1 Samuel

24 Saúl oñorairõ rire umi filisteo kóntrape, ojeʼe chupe: “David oĩ hína En-Guedípe,+ pe desiértope”.

2 Upémarõ Saúl oiporavo 3.000 soldádo Israelguápe ha osẽ oheka David ha isoldadokuérape. Oho umi sérrore oikohápe umi kavara oikóva umi montáñare. 3 Upéi Saúl og̃uahẽ peteĩ lugár oñemoĩháme jepi umi ovechápe.* Upérupi oĩ avei peteĩ kuéva ha Saúl oike upépe oĩ hag̃ua váñope.* Péro David ha isoldadokuéra okañy hína avei pe kuéva ruguaitépe.+ 4 Ha umi soldádo heʼi Davídpe: “Koestedía Jehová ontrega ne enemígo nde pópe,+ ha ikatu rejapo hese rejaposéva”. Upémarõ David opuʼã ha kirirĩhaitépe oñemboja ha oikytĩ Saúl ao* ruguái. 5 Péro upéi ojopy chupe ikonsiénsia*+ ha oñeñandu vai oikytĩ haguére Saúl ao ruguái. 6 Ha David heʼi isoldadokuérape: “Ni mbaʼevéicharõ ndajapomoʼãi mbaʼeve che ruvicháre, pórke haʼe hína Jehová elehído.* Jehová oiporavóma chupe ha ivaietereíta Jehovápe g̃uarã ajapórõ algúna kósa hese”.+ 7 Heʼívo koʼã mbaʼe David ojoko isoldadokuérape, haʼe ndohejái oataka hikuái Saúlpe. Upéi Saúl osẽ pe kuévagui ha osegi la hape.

8 Upe rire David osẽ pe kuévagui ha osapukái Saúlpe: “¡Rréi Saúl, che ruvicha!”.+ Saúl ojerévo omaña, David oñesũ ha oñakãityete. 9 Ha David heʼi Saúlpe: “¿Mbaʼére piko repena umi hénte heʼívare che roperhudikaseha?+ 10 Koestedía nde rehecha mbaʼéichapa Jehová nentrega che pópe pe kuévape. Ha peteĩ soldádo heʼi chéve rojuka hag̃ua,+ péro che roiporiahuvereko ha haʼe chupe: ‘Ndovaléi ajapo mbaʼeve ivaíva che ruvicháre pórke haʼe Jehová elehído’.+ 11 Che ru emañami, che pópe areko nde ao ruguái pedáso. Aikytĩrõ guare nde ao ruguái che ikatu kuri rojuka, péro ndajapói upéva. Koʼág̃a rehechakuaa che napuʼãiha nderehe ni ndorojukaseiha. Che ndapekái ne kóntrape,+ nde katu reiko chepersegi chejuka hag̃ua.*+ 12 Jehová ohusgáta ñande káso.+ Ha Jehová toñevenga nderehe che vése,+ pórke che ndajapomoʼãi mbaʼevete asy nderehe.+ 13 Ymaite guive oĩ voi peteĩ ñeʼẽnga heʼíva: ‘Iñañávamante ojapo ivaíva’, upévare che ndajapomoʼãi nderehe mbaʼeve. 14 Epensamíntena mávapepa repersegi hína. Nde ningo Israel rréi, ha ne renondépe che peteĩ tungusúnte.+ Che haʼete peteĩ jagua reʼongue ndoapeligravéimava avavépe. 15 Jehová tañandehusga ha tohecha la oikóva.+ Haʼe ojapóta chéve hustísia ha chesalváta ndehegui”.

16 David heʼipáre koʼã mbaʼe, Saúl heʼi: “¿Ndéiko hína che raʼy David?”.+ Ha upe rire oñepyrũ hasẽ soro. 17 Ha Saúl heʼi Davídpe: “Nde ningo ndehustove chehegui, nde chetrata porã ha che katu cheñaña nendive.+ 18 Koestedía nde rehechauka nevuenoha chendive, pórke Jehová chentregáramo jepe nde pópe, nde ndachejukái.+ 19 ¿Máva piko ótro ohejátante iñenemígope oho jey trankiloite? Péro nde nderejapói mbaʼeve cherehe koestedía, upévare Jehová nevendesíta.+ 20 Koʼág̃a che aikuaa katuete oikotaha ndehegui rréi,+ ha ne família ogovernataha pára siémpre Israélpe. 21 Che aipota rejapo peteĩ huraménto Jehová réra rehe.+ Epromete nderejukapamoʼãiha che familiakuérape che amano rire. Péicha che réra ndopytamoʼãi tesaráipe che hentekuéra apytépe”.+ 22 Upémarõ David ojapo pe huraménto ha Saúl oho jey hógape.+ David ha isoldadokuéra katu oho jey pe lugár isegúro porãvape okañy haguépe hikuái.+