1 Samuel
14 Peteĩ día Saúl raʼy Jonatán,+ oavisaʼỹre itúape heʼi pe soldádo oguerahávape hiʼarmakuéra: “Eju jaha amo ótro ládo oĩháme umi filisteo kampaménto”. 2 Upe tiémpope Saúl ha 600 soldádorupi+ oĩ Migrónpe, Guibeá+ ypýpe. Ha Saúl omoĩ hóga kárpa peteĩ granáda máta guýpe. 3 (Ahíya oreko pe delantál* oipurúva umi saserdóte.+ Haʼe ningo Ahitub raʼy,+ itio katu Icabod+ ha ijavuélo katu Finehás,+ haʼéva Elí+ raʼy. Elí ningo Jehová saserdóte vaʼekue Silópe).+ Péro avave ndoikuaái Jonatán osẽ hague oho. 4 Og̃uahẽ hag̃ua umi filisteo oĩháme, Jonatán ohasa vaʼerã umi tape poʼi oĩvare sérro paʼũre. Upérupi oĩ mokõi ita guasu hakuáva, peteĩva héra Bozez ha pe ótro katu Sené. Koʼã ita oĩ ojovái ha imbytérupi ohasa vaʼerã Jonatán. 5 Peteĩva ijyvateterei ha oĩ nórte gotyo ha omaña Micmash ládo. Pe ótro oĩ sur gotyo ha omaña Gueba+ ládo.
6 Upéi Jonatán heʼi isoldádope: “Eju jaha oĩháme umi filisteo kyʼa.*+ Ikatu mbaʼe Jehová osẽ ñande favórpe. Jehová ñanepytyvõséramo, mbaʼevete ndojokomoʼãi chupe. Haʼe ikatu ojevale heta héntere térã mbovymíre osalva hag̃ua ipuévlope”.+ 7 Upémarõ pe soldádo heʼi chupe: “Ejapo katu la repensáva. Eho katu rehosehápe ha che rosegíta”. 8 Upéi Jonatán heʼi chupe: “Jahasáta umi filisteo oĩha gotyo ha jajechaukáta chupekuéra. 9 Heʼírõ ñandéve hikuái: ‘¡Pepyta upepete, ore rohóta pene rendápe!’, entónse japytátante. 10 Péro heʼírõ hikuái: ‘¡Peju ápe ñañorairõ hag̃ua!’, upéicharõ jaháta haʼekuéra oĩha peve, pórke upéva haʼéta peteĩ señál Jehová ñanepytyvõtaha”.+
11 Ha mokõivéva ojechaukávo umi soldádo filistéope, umi filisteo heʼi: “¡Pemañami! Umi hebreo osẽ sapyʼa umi lugár okañy haguégui”.+ 12 Umi soldádo oĩva umi filisteo kampaméntope, heʼi Jonatán ha iñirũme: “¡Pejúna ápe la peñanimárõ. Rohechaukáta peẽme mbaʼéichapa peñorairõ vaʼerã!”.+ Upepete Jonatán heʼi iñirũme: “Jehová omeʼẽta umi filistéope Israel pópe. Jaha katu, nde rehóta che rapykuéri”.+ 13 Upépe, Jonatán ojupi pe varránkare, iñirũ katu oho hapykuéri ha ohasa hikuái pe ótro ládo. Ha Jonatán ojuka ohóvo umi filistéope, ha iñirũ ojuka ohóvo hapykuéri umi nomanoporãivape. 14 Pe primer atákepema voi, Jonatán ha iñirũ ojukáma amo 20 filistéorupi média ektáreape.
