KÁRTA A LOS FILIPENSES

1 Che Pablo, ha Timoteo, Cristo Jesús esklávo romondo ko kárta enterove umi ojeporavo vaʼekuépe* haʼéva Cristo Jesús disípulo oĩva Filípospe,+ avei umi ansiáno ha siérvo ministeriálpe:*+

2 Aipotaite ñande Ru Ñandejára ha ñande Ruvicha Jesucristo, taimbaʼeporãiterei penendive* ha tomeʼẽ peẽme pyʼaguapy.

3 Che siémpre aagradese Ñandejárape chemanduʼávo penderehe, 4 ajapo jave opaichagua ñemboʼe* penderehehápe. Che vyʼápe ajerure asy penderehehápe,+ 5 pemeʼẽ haguére pene kontrivusión ojepredika hag̃ua umi notísia porã, pehendu ypy guive umi notísia porã koʼag̃aite peve. 6 Che ajerovia Ñandejára penepytyvõtaha pemohuʼã hag̃ua upe mbaʼe porã haʼe omoñepyrũ vaʼekue pende apytépe,+ og̃uahẽ meve Jesucristo ára.+ 7 Oĩ porã la apensa upéicha penderehe, pórke che pohayhueterei che pyʼaite guive. Enterove peẽ ningo chepytyvõ vaʼekue aime aja kárselpe,+ ha ñadefende hag̃ua umi notísia porã ha ñakonsegi hag̃ua pe derécho legál japredika hag̃ua+ umíva. Péicha chéve ha peẽme ideprovécho kuri Ñandejára mbaʼeporã.

8 Ñandejára oikuaa mbaʼeichaitépa pohechagaʼu, pórke che pohayhueterei enterovépe Cristo Jesús penderayhuháicha. 9 Añemboʼe jave, ajerure meme pene mborayhu okakuaave hag̃ua ohóvo,+ ha peikuaa porã+ hag̃ua Ñandejára rembipota ha pentende porã+ hag̃ua upéva. 10 Péicha ikatúta pehechakuaa mbaʼépa hína umi mbaʼe iñimportantevéva,+ ha upéicha ndapejapomoʼãi mbaʼeve ivaíva ha napemoñepysangamoʼãi ótrope,+ og̃uahẽ meve Jesucristo ára. 11 Ha añemboʼe jave ajerure avei pende rekove ha pene kondúkta siémpre iporã hag̃ua Jesucristo penepytyvõ rupi,+ ha péicha oñembotuicháta ha oñemombaʼeguasúta Ñandejárape.

12 Aipota peikuaa che ermanokuéra umi mbaʼe ahasa vaʼekue rupive, añetehápe omeʼẽ hague chéve peteĩ oportunida amombeʼu hag̃ua umi notísia porã, 13 pórke pe rréi de Roma guardiakuéra ha enterove umi ótro oikuaa+ che aĩha préso+ aservi rupi Crístope. 14 Che aime rupi préso, heta hetave ermáno oservíva ñande Ruvichápe ikyreʼỹve ha ipyʼaguasuve omombeʼu hag̃ua Ñandejára ñeʼẽ kyhyjeʼỹme.

15 Oĩ ningo añete umi opredikáva ha oñeʼẽva Cristo rehe iñenvidióso ha oiko vaise rupi, péro oĩ avei umi opredikáva ipyʼaporã rupi. 16 Koʼã último oñeʼẽ Crístore oporohayhúgui, oikuaa rupi hikuái che ajeporavo hague adefende hag̃ua umi notísia porã.+ 17 Péro umi ótro ojapo upéva oporomoingo vaiségui, pórke haʼekuéra oimoʼã péicha chembohasa asytaha aime aja préso. 18 ¿Ha mbaʼe la oikóva amo ipahápe? Umi hénte ohendu pe mensáhe oñeʼẽva Crístore, umi opredikáva iñintensión porã térã nahániriramo jepe, ha upéva chéve chembovyʼa. Upéicharõ che asegíta avyʼa, 19 pórke che aikuaa péicha ajesalvataha, pene ñemboʼe+ rupive ha chepytyvõgui pe espíritu sánto Jesucristo omeʼẽva.+ 20 Che ajerovia ha areko esperánsa ni mbaʼevéicharõ nañemotĩmoʼãiha. Che ndakyhyjéi rupi añeʼẽ hag̃ua, ambotuicha hína Crístope koʼág̃a, yma ajapo haguéicha voi. Tahaʼe aikove térã amanóramo, che ambotuicháta* chupe.+

