KÁRTA A LOS EFESIOS

1 Che Pablo ajeporavo vaʼekue aservi hag̃ua Cristo Jesús apóstolramo Ñandejára oipota rupi. Askrivi ko kárta entéro umi ojeporavo vaʼekuépe* ha ifiélvape, haʼéva hína Cristo Jesús disípulo oĩva Éfesope:+

2 Aipotaite Ñandejára, haʼéva ñande Ru, ha ñande Ruvicha Jesucristo taimbaʼeporãiterei penendive* ha tomeʼẽ peẽme pyʼaguapy.

3 Toñemombaʼeguasu Ñandejárape, haʼéva ñande Ruvicha Jesucristo Túa. Yvágape haʼe omeʼẽ ñandéve opaichagua vendisión pe espíritu sánto rupive, ñande haʼégui Cristo disípulo.+ 4 Ko múndo oñepyrũ mboyve voi haʼe ñandeporavo ñaime hag̃ua en unida Cristo ndive, ikatu hag̃uáicha jajeaparta ha ñanepotĩ+ Ñandejárape g̃uarã jahayhu rupi chupe. 5 Haʼe de antemánoma+ voi odesidi kuri ñandeadoptataha itaʼýraramo,+ Jesucristo rupive. Haʼe ojapo upéva ogustágui chupe ha ojaposégui voi.+ 6 Péva oiko ikatu hag̃uáicha umi hénte omombaʼeguasu Ñandejárape, pórke Itaʼýra ohayhuetéva+ rupive haʼe ohechauka ñandéve imbaʼeporãitereiha.+ 7 Itaʼýra+ rupive haʼe opaga ñanderreskata hag̃ua ha omeʼẽ ñandéve liverta, ha huguy rupive oñeperdona ñandéve ñane rembiapo vaikue,+ pórke Ñandejára imbaʼeporãiterei.*

8 Ñandejára ohechauka imbaʼeporãitereiha ñanendive, ha omeʼẽ ñandéve opaichagua arandu ha ñanepytyvõ ñantende hag̃ua heta mbaʼe. 9 Haʼe oikuaauka ñandéve pe sekréto sagrádo,+ haʼéva hína hembipota. Ha upéva ojapo ogustahaichaite chupe ha asegún pe hembipota 10 omoĩ hag̃ua mbaʼéichapa ojedirihíta entéro mbaʼe.* Upéva oiko vaʼerã og̃uahẽ vove pe tiémpo haʼe heʼi vaʼekue, ha péicha haʼe ombyatypa jeýta entéro mbaʼe oĩva yvágape ha entéro mbaʼe oĩva ko yvy ape ári oĩ hag̃ua Cristo poguýpe.+ Cristo renondépe oñembyatypáta entéro mbaʼe. 11 Ore roime hendive en unida ha rojeporavo avei rorresivi hag̃ua hendive pe erénsia.+ Pórke haʼe de antemánoma voi oreporavo, ha péva haʼe ojapo asegún pe hembipota. Ha haʼe ojapo entéro mbaʼe odesidi vaʼekue asegún pe ivolunta. 12 Ore hína umi primeroite rojerovia vaʼekue Crístore, ikatu hag̃uáicha oñemombaʼeguasu ha oñembotuicha Ñandejárape. 13 Péro peẽ avei pejerovia hese pehendu rire pe añetegua, upéva hína umi notísia porã oñeʼẽva pene salvasión rehe. Peẽ pejerovia rire hese, Ñandejára oipuru pe espíritu sánto opromete vaʼekue omoĩ hag̃ua penderehe peteĩ márka.+ Haʼe ojevale Crístore ojapo hag̃ua upéva. 14 Pe espíritu sánto haʼe hína peteĩ garantía ohechaukáva Ñandejára omeʼẽtaha ñandéve entéro mbaʼe opromete vaʼekue.+ Ñandejára ojapo upéva opaga+ hag̃ua ipuévlore+ ikatu hag̃uáicha oreko liverta, ha péicha oñembotuicha ha oñemombaʼeguasúta chupe.

