Isaías
18 Cháke oho vaíta pe lugár oĩva Etiopía rrío ypýpe,+
pe tetã ningo henyhẽte umi vícho ovevévagui, koʼãva ipepo hyapupa.
2 Haʼekuéra omondo mensahéro ohóva mar rehe,
ojupi hikuái umi kanóape.* Ha ojeʼe chupekuéra:
“Peẽ pendepyaʼetéva,
tapeho pe lugár oikohápe umi hénte ijyvatéva ha ipire suáve asýva.
Opárupi ojekyhyje chuguikuéra,+
haʼekuéra imbarete ha ojagarráma heta tetã.
Ko tetãre ohasa umi rrío”.
3 Entéro peẽ peikóva pe tetãme ha umi hénte oikóva ko yvy tuichakuére,
la peẽ pehechátava ojoguáta peteĩ señál* oñemopuʼãvape umi montáña ári,
ha pehendúta peteĩ tyapu ojoguátava umi turu púpe.
4 Jehová heʼíma chéve:
“Pyʼaguapýpe porã amañáta upe lugár oñemopyenda porã vaʼekuére.
Aĩta upépe omimbiháicha ha ombyakuháicha pe kuarahy,
ha pe ysapy hoʼaháicha mbeguekatu asy kosécha tiémpope haku jave.
5 Og̃uahẽ mboyve pe kosécha tiémpo,
ipotypa rire umi parrál ha hiʼajúvo ohóvo,
umi hoky ojepodáta,
umi hakã ojetrosáta ha ojepeʼaitéta.
6 Umi hénte reʼongue oñemombóta
hoʼu hag̃ua umi guyrakuéra oikóva montáñare ha umi animál salváhe.
Pe veráno aja umi guyra okarúta upépe,
ha umi animál salváhe okarúta upépe kosécha tiémpope.
7 Jehová ningo umi ehérsito yvagapegua ruvicha, ha upe tiémpope ojeguerúta chupe peteĩ rregálo.
Pe rregálo ojeguerúta pe tetã oikohágui umi hénte ijyvatéva ha ipire suáve asýva.
Opárupi ojekyhyje chuguikuéra,
haʼekuéra imbarete ha ojagarráma heta tetã,
ko tetãre ohasa umi rrío.
Pe rregálo ojegueraháta Sérro Siónpe,+ upépe ningo oĩ Jehová réra porãite, haʼe ningo hína umi ehérsito yvagapegua ruvicha”.