Números
33 Koʼãva hína umi lugár opyta hague umi israelita osẽrõ guare Egíptogui. Haʼekuéra osẽ vaʼekue peteĩ ehérsitoicha, grúpo por grúpo,+ ha Moisés ha Aarón odirihi vaʼekue chupekuéra.+ 2 Moisés oanota vaʼekue moõ moõpa opyta hikuái oviahárõ guare, oanotapaite umi lugár Jehová heʼi haguépe chupekuéra opyta hag̃ua. Koʼãva hína umi lugár opyta hague hikuái oviahárõ guare:+ 3 haʼekuéra osẽ Ramesésgui+ pe día 15 pe primer méspe.+ Upe diaitépe, pe Páskua+ rire, umi israelita pyʼaguasúpe osẽ oho, ha umi egipcio ohecha chupekuéra. 4 Upe aja katu umi egipcio oñotỹ joa umi taʼyrakuéra ypykue omano vaʼekuépe, umívape Jehová ojuka kuri,+ pórke Jehová ohusga ha okastiga umi idioskuérape.+
5 Upérõ umi israelita osẽ Ramesésgui ha oho opyta Sucótpe.+ 6 Upéi osẽ hikuái Sucótgui ha oho opyta Ezámpe,+ pe desiérto rembeʼýpe. 7 Upe rire osẽ hikuái Ezámgui ha oho Pihahirot gotyo, oĩva Baal-Zefón+ rovái, ha opyta hikuái Migdol+ renondépe. 8 Upéi haʼekuéra osẽ Pihahirótgui ha ohasa pe mar mbytérupi+ og̃uahẽ meve pe desiértope.+ Ha oguata hikuái 3 día Ezam+ desiértore ha oho opyta Marápe.+
9 Upéi osẽ hikuái Marágui ha og̃uahẽ Elímpe. Ha Elímpe oĩ 12 ykua yvu ha 70 palméra máta, upémarõ opyta hikuái upépe.+ 10 Upe rire osẽ hikuái Elímgui ha oho opyta Mar Rojo ypýpe. 11 Ha pe Mar Rojo ypýgui osẽ hikuái ha oho opyta desiérto de Sínpe.+ 12 Upéi oho hikuái desiérto de Síngui ha opyta Dofcápe. 13 Ha Dofcágui osẽ hikuái ha oho opyta Alúspe. 14 Upéi osẽ hikuái Alúsgui ha oho opyta Refidímpe,+ ha upépe katu ndaipóri vaʼekue y hoʼu hag̃ua umi hénte. 15 Upéi osẽ hikuái Refidímgui ha oho opyta pe desiérto de Sinaípe.+
16 Ha osẽ hikuái oho pe desiérto de Sinaígui ha opyta Quibrot-Hataavápe.+ 17 Upéi Quibrot-Hataavágui osẽ hikuái ha oho opyta Hazerótpe.+ 18 Upe rire osẽ hikuái Hazerótgui ha oho opyta Ritmápe. 19 Ha Ritmágui osẽ hikuái ha oho opyta Rimón-Pérezpe. 20 Upéi Rimón-Pérezgui osẽ hikuái ha oho opyta Libnápe. 21 Upe rire osẽ hikuái Libnágui ha oho opyta Risápe. 22 Riságui osẽ hikuái ha oho opyta Quehelatápe. 23 Upéi Quehelatágui osẽ hikuái ha oho opyta Sérro Séferpe.
