Jeremías
13 Péicha heʼi Jehová: “Tereho ejogua ne sintorã de líno ha emoĩ nde kuʼáre, péro aníke remboykue”. 2 Upémarõ Jehová heʼi haguéicha chéve, ajogua la che sintorã ha amoĩ che kuʼáre. 3 Upéi Jehová oñeʼẽ jey chéve 2 veseha: 4 “Ejagarra pe sínto ejogua vaʼekue ha erekóva ndejehe ha epuʼã tereho Rrío Éufratespe, ha eñomi upépe peteĩ itakuápe”. 5 Upémarõ Jehová omanda haguéicha chéve, aha añomi pe Rrío Éufrates ypýpe.
6 Péro upéi heta día ohasa rire, Jehová heʼi chéve: “Epuʼã tereho Rrío Éufratespe, ha ejagarra upégui pe sínto haʼe vaʼekue ndéve reñomi hag̃ua upépe”. 7 Upémarõ aha pe Rrío Éufratespe ha ajoʼo aguenohẽ hag̃ua pe sínto ha ajagarra upe añomi haguégui, ha atopa pe sínto oñembyaipaitéma, ndoikoveietéma.
8 Upéi Jehová heʼi chéve: 9 “Péicha heʼi Jehová: ‘Ko síntoicha ahundíta Judá oñemombaʼeguasuetévape ha Jerusalén oñemombaʼeguasuetévape, ha amotĩta chupekuéra.+ 10 Koʼã hénte aña naiñeʼẽrenduséiva chéve,+ ojapóva oikóvo tovaʼatãme ikorasõ heʼíva,+ ha oadoráva hína umi ótro dióspe, oservi ha oñesũva henondepekuéra, ko sintoichaite avei opytáta ndovalevéi’. 11 Jehová heʼi: ‘Pe sínto opytaháicha peteĩ kuimbaʼe kuʼáre, péicha avei areko kuri kompletoite Israel rogayguápe ha kompletoite Judá rogayguápe, ikatu hag̃uáicha oiko chuguikuéra che puévlo,+ peteĩ mbaʼe iporãitereíva, chemoherakuã porãva ha ojeguerohory hag̃ua che réra.+ Péro haʼekuéra naiñeʼẽrendúi’.+
12 Ha ere vaʼerã chupekuéra ko mbaʼe: ‘Péicha heʼi Israel Jára Jehová: “Kompletoite umi hárra guasúpe oñemyenyhẽ vaʼerã víno”’. Ha haʼekuéra heʼíta ndéve: ‘¿Ore piko ndoroikuaái voi mbaʼe oñemyenyhẽ vaʼerãha víno kompletoite umi hárra guasúpe?’. 13 Upéicharõ ere chupekuéra: ‘Péicha heʼi Jehová: “Amongaʼupaitéta enterove oikóvape ko paíspe,+ umi rréi oguapývape David trónope, umi saserdóte ha profetakuérape, ha kompletoite oikóvape Jerusalénpe. 14 Ha ajapetéta chupekuéra ojuehe, peteĩ túa ha itaʼýrare peteĩchante ajapóta”, heʼi Jehová.+ “Ndaiporiahuverekomoʼãi ni nambyasymoʼãi chupekuéra, mbaʼeve ndachejokomoʼãi ahundi hag̃ua chupekuéra”’.+
15 Pehendúkena ha peñatende.
Ani peñemombaʼeguasu, pórke Jehová oñeʼẽma.
16 Pemombaʼeguasu pende Jára Jehovápe,
haʼe ogueru mboyve pytũ,
ha peñepysanga mboyve umi montañaháre pytũ mbotávo.
17 Ha nohenduséiramo hikuái,
che cherasẽta* ñemiháme peñemombaʼeguasu rupi.
Heta añohẽta che resay, che reságui osyrýta che resay,+
pórke Jehová ovechakuéra+ ojegueraháma prisionéroramo.
18 Ere pe rréi ha isýpe:+ ‘Peguapy peteĩ lugár ikarapevehápe,
pórke pene koróna porãite hoʼáta pene akãgui’.
19 Umi siudakuéra sur gotyogua oñembotypáta,* ha ndaipóri avave oavri vaʼerã.
Judá kompletoite ojegueraha prisionéroramo ótro tetãme, enterovetépe voi ojegueraha prisionéroramo.+
20 Emaña mombyry ha ehecha umi oúvape hína nórteguio.+
¿Moõpa oime umi ovecha oñemeʼẽ vaʼekue ndéve, umi nde ovechakuéra iporãitéva?+
21 ¿Mbaʼépa eréta ág̃a ndekastiga vove
umi siémpre retrata vaʼekuépe ne amigoitéramo?+
¿Nde piko nanderasyetemoʼãi hasyháicha peteĩ kuña imembýva hína?+
22 Ha ere vove nde pyʼapýpe: ‘¿Mbaʼére piko oiko cherehe koʼã mbaʼe?’.+
Nde ningo tuichaiterei rejavy, upéicha rupi ojepeʼa ndehegui nde polléra+
ha ndepyta rasypa.
23 ¿Ikatúne piko peteĩ cusita* okambia ipire kolór, térã peteĩ leopárdo* okambia pe iparaha?+
Oiméramo ikatu ojapo, upéicharõ peẽ ikatúta avei pejapo iporãva,
peẽ pendevaletéva pejapo hag̃ua ivaíva.
24 Upéicha rupi pomosarambíta pe yvytu desiertopegua omboveveháicha pe kapiʼi pirukue.+
25 Kóva la nderupytýva, kóva hína pe párte ameʼẽ vaʼekue ndéve”, heʼi Jehová.
“Pórke nde nderesarái chehegui+ ha rejerovia umi japúre.+
26 Upévare che ahupíta nde polléra nde rova ári,
ha rejehechapáta.+
27 Nde reporomoakãratĩ+ reikóvo ha rerrelincha peteĩ jégua imbaʼepotávaicha,
neretĩri* nderekovai hag̃ua.
Umi sérro ári ha umi ñúre,
ahecha mbaʼeichaitépa rejapo umi mbaʼe oporombojeguarúva.+
¡Aichejáranga nde Jerusalén!
¿Arakaʼe peve piko resegíta nderekokyʼa?”.+