MALAQUÍAS

1 Ñandejára heʼi ko mbaʼe iñimportantetéva:

Jehová heʼi koʼã mbaʼe Israélpe Malaquías* rupive:

2 “Che pohayhu”,+ heʼi Jehová.

Péro peẽ peje: “¿Mbaʼéicha piko rehechauka oréve orerayhuha?”.

“¿Esaú piko ndahaʼéi vaʼekue Jacob ermáno?”,+ heʼi Jehová. “Che katu ahayhu vaʼekue Jacóbpe, 3 péro ndachaʼéi Esaú rehe,+ ha aheja nandi vera umi imontañakuéra+ ha ameʼẽ pe iñerénsia umi jagua salváhe* oĩvape desiértope”.+

4 “Edom* heʼíramo jepe: ‘Roñehundiete ningo ore, péro roju jeýta ha romopuʼã jeýta umi mbaʼe hoʼapa vaʼekue’, péicha heʼi Jehová, umi ehérsito yvagapegua ruvicha: ‘Haʼekuéra omopuʼãta péro che aitypaite jeýta, ha umi hénte ohenóita upe lugárpe “território ojejapoha heta mbaʼe vai”, ha ohenóita chupekuéra “umi hénte Jehová okondena vaʼekue pára siémpre”.+ 5 Pende resarupiete peẽ pehecháta upéva, ha pejéta: “Toñemombaʼeguasu Jehovápe Israel território tuichakuére”’”.

6 “‘Peteĩ taʼýra omombaʼe itúape,+ ha peteĩ siérvo omombaʼe ipatrónpe. Ha che oiméramo haʼe peteĩ túa,+ ¿mbaʼére piko nachemombaʼéi che amereseháicha?+ Ha oiméramo che haʼe peteĩ patrón,* ¿mbaʼére piko ndacherrespetái* che amereseháicha?’, heʼi Jehová, umi ehérsito yvagapegua ruvicha, umi saserdóte odespresiávape che réra.+

‘Péro peẽ peje: “¿Mbaʼéicha piko ore rodespresia raʼe nde réra?”’.

7 ‘Pepresentávo che altárpe hiʼupy* ikyʼáva’.

‘Ha peẽ peje: “¿Ha mbaʼéicha piko ore romongyʼa raʼe nde réra?”’.

‘Pejapo upéva pejévo: “Jehová mesa+ ningo ojedespresia vaʼerã”. 8 Ha pepresenta jave sakrifísioramo peteĩ animál isiégova peje: “Ndahaʼéingo mbaʼeve”. Ha pepresenta jave peteĩ animál ikarẽva térã peteĩ hasýva, peẽ peje: “Ndahaʼéingo mbaʼeve”’”.+

“Peguerahamína avei peichagua rregálo pene governadórpe, ¿ojagarránepa pendehegui? ¿Pendeguerohorýnepa pejapóramo upéicha?”, heʼi Jehová, umi ehérsito yvagapegua ruvicha.

9 “Ha koʼág̃a, pejerure asýkena Ñandejárape imbaʼeporã hag̃ua ñanendive. ¿Haʼe piko pendeguerohorýta peguerúramo peichagua ofrénda?”, heʼi Jehová, umi ehérsito yvagapegua ruvicha.

10 “¿Ha oĩne piko pende apytépe omboty vaʼerã pe témplo rokẽ,+ térã omyendy vaʼerã tata che altárpe okovraʼỹre mbaʼeve?+ Che ndapoguerohoryiete voi ha ndaipotái umi ofrénda pemeʼẽva chéve rregáloramo”,+ heʼi Jehová, umi ehérsito yvagapegua ruvicha.

11 “Che réra oñembotuicháta umi nasionkuérape, éste guive oéste peve.*+ Entéro lugárpe oñemotimbóta umi sakrifísio ha che rérape ojejapóta umi ofrénda, peteĩ rregálo aguerohorývaicha, pórke che réra oñembotuicháta umi nasionkuérape”,+ heʼi Jehová, umi ehérsito yvagapegua ruvicha.

12 “Péro peẽ pemongyʼa* hína upéva,+ pejévo: ‘Jehová mesa ningo ikyʼa. Umi ofrénda oĩva hiʼári, umi hiʼupy ningo ojedespresia vaʼerã’.+ 13 Ha peje avei: ‘¡Ndaigustoiete ningo!’, ha peapoʼi upéva”, heʼi Jehová, umi ehérsito yvagapegua ruvicha. “Ha peẽ pegueru umi animál oñemonda pyréva, ikarẽva ha umi hasýva. ¡Si, peẽ pegueru umíva rregáloramo! ¿Che piko ajagarra vaʼerã pendehegui?”,+ heʼi Jehová.