21 Che aikovéramo, aipuru che rekove aservi hag̃ua Crístope,+ ha amanóramo, upéicharõ agana.+ 22 Péro che asegíramo aikove ko múndope* ikatúta ajapo hetave mbaʼe Crístope g̃uarã, upéicharõ jepe namombeʼumoʼãi mavaitévapa aiporavóta: pe jeikove térãpa pe ñemano. 23 Ndaikuaái ningo mbaʼépa aiporavóta. Hiʼãite chéve areko liverta ha aime Crístondi,+ pórke upéva añetehápe iporãve hína.+ 24 Upéicharõ jepe, penderehehápe ikuentave asegi aikove ko múndope. 25 Upévare, che aikuaa asegitaha aikove, ha apytataha gueteri penendive ikatu hag̃uáicha peñakãrapuʼã peservívo Ñandejárape ha pevyʼa hag̃ua pende jerovia rupive. 26 Ha péicha ág̃a che aime jey vove penendive pevyʼaitereíta, Cristo Jesús disípuloramo.

27 Pehechaukákena peiko lájare* pemombaʼeha umi notísia porã oñeʼẽva Crístore.+ Upéicha che povisitáramo térã nahániriramo, peẽ pejepytaso mbaretéta, peiméta en unida*+ ha peiméta peteĩ ñeʼẽme,* ha pembaʼapóta oñondivepa siémpre pejerovia hag̃ua umi notísia porãre. 28 Ha ani ni mbaʼevéicharõ pekyhyje pene enemigokuéragui. Koʼã mbaʼe ohechauka chupekuéra oñehunditaha+ hikuái, péro peẽme ohechauka pejesalvataha,+ ha ko mbaʼe Ñandejára voi ohechauka. 29 Pórke peẽme oñemeʼẽ pe priviléhio ndahaʼéi pejeroviánte hag̃ua pe Crístore, síno pehasa asy hag̃ua avei hesehápe.+ 30 Peẽ ningo pehecháma mbaʼéichapa che alucha, ha péicha avei peẽ pelucha pembohovái aja umi mbaʼe ijetuʼúva,+ ha peikuaa koʼag̃aite peve asegiha alucha.

2 Oiméramo peẽ pemokyreʼỹse ótrope Cristo rupive, oimérõ pekonsolase pende rapichápe mborayhúpe, oimérõ pehechaukase pejepyʼapyha, pehayhu ha peiporiahuverekoha pende rapichápe, 2 upéicharõ pejapo vaʼerã upéva, ha péicha pechemyenyhẽ vyʼágui peimévo peteĩ ñeʼẽme,* pejoayhúvo, peimévo en unida ha pepensávo peteĩchapa.+ 3 Ani pejapo mbaʼeve peiko vaiségui+ ni peñembotuichaségui,+ upéva rangue peneumílde vaʼerã ha pepensa umi ótro tuichaveha pendehegui,+ 4 ha ani pejepyʼapy umi mbaʼe peẽme okonvenívarente,+ síno pejepyʼapy vaʼerã avei umi ótrore.+