15 Upévare, che ahendúrõ guare mbaʼéichapa pejerovia ñande Ruvicha Jesús rehe, ha pehechaukaha upéva petrata lájare enterove umi ojeporavo vaʼekuépe,* 16 che siémpre aagradese Ñandejárape penderehe. Ha chemanduʼa meme penderehe che ñemboʼépe, 17 ikatu hag̃uáicha Ñandejára, pe Túa ijojahaʼỹva, haʼéva hína ñande Ruvicha Jesucristo Jára, omeʼẽ peẽme podér penearandu ha pentende hag̃ua umi mbaʼe haʼe omyesakãva peẽme peikuaa porã hag̃ua chupe.+ 18 Ñandejára oavri pene korasõ, ikatu hag̃uáicha pehecha ha peikuaa pe esperánsa haʼe omeʼẽva peẽme, umíva hína umi mbaʼe porã ijojahaʼỹva haʼe opromete vaʼekue umi ojeporavo vaʼekuépe,*+ 19 ha avei peikuaa hag̃ua pe podér tuichaitéva haʼe ohechauka vaʼekue ñande jajeroviáva rehehápe.+ Pe podér tuichaite orekóva ojekuaa umi mbaʼe ojapóvare, 20 upe podér rupive haʼe omopuʼã vaʼekue Crístope umi omanóva apytégui ha omboguapy chupe ideréchape+ yvágape. 21 Omoĩ chupe peteĩ puésto ijyvatevévape entéro goviérnogui, umi orekóvagui autorida ha podér, entéro mburuvichágui ha entéro umi téra ikatúvagui ojepuru,+ ha ndahaʼéi umi oĩvagui ko tiémpopente,* síno avei umi oĩtavagui amo gotyove. 22 Ñandejára omoĩ avei Cristo py guýpe+ entéro mbaʼe, ha omoĩ chupe omoakã hag̃ua entéro mbaʼe kongregasiónpe.+ 23 Pe kongregasión haʼe hína hete,+ ha haʼe rupive henyhẽ, ha haʼe hína pe okompletáva opa mbaʼe.

2 Pende pekádo káusare peẽ haʼete ku pemano vaʼekue, péro Ñandejára penemoingove.+ 2 Peteĩ tiémpope peẽ peiko vaʼekue ko múndope* ojeikoháicha ha pejapo ko múndo+ governánte oipotáva. Haʼe ogoverna pe espíritu*+ iñasãiva opárupi yvytúicha+ ha omomýiva umi hénte naiñeʼẽrendúivape. 3 Añetehápe, yma enterove ñande jaiko vaʼekue avei umi hénteicha, pórke jajapo vaʼekue umi deséo vai jarekóva+ ha jajapo umi mbaʼe vai ñapensáva.+ Ñande ningo ñanase guivéma voi ñamereséma vaʼekue Ñandejára ipochy ñanendive,+ ipochyháicha umi ótrondi. 4 Péro Ñandejára ohechauka ñandeporiahuverekoitereiha,+ pórke haʼe ñanderayhueterei rupi+ 5 ñanemoingove ha ñanemoĩ en unida Cristo ndive, jepe ñande ñamanóma kuri ñane rembiapo vaikuépe,+ añetehápe haʼe imbaʼeporãiterei rupi* peẽ pejesalva vaʼekue. 6 Avei Ñandejára ñanemoingove ha omeʼẽ ñandéve peteĩ lugár jaguapy hag̃ua yvágape, ñande haʼégui Cristo Jesús disípulo.+ 7 Ñandejára ojapo upéva ikatu hag̃uáicha pe múndo pyahu* oútavape ohechauka imbaʼeporãitereiha, ág̃a ojapo vove heta mbaʼe porã ñanderehehápe, ñande haʼéva Cristo Jesús disípulo.

8 Péicha Ñandejára imbaʼeporãiterei haguére peẽ pejesalva pejerovia rupi,+ upéva peẽ ndapehupytýi umi mbaʼe pejapóva rupive, síno péva peteĩ rregálo oúva Ñandejáragui. 9 No, ko salvasión noñemeʼẽi peẽme umi mbaʼe pejapo vaʼekuére,+ ani hag̃ua avave oiko oñembotuicha upévare. 10 Ñande ningo Ñandejára rembiapokue,* ñande haʼégui Cristo Jesús disípulo,+ haʼe ñandeapo+ vaʼekue jajapo hag̃ua umi mbaʼe iporãva. Ñandejára de antemánoma odesidíma vaʼekue jajapotaha upéva.