14 “Toñemaldesi upe isinverguénsavape, orekóva peteĩ animál mácho hesãiva umi ovecha térã kavara apytépe, péro ojapóva peteĩ promésa Jehovápe ha osakrifika peteĩ animál idefektuósova. Pórke che hína peteĩ Rréi tuichaitereíva,+ ha umi nasionkuéra okyhyje ha orrespetáta che réra”,+ heʼi Jehová, umi ehérsito yvagapegua ruvicha.

2 “Peẽ saserdotekuéra, ko mandamiénto peẽme g̃uarã hína.+ 2 Peẽ napehendúiramo ha napepenáiramo hese pemombaʼe hag̃ua che réra”, heʼi Jehová, umi ehérsito yvagapegua ruvicha, “che pomaldesíta,+ ha umi vendisión perekóvagui ajapóta maldisión.+ Si, napepenái rupi hese, che ajapóma maldisión umi vendisión perekóvagui”.

3 “¡Pemañami! Pende káusare ahundíta* umi pene semílla peñotỹ vaʼekue,+ ha ajapetéta pende rováre umi animál rekaka, umi animál pesakrifikáva rekaka pejapo jave umi fiésta, ha pejegueraháta umíva oĩháme.* 4 Upéicha peikuaáta che ameʼẽ hague peẽme ko mandamiénto, ikatu hag̃uáicha osegi pe kompromíso ajapo vaʼekue Leví ndive”,+ heʼi Jehová, umi ehérsito yvagapegua ruvicha.

5 “Pe kompromíso ajapo vaʼekue hendive rupive haʼe osegi vaʼekue oikove. Ha upéva rupive avei haʼe oiko vaʼekue pyʼaguapýpe ha trankílo porã. Haʼe chemombaʼeguasu* vaʼekue ohupyty rupi koʼã vendisión. Haʼe omombaʼeterei rupi che réra, ndojaposéi vaʼekue mbaʼeve ndachegustáiva. 6 Pe léi* oñeʼẽva añeteguáre osẽ vaʼekue ijurúgui,+ ha haʼe siémpre heʼi vaʼekue siertoguáva. Haʼe oiko vaʼekue pyʼaguapýpe chendive ha ihústo vaʼekue umi mbaʼe ojapóvape che renondépe,+ ha hetápe ombojevy hembiapo vaikuégui. 7 Pórke umi saserdóte omboʼe vaʼerã umi héntepe oikuaa hag̃ua Ñandejárape, ha umi hénte oho vaʼerã oporandu chupekuéra umi mbaʼe heʼívare pe léi,*+ pórke haʼe hína Jehová mensahéro, umi ehérsito yvagapegua ruvicha.

8 Péro peẽ voi pesẽ pe tapégui. Peẽ hetápema pemoñepysanga, upévare haʼekuéra ndojapói pe léi* heʼíva.+ Peẽ pehundi pe kompromíso ajapo vaʼekue Leví ndive”,+ heʼi Jehová, umi ehérsito yvagapegua ruvicha. 9 “Upévare che ahejáta pejedespresia ha pejeapoʼi pe puévlo kompletoite renondépe, pórke peẽ ndapeikói umi che rapére, síno pefavorese algúnopente peipuru jave pe léi peporohusga hag̃ua”.+

10 “¿Ndahaʼéi piko peteĩnte la ñande túa?+ ¿Ndahaʼéi piko peteĩnte pe Ñandejára ñandeapo vaʼekue? ¿Mbaʼére piko upéicharõ ñañotraisiona jaikóvo,+ ha ñamongyʼa pe kompromíso ojapo vaʼekue ñande tuakuéra ypykue? 11 Judá oporotraisiona, ha ojejapo peteĩ mbaʼe oporombojeguarúva Israélpe ha Jerusalénpe, pórke Judá omongyʼa Jehovápe, upe ohayhúva umi mbaʼe sagrádova.*+ Judá omenda kuri peteĩ dios extranhéro rajýre.+ 12 Jehová ohundíta Jacob róga karpakuéragui oimeraẽ ojapóvape upéva, tahaʼe haʼéva* ha opresentáramo jepe rregáloramo peteĩ ofrénda Jehovápe, umi ehérsito yvagapegua ruvichápe”.+

