KÁRTA A LOS COLOSENSES

1 Che ningo Pablo, ha Ñandejára oipotágui ajeporavo vaʼekue aservi hag̃ua Cristo Jesús apóstolramo, ha ñane ermáno Timoteo+ oĩva hína chendive, 2 romondo ko kárta entéro umi ojeporavo vaʼekuépe* ha umi ermáno ifiélvape haʼéva hína Cristo Jesús disípulo oĩva Colósaspe:

Aipotaite ñande Ru Ñandejára, ha ñande Ruvicha Jesucristo, taimbaʼeporãiterei penendive* ha tomeʼẽ peẽme pyʼaguapy.

3 Roñemboʼe jave penderehe siémpre roagradese Ñandejárape, haʼéva hína ñande Ruvicha Jesucristo Túa. 4 Ore roagradese chupe rohendúgui pejeroviaha Cristo Jesús rehe ha pehayhuha entéro umi ojeporavo vaʼekuépe.* 5 Pejapo upéva pórke pereko pe esperánsa Ñandejára oñongatúva peẽme g̃uarã yvágape.+ Peẽ peikuaa ko esperánsa pehendúrõ guare pe añetegua, haʼéva hína umi notísia porã 6 ojekuaauka vaʼekue peẽme. Péicha umi notísia porã ojekuaauka vaʼekue peẽme okakuaa ha oñemombeʼu oparupiete ko múndope.+ Upéicha avei oiko pende apytépe pehendu ypy guive umíva ha peikuaa porã mbaʼépa heʼise añetehápe Ñandejára imbaʼeporãitereiha. 7 Peẽ peaprende vaʼekue umi notísia porã Epáfrasgui,+ haʼe hína ñane ermáno jahayhuetéva ha ifiélva, oservíva avei Cristo esklávoramo ñanderehehápe. 8 Haʼe omombeʼu avei oréve mbaʼéichapa peẽ peporohayhu penepytyvõ rupi Ñandejára espíritu.

9 Upévare, rohendu guive koʼã mbaʼe, siémpre roñemboʼe penderehehápe+ ha rojerure Ñandejárape peikuaa porã hag̃ua hembipota,+ penerenyhẽ hag̃ua arandu teetégui ha pentende hag̃ua opa mbaʼe espíritu sánto rupive.+ 10 Péicha ikatúta peiko oikoháicha umi oservíva Jehovápe,* ikatu hag̃uáicha haʼe pendeguerohory entéro mbaʼépe, pesegívo pejapo umi mbaʼe oĩ porãva ha peikuaa porãvévo Ñandejárape.+ 11 Ore roñemboʼe avei Ñandejárape penemombarete hag̃ua ipodér tuichaitéva+ rupive, péicha peẽ ikatúta penepasiénsia ha pevyʼa pegueropuʼakávo entéro mbaʼe. 12 Avei peagradese pe Túape, haʼéva hína Ñandejára. Pórke haʼe pendeprepara perresivi hag̃ua pe erénsia oñemeʼẽva umi ojeporavo vaʼekuépe*+ oikóva pe lus rendýpe.

13 Haʼe ningo ñaneguenohẽ pe pytũmbýgui*+ ha ñanemoĩ Itaʼýra ohayhuetéva rréinope. 14 Haʼe opaga ikatu hag̃uáicha ñanderreskata ha ñandelivera pe pekádogui. Ha péicha oñeperdona ñandéve ñande pekadokuéra.+ 15 Haʼe hína Ñandejára jahechaʼỹva+ joguahaite, pe Taʼýra ypykue ojejapo vaʼekue opaite mbaʼe mboyve.+ 16 Pórke Ñandejára ojevale hese ojapo hag̃ua entéro mbaʼe oĩva yvágape ha yvy ape ári, umi mbaʼe ojehecháva ha umi ojehechaʼỹva,+ tahaʼe umi tróno, umi mburuvicha, umi goviérno térã umi autorida. Entéro koʼã mbaʼe ojejapo haʼe rupive+ ha imbaʼerã. 17 Haʼe oexistíma vaʼekue entéro koʼã mbaʼe mboyve,+ ha haʼe rupive ojejapopaite koʼã mbaʼe. 18 Haʼe omoakã pe kongregasión+ haʼéva hete. Chugui oñepyrũ entéro mbaʼe, haʼe hína pe ijypykue, pe primeroite opuʼã vaʼekue umi omanóva apytégui,+ upévare haʼe oĩ primeroite enteroite mbaʼégui. 19 Pórke Ñandejára oipota vaʼekue pe Cristo ikompléto* entéro mbaʼépe,+ 20 ha haʼe odesidi vaʼekue omoingo porã jey hendive entéro mbaʼe Cristo rupive,+ tahaʼe umi mbaʼe oĩva yvy ape ári térã yvágape. Ko pyʼaguapy ikatu ojehupyty Itaʼýra oñohẽ rupi huguy+ pe yvyráre.*

21 Añetehápe ningo yma peẽ haʼe vaʼekue Ñandejára enemígo ha peime mombyry chugui, pórke pepensa meme vaʼekue umi mbaʼe vaíre. 22 Péro koʼág̃a haʼe penemoingo porã jey hendive, Itaʼýra omano ha osakrifika rupi hekove, ha péicha ikatúta penepotĩ Ñandejára renondépe, ndaperekomoʼãi ni peteĩ defékto, ha ndojeʼemoʼãi penderehe mbaʼeve ivaíva henondépe.+ 23 Péro upearã peẽ pesegi vaʼerã pejerovia,+ peime hatã pe simiénto ári,+ pejepytaso+ mbarete ha ani peheja mbaʼeve penemomombyry pene esperánsagui. Ko esperánsa peẽ perresivi vaʼekue umi notísia porã rupive, ojepredikámava ko múndo tuichakuére.+ Ha che, Pablo, ajeporavo vaʼekue apredika+ hag̃ua koʼã notísia porã.

