KÁRTA A LOS GÁLATAS

1 Che, apóstol Pablo askrivi peẽme. Chéve nachenombrái vaʼekue apóstol peteĩ kuimbaʼe, síno Jesucristo+ ha ñande Ru Ñandejára,+ haʼe ningo omopuʼã vaʼekue Crístope umi omano vaʼekue apytégui. 2 Che ha entéro umi ermáno oĩva chendive, roskrivi umi kongregasión oĩvape Galáciape:

3 Aipotaite ñande Ru Ñandejára, ha ñande Ruvicha Jesucristo, imbaʼeporãiterei penendive* ha omeʼẽ peẽme pyʼaguapy. 4 Jesucristo omeʼẽ vaʼekue hekove ñande pekadokuérare,+ ikatu hag̃uáicha ñandepeʼa ko múndo* añágui,+ ñande Ru Ñandejára oipota haguéicha voi.+ 5 Che añemboʼe ñamombaʼeguasu hag̃ua Ñandejárape opa ára g̃uarã. Amén.*

6 Ahecharamoiterei mbaʼéichapa pyaʼete peñemomombyry Ñandejáragui,* ha peasepta ótro mensáhe haʼeramoguáicha umi notísia porã.+ Haʼe ningo penerenói vaʼekue Cristo mbaʼeporãite rupive. 7 Péro ndaipóri ótro notísia porã. Oĩnte hína pende apytépe okreáva peẽme provléma+ ha pendeguerahaséva ótro tapére okambiávo umi notísia porã oñeʼẽva Crístore. 8 Upéicharõ jepe, peteĩva ore apytégui térã peteĩ ánhel yvagapegua, oikuaaukáramo jepe peẽme peteĩ notísia porã idiferénteva umi notísia porã ore roikuaauka vaʼekuégui peẽme, oñekondena vaʼerã. 9 Angete roʼéma haguéicha peẽme, koʼág̃a haʼe jey peẽme: tahaʼe haʼéva upe oikuaaukáva peẽme peteĩ mbaʼe haʼeramoguáicha umi notísia porã, péro idiferénteva umi peẽ peasepta vaʼekuégui, upévape oñekondena vaʼerã.

10 Che nañehaʼãi hína apyta porã kuimbaʼekuéra renondépe, síno Ñandejára renondépe. Upeichaite hína, che nañehaʼãi añemoĩ porã kuimbaʼekuérandi. Oiméramo che añemoĩ porãse gueteri hína kuimbaʼekuérandi, upéicharõ che ndahaʼemoʼãi Cristo esklávo. 11 Pórke aipota peikuaa che ermanokuéra umi notísia porã aikuaauka vaʼekue peẽme, ndouiha yvyporakuéragui.+ 12 Umíva che ndarresivíri vaʼekue peteĩ yvypóragui ni avave nachemboʼéi, síno Jesucristo voi oikuaauka chéve.

13 Peẽ ningo pehendu kuri mbaʼépa che ajapo vaʼekue aĩrõ guare judiokuéra rrelihiónpe,+ mbaʼeichaitépa apersegi mbarete* Ñandejára kongregasión ha ajapo heta mbaʼe vai ikóntrape.+ 14 Che añakãrapuʼãve vaʼekue umi judiokuéra rrelihiónpe entéro umi che avegua oĩvagui che retãme, ha che pyʼaite guive akumpli vaʼekue umi tradisión che tuakuéra orekóva.+ 15 Ñandejára ningo chegueru vaʼekue ko múndope ha imbaʼeporãiterei+ rupi cheporavo, ha ohecha iporãtaha 16 ojevaléramo cherehe aikuaauka hag̃ua umi notísia porã umi ótro tetãyguápe,+ ha péicha haʼekuéra oikuaa hag̃ua Itaʼýrape. Haʼe cheporavórõ guare ajapo hag̃ua upéva che ndajeruréi vaʼekue konsého yvypórape. 17 Ndaarrivái avei Jerusalénpe ajerure hag̃ua konsého umi apóstolpe, haʼekuéra ningo haʼéma vaʼekue apóstol che mboyve. Upéva rangue aha Arábiape ha upéi aju jey Damáscope.+

18 Upe rire, 3 áño haguépe, aarriva Jerusalénpe+ Cefas*+ rendápe ha apyta hendive 15 día. 19 Péro ndahechái ni peteĩ umi ótro apóstolpe, síno Santiágope+ añónte, haʼéva ñande Ruvicha ermáno. 20 Péro ahura Ñandejára renondépe, siertoha umi mbaʼe askrivíva peẽme.