11 Upéicharõ peẽ penemanduʼa vaʼerã, peẽ ndahaʼéiva judío, umi hénte “osirkunsida vaʼekue”* chupe yvypóra penerenói hague “peẽ hénte napeñesirkunsidáiva”. 12 Upe tiémpope peẽ ndapeikuaái vaʼekue Crístope, peime separádo pe puévlo de Israélgui, peẽ extráño vaʼekue ha napeiméi umi kompromíso Ñandejára ojapo vaʼekuépe pe promésa rupive.+ Ko múndope peẽ peiko vaʼekue esperansaʼỹre ha ndapeikuaái Ñandejárape.+ 13 Péro koʼág̃a peẽ Cristo Jesús disípulo, ymave peẽ ndapeikuaái vaʼekue Ñandejárape, koʼág̃a katu peñemoag̃ui hese Cristo ruguy rupive. 14 Pórke Cristo ogueru vaʼekue ñandéve pyʼaguapy,+ haʼe ningo ojapo vaʼekue umi mokõi grúpogui peteĩnte,+ ha ohundi pe murálla odividi vaʼekue umi mokõi grúpope.+ 15 Osakrifika rupi hete, haʼe oanula umi léi ha mandamientokuéra oĩ vaʼekue Moisés léipe, umíva omoĩ vaʼekue oñoenemígoramo umi mokõi grúpope. Upéi haʼe ojapo chuguikuéra peteĩ grúpo ipyahúva.+ Añetehápe umi mokõi grúpo haʼe hína idisípulo, ha Cristo omoĩ pyʼaguapy ijapytepekuéra. 16 Avei omano rupi pe yvyráre*+ haʼe omoingo porã jey Ñandejárandi umi mokõi grúpope, ikatu hag̃uáicha umi mokõi grúpogui oiko peteĩ puévlonte.* Haʼe ningo omano rupi ohundi pe omoingo vai vaʼekue chupekuéra.+ 17 Haʼe ou vaʼekue oikuaauka umi notísia porã oñeʼẽva pyʼaguapýre peẽ ndapeikuaái vaʼekuépe Ñandejárape, ha avei umi oikuaa vaʼekuépe chupe. 18 Ko sakrifísio haʼe ojapo vaʼekue rupive, enterove ñaiméva umi mokõi grúpope ikatu ñañemboʼe pe Túa oĩvape yvágape, pórke enterove ñande jarresivi el mísmo espíritu sánto.

19 Upéicharõ peẽ ndahaʼevéima extráño ni extranhéro,+ síno peẽ koʼág̃a pereko la mísma nasionalida+ umi ojeporavo vaʼekuéndi* ha peime avei Ñandejára famíliape.+ 20 Ñandejára penemopuʼã peteĩ ógaicha pe simiénto ári, haʼéva umi apóstol ha profetakuéra,+ ha Cristo Jesús haʼe hína pe ita prinsipál* oĩva pe simiéntope.+ 21 Pe óga oñemopuʼãva ha umi ipárte oĩmbaite unído ojuehe. Ha oĩ rupi unído Cristo rehe,+ okakuaa ohóvo oiko hag̃ua chugui peteĩ témplo sagrádo Jehovápe* g̃uarã.+ 22 Peẽ peime rupi en unida Cristo ndive, Ñandejára penemopuʼã hína peẽme umi ótrondi oiko hag̃ua pendehegui peteĩ óga, ikatu hag̃uáicha haʼe oiko upépe ijespíritu rupive.+

3 Upéicha rupi, che Pablo haʼe hína Cristo Jesús prisionéro+ penderehehápe, peẽ hénte ótro tetãygua... 2 Peẽ katuete pehendúne raʼe Ñandejára onkarga+ hague chéve poipytyvõ hag̃ua, ikatu hag̃uáicha ideprovécho peẽme Ñandejára mbaʼeporãite.* 3 Ñandejára oikuaauka chéve isekréto sagrádo, askrivíma haguéicha kuri mbykymi peẽme angetete. 4 Upévare, pelee vove kóva, pehechakuaáta che antendeha pe sekréto sagrádo+ oñeʼẽva Crístore. 5 Ñandejára ndoikuaaukaporãi vaʼekue ko sekréto umi hénte ótro tiémpope guarépe, koʼág̃a oikuaauka porãháicha ijespíritu rupive umi apóstol ojeporavo vaʼekuépe* ha iprofetakuérape.+ 6 Kóva haʼe hína pe sekréto: umi hénte ótro tetãygua haʼéva Cristo Jesús disípulo ohupytýta avei pe erénsia oñemeʼẽva Crístope, ha oĩta peteĩ grúpopentema.+ Haʼekuéra orresivíta avei umi mbaʼe Ñandejára opromete vaʼekue oréve umi notísia porã rupive. 7 Chehegui oiko peteĩ persóna penepytyvõva pentende hag̃ua ko sekréto sagrádo,* Ñandejára imbaʼeporãiterei rupi. Haʼe omeʼẽ chéve ko rregálo ohechauka hag̃ua ipodér.+

