Jeremías
8 Jehová heʼi: “Upe tiémpope umi rréi de Judá kanguekue, umi prínsipe kanguekue, umi saserdóte kanguekue, umi proféta kanguekue ha umi oikóva Jerusalénpe kanguekue, oñeguenohẽmbáta umi sepultúragui. 2 Ha opytáta isarambipa ha ojopéta hesekuéra pe kuarahy, jasy ha opa mbaʼe oĩva yvágape, umívape haʼekuéra ohayhu, oservi, osegi, oheka ha oñesũ henondepekuéra.+ Noñembyatymoʼãi ni noñeñotỹmoʼãi umíva, opytáta isarambipa pe yvýre animál rekakáicha”.+
3 Jehová, umi ehérsito yvagapegua ruvicha heʼi: “Umi hembýva ko nasión añágui, omanoséta oikove rangue entéro umi lugár amosarambitahápe chupekuéra”.
4 “Ha ere vaʼerã chupekuéra: ‘Péicha heʼi Jehová:
“¿Upéicharõ piko hoʼáta hikuái ha nopuʼãmoʼãvéima?
Ha ojevýramo peteĩ, ¿ndojevymoʼãi piko avei pe ótro?
5 ¿Mbaʼére piko ko puévlo, umi hénte oikóva Jerusalénpe, osegi naiñeʼẽrendúi chéve?
Haʼekuéra ndopoiséi pe japúgui,
ndojevyséi hikuái che rendápe.+
6 Ajesareko ha apyta ajapysaka, péro naiporãi la heʼíva hikuái.
Ni peteĩ kuimbaʼe nombyasýi hembiapo vaikue, ha noñeporandúi: ‘¿Mbaʼéiko la ajapo vaʼekue?’.+
Káda uno ojevy ha osegi ojapo umi ótro ojapóvante, ojogua voi umi kavaju itarovaitévape oho hag̃ua gerrahápe.
7 Umi siguéña jepe oikuaa mbaʼe tiémpopepa oho vaʼerã ótro ládo,
pe tortóla, tuguái jetapa ha umi ótro guyra katuete ou jey itiempoitépe.
Péro che puévlo nontendéi mbaʼérepa Jehová oporohusga”’.+
8 ‘Mbaʼéicha piko peẽ pejéta: “Ore ningo orearandu, ha roreko Jehová léi”.*
Pórke umi lápi*+ oipurúva umi sekretário,* ojepuru ojeskrivi hag̃ua japu.
9 Umi iñarandúva oñemotĩta.+
Okyhyjetereíta ha ojejagarráta chupekuéra.
Haʼekuéra orrechasa Jehová ñeʼẽ,
¿mbaʼéicha piko upéicharõ iñarandúta hikuái?
10 Upévare ameʼẽta ótro kuimbaʼépe umi hembirekokuéra,
ijyvykuéra avei ameʼẽta ótrope,+
pórke pe itujáva ha imitãva jepe okonsegi heta ganánsia ombotavy rupi hapichápe,+
umi proféta ha saserdotekuéra entéro oporombotavy.+
11 Haʼekuéra omoñeñandu porãse guaʼu* che puévlope, upévare heʼi:
“¡Jaiko pyʼaguapýpe! ¡Jaiko pyʼaguapýpe!”,
péro añetehápe ndaipóri pyʼaguapy.+
12 ¿Ombyasýpa hikuái umi mbaʼe vai ojapo vaʼekue?
¡Nombyasyiete voi hikuái!
¡Ni ndoikuaái mbaʼéichapa oñembyasýta hikuái!+
Upévare hoʼáta hikuái umi hoʼáma vaʼekue apytépe.
Ág̃a che akastiga vove chupekuéra, oñepysangapáta hikuái’,+ heʼi Jehová.
13 ‘Ág̃a ambyaty vove chupekuéra, ahundíta’, heʼi Jehová,
‘ni peteĩ parrál ndopytamoʼãi pe parrál rakãre, ni peteĩ ígo ndopytamoʼãi pe ígo mátare, ha umi hoguekue ipirupáta.
Ha umi mbaʼe ameʼẽ vaʼekue chupekuéra, oñehundipaitéta’”.
14 “¿Mbaʼére piko jaguapy hína koʼápe?
Ñañembyatýna ha jaha jaike umi siuda imurallapávape+ ha ñamano upépe.
Pórke Ñandejára Jehová ñandejukapáta,
ha hoʼuka ñandéve y orekóva venéno,+
pórke japeka Jehová renondépe.
15 Ñande ningo ñahaʼarõ kuri og̃uahẽ pyʼaguapy, péro ndoúi mbaʼeve iporãva,
ñahaʼarõ kuri og̃uahẽ pe tiémpo jakuera hag̃ua, péro ipahápe tuichaiterei ñañemondýi.+
16 Dan guive oñehendúma ipytuhẽ oúvo umi ñane enemigokuéra kavaju,
oñehendu orrelincha oúvo umi ikavaju kohúdo,
pe yvy oryryipa.
Oike hikuái ha omoperõ pe país ha avei entéro mbaʼe oĩva pype,
umi isiuda ha umi oikóva pype”.
17 Jehová heʼi: “Amondóta mbói pende apytépe,
umi mbói iponsóñava avave ndaikatúiva odomina,
ha umíva pendesuʼúta”.
18 Che ningo añembyasy ha nachepohãi,
chekorasõ rasy.
19 Peteĩ yvy oĩvagui mombyry oĩ ojerure asýva ajúda,
upe guive che puévlo heʼi:
“¿Jehová piko noĩri hína Siónpe?
¿Ndaipóri piko upépe irréi?”.
“¿Mbaʼére piko peẽ chembopochy peipurúvo umi taʼanga,
ha umi dios extranhéro ndovaléiva mbaʼeverã?”.
20 “¡Ohasáma pe kosécha tiémpo, opáma la veráno,
péro avave nañandesalvái!”.
21 Ajepyʼapy ha añekevrantaiterei che puévlo rehe,+
chekangypaite.
Ha akyhyjeterei apytávo.
22 ¿Ndaipóri piko aséite perfumádo* Galaádpe?+
¿Ndaipóri piko médiko upépe?+
¿Mbaʼére piko noñemonguerái che puévlope?+