21 Upéi aha Siria ha Cilicia+ territóriope. 22 Péro Jesucristo segidorkuéra oĩva umi kongregasión de Judéape ndachekuaái vaʼekue. 23 Haʼekuéra ohendúnte ojeʼeha ko mbaʼe: “Upe kuimbaʼe ymave ohundise+ vaʼekue ñane rrelihión ha ñandepersegi+ vaʼekue, koʼág̃a oikuaauka hína umi notísia porã”. 24 Upévare haʼekuéra oñepyrũ omombaʼeguasu Ñandejárape upe oiko vaʼekuére cherehe.

2 Upéi 14 áño haguépe, aarriva jey Jerusalénpe Bernabé+ ndive, ha agueraha avei chendive Títope.+ 2 Che aha Jesucristo oikuaauka rupi chéve aha vaʼerãha, ha apresenta umi ermánope umi notísia porã apredikáva aikóvo umi tetãnguérape, péro ajapo upéva umi ermáno iñimportantevéva renondépente, pórke aikuaase kuri oĩ porãpa hína pe tembiapo ajapóva Ñandejárape g̃uarã. Ha oiméramo ndaupéichai ani hag̃ua ambaʼapo rei. 3 Ha Tito+ haʼéramo jepe griego ha oĩ chendive, avave ndoovligái chupe oñesirkunsida+ hag̃ua.* 4 Péro upe provléma oĩ umi ermáno guaʼu oike rupi pe kongregasiónpe ñemiháme+ okontrola hag̃ua pe liverta+ jaguerekóva Cristo rupive, ikatu hag̃uáicha ñandeovliga jaiko jey hag̃ua pe léi esklávoramo.+ 5 Péro ore norohendúi chupekuéra ha noroñemoĩri ipoguypekuéra+ ni sapyʼaitemi* jepe, ikatu hag̃uáicha peẽ pesegi pejepytaso mbarete pe añeteguápe, upe oúva umi notísia porãgui.

6 Péro umi ermáno ojeʼévare iñimportanteha,+ tahaʼe haʼéva upe ojapo vaʼekue hikuái, upéva ndoúi ni ndohói chéve, pórke Ñandejára ndohusgái yvyporakuérape ipíntare, koʼã ermáno ojerrespetaitéva nomeʼẽi vaʼekue chéve ni peteĩ konsého ipyahúva. 7 Haʼekuéra ohechakuaa oñenkarga hague chéve apredika hag̃ua umi notísia porã umi noñesirkunsidáivape,+ Pédrope oñenkarga haguéicha opredika hag̃ua umi oñesirkunsidávape. 8 (Ñandejára omeʼẽ podér Pédrope oservi hag̃ua apóstolramo umi oñesirkunsidávape, ha Ñandejára omeʼẽ avei chéve podér ajapo hag̃ua upe tembiapo umi tetãnguérape).+ 9 Haʼekuéra ohechakuaávo Ñandejára imbaʼeporãitereiha chendive,*+ Santiago,+ Cefas* ha Juan, umi haʼetéva kolúmna kongregasionpegua, orepopyhy Bernabé ha chéve,+ ohechauka hag̃ua enterovete ore haʼeha oñoirũ, ikatu hag̃uáicha roho umi ótro tetãme, péro haʼekuéra ohotaha umi oñesirkunsidáva rendápe. 10 Haʼekuéra ojerurénte oréve oremanduʼa hag̃ua umi ermáno imboriahúvare, ha upéva che añehaʼãmbaite ajapo.+

11 Péro Cefas*+ oúrõ guare Antioquíape+ derechoite haʼe chupe hovaitépe oĩ vaiha upe ojapóva. 12 Pórke ou mboyve umi kuimbaʼe ombou vaʼekue Santiago,+ haʼe okaru kuri oikóvo umi hénte ótro tetãyguándi,+ péro og̃uahẽrõ guare umi kuimbaʼe, haʼe ndojapovéima upéva ha oñemomombyry chuguikuéra, okyhyje rupi umi oapojávagui pe sirkunsisión.+ 13 Umi ótro judío hovamokõi avei haʼéicha, upéi Bernabé entéro hovamokõima avei haʼekuéraicha. 14 Péro ahechávo haʼekuéra ndoikoiha umi notísia porã heʼiháicha, haʼéva hína pe añetegua,+ che haʼe Céfaspe* enterove rovake: “Nde ningo judío ha upéicharamo jepe ndereikói umi judíoicha, síno umi hénte ótro tetãyguáicha, ¿mbaʼéicha piko upéicharõ reovligáta umi ótro tetãyguápe oiko hag̃ua umi judío oikoháicha?”.+