8 Che ningo ndaikatúi añembojoja ni umi michĩvévare jepe umi ojeporavo vaʼekue* apytépe,+ ha chéve ojehechauka Ñandejára mbaʼeporã:+ aikuaauka vaʼerãha umi ótro tetãyguápe umi notísia porã oñeʼẽva umi vendisión oúvare Crístogui, ha umíva ningo ndaijojahái. 9 Ha aipytyvõ vaʼerã umi héntepe ohecha hag̃ua mbaʼéichapa Ñandejára, haʼéva opa mbaʼe apohare, oikuaauka ha okumpli ohóvo isekréto sagrádo,+ upéva haʼe omokañy vaʼekue hetaiterei tiémpore. 10 Péva oiko ikatu hag̃uáicha koʼág̃a pe kongregasión rupive+ ojekuaauka umi governánte ha autorida oĩvape yvágape mbaʼéichapa ojehechauka heta hendáicha Ñandejára arandu.+ 11 Péva ningo asegún pe hembipota oĩva yma guive ha opa ára g̃uarãva, ha oñekumplítava ñande Ruvicha Cristo+ Jesús rupive. 12 Haʼe rupive ñande ikatu ñañeʼẽ pyʼaguasúpe, ha ñañemoag̃ui Ñandejárare kyhyjeʼỹre+ pórke jajerovia Crístore. 13 Upévare, ajerure peẽme ani hag̃ua penekangy che ahasa asy haguére penderehehápe, pórke umíva rupive peẽ peñembotuicha hína.+

14 Upéicha rupi che añesũ añemboʼe hag̃ua pe Túape, 15 haʼe rupive oexisti entéro família, tahaʼe yvágape térã ko yvy ape ári. 16 Che añemboʼe ikatu hag̃uáicha Ñandejára Ndaijojaháiva oipuru pe podér omeʼẽva ijespíritu omombarete hag̃ua pende pyʼapy.+ 17 Ha añemboʼe Ñandejárape pende jerovia rupive pereko hag̃ua Crístope pene korasõme ha pehayhu hag̃ua avei pende rapichápe pende pyʼaite guive.+ Hiʼãite peñembohapo pypuku+ ha pejepytaso mbarete pe simiénto ári.+ 18 Péicha peẽ ha entéro umi ojeporavo vaʼekue* ikatúta pentende porã mbaʼéichapa ipe, ipuku, ijyvate ha ipypuku pe añetegua. 19 Ha avei peikuaáta Cristo mborayhu,+ upéva iñimportanteve hína umi mbaʼe ikatúvagui jaikuaa, ha péicha ikatúta penerenyhẽ entéro mbaʼe porã Ñandejára omeʼẽvagui.

20 Ñandejára, asegún pe ipodér oĩva ñanendive,+ añetehápe ikatu ojapo hetaitereive mbaʼe ñande ikatúvagui jajerure térã ñañeimahina.+ 21 Upéicharõ haʼe hína upe omereséva oñembotuicha pára siémpre pe kongregasión rupive ha Cristo Jesús rupive. Amén.*

4 Upévare che Pablo, aiméva préso+ haʼégui ñande Ruvicha disípulo, ajerure jey jey peẽme peiko hag̃ua hekopete+ oikoháicha umi Ñandejára ohenói vaʼekue, 2 siémprekena peneumílde,*+ ha peiko pyʼaguapýpe, avei penepasiénsiakena+ ha peñoaguanta mborayhúpe.+ 3 Peikókena pyʼaguapýpe oñondivepa ha peñehaʼãmbaite peime hag̃ua siémpre peteĩ ñeʼẽme, upéva ningo peẽ pehupyty pe espíritu sánto rupive.+ 4 Oĩ peteĩ kongregasión añónte,*+ ha peteĩ espíritunte,+ oĩháicha avei peteĩ prémionte ñahaʼarõva,+ ha Ñandejára ñaneinvita vaʼekue jarresivi hag̃ua upéva. 5 Peteĩnte ñande Ruvicha,+ peteĩnte ñande jerovia, ha peteĩnte pe vautísmo. 6 Peteĩnte Ñandejára, haʼéva enterove Túa, oĩva opa mbaʼe ári, haʼe ojevale opavavére ha ipodér omomýi enterovépe.