5 Pesegíkena pepensa péicha, Cristo Jesús opensa haguéicha.+ 6 Haʼe ningo haʼéramo jepe Ñandejáraicha,+ núnka nopensái vaʼekue oreko vaʼerãha el mísmo lugár Ñandejára orekóva.+ 7 Haʼe ndojapói upéicha, upéva rangue oheja opa mbaʼe orekóva ha opyta peteĩ esklávoicha+ ha oiko chugui peteĩ yvypóra.*+ 8 Ha ndahaʼéi voi upévante, oikórõ guare chugui yvypóra haʼe oñeumilla ha iñeʼẽrendu omano meve,+ ha omano peteĩ yvyráre.*+ 9 Upéicha rupi Ñandejára ombotuicha Jesúspe ha omeʼẽ chupe peteĩ puésto ijyvatevéva,+ avei pyʼaporãme omeʼẽ chupe pe téra iporãvéva entéro umi ótro téragui.+ 10 Ha péicha, Jesús rérape oñesũta enterovéva (entéro umi oĩva yvágape, umi oĩva yvy ape ári ha umi oĩva yvyguýpe),*+ 11 ha enterovéva ohechakuaáta Jesucristo haʼeha ñande Ruvicha,+ ha péicha oñemombaʼeguasúta Ñandejárape, haʼéva hína pe Túa.

12 Upéicharõ che ermanokuéra ahayhuetéva, peẽ ningo siémpre peneñeʼẽrendúva aimérõ guare penendive, ha koʼág̃a che naiméi aja penendive koʼýte peneñeʼẽrenduve. Upévare pesegi vaʼerã pembaʼapo péicha, rrespéto ha kyhyjepópe, pehupyty hag̃ua pe salvasión. 13 Pórke Ñandejára ojapo umi mbaʼe ogustáva chupe ha penemombarete, ikatu hag̃uáicha pereko pe deséo ha pe podér pejapo hag̃ua entéro mbaʼe chupe ogustáva. 14 Pesegíkena pejapo opa mbaʼe pejeplageaʼỹre+ ha pediskutiʼỹre,+ 15 péicha ndaiporimoʼãi mbaʼeve ivaíva ojeʼe vaʼerã penderehe, ha ndapejekulpamoʼãi mbaʼevére. Avei peẽ haʼéva Ñandejára raʼy,+ penepotĩta peikóramo jepe ko henerasión aña apytépe,+ ndojapóiva iporãva. Peẽ katu ijapytepekuéra pehesape hína peteĩ mbaʼerendýicha ko múndope,+ 16 pesegívo peñakarama hatã pe ñeʼẽ oporomoingovévare.+ Ha péicha che avyʼáta Cristo árape, aikuaágui ndaikói hague adipara rei ni ambaʼapo pohýi rei. 17 Upéicharõ, che añeñohẽramo jepe ofrénda líkidaicha+ pende sakrifísio ári+ pembaʼapóvo pe servísio sagrádo rehehápe, che avyʼaiterei penendive, pórke pende jerovia penemomýi pejapo hag̃ua upéva. 18 Péicha avei peẽ pevyʼa ha pendepyʼarory vaʼerã chendive.

19 Ñande Ruvicha Jesús oipotáramo, hiʼãitéma chéve koʼẽrõite amondo pene rendápe Timotéope,+ ikatu hag̃uáicha chekyreʼỹ arresivi vove notísia pendehegui. 20 Pórke ndarekói avave haʼéicha ijaktitu porãva, ipyʼaite guive oñangarekótava penderehe. 21 Enterove umi ótro oheka umi mbaʼe chupekuéra okonvenítavante ha ndojepyʼapýi Cristo Jesús rembipotáre. 22 Peẽ peikuaa porã Timoteo ohechauka hague mbaʼeichagua persónapa haʼe, peteĩ taʼýra+ ombaʼapoháicha itúandi haʼe esklávoicha ombaʼapo chendive umi notísia porã okakuaa hag̃ua oparupiete. 23 Chupe la amondose hína pene rendápe, ha upéicha ajapóta aikuaa vovéntema mbaʼépa oikóta chehegui. 24 Añetehápe, ñande Ruvicha oipotáramo, che voi ahase hína pene rendápe koʼẽrõite.+