15 Ñande ningo judío ñanase guive, ndahaʼéi pekadór umi ótro tetãyguáicha, 16 ñande ningo jaikuaa Ñandejára heʼiha ihustoha peteĩ kuimbaʼe rehe ndahaʼéi okumpli haguére pe léi, síno ojerovia+ rupi Jesucristo+ rehe. Upévare jajerovia Cristo Jesús rehe, ikatu hag̃uáicha Ñandejára heʼi ñanderehe ñandehustoha jajerovia rupi Crístore, ha ndahaʼéi ñakumpli haguére pe léi, pórke avavére ndaikatúi ojeʼe ihustoha okumpli haguére pe léi.+ 17 Péro ojeʼéramo ñanderehe pekadorha pórke ñande jaipota Ñandejára heʼi ñanderehe ñandehustoha Cristo rupive, ¿heʼise piko upéva Cristo ñanemokyreʼỹha japeka hag̃ua? ¡Ni mbaʼevéicharõ! 18 Aikóramo amopuʼã jey umi mbaʼe yma aitýma vaʼekue yvýre, ahechauka hína che voi nakumpliriha pe léi. 19 Pórke pe léi chepytyvõ rupi, che amano pe léipe+ g̃uarã ikatu hag̃uáicha aikove Ñandejárape g̃uarã. 20 Che ningo ajeklaváma peteĩ yvyráre Cristo ndive.+ Che ndaikovéima chejupe g̃uarã,+ péro Cristo oikove ha haʼe oĩ chendive peteĩ ñeʼẽme. Upévare koʼág̃a aiko hína asegún pe jerovia arekóva Ñandejára Raʼýre,+ haʼe ningo cherayhu ha omeʼẽ kuri hekove cherehehápe.+ 21 Che ndarrechasái* Ñandejára mbaʼeporã,+ pórke peteĩ kuimbaʼe rehe ojeʼéramo ihustoha pe léi rupive, upéicharõ añetehápe Cristo omano reiete.+

3 ¡Ajépa pendevyroite peẽ gálata! ¿Máva piko la penembotavy vaʼekue?+ Pórke peẽme ningo oñemyesakã porãiterei vaʼekue mbaʼérepa Jesucrístope ojeklava peteĩ yvyráre.+ 2 Peteĩ mbaʼénte aporanduse peẽme: ¿pe espíritu sánto piko oñemeʼẽ raʼe peẽme pekumpli rupi pe léi, térãpa pejerovia haguére umi notísia porã pehendu vaʼekuére?+ 3 ¡Peichaite peve piko la pendevýro! Peẽ ningo ñepyrũrã pejerovia kuri pe espíritu sántore ha ipahápe koʼág̃a pejerovia umi mbaʼe oúvare yvypóra imperféktogui.+ 4 ¿Upéicharõ piko peẽ hetaite pehasa asy reiete raʼe? Ni ndagueroviaséi voi upéicha hague. 5 ¿Upéicharõ piko pe omeʼẽva peẽme espíritu sánto ha ojapóva pende apytépe heta milágro+ ojapo upéva pekumpli haguére pe léi, térãpa pejerovia haguére umi notísia porã pehendu vaʼekuére? 6 Upéicha ningo oiko vaʼekue avei Abrahán rehe: haʼe “ojerovia Jehováre* ha upévare ojeʼe hese ihustoha”.+

7 Katuete peẽ peikuaáma voi umi ojeroviáva haʼeha Abrahán raʼy.+ 8 Ñandejára Ñeʼẽ ymaitereíma ohechauka vaʼekue haʼe heʼitaha ihustoha umi hénte ótro tetãygua ojerovia rupi. Upévare haʼe de antemánoma voi oikuaauka vaʼekue Abrahánpe umi notísia porã, heʼírõ guare: “Nde rupive oñevendesíta entéro nasión”.+ 9 Upéicharõ, oñevendesi haguéicha Abrahánpe ojerovia haguére, upéicha avei oñevendesi hína umi ojeroviávape.+