15 Umi filisteo oĩva pe kampaméntope okyhyjeterei ohendúvo upe oiko vaʼekue, umi grúpo de soldádo ou vaʼekue oataka hag̃ua Israel jepe,+ okyhyjeterei opytávo. Ha Ñandejára omboryrýi pe yvy, ha omongyhyje chupekuéra. 16 Ha umi guárdia israelita oĩva Guibeápe,+ opytáva Benjamín territóriope, ohecha umi filisteo odiparaha opa gotyo rei pe kampaméntope.+
17 Upémarõ Saúl heʼi umi soldádope: “Pekontami ñandéve mboýpa ñaime jaikuaa hag̃ua mávapa la ofaltáva”. Ha okontapa rire, ohechakuaa ndaiporiha Jonatán ha pe isoldádo ogueraháva hiʼarmakuéra. 18 Ha Saúl heʼi Ahíyape:+ “Egueru ñandéve Ñandejára árka”. (Upe tiémpope* pe árka oreko vaʼekue umi israelita). 19 Ha Saúl oñeʼẽ aja pe saserdótendi, desastrevéntema oiko umi filisteo kampaméntope. Ahíya ojerure hína kuri Ñandejárape oipytyvõ hag̃ua chupekuéra, péro Saúl heʼi chupe: “Ehejaite pe rejapóva”. 20 Upémarõ Saúl ha umi oĩva hendive oñembyaty oho hag̃ua oñorairõ, ha ohecha desastreha umi filisteo situasión pórke haʼekuéra voi ojojukapa hína. 21 Oĩ israelita oho vaʼekue umi filisteo kampaméntope ha omoirũva chupekuéra. Péro amo ipahápe, koʼãva avei osẽ oipytyvõ Saúl ha Jonatánpe. 22 Ha upéi umi israelita okañymba+ vaʼekue Efraínpe umi montáña oĩháme, ohendu umi filisteo odiparapa hague. Upémarõ haʼekuéra osegi avei umi filistéope ojuka hag̃ua chupekuéra. 23 Upe díape Jehová osalva Israélpe+ ha haʼekuéra oñorairõ umi filistéondi Bet-Aven+ peve.
24 Upe díape umi israelita ikangypa ha nomeʼẽvéima pórke Saúl ojapo kuri peteĩ huraménto ha heʼi pe puévlope: “Avave ndoʼúi vaʼerã mbaʼeve* pytũ mboyve, pórke osino oñemaldesíta. Pehaʼarõ vaʼerã añevenga raẽ che enemigokuérare”. Upévare ni peteĩ israelita ndoʼúi mbaʼeve.+
25 Upe rire pe puévlo oike pe kaʼaguýpe ha otopa hikuái hetaiterei eíra otykypáva hína umi panálgui. 26 Ha oikére pe kaʼaguýpe umi israelita ohecha pe eíra otykypaha upépe, péro noñanimái hoʼu hikuái pórke okyhyje pe huraméntogui. 27 Péro Jonatán nohendúi kuri itúa ojapórõ guare pe huraménto.+ Upévare haʼe ohechávo pe eíra, omoinge peteĩ yvyra pe panálpe ha hoʼu. Haʼe ojapóvo upéva, ojajái pe hesa ha imbarete jey. 28 Upépe peteĩva osẽ heʼi chupe: “Nde túa ojapo peteĩ huraménto ha heʼi: ‘Avave ndoʼúi vaʼerã mbaʼeve koestedía osino oñemaldesíta’.+ Upévare enterovete orekangypa”. 29 Upémarõ Jonatán heʼi: “Che túa tuichaiterei operhudika la puévlope. Pehechántena mbaʼeichaitépa ojajái che resa haʼu rire michĩmi pe eíra. 30 Iporãiteve vaʼerãmoʼã peʼúrire peʼuseháicha+ umi mbaʼe peipeʼa vaʼekuégui umi filistéogui. Upéicha hetaitevépe pejukáta kuri”.
31 Upe díape, osegi ojuka hikuái umi filistéope Micmash guive Ayalón+ peve. Upévare ikaneʼõiterei hikuái. 32 Upéi umi soldádo israelita ojagarra umi filisteokuéra animál ha ojuka hoʼu hag̃ua. Ojagarra hikuái ovecha, vaka, tóro, vaka raʼy ha okarnea upépe ha hoʼu pe soʼo huguy reheve.+ 33 Upéi ojeʼe Saúlpe: “Pe puévlo opeka hína Jehová kóntrape, hoʼu hikuái soʼo huguy reheve”.+ Ha Saúl heʼi: “Peẽ tuichaiterei pepeka. Koʼag̃aite pegueru chéve koʼápe peteĩ ita guasu”. 34 Upéi Saúl heʼi jey: “Tapeho peje umi soldádope: ‘Káda uno pegueru vaʼerã pene rymba tóro ha pende ovecha, ha pekarnea vaʼerã koʼápe peʼu hag̃ua. Anive pepeka Jehová kóntrape peʼúvo pe soʼo huguy reheve’”.+ Upémarõ pe pyharépe káda uno ogueru la hymba tóro ha okarnea upépe. 35 Ha Saúl ojapo peteĩ altár Jehovápe g̃uarã.+ Upéva ningo pe primer altár haʼe ojapóva Jehovápe g̃uarã.
