Isaías
58 “Eikuaauka che puévlope irreveldeha.
Emombeʼu Jacóbpe umi mbaʼe vai ojapóva.
¡Ani rejejoko, hatã ere koʼã mbaʼe!+
Hatã esapukái peteĩ turúicha.
2 Káda día haʼekuéra oheka che gía,
heʼi oikuaasetereiha umi che rape.
Péicha heʼi hikuái ojaporõguáicha iporãva,
ha ndohejairõguáicha Ijára mandamientokuéra.+
Ojerure avei chéve ojehusga porã hag̃ua chupekuéra,
ovyʼarõguáicha ikatu haguére oñemoag̃ui cherehe.+
3 Ha koʼág̃a haʼekuéra heʼi: ‘¿Mbaʼére piko nerepenái orerehe roajuna jave?+
Ore* ningo roñembyasy ropeka haguére, ¿nde piko nderehechái voi upéva?’.+
Ha che akontesta: peẽ ningo peajuna jave okonveníva* peẽmente pejapo,
ha petrata vai pende personalkuérape.+
4 Peẽ ningo káda ke peajuna, katuete peñorairõmba,
peneñaña ha peñonupã vaipa.
Péichante pesegíramo peajuna, ndaikatúi pehaʼarõ ahendu la pejeruréva.
5 ¿Che piko amanda peẽme péicha peajuna hag̃ua?
¿Peimoʼã piko che aipotaha péicha pesufri?
Peiko peñakãity guaʼu peteĩ plántaicha, peñeno umi ao chalái ha tanimbu ári.
¿Péva piko la ajúno peẽme g̃uarã?
Che ningo Jehová, ¿peimoʼã piko péicha chembovyʼataha?
6 Nahániri, che aipota pejapo koichagua ajúno:
aipota peipeʼa umi prisionérogui umi kadéna oñemoĩ reiete vaʼekue hesekuéra,
pemondoho umi pióla oñapytĩva pe júgo pohýi ogueraháva umi hénte,+
pepoi umi osufrívagui,+
pemopẽ umi júgo ogueraháva umi hénte.
7 Che aipota pekomparti pene rembiʼu umi iñembyahýiva ndive,+
pemoinge pende rógape umi ndahógaivape ha umi imboriahúvape,
Ani pemboyke pene hentekuérape.
8 Pejapóramo péicha, pende lus koʼẽjúicha omimbíta,+
ha pyaʼeterei pekuera jeýta.
Pe hustísia ohóta pene renonderã,
ha Jehová podér pendeprotehéta pende kupéguio.+
9 Ha pejeruréramo ajúda Jehovápe, haʼe katuete penerendúta,
pehenóiramo chupe, haʼe heʼíta peẽme: ‘Koʼápe aime’.
Peẽ peipeʼa vaʼerã umi júgo pemoĩva ótrore,
ha anive peiko peseñala pende rapichápe ha peñeʼẽ vai hese.+
10 Peẽ pemeʼẽ vaʼerã umi iñembyahýivape la peẽ* voi peʼuséva,+
pemeʼẽ vaʼerã umi osufrívape hemikotevẽ.
Pejapóramo upéicha, peẽ pehesapéta pe pytũmbýpe,
ha pytũramo jepe, peẽme g̃uarã hesakãta asajepytéicha.+
Che pomombaretéta,*
pejoguáta peteĩ hardín ojerrega porãvape,+
pejoguáta peteĩ ykua núnka ndahypáivape.
12 Umi lugár oñehundipa vaʼekue, peẽ pemopuʼã jeýta,+
pemyatyrõta umi simiénto hetaite tiémpore opyta rei vaʼekue.+
Pemyatyrõta umi murálla ha umi kálle,+
ha opárupi umi hénte pendekuaáta pejapo rupi koʼã mbaʼe.
13 Pe sábado ningo sagrádo chéve g̃uarã, upévare peẽ perrespeta vaʼerã ha pemboyke umi mbaʼe pejaposéva.*+
Che, Jehová, haʼéma pe sábado sagradoha, ha peẽ pemombaʼe vaʼerã upe día, pevyʼa vaʼerã pejapóvo upéva.+
Pemombaʼe vaʼerã pe sábado, pemotenonde rangue pejaposéva, ha peiko rangue peñeʼẽ vyroreíre.
14 Pejapóramo upéicha, che, Jehová, poipytyvõta pevyʼa hag̃ua,
ha perekóta pende poguýpe umi lugár ijyvatéva.+
Peẽ pedisfrutáta perresivívo Jacob, pende túa ypykue yvy pene erensiarã.+
Che hína Jehová, ha che haʼéma oikotaha koʼã mbaʼe”.