7 Upéicharõ, Ñandejára imbaʼeporãiterei ñanendive,* káda únondi, ha pe Cristo hína upe omeʼẽ vaʼekue káda únope upe rregálo gratiete.+ 8 Pórke Ñandejára Ñeʼẽ heʼi: “Haʼe ojupírõ guare yvate ogueraha prisionéro ha ombou koʼã kuimbaʼépe rregáloramo”.+ 9 Péro, ¿mbaʼépa heʼise “ojupírõ guare yvate”? Heʼise haʼe oguejy raẽ hague avei ko yvy ape ári. 10 Ha upe oguejy vaʼekue ko yvy ape ári, haʼe avei upe ojupi+ vaʼekue yvateve pe yvágagui,+ oñekumplipa hag̃ua opa mbaʼe.

11 Ha haʼe omeʼẽ vaʼekue pe kongregasiónpe unos kuánto oservi hag̃ua apóstolramo,+ unos kuánto profétaramo,+ unos kuánto opredika+ hag̃ua umi notísia porã, ótro katu pastór ha mboʼehára.+ 12 Haʼekuéra oĩ oipytyvõ* hag̃ua umi ojeporavo vaʼekuépe* oho hag̃ua tape porãre, oservi hag̃ua ótrope ha omombarete hag̃ua Cristo rete.*+ 13 Haʼekuéra ñanepytyvõta ikatu hag̃uáicha ñaime unído entéro mbaʼe jagueroviávape ha jaikuaa porã hag̃ua Ñandejára Raʼýpe. Péicha oikóta ñandehegui peteĩ kuimbaʼe okakuaapámava+ ha ohupytýva Crístope entéro mbaʼépe. 14 Upévare ndajaikovéima vaʼerã mitãicha, pórke pe ogueroviáva umi japu+ omboʼéva umi kuimbaʼe oikóva oporombotavy haʼete peteĩ várko oĩva márpe, ogueraháva chupe umi oláda ha yvytu ápe ha pépe. 15 Upéva rangue, jaʼe vaʼerã siertoguávante ha japorohayhu, ha péicha ikatúta jakakuaapa entéro mbaʼépe jajogua hag̃ua Crístope, upe ñanemoakãvape.+ 16 Haʼe rupive pe hete kompletoite+ ojoaju umi ñúdo rupive ha ombaʼapo porã oñondive, omeʼẽvo upe oñekotevẽva. Ha káda párte ojapo porãvo hembiapo otokáva chupe, oipytyvõ pe hetépe okakuaa ha oñemombarete hag̃ua ohóvo mborayhúpe.+

17 Upéicharõ, ko mbaʼe haʼe peẽme ha ajerure jey jey peẽme ñande Ruvicha rérape: anive peiko umi hénte ko mundopegua oikoháicha,+ pórke haʼekuéra oiko asegún umi vyrorei* opensávante.+ 18 Haʼekuéra* oĩ pytũmbýpe ha oñemomombyry pe jeikove oúvagui Ñandejáragui, ndoikuaaséigui Ñandejárape ha ipyʼahatã rupi hikuái. 19 Koʼãva ningo ndoikuaavéima mbaʼépa iporã ha mbaʼépa ivai, notĩveietéma hembiapo vai hag̃ua,*+ ojapo umi mbaʼe kyʼa ñanembojeguarúva ha noñekontentái voi* hikuái.

20 Péro peẽ napeaprendéi kuri Cristo ojogua hague koʼãichagua héntepe. 21 Jesús ningo omboʼe vaʼekue umi mbaʼe siertoguáva, ha oimérõ peẽ pehendu raʼe chupe ha peñehekomboʼe haʼe rupive, upéicharõ peẽ peikuaa porã koʼã mbaʼe. 22 Peẽ ningo peaprende vaʼekue pehejaite vaʼerãha pene kondúkta yma guare,+ upéva hína upe peiko lája ymave, pórke pene kondúkta yma guare ivaive ohóvo penembotavy rupi umi pende deséo vai.+ 23 Ha peẽ pesegi vaʼerã pembopyahu pepensa lája,*+ 24 ha pemonde vaʼerã peteĩ aóicha pe kondúkta pyahu,+ ojejapo vaʼekue Ñandejára oipotahaichaite, asegún umi mbaʼe oĩ porãva ha ifiélva.

