2 Reyes
3 Ha 18 áño ogoverna haguépe Jehosafat rréi de Judá, Acab raʼy Jehorámgui+ oiko rréi Samáriape ogoverna hag̃ua Israel, ha 12 áñore ogoverna vaʼekue Israélpe. 2 Haʼe ojapo meme vaʼekue ivaíva Jehová renondépe, péro ndahaʼéi itúa ha isy ojapo hagueichaite, pórke haʼe oipeʼa pe kolúmna sagráda itúa ojapo vaʼekue Baálpe g̃uarã.+ 3 Péro haʼe ojapo umi mbaʼe vai, Nebat raʼy Jeroboán ojapo vaʼekue, Jeroboán ningo ojapoka vaʼekue avei Israélpe umi mbaʼe vai haʼe ojapo vaʼekue.+ Jehoram osegi vaʼekue ojapo umi mbaʼe vai.
4 Pe rréi de Moab hérava Mesá ningo oreko vaʼekue heta ovecha, ha opaga hag̃ua impuésto rréi de Israélpe omeʼẽ jepi 100.000 ovecha raʼyrusu ha 100.000 ovecha mácho oñeñapĩʼỹre. 5 Acab omano riremínte,+ rréi de Moab opuʼã pe rréi de Israel kóntrape.+ 6 Upémarõ pe rréi Jehoram osẽ upe tiémpope Samáriagui, ha ombyaty kompletoite Israélpe oho hag̃uáicha oñorairõ. 7 Haʼe heʼika avei rréi Jehosafat de Judápe: “Rréi de Moab ningo opuʼã che kóntrape, ¿nderehoséi piko chendive ñañorairõ hag̃ua Moab kóntrape?”. Upépe haʼe heʼi chupe: “Che aháta añorairõ nde ykére,+ che puévlo ha che kavajukuéra reheve”.+ 8 Upéi oporandu: “¿Mbaʼe tapérupi piko jaháta?”. Ha Jehoram heʼi chupe: “Jahána pe tape ohasávare Edom desiértorupi”.
9 Upémarõ pe rréi de Israel osẽ oho pe rréi de Judá ha pe rréi de Edom ndive.+ Upéi oviaha rire hikuái 7 día, opa la y pe ehérsitope g̃uarã ha hymbakuérape g̃uarã. 10 Ha pe rréi de Israel heʼi: “¡Ivaiete ningo la oikóva! ¡Jehová ombyaty mbohapy rréipe ontrega hag̃ua chupekuéra Moab pópe!”. 11 Upépe Jehosafat osẽ heʼi: “¿Ndaipóri piko koʼápe Jehová proféta jajevale hag̃ua hese ha ñaporandu Jehovápe?”.+ Ha peteĩva pe rréi de Israel siervokuéra heʼi chupe: “Oĩ hína Eliseo,+ Safat raʼy, haʼe ningo oñohẽmi vaʼekue y Elías póre ojepohéi hag̃ua”.*+ 12 Jehosafat heʼi: “Haʼe ikatu heʼi ñandéve mbaʼépa Jehová oipota jajapo”. Upémarõ pe rréi de Israel, pe rréi de Edom ha rréi Jehosafat ovahea Eliseo rendápe.
13 Ha Eliseo heʼi pe rréi de Israélpe: “¿Mbaʼéreiko reju che rendápe?*+ Terehóna eporandu nde túa profetakuérape ha nde sy profetakuérape”.+ Péro pe rréi de Israel heʼi chupe: “No, pórke Jehová ombyaty mbohapy rréipe ontrega hag̃ua chupekuéra Moab pópe”. 14 Upépe Eliseo heʼi chupe: “Ahura ndéve Ñandejára Jehová oikovévare, umi ehérsito yvagapegua ruvicha, che aservi hína chupe,* ha hérape haʼe ndéve, ndahaʼéirire rréi Jehosafat+ de Judá rehehápe, namañamoʼãi ni napenái vaʼerãmoʼã nderehe.+ 15 Koʼág̃a pegueru chéve peteĩ arpísta”.*+ Oñepyrũmírente ombopu pe árpa, Jehová espíritu* oguejy Eliseo ári.+ 16 Ha Eliseo heʼi chupekuéra: “Jehová heʼi kóicha: ‘Pejoʼo heta yvykua ko ñúme,* 17 pórke péicha heʼi Jehová: “Ndaiporimoʼãi yvytu ni ama, péro henyhẽta y ko ñúme,*+ ha peyʼúta peẽ ha pene rymbakuéra”’. 18 Péro koʼã mbaʼe vyroreiete hína Jehovápe g̃uarã,+ pórke haʼe ontregáta avei ndéve nde pópe Moábpe.+ 19 Peẽ pehundi vaʼerã entéro siuda imurallapáva+ ha umi siuda iñimportánteva, peitypa vaʼerã umi yvyramáta iporãva, pejoko umi ysyry, ha pemosarambipa vaʼerã ita umi yvy iporãvape anive hag̃ua oprodusi mbaʼeve”.+
20 Upéi pyhareve, ojeofreseha órape pe ofrénda de semílla pyharevegua,+ Edómguio ládo ou y ha omyenyhẽte pe ñu.
21 Kompletoite umi moabita ohendúrõ guare umi mbohapy rréi ou hague oñorairõ hag̃ua ikontrapekuéra, oñehenói ha oñembyaty umi kuimbaʼe ikatúvape oñorairõ* ha oho oñemoĩ hikuái pe frontérape. 22 Ha opuʼãrõ guare hikuái pyharevete, pe kuarahy ohesape pe ýre ha omimbi, ha umi moabita oĩva pe ótro ládo ohecha pe y pytãha tuguýicha. 23 Ha heʼi hikuái: “¡Péva ningo tuguy! Katuete oiméne umi rréi ojojukapa raʼe espádape. Upévare peẽ moabitakuéra: ¡jaha katu jasakea chupekuéra!”.+ 24 Ha oikévo hikuái umi israelita kampaméntope, umi israelita opuʼã ha oñepyrũ ojuka umi moabítape, ha haʼekuéra katu odipara chuguikuéra.+ Umi israelita oike Moab territóriope ha ojuka ohóvo umi moabítape. 25 Haʼekuéra ohundipaite umi siuda, ha káda uno opoi peteĩ ita umi yvy iporãháme, ha péicha omyenyhẽte umíva itágui. Avei ojoko hikuái umi ysyry,+ ha oitypaite umi yvyramáta iporãva.+ Ipahápe hemby Quir-Haréset+ murallakuéra añoite, ha umi soldádo oipurúva ónda* omongora upe siuda ha oataka oitypa peve.
26 Pe rréi de Moab ohechakuaárõ guare operdeha ohóvo, ojagarra ogueraha hendive 700 kuimbaʼe oipurukuaáva espáda, mbaretépe ohasa hag̃uáicha rréi de Edom+ oĩha gotyo, péro ndaikatúi. 27 Upémarõ pe rréi de Moab ojagarra itaʼýra ypykue, pe opytáta vaʼekue hekovia rréiramo ha oofrese chupe sakrifísio ojehapývaramo+ pe murálla ári. Ha Israel enemigokuéra ipochyeterei ikóntrape,* upémarõ pe ehérsito ojerretira ha oho jey hikuái hetãme.