2 Reyes
15 Ha 27 áño ogoverna haguépe rréi de Israel Jeroboán,* Azaríasgui*+ oiko rréi, haʼe hína rréi Amasías+ de Judá raʼy.+ 2 Azarías oreko vaʼekue 16 áño oikórõ guare chugui rréi, ha ogoverna 52 áñore Jerusalénpe. Isy héra vaʼekue Jecolías Jerusalengua. 3 Ha Azarías ojapo vaʼekue iporãva Jehová renondépe, ojapo haguéicha itúa Amasías.+ 4 Péro ndoipeʼapái umi lugár yvate,+ ha pe puévlo osegi ojapo sakrifísio ha omotimbo umi sakrifísio umi lugár ijyvatehápe.+ 5 Upéi Jehová ombohasy pe rréipe ha ojagarra chupe lépra,+ ha opyta upéicha omanoha día peve. Haʼe oiko vaʼekue peteĩ óga apártepe,+ ha upe aja Jotán,+ pe rréi raʼy, oñenkarga pe palásiore ha ohusga umi hetãyguápe.+ 6 Azarías istória+ oñemoĩmbaite pe lívro ojeskrivihápe umi mbaʼe oiko vaʼekue Judá rreikuéra tiémpope, upépe oñemombeʼu entéro mbaʼe ojapo vaʼekue. 7 Upéi Azarías omano+ ha oñeñotỹ chupe umi ituakuéra ypykuéndi pe Siuda de Davídpe, ha itaʼýra Jotángui oiko rréi hekovia.
8 Ha 38 áño ogoverna haguépe rréi Azarías+ de Judá, Zacaríasgui+ oiko rréi de Israel Samáriape ha ogoverna 6 mése aja. Zacarías hína Jeroboán raʼy. 9 Umi ituakuéra ypykue ojapo haguéicha haʼe ojapo meme ivaíva Jehová renondépe, ndohejái umi mbaʼe vai Nebat raʼy Jeroboán ojapo vaʼekue, haʼe ningo ojapoka Israélpe umi mbaʼe vai haʼe voi ojapo vaʼekue.+ 10 Upémarõ Salum haʼéva Jabés raʼy opuʼã Zacarías rehe ñemiháme ha oataka+ chupe Ibleámpe.+ Ha Salum ojuka rire chupe, oiko chugui rréi hekovia. 11 Zacarías istória oñemoĩmbaite pe lívro ojeskrivihápe umi mbaʼe oiko vaʼekue Israel rreikuéra tiémpope, upépe oñemombeʼu umi mbaʼe haʼe ojapo vaʼekue. 12 Péicha oñekumpli Jehová heʼika vaʼekue Jehúpe: “Ne familiare, pe cuarta henerasión+ peve, oguapýta Israel trónope”.+ Ha peichaite oiko vaʼekue.
13 Ha 39 áño ogoverna haguépe rréi Uzías*+ de Judá, oiko rréi Salúmgui ha ogoverna un mes aja entéro Samáriape. Salum hína Jabés raʼy. 14 Upéi Gadí raʼy Menahem osẽ Tirzágui+ ha oho Samáriape. Ha haʼe oataka Jabés raʼy Salúmpe+ Samáriape. Ojuka rire chupe, Menahem opyta rréiramo hekovia. 15 Salum istória oñemoĩmbaite pe lívro ojeskrivihápe umi mbaʼe oiko vaʼekue Israel rreikuéra tiémpope, upépe oñemombeʼu umi mbaʼe ojapo vaʼekue ha mbaʼéichapa haʼe opuʼã vaʼekue ñemiháme pe rréire. 16 Upérõ Menahem osẽ Tirzágui ha oho oataka Tifsá, umi oĩvape upépe ha avei iterritório kompletoite, pórke haʼekuéra ndoavríri kuri chupe pe siuda rokẽ. Menahem ohundi chupekuéra ha oavri enterovete umi kuña hyeguasúva rye.
17 Ha 39 áño ogoverna haguépe rréi Azarías de Judá, Menahémgui oiko rréi de Israel ha ogoverna 10 áñore Samáriape. Menahem hína Gadí raʼy. 18 Haʼe ojapo meme ivaíva Jehová renondépe, oikove aja entéro ndohejái umi mbaʼe vai Nebat raʼy Jeroboán ojapo vaʼekue, haʼe ningo ojapoka Israélpe umi mbaʼe vai haʼe voi ojapo vaʼekue.+ 19 Upéi pe rréi Pul+ de Asiria oike Israel territóriope, ha Menahem omeʼẽ chupe 34.200 kílo* de pláta oipytyvõ hag̃ua chupe, ikatu hag̃uáicha imbarete pe goviérno ipoguýpe.+ 20 Ha omeʼẽ hag̃ua pe pláta pe rréi de Asíriape, Menahem oovliga umi kuimbaʼe iñimportántevape ha ipláta hetávape oĩva Israélpe+ omeʼẽ hag̃ua káda uno 570 grámo* de pláta. Upémarõ pe rréi de Asiria oho jey ha ndoatakái chupekuéra. 21 Menahem istória+ oñemoĩmbaite pe lívro ojeskrivihápe umi mbaʼe oiko vaʼekue Israel rreikuéra tiémpope, upépe oñemombeʼu entéro mbaʼe ojapo vaʼekue. 22 Upéi Menahem omano ha itaʼýra Pecahíasgui oiko rréi hekovia.