25 Upéicharõ, koʼág̃a peipeʼáma rupi pendejehegui opaichagua japu, siertoguávante peje vaʼerã pende rapichápe,+ pórke enterove ñande haʼe peteĩ párte oĩva pe kuérpope odependéva ojuehe.+ 26 Pendepochýramo jepe, ani pepeka,+ ani pesegi pendepochy kuarahy oike peve,+ 27 ani pemeʼẽ oportunida pe Diáblope ojapoka hag̃ua peẽme mbaʼeve.+ 28 Pe omondáva anivéma omonda, upéva rangue tombaʼapo pohýi ojapóvo iporãva,+ ikatu hag̃uáicha oguereko álgo okomparti hag̃ua pe oikotevẽvandi.+ 29 Aníkena osẽ pende jurúgui mbaʼeveichagua ñeʼẽ kyʼa,*+ síno peñeʼẽ jave peje umi mbaʼe iporãva ha oporomombaretétava añoite asegún pe oñekotevẽva upe moméntope, péicha umi mbaʼe pejéva ideprovéchota umi penerendúvape.+ 30 Aníkena avei pemoñembyasy* Ñandejára espíritu sánto.+ Pórke upéva rupive ningo Ñandejára omoĩ vaʼekue penderehe peteĩ séllo,+ pejesalva hag̃ua pe rreskáte rupive peteĩ día de liverasiónpe.+

31 Aníkena ni mbaʼevéicharõ pendepyʼaro,+ pendepochy, perrenega vaipa, pejoguerosapukái, peñeʼẽ vai ojuehe+ ni peneñaña,+ peipeʼaitékena pendejehegui koʼã mbaʼe. 32 Upéva rangue penembaʼeporã vaʼerã oñondive, pejoporiahuvereko+ ha peñoperdona vaʼerã pende pyʼaite guive, Ñandejára peneperdona haguéicha avei ipyʼaite guive Cristo rupive.+

5 Upévare, pehaʼangákena Ñandejárape,+ peẽ itaʼýra haʼe ohayhuetéva. 2 Ha pesegíkena pejoayhu+ Cristo ñanderayhu* haguéicha,+ haʼe ningo omeʼẽ vaʼekue hekove ñanderehehápe* peteĩ ofrénda ha sakrifísio hyakuã porãvaicha Ñandejárape g̃uarã.+

3 Aníkena ni mbaʼevéicharõ peñeʼẽ tekovaíre,* ni mbaʼeveichagua mbaʼe kyʼáre, ni peipotaitereiha heta mbaʼe,*+ pórke Ñandejára siervokuéra* ndojapói vaʼerã koʼã mbaʼe.+ 4 Aníke pejapo avei mbaʼeve oporomotĩva, ni peñeʼẽ vyroreíre, ni pemombeʼu chíste tieʼỹ,+ koʼã mbaʼe naiporãigui, upéva rangue peagradese vaʼerã Ñandejárape.+ 5 Pórke peẽ peikuaa ko mbaʼe, ha añetehápe pentende porãiterei voi: ni peteĩ hekovaíva,+ hekokyʼáva, ni umi hénte siémpre oipota potavéva*+ (umíva ojogua umi persóna oadorávape taʼanga), ndoikemoʼãiha Ñandejára Rréinope, Cristo ogovernahápe.+

6 Aníke avave penembotavy heʼívo peẽme vyrorei, pórke koʼã mbaʼe káusare Ñandejára ipochyeterei umi naiñeʼẽrendúivandi. 7 Upévare aníkena pejeheʼa hesekuéra. 8 Peteĩ tiémpope peẽ peime vaʼekue pytũmbýpe, péro koʼág̃a peporohesape+ peservi rupi ñande Ruvichápe.+ Pesegíkena peiko umi oĩva lus rendýpe oikoháicha. 9 Jaiko upe lus rendýpe heʼise ñanembaʼeporãha opa mbaʼépe, ñandehústo ha jaikoha tape porãre.+ 10 Pesegíkena pehechakuaa oĩ porãpa térãpa oĩ vai+ ñande Ruvichápe g̃uarã umi mbaʼe pejapóva. 11 Anive pejapo umi mbaʼe ndovaléiva mbaʼeverã ha oĩva pytũmbýpe,+ upéva rangue pehechauka umíva ivaiha. 12 Pórke umi mbaʼe haʼekuéra ojapóva ñemiháme ningo ñatĩ ñamombeʼu hag̃ua jepe. 13 Pe lus rendy rupive ojehecha* umi mbaʼe naiporãiva, pórke pe lus rupive ojekuaa entéro mbaʼe. 14 Upévare, Ñandejára Ñeʼẽ heʼi: “Nde rekéva hína peteĩ omanóvaicha,+ epáyke, epuʼã umi omano vaʼekue apytégui ha Cristo ohesapéta nde ári”.+

