Números

21 Pe rréi de Arad,+ pe cananeo oikóva hína Néguebpe oikuaárõ guare umi israelita ouha hína Atarim rapére, osẽ oataka umi israelítape ha unos kuántope ojagarra ha ogueraha. 2 Upémarõ umi israelita ojapo peteĩ kompromíso Jehovándi, ha heʼi chupe hikuái: “Oreajudáramo rojagarra hag̃ua ko puévlo, ore katuete rohundipaitéta umi isiudakuéra”.* 3 Jehová ohendu umi israelítape ha oipytyvõ chupekuéra ipuʼaka hag̃ua umi cananéore. Ha umi israelita ohundipaite chupekuéra, ohundi umi héntepe ha isiudakuéra entéro. Upévare ombohéra hikuái upe lugár Hormá.*+

4 Upéi umi israelita okontinua iviáhe Sérro Hor guive,+ ha oho hikuái pe Mar Rojo rapére ojere hag̃ua Edom territóriogui,+ ha tapére ou ikaneʼõiterei hikuái. 5 Ha umi hénte oñepyrũ oñeʼẽ vai Ñandejára ha Moisés kóntrape,+ ha heʼi: “¿Maʼerã piko oreguenohẽ raʼe Egíptogui orejukapa hag̃ua ko desiértope? Koʼápe ndaipóri y ni mbaʼeve jaʼu hag̃ua,+ ha orembyajúma avei ko maná puerkésa”.+ 6 Upémarõ Jehová ombou chupekuéra mbói iponsóñava ha oisuʼu chupekuéra, upéicha rupi heta israelita omano.+

7 Ha umi hénte ou Moisés rendápe ha heʼi chupe: “Ore ningo rofalla roñeʼẽ vaívo Jehováre ha avei nderehe.+ Eñeʼẽmína Jehovápe orerehehápe ha ejerure chupe toipeʼami umi mbói ore apytégui”. Ha Moisés ojerure asy Ñandejárape pe puévlo rehehápe.+ 8 Upémarõ Jehová heʼi Moiséspe: “Ejapo peteĩ mbói iponsóñava raʼanga ha emoĩ peteĩ póstere. Upéicharõ peteĩ mbói oisuʼúramo peteĩ persónape, omaña vaʼerã pe mbói raʼangáre ha nomanomoʼãi”. 9 Moisés ensegída ojapo peteĩ mbói raʼanga kóvregui+ ha omoĩ peteĩ póstere.+ Ha umi mbói oisuʼu jave umi héntepe, haʼekuéra omaña pe mbói raʼangáre ha nomanói.+

10 Upe rire umi israelita osẽ ha oho oiko pe lugár héravape Obot.+ 11 Upéi osẽ jey hikuái Obótgui ha oho oiko pe lugár héravape Iyé-Abarim,+ opytáva pe desiérto oĩvape Moab rovái, éste gotyo. 12 Upe rire osẽ hikuái upégui ha oho opyta Zered Ñúme.*+ 13 Upéi oho hikuái oiko peteĩ sóna héravape Arnón,+ ko lugár oĩ hína pe desiérto og̃uahẽvape umi amorreokuéra território oríllape. Umi moabita território katu og̃uahẽ Arnón peve, upéicharõ Arnón opyta éntre umi amorreokuéra território ha umi moabitakuéra território. 14 Upévare pe lívro oñeʼẽvape Jehová Gerrakuéra rehe imanduʼa koʼã lugár rehe, heʼívo: “Vaheb oĩva Sufápe ha umi lugár oĩva Arnón ñúme,* 15 ha umi ñu* vaháda ojepysóva Ar oĩha gotyo ha oho hese Moab oríllare”.

16 Upéi oho hikuái Beer peve. Upépe oĩ pe póso Jehová heʼi haguépe Moiséspe: “Embyaty pe puévlope ha che ameʼẽta chupekuéra y”.