13 “Ha peẽ pejapo avei ótra kósa,* ha upéicha rupi Jehová altár ojejahoʼi tesaýpe, ha oñehendu upépe ojaheʼo ha ipyahẽva, upévare haʼe nopenavéima pene ofrénda pemeʼẽvare rregáloramo, ni ndoguerohoryvéima mbaʼeve pemeʼẽva chupe.+ 14 Ha peẽ peje: ‘¿Mbaʼére piko?’. Pórke Jehová osẽma testígoramo pene kóntrape, peẽ petraisiona haguére pene rembirekópe, upe pemenda vaʼekuére penemitãrõ guare, hiʼarive haʼe hína pene irũ ha pene rembireko pe kompromíso rupive.*+ 15 Péro oĩ kuri peteĩ ndojapói vaʼekue upéva, pórke oreko gueteri michĩmi Ñandejára espíritu sánto. ¿Ha mbaʼe piko oheka raʼe oikóvo upéva? Ñandejára familiare. Upévare peñatendékena umi mbaʼe pepensávare,* ha ani petraisiona pene rembirekópe, upe pemenda vaʼekuére penemitãrõ guare. 16 Pórke che ndachaʼéi* pe divórsiore”,+ heʼi Israel Jára Jehová, “ha ndachaʼéi avei upe orekóvare ijehe umi mbaʼe vai ojapóva* orekoháicha ijehe umi ijao kyʼa”, heʼi Jehová, umi ehérsito yvagapegua ruvicha. “Ha peñatendékena umi mbaʼe pepensávare ha ani peporotraisiona.+

17 Peẽ ningo pemongueráima Jehovápe umi mbaʼe pejéva rupive.+ Péro peẽ peje: ‘¿Mbaʼéicha piko ore romonguerái chupe?’. Pejapo upéva pejévo: ‘Enterove ojapóva ivaíva, ivuéno hína Jehová renondépe, ha haʼe oguerohory chupe’,+ térã pejévo: ‘¿Moõ piko oime pe Ñandejára ojapóva hustísia?’”.

3 “¡Pemañami! Amondo hína che mensahéro ha haʼe opreparáta* peteĩ tape che renonderã.+ Ha derrepentete pe Mburuvicha Tuichavéva, upe peẽ pehekáva peikóvo oúta itémplope,+ ha oúta pe mensahéro pe kompromísope g̃uarã, upe peẽ pehaʼarõva hína vyʼapópe. ¡Pemañami! Haʼe oúta katuete”, heʼi Jehová, umi ehérsito yvagapegua ruvicha.

2 “¿Péro máva piko ogueropuʼakáta pe día haʼe outaha, ha mávapa oĩta preparádo ág̃a haʼe ou vove? Pórke haʼe ojoguáta pe tata omopotĩvape umi metál, ha havõ oipurúvape umi ojohéiva ao.+ 3 Haʼe oguapýta omopotĩ Leví raʼykuérape ojapoháicha peteĩ omboyku ha omopotĩva pláta.+ Haʼe omopotĩta chupekuéra óro ha plátaicha, ha hustísiape opresentáta hikuái Jehovápe peteĩ ofrénda rregáloramo. 4 Jehová añetehápe oguerohoryetereíta* pe ofrénda omeʼẽva rregáloramo Judá ha Jerusalén, haʼe ojapo haguéicha voi ymave.+

5 Che ajúta pohusga hag̃ua ha pyaʼeterei voi akondenáta umi pajesérope,+ umi oporomoakãratĩvape, umi ijapúvape ohura jave,+ umi ombotavýva ipersonálpe ha ndopagapái chupe,+ umi ombohasa asývape pe viúdape ha pe ityreʼỹvape,+ ha umi noipytyvõséivape* umi extranhérope.+ Koʼãva ndokyhyjéi chehegui ha ndacherrespetái”, heʼi Jehová, umi ehérsito yvagapegua ruvicha.

6 “Pórke che hína Jehová, che nakambiái.*+ Peẽ ningo Jacob raʼykuéra, upéicha rupi napeñehundipái gueteri. 7 Pende tuakuéra ypykue tiémpo guive peẽ ndapejapói che mandamientokuéra heʼíva ha napekumplíri umíva.+ Peñemoag̃ui jeýna cherehe, ha che añemoag̃ui jeýta penderehe”,+ heʼi Jehová, umi ehérsito yvagapegua ruvicha.

Péro peẽ peje: “¿Mbaʼéicha guaʼu la roñemoag̃ui jeýta nderehe?”.

8 “¿Ikatu piko peteĩ persóna omonda Ñandejárape? Péro peẽ chemonda hína”.

Ha peẽ peje: “¿Mbaʼe mbaʼéiko romonda raʼe ndehegui?”.