15 Upéicharõ, peñatende porãke peiko lájare, ani peiko umi itavývaicha, síno umi iñarandúvaicha. 16 Ha peipuru porãke pene tiémpo,*+ pórke ivai hína umi día. 17 Upéicha rupi, anive pendevýro, síno pesegi pehecha mbaʼépa hína Jehová* oipota pejapo.+ 18 Ani avei pekaʼu,*+ pórke upéva ojapoka heta mbaʼe vai,* upéva rangue pesegi vaʼerã penerenyhẽ espíritu sántogui. 19 Pepurahéi oñondive* umi salmo, pemombaʼeguasu Ñandejárape ha pepurahéi músika peadora hag̃ua chupe.+ Pegueropurahéi+ Jehovápe* pende pyʼaite guive.+ 20 Avei siémprekena peagradese+ ñande Ru Ñandejárape entéro mbaʼére, ñande Ruvicha Jesucristo rérape.+

21 Enterove peñemoĩ vaʼerã pende rapicha poguýpe,+ perrespeta rupi Crístope pende pyʼaite guive. 22 Tembirekokuéra oñemoĩ vaʼerã iména poguýpe,+ oñemoĩháicha ñande Ruvicha poguýpe. 23 Pórke pe ména ningo omoakã hína hembirekópe,+ Cristo omoakãháicha pe kongregasión,+ haʼéva hete haʼe osalva vaʼekue. 24 Añetehápe, pe kongregasión oñemoĩháicha Cristo poguýpe, upéicha avei tembirekokuéra oñemoĩ vaʼerã iména poguýpe entéro mbaʼépe. 25 Menakuéra, pesegíkena pehayhu pene rembirekópe,+ Cristo ohayhu haguéicha pe kongregasión ha omeʼẽ hekove hesehápe.+ 26 Haʼe ojapo upéicha ikatu hag̃uáicha osantifika chupe, omopotĩvo chupe Ñandejára Ñeʼẽme, omopotĩrõguáicha ýpe.+ 27 Ikatu hag̃uáicha henondépe pe kongregasión iporã, naimánchai, naichaʼĩri ha ndorekói mbaʼeve ivaíva,+ upéva rangue taipotĩ Ñandejára renondépe ha ani oreko ni peteĩ defékto.+

28 Peichaite avei menakuéra ohayhu vaʼerã hembirekópe, haʼekuéra ojehayhuháicha. Pe ohayhúva hembirekópe ojehayhu ijupe voi. 29 Pórke ndaipóri ningo kuimbaʼe ndochaʼéiva hetére, upéva rangue mborayhúpe oñangareko hetére, Cristo ojapoháicha pe kongregasiónre, 30 pórke ñande haʼe hína umi párte oĩva Cristo retépe.+ 31 “Upévare pe kuimbaʼe ohejáta itúa ha isýpe, ha opytáta* hembirekóndi, ha mokõivégui oikóta peteĩntema”.+ 32 Ko sekréto sagrádo+ iñimportanteterei. Koʼág̃a añeʼẽ hína Cristo rehe ha pe kongregasiónre.+ 33 Upéicharõ, káda uno pehayhu vaʼerã pene rembirekópe+ peẽ voi pejehayhuháicha. Pe tembireko katu orrespeta vaʼerã iménape ipyʼaite guive.+

6 Mitãnguéra, peneñeʼẽrendúkena pende tuakuérape+ ñande Ruvicha oipotaháicha, upéva ningo oĩ porã Ñandejára renondépe. 2 “Emombaʼékena nde túa ha nde sýpe”,+ péva hína pe primer mandamiénto oñemeʼẽ vaʼekue ko promésa ndive: 3 “Oho porã hag̃ua ndéve ha reikove puku hag̃ua ko yvy ape ári”. 4 Ha peẽ tuakuéra, ani pedesahusia* pene famíliape,+ síno pesegi pemongakuaa, pekorrehi+ ha peñemoñeʼẽ* chupekuéra Jehová* heʼiháicha.+

