okápe ha ohaʼarõ umi enkargádope osẽ vove faraón rendágui oñeʼẽ hag̃ua hendivekuéra. 21 Umi enkargádo israelita heʼi chupekuéra: “Jehová tapendehusga la pejapo vaʼekuére, pórke pende káusare faraón ha isiervokuéra ndaijaʼevéi orerehe, ha koʼág̃a haʼete voi pemoĩva ipopekuéra peteĩ espáda orejukapa hag̃ua”.+ 22 Upépe Moisés heʼi Jehovápe: “Jehová, ¿mbaʼére piko péicha rembohasa asy ko puévlope? ¿Maʼerãiko chembou raʼe? 23 Aha ypy guive faraón rendápe haʼe hag̃ua chupe umi mbaʼe remanda vaʼekue,+ haʼe ojopyvéntema pe puévlope,+ ha nde nderejapói mbaʼeve resalva hag̃ua chupekuéra”.+