17 Upérõ umi israelita opurahéi ha heʼi:

“¡Tosẽ y pe pósogui! ¡Tojepurahéi chupe!*

Upéi haʼekuéra osẽ pe desiértogui ha oho pe lugár héravape Mataná. 19 Matanágui oho hikuái Nahaliélpe ha upégui oho jey hikuái Bamótpe.+ 20 Ha Bamótgui oho hikuái pe ñu guasu oĩvape umi moabitakuéra territóriope,+ opytáva hína Pisgá altúrape.+ Upe lugár guive ikatu ojehecha Jesimón.+

21 Upéi umi israelita omondo mensahéro Sehón rendápe, umi amorreokuéra rréi rendápe. Ha heʼika chupe:+ 22 “Rojerurese ndéve permíso rohasami hag̃ua nde territóriorupi. Ndoroikemoʼãi ni peteĩ pende kokuépe ni pende parraltýpe ha ndoroyʼumoʼãi avei ni peteĩ pende pósogui. Ore rohótante pe Rréi Rapérupi rohasapa peve nde território”.+ 23 Péro pe rréi Sehón nopermitíri umi israelítape ohasa iterritóriorupi. Upéva rangue oho ombyaty ipuévlope ha osẽ umi israelitakuéra kóntrape pe desiértope. Haʼe oho oñorairõ umi israelítandi pe lugár héravape Jáhaz.+ 24 Ha umi israelita oñorairõ hendivekuéra espáda reheve+ ha ogana chupekuéra, ha ojagarra chuguikuéra ijyvy+ Arnón+ guive Jaboc+ peve, oĩva hína umi ammonita território ypýpe. Péro ndohasái hikuái Jazer,+ pórke upe peve og̃uahẽ hína umi ammonita território.+

25 Umi israelita ojagarrapaite umi amorreokuéra+ siuda ha oñepyrũ oiko upépe, oiko hikuái Hesbónpe ha umi puevloʼi oĩvape ijerére. 26 Hesbón haʼe vaʼekue pe siuda oiko haguépe Sehón, umi amorreokuéra rréi. Haʼe ningo oñorairõ kuri pe rréi de Moab ndive ha oipeʼa chugui ijyvy Arnón peve. 27 Upéicha rupi ojejapo vaʼekue peteĩ poesía oñeñembohory hag̃ua upe oiko vaʼekuére:

“¡Peju Hesbónpe!

¡Toñemopuʼã pe siuda de Hesbón ha toñemopyenda mbarete pe iváse!

28 ¡Pórke Hesbóngui osẽ tata, peteĩ tatarendy osẽ kuri Sehón retãgui!

¡Upéva ombokusugue Árpe, oĩva hína Moábpe, ha ohundipaite umi kuimbaʼe omanda guasúva oikóvape umi serroháre Arnónpe!

29 ¡Aichejáranga Moab, Kemós+ retã! ¡Reñehundipaitéta!

¡Itaʼyrakuéra odiparapáta, ha Sehón umi amorreokuéra rréi, ojagarrapaitéta umi itajyrakuéra!

¡Ojagarrapáta pe tata Medebá peve!”.+

31 Péicha umi israelita oñepyrũ oiko umi amorreokuéra yvýpe. 32 Upéi Moisés omondo unos kuánto kuimbaʼe Jazérpe+ ovichea hag̃ua upe lugár. Umi israelita ojagarra umi puevloʼi oĩva ijerére ha omosẽmba umi amorreokuéra oikóvape umírupi. 33 Upe rire ojere ha oho hikuái Basán Rapére. Upémarõ Og+ pe rréi de Basán ha entéro ijehérsito osẽ oñorairõ umi israelítandi Edréipe.+ 34 Ha Jehová heʼi Moiséspe: “Ani rekyhyje chugui,+ pórke roipytyvõta rejagarra hag̃ua chupe, ipuévlo ha ijyvy kompletoite.+ Ha rejapóta hese rejapo hagueichaite Sehón rehe, umi amorreokuéra rréi oiko vaʼekue Hesbónpe”.+ 35 Upémarõ umi israelita ojuka pe rréipe, itaʼyrakuérape, ipuévlope, ha ni peteĩ ndopytái.+ Upéi ojagarra chuguikuéra ijyvy.+