36 Upe rire Saúl heʼi: “Jahána pyharekue jasakea umi filistéope koʼẽmba peve. Jajuka chupekuéra ha ani ni peteĩva opyta rei”. Ha pe puévlo heʼi: “Si, la nde eréva ojejapóta”. Upémarõ pe saserdóte heʼi: “Ñañemboja Ñandejára renondépe”.+ 37 Ha Saúl oporandu Ñandejárape: “¿Roho vaʼerã piko roataka umi filistéope?+ ¿Rehejátapa rogana chupekuéra?”. Péro Ñandejára ndeʼíri chupe mbaʼeve upe díape. 38 Upémarõ Saúl heʼi umi hénte iñimportantevévape: “Peju koʼápe ha peaverigua mbaʼépa hína la pekádo ojejapo vaʼekue koestedía. 39 Ñandejára Jehová oikovévare, pe osalváva Israélpe iñenemigokuéragui, hese che ahura pe opeka vaʼekue omanotaha. Tahaʼe jepe raʼe che raʼy Jonatán”. Péro avave ndeʼíri chupe mbaʼeve. 40 Upémarõ Saúl heʼi: “Peẽ peñemoĩta peteĩ ládo, ha che ha Jonatán katu roñemoĩta pe ótro ládo”. Ha umi hénte heʼi chupe: “Ejapo katu nde repensáva iporãveha”.
41 Upéi Saúl heʼi Jehovápe: “Israel Jára, eipurúna pe Tumim ekontesta hag̃ua oréve”.+ Upémarõ pe Tumim oiporavo Saúl ha Jonatánpe, ha umi israelita opyta lívre. 42 Upéi Saúl heʼi: “Pesortea*+ jaikuaa hag̃ua mávapa la kulpávle, che térãpa Jonatán”. Ha osẽ Jonatán. 43 Upémarõ Saúl heʼi Jonatánpe: “Emombeʼu chéve mbaʼépa rejapo raʼe”. Ha Jonatán heʼi: “Chéngo amoingénte peteĩ yvyra pe panálpe ha aprovaʼimínte kuri pe eíra.+ Tamano katu la oimérõ amano vaʼerã”.
44 Ha Saúl heʼi Jonatánpe: “Ñandejára tachekastiga el dóvle la nde neremanóirõ”.+ 45 Upémarõ pe puévlo heʼi: “¡Mbaʼéicha piko omanóta Jonatán! Haʼe rupive ningo Israel ogana.*+ Ni mbaʼeveichavérõ nomanói vaʼerã. Rohura Ñandejára Jehová oikovévare ndojejukamoʼãiha Jonatánpe. Ni peteĩ iñakãrangue rehe ndojepokomoʼãi. Ñandejára oipytyvõ chupe ogana hag̃ua koestedía”.+ Pe puévlo osalva rupi Jonatánpe, ndojejukái chupe.
46 Ha upérõ Saúl ndopersegivéi umi filistéope, ha haʼekuéra ohopa jey iterritóriope.
47 Ha Saúl omombarete igoviérno ha omanda Israel tuichakuére. Haʼe oñorairõ entéro iñenemígo ndive oĩva Israel jerére. Oñorairõ umi moabítandi,+ umi ammonítandi,+ umi edomítandi,+ umi filistéondi+ ha umi rréi Zobaguándi.+ Haʼe ohohápe oñorairõ ogana iñenemigokuérape. 48 Haʼe pyʼaguasúpe oho oñorairõ umi amalequítandi+ ha ogana chupekuéra. Péicha oprotehe Israélpe iñenemigokuéragui.
49 Saúl raʼykuéra héra Jonatán, Isví ha Malki-Súa.+ Haʼe mokõi itajýra vaʼekue, pe tuichavéva héra Merab+ ha pe imitãvéva Mical.+ 50 Saúl rembireko katu héra Ahinoam, haʼéva hína Ahimáaz rajy. Ha pe odirihíva Saúl ehérsito héra Abner,+ ha itúa héra Ner, haʼéva hína Saúl tio. 51 Saúl túa héra Quis,+ ha Abner túa héra Ner,+ ha Ner túa katu Abiel.
52 Ha Saúl ogoverna aja, siémpre oñorairõ umi filistéondi.+ Saúl ohechávo peteĩ kuimbaʼe ipyʼaguasu ha imbareteha, oraha chupe isoldadorã.+