25 Péro koʼág̃a katu ahecha tekotevẽha amondo pene rendápe Epafrodítope, haʼe hína che ermáno chemoirũva che rembiapópe, haʼéva avei Cristo soldádo. Peẽ ningo pemondo kuri chupe oñatende hag̃ua cherehe umi mbaʼe aikotevẽvape.+ 26 Haʼe ningo penderechasetereíma ha oime oñeñandu vaieterei peẽ pehendu rupi haʼe hasy hague. 27 Añetehápe haʼe hasyete, haimete voi omano kuri, péro Ñandejára oiporiahuvereko chupe, ha ndahaʼéi voi chupe añónte síno chéve avei, ani hag̃ua ojoʼapa chehegui umi mbaʼe chemoñembyasýva. 28 Upévare pyaʼe porã amondo hína pene rendápe, ikatu hag̃uáicha pevyʼa jey pehecha vove chupe ha che katu saʼive ajepyʼapýta. 29 Upéicharõ, perresivi porãkena chupe perresiviháicha jepi ñande Ruvicha segidorkuérape, ha pesegíkena pemombaʼe koʼãichagua kuimbaʼépe.+ 30 Pórke haʼe ningo haimete omano ombaʼapo rupi Crístope g̃uarã,* ha oapeligra hekove* chepytyvõ hag̃ua pende vése.+

3 Upéicharõ che ermanokuéra, pesegíkena pevyʼa ñande Ruvicha servísiope.+ Che nacheprovlémai askrivi jey hag̃ua peẽme koʼã mbaʼe, pórke upéva ningo pene vienrãnte hína.

2 Pejekuidákena umi hénte ojoguávagui jaguápe,* pejekuidákena umi mbaʼe vai apohágui, pejekuidákena umi oikóvagui omboliga ótrope oñesirkunsida hag̃ua.*+ 3 Pórke ñande jareko pe sirkunsisión* teetéva+ jaservi rupi Ñandejárape ijespíritu rupive, ñañembotuicha haʼégui Cristo Jesús segidór,+ ha ndajajeroviái yvyporakuéra ojapóvare.

4 Oiméramo oĩ oñemombaʼeguasuséva umi mbaʼe ohupyty vaʼekuére yvypóraicha, che ikatu añemombaʼeguasuve hína chugui: 5 añesirkunsida 8 día+ anase haguépe, che hína Israel nasiongua, Benjamín trivugua, che hebreo ha che tuakuéra hebreo+ avei, che haʼe vaʼekue peteĩ fariséo+ okumplíva pe léi. 6 Ha akumplisetereígui pe chéverõ g̃uarã oĩ porãva, apersegi pe kongregasiónpe+ ha ajapopaite umi mbaʼe pe léi heʼíva oĩ porãha. 7 Upéicharõ jepe, umi mbaʼe yma iñimportanteterei vaʼekue chéve g̃uarã, koʼág̃a vyʼápe ahejapaite Cristo rehehápe.+ 8 Añetehápe chéve g̃uarã koʼã mbaʼe ndovaléi mbaʼeverã aikuaa rupi che Ruvicha Cristo Jesúspe, ha upéva chéve g̃uarã ndaijojahái. Hesehápe ahejapaite entéro mbaʼe areko vaʼekue ha ahecha umíva ytýramo, ikatu hag̃uáicha agana hetave mbaʼe asegívo Crístope, 9 ha péicha ojehechakuaa hag̃ua che haʼeha isegidór. Péro che ndaʼéi chejehe chehustoha akumpli rupi pe léi, upéva rangue ojeʼe cherehe chehustoha ajerovia+ rupi Crístore.+ Añetehápe, Ñandejára heʼi ihustoha umi ojeroviáva Crístore.+ 10 Che ningo aikuaase Crístope, pe podér omoingove jey vaʼekue chupe umi omanóva apytégui,+ ha ahasa asyse haʼéicha,+ avei aime preparádo amano hag̃ua haʼe omano haguéicha.+ 11 Che añehaʼãmbaite ajapo upéva, ikatu hag̃uáicha aime umi primeroite oñemoingove jeýtava apytépe.*+