23 Ha 50 áño ogoverna haguépe rréi Azarías de Judá, Pecahíasgui oiko rréi, ha 2 áñore ogoverna Israel Samaria guive. Pecahías hína Menahem raʼy. 24 Haʼe ojapo meme ivaíva Jehová renondépe, ndohejái umi mbaʼe vai Nebat raʼy Jeroboán ojapo vaʼekue, haʼe ningo ojapoka Israélpe umi mbaʼe vai haʼe voi ojapo vaʼekue.+ 25 Upéi iñajudánte Pécah,+ haʼéva Remalías raʼy, opuʼã ñemiháme Pecahías rehe ha oataka chupe Argob ha Arié ndive Samáriape, pe tórre oĩvape pe rréi palásiope. Pécah oreko vaʼekue hendive 50 kuimbaʼe Galaadgua, ha ojuka rire Pecahíaspe, oiko chugui rréi hekovia. 26 Pecahías istória oñemoĩmbaite pe lívro ojeskrivihápe umi mbaʼe oiko vaʼekue Israel rreikuéra tiémpope, upépe oñemombeʼu entéro mbaʼe ojapo vaʼekue.
27 Ha 52 áño ogoverna haguépe rréi Azarías de Judá, Pécahgui+ oiko rréi, ha 20 áñore ogoverna Israel Samaria guive. Pécah hína Remalías raʼy. 28 Haʼe ojapo meme ivaíva Jehová renondépe, ndohejái umi mbaʼe vai Nebat raʼy Jeroboán ojapo vaʼekue, haʼe ningo ojapoka Israélpe umi mbaʼe vai haʼe voi ojapo vaʼekue.+ 29 Ogoverna aja rréi Pécah de Israel, Tiglat-Piléser+ rréi de Asiria ou ha ojagarra umi siuda hérava Ijón, Abel-Bet-Maacá,+ Janóah, Quedes,+ Hazor, Galaad+ ha avei Galilea, upéva hína Neftalí+ território kompletoite. Haʼe ogueraha avei prisionéroramo umi héntepe Asíriape.+ 30 Upéi Hosea,+ Elá raʼy opuʼã ñemiháme Pécah kóntrape, oataka ha ojuka chupe. Pécah hína Remalías raʼy. Upéi haʼe opyta rréiramo hekovia, 20 áño ogoverna haguépe Uzías raʼy, Jotán.+ 31 Pécah istória oñemoĩmbaite pe lívro ojeskrivihápe umi mbaʼe oiko vaʼekue Israel rreikuéra tiémpope, upépe oñemombeʼu entéro mbaʼe ojapo vaʼekue.
32 Ha 2 áño ogoverna haguépe Pécah, haʼéva pe rréi de Israel Remalías raʼy, oiko rréi Jotángui,+ pe rréi Uzías+ de Judá raʼy. 33 Jotán oreko vaʼekue 25 áño oikórõ guare chugui rréi, ha ogoverna 16 áñore Jerusalénpe. Isy héra vaʼekue Jerusá, Sadoc rajy.+ 34 Ha Jotán ojapo meme iporãva Jehová renondépe, ojapo haguéicha itúa Uzías.+ 35 Péro ndojepeʼái umi lugár yvate, ha pe puévlo osegi ojapo sakrifísio ha omotimbo umi sakrifísio umi lugár ijyvatehápe.+ Jotán ojapo vaʼekue Jehová róga rokẽ ijyvatevéva.+ 36 Jotán istória oñemoĩmbaite pe lívro ojeskrivihápe umi mbaʼe oiko vaʼekue Judá rreikuéra tiémpope, upépe oñemombeʼu umi mbaʼe ojapo vaʼekue. 37 Upe tiémpope Jehová omondo Judá kóntrape Rezín rréi de Síriape, ha Pécahpe,+ Remalías raʼýpe.+ 38 Upéi Jotán omano ha oñeñotỹ chupe umi ituakuéra ypykuéndi pe Siuda de Davídpe, haʼe hína itúa ypykue. Ha itaʼýra Acázgui oiko rréi hekovia.