Jeremías
35 Ogovernaha tiémpope Jehoiaquim,+ haʼéva Josías raʼy rréi de Judá, Jehová oñeʼẽ Jeremíaspe, ha heʼi chupe: 2 “Tereho umi recabita+ rógape, eñeʼẽ hendivekuéra ha egueraha chupekuéra Jehová rógape, peteĩva umi komedórpe,* ha upépe eofrese chupekuéra víno hoʼu hag̃ua”.
3 Upémarõ agueraha Jaazaníaspe, haʼéva Jeremías raʼy ha Habazinías niéto, ha agueraha avei iñermanokuérape, enterovete itaʼyrakuérape ha kompletoite umi recabita rogayguápe 4 Jehová rógape. Agueraha chupekuéra Igdalías raʼy Hanán komedórpe, haʼe ningo Ñandejára siérvo, upe komedór oĩ vaʼekue umi prínsipe komedór ykére, oĩva Salum raʼy Maaseya komedór ári, haʼe hína pe guárdia oñangarekóva okẽre. 5 Upémarõ amoĩ umi váso ha kópa renyhẽ víno umi kuimbaʼe recabita rogaygua renondépe, ha haʼe chupekuéra: “Peʼúna ko víno”.
6 Péro haʼekuéra heʼi: “Ndoroʼumoʼãi víno, pórke ore túa ypykue Jehonadab,*+ haʼéva Recab raʼy, omanda vaʼekue oréve: ‘Peẽ ni pende raʼykuéra arakaʼeve ndapeʼúi vaʼerã víno. 7 Ha napemopuʼãi vaʼerã pende rogarã, napeñemitỹi vaʼerã, ni napeñotỹi vaʼerã parrál ni napekonsegíri vaʼerã parralty penembaʼerã. Upéva rangue peiko vaʼerã siémpre óga kárpape, péicha peikóta heta tiémpore pe yvy peikohápe hína extranhéroramo’. 8 Upévare ore rosegi rojapo Jehonadab heʼi vaʼekue, haʼe hína ore túa ypykue Recab raʼy, rojapo entéro mbaʼe omanda vaʼekue oréve ha arakaʼeve ndoroʼúi víno, ore ni ore rembirekokuéra, ore raʼykuéra ni ore rajykuéra. 9 Ha noromopuʼãi óga roiko hag̃ua pype, ni ndoroguerekói parralty térã kokue ni semílla roñemitỹ hag̃ua. 10 Rosegi roiko óga kárpape ha rojapo entéro mbaʼe omanda vaʼekue oréve ore túa ypykue Jehonadab.* 11 Péro rréi Nabucodonosor* de Babilonia oúrõ guare ko país kóntrape,+ ore roʼe: ‘Peju jaha jaike Jerusalénpe jajesalva hag̃ua umi caldeo ehérsitogui ha avei umi síriogui’, ha upévare koʼág̃a roiko hína Jerusalénpe”.
12 Ha Jehová oñeʼẽ Jeremíaspe ha heʼi: 13 “Péicha heʼi Israel Jára Jehová, umi ehérsito yvagapegua ruvicha: ‘Tereho ere umi kuimbaʼe Judaguápe ha umi oikóvape Jerusalénpe, Jehová heʼi: “¿Che piko ndaʼéi raʼe peẽme heta vése pejapo hag̃ua che haʼéva?”.+ 14 “Jehonadab, haʼéva Recab raʼy, omanda vaʼekue umi ifamiliarépe ani hag̃ua hoʼu víno, ha enterove haʼekuéra ojapo upe heʼi vaʼekue ha ndoʼúi víno koestedía peve, péicha iñeʼẽrendu hikuái ituakuéra ypykuépe.+ Péro che ningo añeʼẽ jey jey* peẽme, péro peẽ napepenái cherehe.+ 15 Ha asegi amondo peẽme enterove umi che profetakuéra, amondo jey jey* peẽme,+ ha heʼi hikuái: ‘¡Pejevýna káda uno pende rape vaígui+ ha pejapo umi mbaʼe oĩ porãva! Ani peho peadora ni peservi umi ótro dióspe. Upéicharõ pesegíta peiko pe yvy ameʼẽ vaʼekuépe peẽme ha pende tuakuéra ypykuépe’.+ Péro peẽ napepenái ni napehendúi la haʼéva peẽme. 16 Recab raʼy Jehonadab familiare okumpli upe ituakuéra ypykue omanda vaʼekue chupekuéra,+ péro koʼã hénte nopenái la che haʼévare”’”.
17 “Upévare, péicha heʼi Israel Jára Jehová, umi ehérsito yvagapegua ruvicha: ‘Aguerúta Judá ári ha kompletoite umi hénte oikóvare Jerusalénpe, entéro umi mbaʼe vai haʼe vaʼekue amboutaha,+ pórke che aavisa vaʼekue chupekuéra, péro nohendúi hikuái, ha asegi ahenói chupekuéra péro nopenái cherehe’”.+
18 Ha Jeremías heʼi umi recabítape: “Péicha heʼi Israel Jára Jehová, umi ehérsito yvagapegua ruvicha: ‘Peẽ ningo pejapo pende túa ypykue Jehonadab heʼi vaʼekue, ha pesegi pekumpli upe omanda vaʼekue, pejapóvo haʼe heʼi hagueichaite peẽme, 19 upévare péicha heʼi Israel Jára Jehová, umi ehérsito yvagapegua ruvicha: “Siémpre oĩta Recab raʼy Jehonadab* familiare oservíva che renondépe”’”.