Números

4 Jehová oñeʼẽ Moisés ha Aarónpe, ha heʼi: 2 “Umi levita apytégui, rekonta vaʼerã mboy cohatítapa+ oĩ. Reanota vaʼerã chupekuéra por família ha asegún máva familiarépa hikuái. 3 Reanota vaʼerã umi orekóva guive éntre 30+ ha 50 áño+ ombaʼapo hag̃ua pe tavernákulope.*+

4 Umi mbaʼe ojapótava umi cohatita pe tavernákulope+ sagradoiterei hína. 5 Umi israelita okontinua vove iviáhe, Aarón ha itaʼyrakuéra oike vaʼerã pe tavernákulope ha oipeʼa pe kortína+ odividíva pe tavernákulo, ha ojahoʼi pype pe Árka del Pákto.*+ 6 Upéva ári jey omoĩ vaʼerã fóka* pirekue ha oipyso avei hiʼári peteĩ téla hovy asýva. Upéi omoĩ vaʼerã hikuái umi yvyra puku+ pe árka rehe ikatu hag̃uáicha ojegueraha.

7 Upéi oipyso vaʼerã hikuái peteĩ téla hovy pe mesa ári,+ upe mesa ojepuru jepi oñemoĩ hag̃ua pe pan oñepresentáva Ñandejárape. Ha oñemoĩ vaʼerã hiʼári umi pláto, umi kópa, umi tasón ha umi hárra ojepurúva oñeñohẽ hag̃ua umi ofrénda líkida.+ Ha pe mesa ári siémpre oĩ vaʼerã pe pan oñepresentáva Ñandejárape.+ 8 Haʼekuéra oipyso vaʼerã entéro umi mbaʼe ári peteĩ téla pytã asýva, ha hiʼári omoĩ vaʼerã avei fóka pirekue. Upéi omoĩ vaʼerã hikuái umi yvyra puku+ ojepurúva jepi ojegueraha hag̃ua pe mesa. 9 Ojagarra vaʼerã avei hikuái peteĩ téla hovy ha ojahoʼi pype pe kandelávro,+ umi lamparaʼi,+ umi pínsa ha umi mbaʼyruʼi ojepurúva oñemoĩ hag̃ua umi mécha tujakue.+ Avei umi mbaʼyru oipurúva hikuái omoĩ hag̃ua aséite ikatu hag̃uáicha hendy pe kandelávro. 10 Upéi haʼekuéra ojahoʼi jey vaʼerã fóka pirekuépe pe kandelávro ha hembiporukuéra. Ha omoĩ vaʼerã hikuái peteĩ armáhe de madéra ári ogueraha hag̃ua. 11 Ha oipyso vaʼerã hikuái peteĩ téla hovy pe altár de óro ári,+ upéi ojahoʼi jey vaʼerã fóka pirekuépe ha omoĩ umi yvyra puku+ pe altár rehe ikatu hag̃uáicha ojegueraha. 12 Upéi haʼekuéra ojagarrapaite vaʼerã umi ótro tembiporu+ oipurúva jepi hikuái pe lugár sagrádope, ha omoĩ peteĩ téla hovy ári ha ojahoʼi jey fóka pirekuépe. Ha omoĩ vaʼerã hikuái peteĩ armáhe de madéra ári ogueraha hag̃ua.

13 Ha oipeʼapa vaʼerã hikuái pe tanimbu* pe altár+ de kóvregui, ha oipyso pe altár ári peteĩ téla ojejapo vaʼekue lána lílagui. 14 Upéi omoĩta hikuái hiʼári umi tembiporu ojepurúva oñembaʼapo hag̃ua pe altárpe: umi válde ojegueraha hag̃ua tanimbu, umi tenedór, umi pála ha umi palangána.+ Upéi ojahoʼi jey vaʼerã hikuái fóka pirekuépe ha omoĩ umi yvyra puku+ pe altár rehe ikatu hag̃uáicha ojegueraha.

15 Umi israelita okontinuáta jave iviáhe oho hag̃ua ótro lugárpe, Aarón ha itaʼyrakuéra ojahoʼipáma vaʼerã opa mbaʼe oĩva pe tavernákulope+ ha umi tembiporukuéra. Upe rire ae oike vaʼerã umi cohatita ogueraha hag̃ua koʼã mbaʼe,+ péro haʼekuéra ndopokói vaʼerã umi mbaʼe oĩvare pe lugár sagrádope, pórke opokóramo hese omanóta.+ Koʼã mbaʼe ojapo vaʼerã umi cohatita okumpli hag̃ua irresponsavilida pe tavernákulope.

16 Eleazar,+ Aarón raʼy oñenkarga vaʼerã pe aséite oñemoĩvare umi lamparaʼípe,+ pe insiénso hyakuã asývare,+ pe ofrénda de semíllare ha pe aséite ojepurúvare ojejapo hag̃ua nombramiénto.+ Haʼe oñenkarga vaʼerã pe tavernákulo kompletoitére ha opa mbaʼe oĩvare pype: pe tavernákulo ha hembiporukuérare”.