10 Entéro umi ojeroviáva pe léi rehe añoite oñemaldesi, pórke ojeskrivi voi Ñandejára Ñeʼẽme: “Toñemaldesi upe nokumplimeméivape umi mbaʼe ojeskrivi vaʼekue ko lívro* de la léipe”.+ 11 Avei jaikuaa porãiterei Ñandejára avavére ndeʼimoʼãiha ihustoha okumpli rupi pe léi,+ upévare ojeskrivi pype: “Pe ihústova oikovéta ojerovia rupi”.+ 12 Pe léi ningo nodependéi pe jeroviáre, upévare ojeskrivi pype: “Entéro umi okumplíva umi mbaʼe heʼíva pe léi, oikovéta”.+ 13 Cristo opaga+ ñanderehe ñaneguenohẽ+ hag̃ua pe léi maldisión poguýgui, ha péicha oñemaldesi chupe ñande vése, pórke Ñandejára Ñeʼẽme ojeskrivi voi: “Toñemaldesi entéro kuimbaʼe oñemosaingóvape yvyráre”.+ 14 Upéva oiko ikatu hag̃uáicha Jesucristo+ rupive umi ótro tetãygua ohupyty avei pe vendisión oñepromete vaʼekue Abrahánpe. Ha péicha jajerovia rupi, ikatúta jarresivi pe espíritu sánto+ Ñandejára opromete vaʼekue omeʼẽtaha.

15 Che ermanokuéra, amoĩta peẽme peteĩ ehémplo: ojejapóramo peteĩ kompromíso ha yvypórante ombovale upéva, upéicharõ jepe avave ndaikatuvéima oanula térã omoĩve pype ótra kósa. 16 Umi promésa ningo ojejapo vaʼekue Abrahánpe ha ifamiliarépe.*+ Upépe ndeʼíri: “Ha umi ne familiarépe”,* oñeñeʼẽramoguáicha heta persónare, síno heʼi: “Ha ne familiarépe”,* péicha oñeñeʼẽ hína peteĩ persónarente, haʼéva Cristo.+ 17 Che avei haʼe ko mbaʼe: Ñandejára primero ojapo vaʼekue pe kompromíso, ha upéi 430 áño+ haguépe omeʼẽ pe léi, péro upéva noanulái pe kompromíso, ha pe promésa ndopytareíri. 18 Pórke Ñandejára omeʼẽramo pe erénsia pe léi rupive, upéicharõ ndahaʼevéima peteĩ promésa rupive. Péro Ñandejára imbaʼeporã rupi, omeʼẽ upéva Abrahánpe peteĩ promésa rupive.+

19 ¿Mbaʼére piko upéicharõ oñemeʼẽ rakaʼe pe léi? Pe léi oñemeʼẽ vaʼekue ñandéve ojekuaa hag̃ua umi mbaʼe vai+ jajapóva og̃uahẽ+ meve pe familiare, chupe ningo ojejapo vaʼekue pe promésa. Umi ánhel+ omeʼẽ vaʼekue pe léi umi héntepe peteĩ mediadór+ rupive. 20 Péro natekotevẽi oĩ peteĩ mediadór peteĩnte ojapóramo pe kompromíso. Ha upéicha avei Ñandejára, haʼe oĩ vaʼekue haʼeño ojapórõ guare upe promésa. 21 ¿Upéicharõ piko pe léi oñemoĩ Ñandejára promesakuérare? ¡Ni mbaʼevéicharõ! Pe léi orresivi vaʼekue umi hénte ikatúrire omeʼẽ chupekuéra jeikove, upéicharõ ikatu vaʼerãmoʼã ojeʼe hesekuéra ihustoha pe léi rupive. 22 Péro Ñandejára Ñeʼẽ omoĩ entéro mbaʼe pekádo poguýpe. Péicha umi ojeroviáva ikatúta ohupyty umi mbaʼe porã oñepromete vaʼekue umi ojeroviávape Jesucrístore.