12 Che neʼĩra arresivi pe prémio, ha neʼĩra ahupyty pe perfeksión, síno kontinuadoite añehaʼã+ añakarama hatã hag̃ua pe prémiore, pórke aikuaa Cristo Jesús cheporavo hague upearã.+ 13 Che ermanokuéra, che napensái ahupytymaha upéva, péro ajapo peteĩ mbaʼe: cheresarái umi mbaʼe opyta vaʼekuégui che rapykuépe,+ ha añehaʼãmbaite ahupyty umi mbaʼe oĩva che renonderãme.+ 14 Che añehaʼãmbaite hína arresivi hag̃ua pe prémio+ Ñandejára omeʼẽva, upéva hína pe jeikove yvágape,+ ha Ñandejára omeʼẽta upéva umi oiporavo vaʼekuépe Cristo Jesús rupive. 15 Upéicharõ, umi ijerovia mbaretémava+ ñande apytépe, jasegi vaʼerã ñapensa asegún umi mbaʼe haʼe vaʼekue peẽme angete. Péro oiméramo peẽ napepensái hína péicha, Ñandejára penepytyvõta ikatu hag̃uáicha pepensa upéicha. 16 Opáichavo, oiméramo jahupytýma hína heta mbaʼe, jasegíkena jaiko upéicha ha jaha meme tenonde gotyo.

17 Enterove peẽ che ermanokuéra, pesegíkena che ehémplo+ ha pejesareko meme umi oikóvare hína asegún pe ehémplo romoĩ vaʼekue peẽme. 18 Pórke oĩ heta nomombaʼéiva Cristo omano hague pe yvyráre.* Yma che chemanduʼa meme vaʼekue hesekuéra, ¿ajépa? Péro koʼág̃a cherasẽ chemanduʼávo hesekuéra. 19 Ipahápe haʼekuéra oñehundi vaʼerã, haʼekuéra omombaʼeguasu hete ojaposéva, oñemombaʼeguasu umi mbaʼe otĩ vaʼerãre, ha opensa meme hikuái umi mbaʼe ko mundopeguáre.+ 20 Ñande katu hína siudadáno+ yvagapegua,+ ha ñahaʼarõitereíma peteĩ salvadór, haʼéva ñande Ruvicha Jesucristo oĩva yvágape.+ 21 Haʼe ojevaléta ipodér tuichaitévare orresivi vaʼekue omoĩ hag̃ua ipoguýpe entéro mbaʼe,+ okambia hag̃ua ñande rete ikangýva, ikatu hag̃uáicha ojapo chugui peteĩ ojoguáva hete omimbipávape.+

4 Upévare, che ermanokuéra ahayhuetéva, hiʼãitéma chéve pohecha, peẽ ningo chembovyʼa ha chéve g̃uarã peẽ haʼe hína peteĩ korónaicha.+ Péicha peẽ pesegi vaʼerã pejepytaso mbarete+ ñande Ruvicha servísiope.

2 Evodia ha Síntiquepe ajerure jey jey opensa hag̃ua peteĩcha oservívo ñande Ruvichápe.+ 3 Ajerure avei ndéve, che ermáno reservíva che ykére nde pyʼaite guive,* resegi hag̃ua reipytyvõ koʼã ñane ermánape. Añetehápe haʼekuéra ha avei Clemente ha umi ótro ermáno ombaʼapo jejopy* vaʼekue che ykére omombeʼu hag̃ua umi notísia porã. Herakuéra ningo ojeskrivíma pe lívro de la vídape.+

4 Siémprekena pevyʼa ñande Ruvicha servísiope, haʼe jeýta voi peẽme: ¡pevyʼákena!+ 5 Enterove toikuaa napeñemohatãiha peẽ pejévapente.*+ Aníkena penderesarái hiʼag̃uimaha ñande Ruvicha. 6 Ani pejepyʼapyeterei mbaʼevére,+ síno oimeraẽ situasiónpe pejerure Ñandejárape penepytyvõ hag̃ua, peñemboʼe ha pejerure asývo chupe, ha peagradese avei chupe.+ 7 Ha Ñandejára pyʼaguapy+ tuichavéva entéro mbaʼe yvyporakuéra ikatúvagui ontende, oñangarekóta pene korasõre+ ha umi mbaʼe pepensávare Cristo Jesús rupive.