24 Upe rire osẽ hikuái Sérro Séfergui ha oho opyta Haradápe. 25 Ha Haradágui osẽ hikuái ha oho opyta Maquelótpe. 26 Maquelótgui katu osẽ hikuái+ ha oho opyta Táhatpe. 27 Upéi osẽ hikuái Táhatgui ha oho opyta Tarépe. 28 Ha Tarégui osẽ hikuái ha oho opyta Mitcápe. 29 Upéi Mitcágui osẽ hikuái ha oho opyta Hasmonápe. 30 Hasmonágui katu osẽ hikuái ha oho opyta Moserótpe. 31 Upéi osẽ hikuái Moserótgui ha oho opyta Bene-Jaacánpe.+ 32 Ha upéi osẽ hikuái Bene-Jaacángui ha oho opyta Hor-Haguidgádpe. 33 Upéi osẽ hikuái Hor-Haguidgádgui ha oho opyta Jotbatápe.+ 34 Ha osẽ rire hikuái Jotbatágui oho opyta Abronápe. 35 Upéi osẽ hikuái Abronágui ha oho opyta Ezión-Guéberpe.+ 36 Ha osẽ rire hikuái Ezión-Guébergui oho opyta Cadéspe, pe desiérto de Zínpe.+
37 Upéi osẽ hikuái Cadésgui ha oho opyta Sérro Hórpe,+ pe Edom território rembeʼýpe. 38 Ha Aarón pe saserdóte ojupi pe Sérro Hórpe Jehová heʼi rupi chupe, ha upépe omano pe primer día del quinto mes, 40 áño umi israelita osẽ rire Egíptogui.+ 39 Aarón oreko vaʼekue 123 áño omanórõ guare pe Sérro Hórpe.
40 Upéi pe rréi de Arad+ oikuaa umi israelita ouha. Upe rréi ningo peteĩ cananeo oiko vaʼekue Néguebpe, upe lugár opyta hína Canaánpe.
41 Tiémpo rire umi israelita osẽ pe Sérro Hórgui+ ha oho opyta Zalmonápe. 42 Upéi osẽ hikuái Zalmonágui ha oho opyta Punónpe. 43 Ha upéi osẽ hikuái Punóngui ha oho opyta Obótpe.+ 44 Upe rire osẽ hikuái Obótgui ha oho opyta Iyé-Abarímpe, Moab território oríllape.+ 45 Upéi osẽ hikuái Iyímgui ha oho opyta Dibón-Gádpe.+ 46 Ha osẽ rire hikuái Dibón-Gádgui oho opyta Almón-Diblatáimpe. 47 Upéi osẽ hikuái Almón-Diblatáimgui ha oho opyta umi montáña de Abarímpe,+ opytáva Nebo rovái.+ 48 Upéi osẽ hikuái umi montáña de Abarímgui ha oho opyta pe desiérto de Moábpe, Jordán ypýpe, Jericó rovái.+ 49 Ha osegi opyta hikuái pe Jordán ypýpe, pe lugár héravape Bet-Jesimot guive Abel-Sitim peve,+ pe desiérto de Moábpe.
50 Ha Jehová oñeʼẽ Moiséspe pe desiérto de Moábpe, Jordán ypýpe, Jericó rovái, ha heʼi chupe: 51 “Ere umi israelítape: ‘Pehasáta pe Jordán ha peikéta Canaánpe.+ 52 Ha pemosẽmbaite vaʼerã umi hénte oikóvape upe yvýpe ha pehundipa vaʼerã umi estátua ojejapo vaʼekue itágui+ ha umi ojejapo vaʼekue metálgui,+ ha pehundipaite vaʼerã umi lugár yvate.+ 53 Ha peẽ pejagarráta pe yvy ha peikóta pype, pórke ameʼẽta peẽme penembaʼerã upe yvy.+ 54 Pejapo vaʼerã sortéo+ perreparti hag̃ua hekoitépe pe yvy pene hentekuérape. Umi hetavévape pemeʼẽ vaʼerã tuichave ijyvyrã, ha umi mbovyvévape pemeʼẽ vaʼerã michĩve ijyvyrã.+ Káda únope oñemeʼẽta ijyvyrã asegún osẽ pe sortéope. Oñemeʼẽta peẽme pende yvyrã, pe erénsia oñemeʼẽvagui pende trívupe.+
55 Péro peẽ napemosẽiramo umi hénte oikóvape upe yvýpe,+ umi pehejáva guive pendestorváta ohoramoguáicha pende resápe yvyra kuʼi ha haʼetéta ñuatĩ pendekutúva pende kostádope. Haʼekuéra penembohasa asýta umi lugár peikohápe.+ 56 Ha ajapóta penderehe umi mbaʼe vai apensa vaʼekue ajapotaha hesekuéra’”.+