23 Péro og̃uahẽ mboyve pe jerovia teete* pe léi ñandeprotehe kuri, ha ñaime voi ipoguýpe ñahaʼarõ aja ojekuaauka pe jerovia.+ 24 Upéicharõ, pe léi haʼe vaʼekue peteĩ gía* ñandegueraháva Crístope,+ ikatu hag̃uáicha ojeʼe ñanderehe ñandehustoha jajerovia+ rupi. 25 Péro koʼág̃a og̃uahẽma+ pe jerovia teete ha nañaimevéima peteĩ gía poguýpe.+

26 Añetehápe enterove peẽ haʼe Ñandejára raʼy,+ pejerovia rupi Cristo Jesús rehe.+ 27 Enterove peẽ pejevautisáva ha peiméva koʼág̃a Cristo ndive peteĩ ñeʼẽme, pesegi vaʼerã Cristo ehémplo.+ 28 Ndaiporivéima pende apytépe diferénsia éntre judío ni griego,+ esklávo ni orekóva liverta,+ kuimbaʼe ni kuña,+ pórke enterove peime peteĩ ñeʼẽme Cristo Jesús disípuloramo.+ 29 Peẽ haʼéramo Cristo disípulo, upéicharõ peẽ hína Abrahán familiare,+ ha ikatu pehupyty pe erénsia+ oñepromete+ vaʼekue Abrahánpe.

4 Upéicharõ che haʼe peẽme: pe eredéro imitã aja ningo naidiferéntei pe esklávogui, imbaʼéramo jepe entéro mbaʼe. 2 Péro haʼe oĩ umi oñangarekóva hese kárgope ha umi hógare oñenkargáva* kárgope, og̃uahẽ meve pe día itúa omoĩma vaʼekue upearã. 3 Upéicha avei ñande umi mitãicha jasegi vaʼekue umi mbaʼe ojapo ha opensáva ko múndo.+ 4 Péro oñemohuʼãvo pe tiémpo oñemoĩ vaʼekue, Ñandejára ombou Itaʼýrape. Haʼe onase peteĩ kuñágui+ ha oiko vaʼekue pe léi+ heʼiháicha, 5 péicha haʼe ikatúta kuri opaga oguenohẽ hag̃ua umi oĩvape léi poguýpe,+ ha Ñandejára ikatúta ñandeadopta itaʼýraramo.+

6 Ha koʼág̃a peẽ haʼéma Ñandejára raʼy, upévare haʼe omoĩ pe espíritu sánto+ ñane korasõme.+ Ko espíritu sánto oñemeʼẽ vaʼekue Itaʼýrape, ha ko espíritu sánto rupive ñande hatã jaʼe: “¡Abba,* che Ru!”.+ 7 Upéicharõ káda uno peẽ ndahaʼevéima esklávo síno Ñandejára raʼy. Ha oiméramo nde haʼe Ñandejára raʼy, haʼe omeʼẽta avei ndéve peteĩ erénsia.+

8 Upéicharõ jepe, peẽ peikuaa mboyve Ñandejárape, peservi vaʼekue esklávoicha umi dios fálsope. 9 Péro koʼág̃a peikuaáma Ñandejárape, térã jaʼe porãsérõ g̃uarã Ñandejára pendekuaáma. ¿Ha mbaʼéicha piko upéicharõ pejevyse jey umi vyrorei ko mundopeguápe ndovaléiva mbaʼeverã,+ ha peservise jey umívape esklávoramo?+ 10 Peẽ ningo peiko pemboarete umi día, mése,+ tiémpo* ha áño. 11 Ajepyʼapy ningo oimérõ g̃uarã añehaʼã reiete raʼe poipytyvõ hag̃ua.

