Números

14 Upépe enterove umi israelita osapukái ha ojeplagea, ha osegi voi ojaheʼo hikuái upe pyhare pukukue.+ 2 Enterovete umi israelita oñepyrũ ojeplagea Moisés ha Aarón kóntrape,+ ha oñeʼẽ vai hesekuéra heʼívo: “¡Ikuentave vaʼerãmoʼã ñamanomba kuri Egíptope, térã ñamanomba ko desiértope! 3 ¿Maʼerã piko Jehová ñandegueraha hína upe lugárpe, umi hénte ñandejukapa hag̃ua espádape?+ Ñane enemigokuéra oguerahapáta ñandehegui ñane rembireko ha ñane familiakuéra.+ ¡Iporãvéta ningo jaha jeýnte Egíptope!”.+ 4 Heʼi voi katu hikuái ojupe: “¡Jaiporavo peteĩ ñanemoakã vaʼerã ha jaha jey Egíptope!”.+

5 Upémarõ Moisés ha Aarón oñesũ ha oñakãityete, ha enterove umi israelita ohecha chupekuéra ojapórõ guare upéicha. 6 Ha Josué,+ Nun raʼy, ha Caleb,+ Jefuné raʼy, omondoro ijao ohechauka hag̃ua ombyasyha la oikóva. Haʼekuéra ningo oho vaʼekue avei ovichea hag̃ua pe yvy. 7 Ha heʼi hikuái enterove umi israelítape: “Pe yvy roho vaʼekue rovichea hag̃ua ningo iporã, ha añetehápe iporãiterei voi.+ 8 Jehová ñandeguerohorýramo, katuete ñandegueraháta upe yvy opromete vaʼekuépe, ha omeʼẽta ñandéve pe yvy ýicha osyryhápe kamby ha eirete.+ 9 Péro ani pepuʼã Jehováre, ha ani pekyhyje umi hénte oikóvagui upe lugárpe,+ pórke ñande katuete ñandepuʼakáta hesekuéra. Avave ningo ndoprotehevéima chupekuéra, ha ñanendive katu oĩ Jehová.+ Aníke pekyhyje chuguikuéra”.

10 Upéicharõ jepe enterove umi israelita oamenasa ojapitaha chupekuéra itápe ojuka peve.+ Péro Jehová ojechauka chupekuéra pe tavernákulo* ári.+

11 Ha Jehová heʼi Moiséspe: “¿Arakaʼe peve piko ndacherrespetamoʼãi ko puévlo,+ ha arakaʼe peve piko ndojeroviamoʼãi cherehe hikuái? Hiʼarive che ajapóma heta milágro* henondepekuéra.+ 12 Koʼág̃a amboúta chupekuéra mbaʼasy ha ahundíta chupekuéra, ha ndehegui katu ajapóta peteĩ nasión tuichavéva ha ipoderosovéva”.+

13 Péro Moisés heʼi Jehovápe: “Nde ningo ndepoderóso rupi reguenohẽ vaʼekue ko puévlope Egíptogui, ha koʼág̃a rejapóramo péicha umi egipcio oikuaáta upéva,+ 14 ha haʼekuéra omombeʼúta umi oikóvape ko lugárpe. Ha umi hénte ohendu avei nde, Jehová, reimeha ko puévlondi,+ rejechaukaha chupekuéra ha reñeʼẽha hendivekuéra frénte a frénte.+ Haʼekuéra ohendu avei nde haʼeha Jehová, nde arai oĩha ko kampaménto ári, ha nde rehoha hína henonderãkuéra peteĩ araípe* de diakue ha peteĩ tatarendýpe* pyharekue.+ 15 Ha una vetépe rejukapáramo ko puévlope, upéicharõ enterove umi ótra nasión ohendúmava nde ndepoderosoha, heʼíta: 16 ‘Jehová ndaikatúi kuri omoinge ipuévlope pe yvy opromete vaʼekuépe, upéicha rupi ojukapa chupekuéra pe desiértope’.+ 17 Ha koʼág̃a Jehová, ehechaukamína mbaʼeichaitépa nde ndepoderóso, repromete haguéicha erérõ guare: 18 ‘Jehová ndaipochyreíri ha oporohayhueterei,*+ operdona umi ojavývape, hembiapo vaíva ha opekávape, péro ni mbaʼevéicharõ ndohejareimoʼãi umi ofallávape. Peteĩ túa ofalláramo akastigáta chupe, ha upe kastígo ohupytýta itaʼýrape, iniétope ha avei ivisniétope’.+ 19 Ha reporohayhuetereígui, eperdonamína ko puévlope ojavy haguére, eperdonamína ko puévlope eperdona haguéicha chupekuéra osẽ guive Egíptogui koʼag̃aite peve”.+

