Jeremías
5 Pekorre Jerusalén kallekuérare.
Pemaña upérupi ha pejesareko porã,
peheka umi plásarupi pehecha hag̃ua,
ikatúpa petopa peteĩ kuimbaʼe ihústova,+
peteĩ iñeʼẽrenduséva,
ha che aperdonáta pe siuda.
2 Heʼíramo jepe hikuái: “¡Ahura Ñandejára Jehová oikovévare!”,
lomímonte ijapúta hikuái ohurávo.+
3 Jehová, ¿nde piko neremañái hína umi iñeʼẽrendúvare?+
Nde rekastiga kuri nde puévlope, péro ndoikéi hesekuéra mbaʼeve.*
Nde rehundi ijyvykuéra, péro lomímonte noaprendéi hikuái.+
4 Péro che haʼe chejupe: “Katuete oiméne koʼãva hénte tavy hína.
Haʼekuéra ningo vyrorei la ojapóva, pórke ndoikuaái Jehová rape,
pe Ijarakuéra léi.
5 Che aháta umi kuimbaʼe iñimportánteva rendápe ha añeʼẽta hendivekuéra,
pórke oiméne haʼekuéra oikuaa Jehová rape,
pe Ijarakuéra léi.+
Péro enterove haʼekuéra ojei Ñandejára júgo guýgui,
ha omondoho umi mbaʼe oñapytĩva chupekuéra”.
6 Upévare peteĩ león osẽ kaʼaguýgui ha oataka chupekuéra,
peteĩ lóvo oĩva umi desiértope osegi ojapo hesekuéra sarambi,
peteĩ leopárdo* oñeno ha opeska hína umi isiudakuéra ypýpe.
Ha haʼe odeskuartisa enterove umi osẽvape upégui.
Pórke umi ipekadokuéra hetaiterei,
ha ojapo hikuái hetaiterei mbaʼe vai naiñeʼẽrendúi rupi.+
7 ¿Mbaʼéicha piko roperdonáta ko mbaʼére?
Umi nde raʼykuéra cherejapa,
ha ohura hikuái umi mbaʼe ndahaʼéivare Dios.+
Che ameʼẽ kuri chupekuéra entéro mbaʼe oikotevẽva,
péro haʼekuéra osegi chemoakãratĩ,
ha oho hikuái éntre heta peteĩ kuña rekovai rógape.
8 Ojogua hikuái umi kavaju itarovaite ha iñakãraku vaívape,
káda uno orrelincha ohóvo tembireko ahéno rapykuéri.+
9 Jehová heʼi: “¿Che piko ndapokastigái vaʼerã koʼã mbaʼére?
¿Che* piko nañevengái vaʼerã peteĩ nasión peichaguávare?”.+
10 “Pearriva iparraltýpe ha pehundi,
péro ani pehundipaite.+
Peikytĩ umi hakã pyahu,
pórke ndahaʼéi Jehová mbaʼe.
11 Umi Israelgua ha Judagua ningo
tuichaiterei chetraisiona”, heʼi Jehová.+
12 “Haʼekuéra onega Jehovápe ha heʼi jey jey:
Ha mbaʼeve ivaíva ndoikomoʼãi ñanderehe,
ndajahechamoʼãi gérra ni ndaiporimoʼãi ñembyahýi’.+
13 Umi proféta oñeʼẽmba rei,
ha ndahaʼéi Ñandejára ñeʼẽ la heʼíva hikuái.
¡Haʼekuéra opa reíta opa reiháicha umi mbaʼe heʼi vaʼekue!”.
14 Upévare Jehová, umi ehérsito yvagapegua ruvicha, heʼi péicha:
“Koʼã kuimbaʼe heʼi rupi péicha,
koʼág̃a umi mbaʼe haʼéva ndéve haʼetéta tata osẽva nde jurúgui,+
ha ko puévlo hína pe jepeʼa,
ha péva ohapypaitéta chupekuéra”.+
15 Jehová heʼi: “Ápe aguerúta peteĩ nasión mombyrýgui pene kóntrape peẽ Israelgua.+
Peteĩ nasión oĩmava ymaite guive,
peteĩ nasión itujámava,
peteĩ nasión ndereikuaáiva mbaʼe idiómapepa oñeʼẽ,
ha nerentendéiva mbaʼépa la heʼíva.+
16 Haʼekuéra ningo gerréro memete,
ha iflécha ryrukuéra haʼete peteĩ sepultúra noñembotýiva.