12 Chéngo yma aiko vaʼekue avei peẽicha, upévare che ermanokuéra ajerure asy peẽme peiko hag̃ua che aikoháicha koʼág̃a.+ Peẽ ningo ndapejapói kuri cherehe mbaʼeve ivaíva. 13 Péro peẽ peikuaa avei che cherasykatu rupi, aikuaauka hague peẽme primera ves umi notísia porã. 14 Che mbaʼasy haʼéramo jepe peteĩ kárga pohýi peẽme g̃uarã, peẽ ndacheapoʼíri ni ndapejeguarúi chehegui.* Upéva rangue peẽ cherresivi haʼeramoguáicha Ñandejára ánhel térã Cristo Jesús. 15 Upe tiémpope peẽ pevyʼa vaʼekue, ¿mbaʼére piko upéicharõ ndapevyʼavéi koʼág̃a? Pórke che aikuaa porã peẽ peime hague peipeʼa hag̃uáicha pende resa jepe pemeʼẽ hag̃ua chéve,+ chepytyvõtarire upéva. 16 ¿Upéicharõ piko che koʼág̃a pene enemígo haʼe rupi peẽme pe siertogua? 17 Koʼã kuimbaʼe ningo oñehaʼãmbaite opyta porã penendive, péro ndahaʼéi penepytyvõ hag̃ua, upéva rangue ojapo péicha penemomombyry hag̃ua chehegui, ikatu hag̃uáicha peẽ pesegi meme chupekuéra. 18 Ndaivaíri ningo añete oĩramo oñehaʼãmbaitéva opyta porã penendive ojaposégui iporãva, péro upéva ndojapói vaʼerã hikuái che aime ajánte penendive. 19 Che raʼykuéra+ ahayhuetéva, pende káusare ahasa asy jeýta peteĩ kuña imemby potávaicha. Ha che asegíta ahasa asy péicha peẽ pehaʼanga porã meve Crístope. 20 Hiʼãite chéve aime penendive koʼág̃a ha añeʼẽ peẽme pyʼaguapýpe porãnte, pórke ndaikuaavéima mbaʼépa ajapóta pendehegui.

21 Peẽ pejaposéva pe léi heʼíva, ¿peẽ piko ndapeikuaái mbaʼépa heʼi pe léi? 22 Por ehémplo, upépe ningo ojeskrivi Abrahán oreko hague mokõi itaʼýra, peteĩva pe esklávagui,+ ha pe ótro katu pe kuña ndahaʼéivagui eskláva.+ 23 Pe eskláva memby onase entéro mitã onaseháicha,+ pe kuña ndahaʼéiva eskláva memby katu onase peteĩ promésa+ rupive. 24 Koʼã mbaʼe orrepresenta umi mbaʼe oikóta vaʼekue. Koʼã mokõi kuña orrepresenta mokõi kompromíso. Peteĩva ojejapo kuri Sérro Sinaípe,+ ha enterove umi oĩva ko kompromísope haʼe esklávo. Agar orrepresenta hína ko kompromíso. 25 Agar heʼise hína Sinaí,+ peteĩ montáña oĩva Arábiape. Ha haʼe orrepresenta Jerusalén koʼag̃aguápe, pórke haʼe ha imembykuéra oservi esklávoramo. 26 Pe ótro kuña orrepresenta pe Jerusalén yvagapeguápe, haʼe hína ñande sy ha oĩ en liverta.

27 Ñandejára Ñeʼẽme heʼi: “Evyʼáke nde kuña ndaikatúiva nememby, esapukái vyʼágui, nde nanderasýiva nememby hag̃ua. Pórke pe kuña ojeheja rei vaʼekue hetave imemby pe kuña omendávagui”.+ 28 Koʼág̃a che ermáno ha che ermanakuéra, peẽ hína umi mitã onase vaʼekue pe promésa rupive, Isaac onase haguéicha.+ 29 Upérõ pe onase vaʼekue entéro mitã onaseháicha oñepyrũ opersegi pe onase vaʼekuépe espíritu sánto rupive,+ ha upeichaite avei oiko koʼág̃a.+ 30 Upéicharõ jepe, ¿mbaʼépa heʼi Ñandejára Ñeʼẽ? “Emosẽ pe eskláva ha imembýpe, pórke ko eskláva memby ni mbaʼevéicharõ nokompartimoʼãi ne erénsia pe kuña oĩva en liverta+ membýndi”. 31 Upéicharõ che ermanokuéra, ñande ndahaʼéi hína peteĩ eskláva memby, síno peteĩ kuña oĩva en liverta membyre.

