El Cantar de los Cantares
5 Pe kariaʼy heʼi: “Che ermána, che rembirekorãmi, che aikéma che hardínpe.+
Ambyaty mírra ha umi ótra plánta hyakuã asýva.*+
Haʼu pe eirete oĩva pe panálpe,
ha avei víno ha kamby”.+
Umi mitãkuña Jerusalengua heʼi: “Peẽ mokõive pejoayhúva,
pekaru ha peʼu vevída, pehechauka ojupe mbaʼeichaitépa pejoayhu.
Tapenerenyhẽ mborayhúgui”.+
2 Pe kuñataĩ heʼi: “Che ake péro che korasõ ndaikatúi oke.+
Ha ahendu che mborayhu jára ouha ombota chéve che rokẽ.
Ha heʼi chéve: ‘Che pykasumi, ndaipóri mbaʼeve ivaíva nderehe.
Che rembirekorãmi rohayhuetéva, eavrimína chéve ne rokẽ,
che akã ningo hykuepáma ko serénope,
oĩ serrasón ko pyharépe ha che akãrangue hykuepaitéma’.+
3 Ha haʼe chupe: ‘Che añenóma,
¿añemonde jey vaʼerã piko?
Ajepyheipáma ningo,
¿amongyʼa jeýta piko che py?’.
4 Haʼe omoinge ipo pe okẽ ikuahárupi oavri hag̃ua, péro upéi ahecha oipeʼa jeynteha ipo upégui,
ha che korasõ oñepyrũ operere.
5 Upémarõ apo apuʼã aavri hag̃ua pe okẽ
che mborayhu járape.
Ha añandu osyryha che pógui ha che kuãgui aséite de mírra,
ha ijaysykue opytapa pe okẽ tránkare.*
6 Aavrívo che rokẽ
ndatopavéima che rembiayhúre.
Ajedesespera* pórke ohóma raʼe.*
Ahenói chupe péro nopenái cherehe.
Ahekáramo jepe chupe, ndatopavéima hese.+
7 Umi guárdia okorréva oikóvo pe siudáre cherecha ha chembyepoti, haʼekuéra chenupã.
Che areko kuri peteĩ mánto che akãre
ha umi guárdia oĩva pe murállape oipeʼa chehegui.
8 Peẽ mitãkuña Jerusalengua, aipota pehura chéve peteĩ mbaʼe.
Pehecha sapyʼárõ che amórpe,
pejemína chupe mborayhúgui chekangypamaha”.
9 Umi mitãkuña Jerusalengua heʼi:
“Nde ningo la neporãvéva umi kuña apytépe.
¿Mbaʼéicha rupi ere ndaiporiha ótro ne mborayhu járaicha?
¿Mbaʼére piko oreovligáta rojapo hag̃ua ndéve ko huraménto?”.
10 Pe kuñataĩ heʼi: “Che mborayhu jára ningo ndaijojahái, hova ningo pytã asy.
Diez mil kuimbaʼe apytépe ndaiporichéne haʼéicha iporãva.
11 Iñakãrangue hũ vera pe kuérvoicha,
iñakãrangue haʼete palméra rakã oveve kangymíva ápe ha pépe.
Iñakã iporãiterei, pe óro iporãvévaicha iporã.
12 Hesa ningo ojogua mokõi palómape oĩva ysyry ykére,
haʼete voi oñemboʼýva hikuái peteĩ piléta kóstape
ha ojahúva kambýpe.
13 Hova ningo haʼete umi hardín hyakuãvu reíva,+
henyhẽtéva plánta hyakuã asývagui.
Hembe katu ojogua umi lírio potýpe, ha otyky chugui aséite de mírra hyakuã asýva.+
14 Ikuã haʼete óro, ha ipyapẽ katu ita vera saʼyju kangymíva.*
Ikuérpo ningo haʼete voi marfíl* ojeguapáva ita vera héravape safíro.
15 Hetyma ojogua mokõi kolúmna de mármol oñemboguapýva óro puroitépe.
Pe Líbanoicha che mborayhu jára iporã, haʼe ndaijojahái umi sédro mátaicha.+
16 Ijuru heʼẽ asy, entéro mbaʼe ningo iporã hese.+
Peẽ mitãkuña Jerusalengua,
péicha hína che mborayhu jára ahayhuetéva”.