5 Peẽ esklavokuéra, peneñeʼẽrendúkena pene patronkuérape,*+ perrespeta ha pekyhyje vaʼerã chuguikuéra ha peneñeʼẽrendu chupekuéra pende pyʼaite guive, pejapoháicha Cristo ndive. 6 Ani pejapo upéva pejechauka hag̃uánte, pepyta porãségui kuimbaʼekuéra renondépe,+ upéva rangue peneñeʼẽrendu Cristo esklávoramo ha pejapo Ñandejára rembipota pende pyʼaite guive.*+ 7 Peservi vaʼerã kyreʼỹme pene patrónpe peserviramoguáicha Jehovápe,*+ ha ndahaʼéi kuimbaʼekuérape. 8 Peẽ ningo peikuaa voi, tahaʼe esklávo térã peteĩ orekóva liverta, Jehová* omyengoviataha káda únope+ entéro mbaʼe porã ojapóvare. 9 Avei peẽ patronkuéra penemanduʼa vaʼerã koʼã mbaʼére ha upéicha avei pesegi petrata porã chupekuéra, ha ani peiko peamenasa chupekuéra, pórke mokõivéva Patrón oĩ hína yvágape,+ ha haʼe otrata enterovépe peteĩchante.

10 Ipahápe, ñande Ruvicha tomeʼẽ peẽme podér,+ pe ifuérsa tuichaitéva rupive. 11 Pemoĩkena pendejehe pe armadúra kompletoite+ oúva Ñandejáragui, ikatu hag̃uáicha pejepytaso mbarete ani hag̃ua peʼa umi ñuhã oipurúvape pe Diablo. 12 Pórke ñande ningo nañañorairõi+ kuimbaʼekuérandi, síno ñañorairõ hína umi demónio+ ehérsito yvagapeguándi, koʼãva hína umi goviérno, umi autorida ha umi ogovernáva ko múndo oĩva pytũmbýpe. 13 Upévare pemoĩkena pendejehe pe armadúra kompletoite oúva Ñandejáragui,+ pendepuʼaka hag̃ua ko enemígore haʼe pendeataka vove.* Péicha pejapo porã rire entéro mbaʼe, peẽ ikatúta pejepytaso mbarete.

14 Upéicharõ, pejepytaso mbaretékena, ha peteĩ síntoicha pemoĩ pende kuʼáre pe añetegua,+ ha peteĩ armadúraicha pemoʼã pende pytiʼa hustísiape.+ 15 Pemoĩ pende pýre pe sandália peime hag̃ua preparádo pepredika hag̃ua umi notísia porã oñeʼẽva pyʼaguapýre.+ 16 Siémprekena peñakarama pende jeroviáre peteĩ eskúdo guasúicha,+ upévape peẽ ikatúta pembogue kompletoite umi flécha hendýva opoíva Satanás.*+ 17 Avei pemoĩ pene akãre peteĩ káskoicha pe salvasión,+ ha pejagarra pe espáda omeʼẽva pe espíritu sánto,* upéva hína Ñandejára ñeʼẽ.+ 18 Upe aja pesegi pejapo opaichagua ñemboʼe+ ha pejerure asy Ñandejárape pe espíritu podér rupive.+ Upévare, peime vaʼerã pepayhápe ikatu hag̃uáicha kontinuadoite pejerure asy enterove umi ojeporavo vaʼekue* rehehápe. 19 Peñemboʼe avei cherehe, ikatu hag̃uáicha aikuaa mbaʼépa haʼéta añeʼẽta vove ha péicha apredika hag̃ua pyʼaguasúpe umi notísia porã, haʼéva hína peteĩ sekréto sagrádo.+ 20 Ñandejára chembou vaʼekue irrepresentánteramo*+ apredika hag̃ua umi notísia porã, upéicha rupi cheñapytĩ hikuái kadénape. Che ningo añeʼẽ vaʼerã pyʼaguasúpe umi notísia porã rehe, upévare peñemboʼékena Ñandejárape cherehe ikatu hag̃uáicha ajapo upéva.

21 Tíquico,+ ñane ermáno jahayhuetéva ha oservíva ipyʼaite guive ñande Ruvichápe, omombeʼúta peẽme mbaʼépa ajapo ha mbaʼetekópa oho chéve.+ 22 Upearã voi amondo hína chupe pene rendápe omombeʼu hag̃ua peẽme mbaʼéichapa ore roime, ha penekonsola hag̃ua.

23 Ñande Ru Ñandejára, ha ñande Ruvicha Jesucristo tomeʼẽ enterove ermanokuérape pyʼaguapy, mborayhu ha jerovia. 24 Ñandejára taimbaʼeporãite* entéro umi orekóvandi pe mborayhu ndopamoʼãiva arakaʼeve ñande Ruvicha Jesucrístore.