5 Ha Cristo ñandelivera ikatu hag̃uáicha ñasẽ pe léi poguýgui. Upévare peñehaʼãkena ani peperde pende liverta+ ha pepyta jey esklávoramo pe júgo guýpe.+

2 Chete Pablo haʼe peẽme ko mbaʼe: peñesirkunsidáramo,* Cristo ojapo vaʼekue ndaideprovechomoʼãi peẽme.+ 3 Avei pomomanduʼa jey, entéro kuimbaʼe oñesirkunsidáva okumpli vaʼerãha katuete pe léi kompletoite.+ 4 Peẽ peñemomombyry hína Crístogui, peẽ peipotáva ojeʼe penderehe pendehustoha pekumpli rupi pe léi,+ upévare ndaikatúi penderupyty imbaʼeporã.* 5 Oréve katu hiʼãiterei orehústo Ñandejára renondépe, ha upéva ikatu hína ojehupyty pe espíritu sánto ha ore jerovia rupive añoite. 6 Pórke Cristo Jesús disípulope g̃uarã ndovaléi mbaʼeverã oñesirkunsida térã noñesirkunsidáiramo,+ la ovaléva hína haʼe ohechaukáramo ojeroviaha oporohayhúvo.

7 Peẽngo peho porã+ kuri hese pe añetegua rapére. ¿Mávaiko pendestorva raʼe anive hag̃ua peneñeʼẽrendu pe añeteguápe? 8 ¿Mávaiko penekonvense raʼe pejapo hag̃ua péicha? Ndahaʼéi hína Ñandejára, upe penerenóiva. 9 Cháke michĩmi levadúra ombovupaitéma pe mása kompletoite.+ 10 Ajerovia peẽ ñande Ruvicha disipulokuéra pepensataha che apensaháicha,+ péro oimeraẽ okreáva peẽme provléma+ orresivíta pe kastígo omereséva. 11 Che ermanokuéra, che asegírire amboʼe gueteri pe sirkunsisión, haʼekuéra ndachepersegíri vaʼerãmoʼã, ha avavépe nombopochymoʼãvéima amboʼe haguére Jesús omano hague peteĩ yvyráre.*+ 12 Hiʼãite chéve umi kuimbaʼe heʼíva peẽme peñesirkunsida hag̃ua, tojekapa ijupe voi.

13 Che ermanokuéra, peẽ ningo pejeporavo vaʼekue pereko hag̃ua liverta, péro aníke peipuru pe liverta pejapo hag̃ua umi mbaʼe vai ogustáva+ pende rete imperféktope. Upéva rangue, pe mborayhu penemomýi vaʼerã peservi hag̃ua ojupe esklávoramo.+ 14 Pe léi kompletoite oñekumpli* peteĩ mandamiénto rupive: “Rehayhu vaʼerã nde rapichápe nde voi rejehayhuháicha”.+ 15 Péro peẽ pesegínteramo peñokarãi ha peñorairõ oñondive,+ peñatendéke, cháke péicha peẽ voi ikatu peñohundipa.+

16 Péro che haʼe peẽme: pesegíkena peiko pe espíritu poguýpe+ ha péicha ni mbaʼevéicharõ ndapejapomoʼãi umi mbaʼe vai ogustáva pende rete imperféktope.+ 17 Umi mbaʼe vai ogustáva ñande rete imperféktope oñemoĩ pe espíritu rehe, ha pe espíritu oñemoĩ umi mbaʼe vai ogustávare ñande rete imperféktope, mokõivéva oñemoĩ ojuehe, upévare peẽ ndaikatúi pejapo umi mbaʼe pejaposéva.+ 18 Avei pehejáramo pe espíritu pendegia, peẽ napeiméi hína pe léi poguýpe.

19 Umi mbaʼe vai ogustáva yvypóra rete imperféktope ojekuaa porã, upévare oĩ ojapóva koʼã mbaʼe: hekovai,*+ hekokyʼa, notĩri+ hembiapo vai hag̃ua,* 20 oadora umi taʼanga,* ojapo espiritísmo,*+ ijarhél, oñorairõ, ipyʼaro,* ipochyeterei, oiko vai ótrondi, oporodividi, oforma umi sékta, 21 iñenvidióso, ikaʼu,+ ofarrea itarovávaicha ha hetave koʼã mbaʼeichagua.+ Che haʼéma voi kuri peẽme ha koʼág̃a poavisa jey: umi osegíva ojapo koʼã mbaʼe, ndoikemoʼãi Ñandejára Rréinope.+

22 Péro umi mbaʼe porã oúva Ñandejára espíritugui haʼe hína: mborayhu, vyʼa, pyʼaguapy, pasiénsia, mbaʼeporã,+ pyʼaporã, jerovia, 23 akãguapy ha jejokokuaa.+ Ndaipóri léi oñemoĩva koʼã mbaʼére. 24 Avei umi Cristo Jesús disípulo, ojuka* umi mbaʼe vai ogustáva hete imperféktope, umi mbaʼe omoakãrakúva chupekuéra ha ojaposéva.+

25 Upéicharõ, jahejáramo Ñandejára espíritu ñandegia, jasegi vaʼerã jaiko pe espíritu oipotaháicha.+ 26 Aníkena jaiko ñakompeti ótrondi+ ni ñaneenvidióso,+ péicha nañañembotuichamoʼãi.