8 Upéicharõ che ermanokuéra, pesegíkena pejepyʼamongeta entéro mbaʼe siertoguávare, iñimportántevare, ihústovare, ipotĩvare, umi mbaʼe ñanemomýivare japorohayhu hag̃ua, umi mbaʼe oñeñeʼẽ porãvare, entéro mbaʼe iporãvare ha entéro mbaʼe omeresévare ojeguerohory.+ 9 Peẽ pejapo vaʼerã umi mbaʼe peguerovia ha peaprende vaʼekue chehegui, umi mbaʼe pehendu vaʼekue che haʼeha ha umi mbaʼe pehecha vaʼekue che ajapo.+ Ha péicha Ñandejára omeʼẽva pyʼaguapy penevendesíta.

10 Che aservi ñande Ruvichápe ha avyʼaiterei peẽ pehechauka jey haguére pepensaha hína cherehe.+ Peẽ napenderesaráiri chehegui, péro peẽ ndapeikuaái kuri mbaʼéichapa chepytyvõta. 11 Ndaʼéi hína koʼã mbaʼe ajejopy vaígui, pórke ajepokuaáma añekontenta pe arekomívare, tahaʼe haʼéva pe situasión ahasáva.+ 12 Che aikuaa mbaʼéichapa aiko vaʼerã arekóramo saʼi+ ha mbaʼéichapa aiko vaʼerã arekóramo heta. Che aaprende peteĩ mbaʼe naentéroi oikuaáva, tahaʼe haʼéva pe situasión ahasáva: tahaʼe arekóramo haʼu vaʼerã térã ahasáramo ñembyahýi, tahaʼe arekóramo heta mbaʼe térã nahániri, che ajepokuaáma añekontenta umi mbaʼe arekomívare. 13 Che chembarete ambohovái hag̃ua entéro mbaʼe Ñandejára* omeʼẽgui chéve podér.+

14 Upéicharõ jepe, peẽ pehechauka penembaʼeporãha pechepytyvõ rupi ahasa asýrõ guare. 15 Añetehápe, peẽ ermanokuéra Filiposgua peikuaa porã avei añepyrũrõ guare amombeʼu umi notísia porã ha asẽrõ guare Macedóniagui, ni peteĩ kongregasión nachepytyvõi ni ndohejái che aipytyvõ chupekuéra, síno peẽ añoiténte.+ 16 Pórke aimérõ guare Tesalónicape, peẽ 2 vése peguerahaka chéve umi mbaʼe aikotevẽva. 17 Ndahaʼéi ningo che aipotáva hína pemeʼẽ chéve rregálo, síno aipotánte peẽ pejapo umi mbaʼe iporãva pegana hag̃ua hetave mbaʼe Ñandejára renondépe. 18 Péro koʼág̃a che naikotevẽi mbaʼeve, areko hetave mbaʼe upe aikotevẽvagui, pórke Epafrodito+ omeʼẽma chéve umi mbaʼe pegueruka vaʼekue. Umíva ningo ojogua peteĩ sakrifísio iporã ha hyakuã asývape+ Ñandejárape g̃uarã. 19 Upéicharõ Cristo Jesús rupive Ñandejára omeʼẽta peẽme entéro mbaʼe peikotevẽva,+ pórke haʼe oreko hetaiterei mbaʼe. 20 Koʼág̃a toñembotuicha ñande Ru Ñandejárape opa árare ha pára siémpre. Amén.*

21 Saludomi enterove Cristo Jesús disípulo ojeporavo vaʼekuépe.* Umi ermáno oĩva chendive oguerahaka avei peẽme salúdo. 22 Enterove umi ojeporavo vaʼekue* oguerahaka peẽme salúdo, koʼýte umi oĩva César*+ palásiope.

23 Hiʼãite chéve ñande Ruvicha Jesucristo imbaʼeporãiterei penendive* pe espíritu peẽ pehechaukávare.