20 Upémarõ Jehová heʼi: “Aperdonáta chupekuéra nde ere haguéicha.+ 21 Péro che, Jehová, ahura ndéve che rekovére, pe yvy tuichakuére ojekuaataha mbaʼeichaitépa chepoderóso.+ 22 Upéicharõ jepe, ni peteĩ kuimbaʼe ohecha vaʼekue che podér ha umi milágro+ ajapo vaʼekue Egíptope ha pe desiértope, péro lomímonte osegi vaʼekue chedesafia ha opuʼã cherehe+ heta vése* ha nohenduséi che ñeʼẽ,+ 23 haʼekuéra ndohechamoʼãi asy pe yvy apromete vaʼekue ituakuérape. Ni peteĩ umi ndacherrespetái vaʼekue ndohechamoʼãi upe yvy.+ 24 Péro che siérvo Caleb+ idiferénte vaʼekue umi ótrogui,* ha osegi iñeʼẽrendu chéve ipyʼaite guive. Upévare amoingéta chupe pe yvy oho vaʼekuépe ohecha, ha umi ifamiliare ojagarráta upe yvy.+ 25 Umi amalequita ha umi cananeo+ oiko hína pe ñúme, upévare koʼẽrõ peẽ pejere vaʼerã ha peho pe desiértope Mar Rojo rapére”.+

26 Upéi Jehová heʼi Aarón ha Moiséspe: 27 “¡Arakaʼe peve piko ko puévlo oikóta péicha ojeplagea che kóntrape!+ Ahendu mbaʼeichaitépa umi israelita oñeʼẽ vai cherehe.+ 28 Ere chupekuéra: ‘Péicha heʼi Jehová: “¡Ahura peẽme che rekovére ajapotaha penderehe opa mbaʼe peje vaʼekue peñeʼẽ vaírõ guare cherehe!+ 29 Enterovete umi orekóva 20 áño guive, umi oñesensa ha oñeʼẽ vai vaʼekue che kóntrape, hoʼáta omanombaite ko desiértope.+ 30 Pende apytégui ni peteĩ ndoikemoʼãi pe yvy apromete vaʼekuépe ameʼẽtaha peẽme peiko hag̃ua.+ Caleb, Jefuné raʼy, ha Josué, Nun raʼy añoite oikéta.+

31 Amoingéta avei upépe pende raʼykuérape, umi peẽ peje vaʼekue oguerahapataha pene enemigokuéra.+ Haʼekuéra oikuaáta pe yvy peẽ pedespresia vaʼekue.+ 32 Peẽ katu pemanombaitéta ha pene reʼongue opytapáta ko desiértope. 33 Koʼág̃a guive pende raʼykuéragui oikóta pastór pe desiértope 40 áño pukukue,+ ha opagáta hikuái umi mbaʼe vai peẽ pejapo vaʼekuére,* enterovete peẽ pemanomba peve pe desiértope.+ 34 Peẽ ningo 40 día+ peho vaʼekue pevichea pe yvy, upévare 40 áño+ pepagáta pene rembiapo vaikuére, pepagáta un áño por káda día. Ha péicha peikuaáta mbaʼépa oiko umi opuʼãvare cherehe.

35 Che, Jehová, haʼéma péicha ajapotaha enterove koʼã hénte aña oñembyatývare koʼápe opuʼã hag̃ua cherehe: ko desiértope oñehundíta ha koʼápe omanombáta hikuái.+ 36 Umi kuimbaʼe omondo vaʼekue Moisés ovichea hag̃ua pe yvy ha omboliga vaʼekue umi héntepe oñeʼẽ vai hag̃ua ikóntrape, haʼekuéra ou jeýrõ guare ivaívante voi omombeʼu upe lugár ohecha vaʼekuére.+ 37 Koʼã kuimbaʼe omombeʼu vaʼekue ivaívante voi upe lugár ohecha vaʼekuére. Chupekuéra ojekastigáta ha omanóta Jehová renondépe.+ 38 Péro Caleb, Jefuné raʼy, ha Josué, Nun raʼy añoite nomanomoʼãi. Haʼekuéra oho vaʼekue avei umi ótro kuimbaʼéndi ovichea hag̃ua pe yvy”’”.+

39 Moisés heʼírõ guare koʼã mbaʼe umi israelítape, haʼekuéra oñembyasyeterei ha hasẽ. 40 Ha opuʼã hikuái pyharevete voi porã ha oho ojupi hag̃ua pe montáña ruʼãme, ha heʼi hikuái: “Ore rofalla kuri, péro koʼág̃a roiméma preparádo rojupi hag̃uáicha pe lugár Jehová heʼi haguépe”.+ 41 Péro Moisés heʼi: “¿Mbaʼére piko pejapose koʼág̃a Jehová ndeʼíri vaʼekue peẽme? Nosẽporãmoʼãi peẽme upéva. 42 Ani pejupi, pórke Jehová napenepytyvõmoʼãi, ha umi pene enemigokuéra penerundíta.+ 43 Umi amalequita ha umi cananeo oĩ pene renonderãme,+ ha haʼekuéra pendejukáta espádape. Jehová noĩmoʼãi penendive, pórke peẽ pepuʼã Jehováre ha napeneñeʼẽrendúi chupe”.+

44 Haʼekuéra ndoikuaaséi mbaʼeve ha oñepyrũ ojupi pe montáña ruʼã gotyo,+ péro Jehová Árka del Pákto ha Moisés opyta pe kampaménto mbytépe.+ 45 Upémarõ umi amalequita ha umi cananeo oikóva upe montáñape, oguejy ha oñepyrũ omuña ha ojuka ohóvo chupekuéra Hormá peve.+