17 Jehová heʼi jey Moisés ha Aarónpe: 18 “Aníke peheja umi cohatita+ oñehundipa umi levitakuéra apytégui. 19 Upévare pejapo vaʼerã umi mbaʼe haʼe vaʼekue peẽme, ha péicha nomanomoʼãi hikuái oñemoag̃ui haguére umi mbaʼe sagradoitereívare.+ Aarón ha itaʼyrakuéra oike vaʼerã pe tavernákulope, ha heʼíta káda únope hembiaporã ha mbaʼe mbaʼépa ogueraha vaʼerã. 20 Haʼekuéra oike vove ndohechái vaʼerã ni sapyʼaitemi jepe umi mbaʼe sagrádova, pórke ohecháramo omanóta”.+

21 Upéi Jehová heʼi Moiséspe: 22 “Rekonta vaʼerã mboy guersonítapa+ oĩ. Reanota vaʼerã por família ha asegún máva familiarépa hikuái, 23 enterove umi orekóva éntre 30 ha 50 áño, ha ombaʼapótava pe tavernákulope. 24 Umi guersonita oñatende ha ogueraha vaʼerã koʼã mbaʼe:+ 25 haʼekuéra ogueraha vaʼerã umi téla oĩva pe tavernákulo ári,+ pe fóka pirekue oĩva umíva ári+ ha pe kortína oĩva pe tavernákulo entrádape.+ 26 Avei umi téla ojepurúva oñemongora hag̃ua+ pe tavernákulo oĩháme pe altár, pe kortína oĩva pe korapy entrádape,+ umi piolín, entéro umi tembiporu ha opa mbaʼe ojepurúva ojejapo hag̃ua pe traváho. Koʼã mbaʼe oñenkarga hína chupekuéra ojapo hag̃ua. 27 Aarón ha itaʼyrakuéra ohecha vaʼerã opa mbaʼe ojapóva ha ogueraháva umi guersonita.+ Peẽ peje vaʼerã chupekuéra oñenkargataha koʼã mbaʼére. 28 Koʼã mbaʼe hína la ojapótava umi guersonita ojegueraháta jave pe tavernákulo.+ Itamar+ poguýpe ombaʼapóta hikuái, haʼe hína Aarón pe saserdóte raʼy.

29 Rekonta vaʼerã mboy merarítapa+ oĩ. Reanota vaʼerã por família ha asegún máva familiarépa hikuái, 30 enterove umi orekóva éntre 30 ha 50 áño ha ombaʼapótava pe tavernákulope. 31 Koʼã mbaʼe haʼekuéra ogueraha vaʼerã+ ojeguerováta jave pe tavernákulo: umi armáhe,+ umi yvyra puku,+ umi orkón+ ha umi ivaseʼi ikuáva mbytépe.+ 32 Avei umi póste+ ojepurúva oñemongora hag̃ua pe tavernákulo ha umi ivaseʼi ikuáva mbytépe,+ umi estáka,+ umi piolín ha opa mbaʼe ojepurúva ojejapo hag̃ua pe traváho. Peẽ peje vaʼerã káda únope mbaʼe mbaʼépa ogueraháta. 33 Péicha umi merarita+ ombaʼapo vaʼerã pe tavernákulope. Itamar poguýpe ombaʼapóta hikuái, haʼe hína Aarón pe saserdóte raʼy”.+

34 Moisés, Aarón ha umi kuimbaʼe omoakãva+ israelitakuérape okonta mboy cohatítapa+ oĩ. Oanota chupekuéra por família ha asegún máva familiarépa hikuái, 35 enterove umi orekóva éntre 30 ha 50 áño ha ombaʼapótava pe tavernákulope.+ 36 Oñeanota chupekuéra por família ha en totál ohupyty 2.750.+ 37 Koʼãva hína umi cohatita oñeanota vaʼekue, umi ombaʼapóva pe tavernákulope. Moisés ha Aarón oanota chupekuéra Jehová heʼi hagueichaite Moisés rupive.+

38 Umi guersonítape+ oñeanota por família ha asegún máva familiarépa hikuái, 39 enterove umi orekóva éntre 30 ha 50 áño ha ombaʼapótava pe tavernákulope. 40 Oñeanota chupekuéra por família ha asegún máva familiarépa hikuái, en totál ohupyty 2.630.+ 41 Koʼãva hína umi guersonita oñeanota vaʼekue, umi ombaʼapóva pe tavernákulope. Moisés ha Aarón oanota chupekuéra Jehová heʼi hagueichaite.+

42 Umi merarítape oñeanota por família ha asegún máva familiarépa hikuái, 43 enterove umi orekóva éntre 30 ha 50 áño ha ombaʼapótava pe tavernákulope.+ 44 Oñeanota chupekuéra por família ha en totál ohupyty 3.200.+ 45 Koʼãva hína umi merarita oñeanota vaʼekue. Moisés ha Aarón oanota chupekuéra Jehová heʼi hagueichaite Moisés rupive.+

46 Moisés, Aarón ha umi kuimbaʼe omoakãva israelitakuérape okonta mboy levítapa oĩ. Oanota chupekuéra por família ha asegún máva familiarépa hikuái. 47 Oñeanota umi orekóva guive éntre 30 ha 50 áño, ombaʼapo ha ogueraha hag̃ua umi kárga ojeguerováta jave pe tavernákulo.+ 48 En totál umi oñeanota vaʼekue ohupyty 8.580.+ 49 Chupekuéra oñeanota Jehová heʼi hagueichaite Moisés rupive, káda únope asegún mbaʼépa ojapo vaʼerã ha mbaʼépa ogueraha vaʼerã. Oñeanota chupekuéra Jehová heʼi hagueichaite Moiséspe.