6 Che ermanokuéra, peteĩ persóna ohóramo tape vaíre haʼe oñemeʼẽʼỹre enkuénta, peẽ pejegiáva pe espíritu sántore pegueru jey vaʼerã chupe tape porãme. Péro pejapo vaʼerã upéva pyʼaguapýpe porãnte.+ Ha peñatendéke pendejehe,+ ani hag̃ua peẽ avei peʼa ñuhãme.+ 2 Pesegíkena peñopytyvõ pegueraha hag̃ua ojupe pende kárga pohýi+ ha péicha pekumpli Cristo léi.+ 3 Pórke oĩramo opensáva haʼe iñimportanteha, ha ndaupéichai,+ haʼe voi oñembotavy hína ijupe. 4 Péro káda uno tojesareko umi mbaʼe ojapóvare,+ péicha ovyʼáta hembiapóre ha ndahaʼéi oñembojoja haguére ótrore.+ 5 Pórke káda uno ogueraháta ikárga.*+

6 Avei pe oñehekomboʼévape* hína Ñandejára ñeʼẽ okomparti vaʼerã entéro mbaʼe porã pe omboʼévandi chupe.*+

7 Ani peñembotavy pendejupe voi: avave ningo ndaikatúi oñembohory Ñandejárare, pórke entéro mbaʼe oñotỹva peteĩ persóna, upéva avei omonoʼõta.+ 8 Pórke pe oñotỹva omeʼẽ hag̃ua gústo hete imperféktope, omonoʼõta ñehundi, péro pe oñotỹva oiko hag̃ua pe espíritu sánto oipotaháicha, omonoʼõta jeikove opaveʼỹva pe espíritu rupive.+ 9 Upévare, siémprekena jajapo iporãva, pórke og̃uahẽ vove pe tiémpo Ñandejára omoĩ vaʼekue, katuete ñamonoʼõta nañanekaneʼõiramo.+ 10 Upéicharõ, jareko jave oportunida ñañopytyvõ hag̃ua, jajapo memékena iporãva enterove rehehápe, péro koʼytevéntema ñane ermáno ha ermanakuéra rehehápe.

11 Pehechamíntena mbaʼeichaitépa tuichaicha umi létra chete voi askrivi vaʼekue peẽme ko kártape.

12 Enterove umi opyta porãséva ótrondi,* umíva hína umi pendeovligaséva peñesirkunsida hag̃ua.* Péicha ojapo hikuái ani hag̃ua ojepersegi chupekuéra Cristo* káusare. 13 Añetehápe, ni umi oñesirkunsidáva jepe nokumplipái pe léi,+ péro haʼekuéra oipota peẽ peñesirkunsida ikatu hag̃uáicha oñemombaʼeguasu penekonvense haguére peñesirkunsida hag̃ua. 14 Péro che ni mbaʼevéicharõ nañemombaʼeguasuséi, ndahaʼéiramo ñande Ruvicha Jesucristo rehe, chupe ningo ojejuka vaʼekue peteĩ yvyráre.*+ Chéve g̃uarã, haʼe rupive ko múndo oñekondena omano hag̃ua,* péro ko múndope che añekondena amano hag̃ua haʼe rupive. 15 Naiñimportántei hína reñesirkunsidáramo térã nereñesirkunsidáiramo.+ La iñimportánteva hína Ñandejára ombopyahu peteĩ persónape.+ 16 Ñandejára tomeʼẽ pyʼaguapy ha toiporiahuvereko entéro umi opensávape upéicha,* haʼekuéra hína pe Israel Ñandejára mbaʼéva.+

17 Koʼág̃a guive anive avave okrea chéve provléma, pórke che areko che retére umi márka ohechaukáva che haʼeha Cristo esklávo.+

18 Che ermanokuéra, hiʼãite chéve ñande Ruvicha Jesucristo mbaʼeporãite* toĩ pene korasõme. Amén.*