17 Haʼekuéra hoʼupáta umi mbaʼe rekosecha vaʼekue ha umi hiʼupy.+
Ohundipáta umi nde raʼykuéra ha nde rajykuérape.
Ohundipáta umi nde ovecha ha vakakuéra.
Ohundipáta umi nde parralty ha igoty.
Ohundipáta espádape umi nde siuda imurallapáva rejeroviaha”.
18 Jehová heʼi: “Upe tiémpope jepe napohundimoʼãi kompletoite.+ 19 Ha ág̃a oporandu vove ndéve hikuái: ‘¿Mbaʼére piko Ñandejára Jehová ojapo orerehe entéro koʼã mbaʼe?’. Nde ere vaʼerã chupekuéra: ‘Peẽ peheja haguéicha Ñandejárape peservi hag̃ua peteĩ dios extranhérope pene retãme voi, péicha avei peẽ peservíta umi extranhérope peteĩ país ndahaʼéivape pene retã’”.+
20 Peje ko mbaʼe Jacob rogayguápe,
ha pemombeʼu Judápe, ha peje:
21 “Pehendu ko mbaʼe, peẽ hénte ivýrova ha iñembotavýva:*+
22 Jehová heʼi: ‘¿Peẽ piko ndapekyhyjéi chehegui?
Peẽ ningo peryrýi pesusũ vaʼerã che renondépe.
Che amoĩ kuri pe yvykuʼi ojoko hag̃ua pe mar,
ha péva hína peteĩ léi opytáva pára siémpre, upévare pe mar ndaikatúi ohasa upéva.
Umi oláda opuʼãramo jepe ndaikatúi ipuʼaka hese,
ipochýramo jepe pe mar ndaikatúi ovandea pe yvykuʼi.+
23 Péro ko puévlo korasõ ningo ikaprichóso ha irrevélde,
haʼekuéra chereja ha osegi pe tape ogustáva chupekuéra.+
24 Ha ndeʼíri hikuái ipyʼapýpe:
“Jakyhyje ha jarrespeta vaʼerã koʼág̃a Ñandejára Jehovápe,
upe omboúva ñandéve ama itiempoitépe,
pe ama oúva otóñope ha primavérape,
upe oñenkargáva jareko hag̃ua umi semána ñamonoʼõ hag̃ua ñane ñemitỹngue”.+
25 Umi mbaʼe vai pejapóva káusare ndouvéi koʼã mbaʼe,
pende pekádo káusare ndaiporivéi umi mbaʼe porã.+
26 Pórke che puévlo apytépe oĩ umi kuimbaʼe iñañáva.
Haʼekuéra oiko opeska ojapoháicha umi oitýva ñuhãme guyra.
Omoĩ hikuái umi trámpa oporojukáva.
Péro kuimbaʼépe la oity hikuái iñuhãme.
27 Umi háula henyhẽháicha guyrágui,
upéicha avei hogakuéra henyhẽ umi mbaʼe okonsegi vaʼekuégui oporombotavy rupi.+
Upévare haʼekuéra ipoderóso ha irrikoiterei.
28 Haʼekuéra ikyra ha hye pire overa asy,
iñañaiterei hikuái.
Ha ikatu hag̃uáicha oñakãrapuʼã,
ndojapói hustísia umi ityreʼỹva rehehápe,+
ni umi imboriahúva rehehápe’”.+
29 Jehová heʼi: “¿Che piko ndapokastigái vaʼerã koʼã mbaʼére?
¿Che* piko nañevengái vaʼerã peteĩ nasión peichaguávare?
30 Ko paíspe oiko peteĩ mbaʼe ivaieterei ha tuichaitereíva:
31 umi profetakuéra oprofetisa japu,+
ha umi saserdotekuéra oipuru ijautorida omanda hag̃ua ótrore.
Ha che puévlope ogusta upéva.+
Péro, ¿mbaʼépa pejapóta ág̃a ou vove la fin?”.