“Peẽ napemeʼẽi umi diésmo* ha umi kontrivusión. 9 Peẽ añetehápe peñemaldesi,* pórke peẽ chemonda hína... si, pe nasión kompletoite voi ojapo hína upéicha. 10 Pegueru pe diésmo kompletoite pe témplope*+ oĩ hag̃ua hiʼupy che rógape,+ ha pechetanteána ko mbaʼépe”, heʼi Jehová, umi ehérsito yvagapegua ruvicha, “jahecha ndaavríripa peẽme pe yvága rokẽ+ ha ahykuavo* pende ári peteĩ vendisión, ndofaltavéi peve peẽme mbaʼeve”.+

11 “Ha penderehehápe napermitimoʼãvéima umi tuku* hoʼupa pendehegui umi mbaʼe peñotỹ vaʼekue, ha katuete hiʼáta pende parralty”,+ heʼi Jehová, umi ehérsito yvagapegua ruvicha.

12 “Enterove umi tetãnguéra heʼíta penderehe pevyʼaha,+ pórke pende yvýgui oikóta peteĩ yvy ojevyʼaha”, heʼi Jehová, umi ehérsito yvagapegua ruvicha.

13 “Peẽ ningo peñeʼẽ pohýi kuri che kóntrape”, heʼi Jehová.

Ha peẽ peje: “¿Mbaʼe piko ore roʼe raʼe ne kóntrape?”.+

14 “Peẽ peje: ‘Mbaʼeve ningo nañaguenohẽi jaservívo Ñandejárape.+ Ha mbaʼevépe ndaideprovéchoi ñandéve ñakumpli umi mbaʼe Ñandejára ojeruréva ñandehegui, ni jaiko ñembyasýpe japeka haguére Jehová renondépe, umi ehérsito yvagapegua ruvicha. 15 Koʼág̃a ore roʼe ovyʼaha umi hénte ijorgullósova. Avei umi ojapóva ivaíva osẽ porã opa mbaʼépe.+ Haʼekuéra notĩri odesafia hag̃ua Ñandejárape ha ndoikói hesekuéra mbaʼeve’”.

16 Upe tiémpope umi orrespetáva Jehovápe oñemongeta oñondive, káda uno pe iñirũ ndive. Ha Jehová osegi ohendu ha oñatende hesekuéra, ha oñepyrũ vaʼekue ojeskrivi henondépe peteĩ lívro+ orekóva umi hénte réra, umi haʼe imanduʼátavare, upépe ojeskrivi máva mávapa okyhyje ha orrespeta Jehovápe ha ojepyʼamongeta* hérare.+

17 “Che ajapóta chuguikuéra che puevlorã”,+ heʼi Jehová, umi ehérsito yvagapegua ruvicha, “upe día ajapo vove chuguikuéra che puévlo espesiál.*+ Aiporiahuverekóta chupekuéra, peteĩ túa oiporiahuverekoháicha itaʼýra iñeʼẽrendúvape chupe.+ 18 Ha peẽ pehechakuaa jeýta idiferenteha peteĩ persóna ihústova ha peteĩ iñañáva,+ peteĩ oadoráva Ñandejárape ha peteĩ ndoadoráiva chupe”.

4 “¡Pemañami! Ou hína pe día hendýva peteĩ tatakua guasúicha,+ upépe enterove umi ijorgullósova ha umi ojapóva mbaʼe vai ojoguáta kapiʼi pirukuépe. Upe día oúva katuete ohapypaitéta chupekuéra”, heʼi Jehová, umi ehérsito yvagapegua ruvicha, “ha ndopytamoʼãi chuguikuéra hakãngue ni hapokue. 2 Péro peẽ pemombaʼeguasúva* che réra, pende ári ojajáita pe kuarahy oguerúva hustísia, ha penemongueráta ohesapévo penderehe pe imimbikue, ha vyʼápe pepopóta vaka raʼy oñemongyra vaʼekuéicha”.

3 “Ha peẽ pepyrũmbaitéta umi iñañávare, pórke haʼekuéra haʼetéta yvykuʼi pende py guýpe pe ajapoha díape koʼã mbaʼe”, heʼi Jehová, umi ehérsito yvagapegua ruvicha.

4 “Penemanduʼákena che siérvo Moisés léi rehe, umi mandamiénto ha umi mbaʼe tekotevẽva oñekumpli ameʼẽ vaʼekue chupe Horébpe, ikatu hag̃uáicha Israel kompletoite okumpli umíva.+

5 ¡Pemañami! Amondo peẽme proféta Elíaspe+ ou mboyve Jehová ára, pe día tuichaite ha oporomongyhyjéva.+ 6 Haʼe ojapóta umi tuakuéra korasõgui umi mitã korasõicha,+ ha umi mitã korasõgui ojapóta umi tuakuéra korasõicha,* ani hag̃ua aju ambyai ko yvy ha ahundiete”.

(Koʼápe opa Escrituras Hebreoarameas traduksión, ha osegi umi Escrituras Griegas)