24 Koʼág̃a che avyʼa ahasa asýgui penderehehápe.+ Che aime preparádo asegi hag̃ua ahasa asy haʼégui peteĩ párte oĩva Cristo retépe. Koʼã mbaʼe vai ahasáva hína ideprovéchota pe kongregasiónpe,+ haʼéva hína Cristo rete.+ 25 Che aservi ko kongregasiónpe, pórke haʼe cheporavo ajapo hag̃ua ko traváho,+ ha upéva ideprovéchota peẽme. Upévare che apredika Ñandejára ñeʼẽ che pyʼaite guive. 26 Upéva hína pe sekréto sagrádo+ oñemokañy vaʼekue pe múndogui*+ ha umi hénte ymave guarégui, péro koʼág̃a ojekuaauka upéva umi haʼe oiporavo vaʼekuépe.*+ 27 Ñandejára ohecha iporãha oikuaauka ko sekréto sagrádo, ko tesóro ndaijojaháiva umi ojeporavo vaʼekuépe umi nasionkuéra apytégui. Ko sekréto sagrádo+ haʼe hína Cristo, haʼe oĩ hína en unida penendive ha peẽ pereko esperánsa peñembotuichataha hendive.+ 28 Chupe ñande jaikuaauka hína umi héntepe, japoroavisa ha tuicha arandu reheve ñamboʼe chupekuéra oikuaa hag̃ua Crístope. Péicha entéro kuimbaʼe ñapresentáva Ñandejára renondépe haʼéta Cristo segidór ha ijerovia mbaretéta.+ 29 Upearã ambaʼapo jejopy ha añehaʼãmbaite, ha Ñandejára oipuru ipodér chemombarete+ hag̃ua.

2 Aipota pehechakuaa mbaʼeichaitépa che alucha poipytyvõ hag̃ua, avei umi oĩvape Laodicéape+ ha entéro umi ótro ndacherechái vaʼekuépe.* 2 Ajapo upéva ikatu hag̃uáicha haʼekuéra oñekonsola,+ ha oĩ unído oñondivepa mborayhúpe,+ péicha enterove orresivíta umi rrikésa, umíva hína ontende ha oikuaa porã hikuái Ñandejára sekréto sagrádo, haʼéva hína Cristo.+ 3 Pype oñemokañy porã opaichagua arandu ha konosimiénto+ ivaliosoitereíva. 4 Che ningo haʼe hína peẽme ko mbaʼe ani hag̃ua avave penembotavy ñeʼẽkuaápe. 5 Che naiméiramo jepe pende apytépe, apensa meme penderehe ha avyʼa ahechávo mbaʼéichapa pejapo opa mbaʼe hekoitépe+ ha pejerovia pende pyʼaite guive Crístore.+

6 Upéicharõ, peẽ pejeroviáma haguére ñande Ruvicha Cristo Jesús rehe, pesegíkena peiko haʼe oiko haguéicha. 7 Ha peaprende haguéicha, pende jerovia Crístore+ penemombarete ha penepytyvõ vaʼerã pejepytaso mbarete+ hag̃ua peteĩ yvyramáta hapo pypukúvaicha, ha siémpre peagradese+ Ñandejárape.

8 Peñatendéke ani avave pendereity iñuhãme* oipurúvo yvypóra arandu, ha heʼívo peẽme vyrorei penembotavy+ hag̃ua. Upearã haʼekuéra ojevale yvyporakuéra tradisiónre, umi mbaʼe oñepensávare ko múndope, ha ndahaʼéi Cristo omboʼévare. 9 Entéro umi mbaʼe porã Ñandejára orekóva oĩ hína Crístope.+ 10 Peẽme ningo ndofaltái mbaʼeve mediánte haʼe, haʼe hína pe omoakãva entéro goviérno ha autorida.+ 11 Pejerovia rupi Crístore peẽ peñesirkunsida vaʼekue,* péro ndahaʼéi kuimbaʼekuéra ojapoháicha, síno pehejávo pende rete imperfékto+ ojaposéva. Péicha oñesirkunsida Cristo segidorkuéra.+ 12 Peẽ ningo peñeñotỹ vaʼekue hendive pejevautisárõ*+ guare haʼéicha, ha Ñandejára penemopuʼã+ avei hendive, pórke peẽ pejerovia Ñandejára podér tuichaitévare. Haʼe hína upe omopuʼã vaʼekue chupe umi omanóva+ apytégui.

13 Avei, peẽ ningo pemanóma vaʼekue pene rembiapo vaikue káusare ha napeñesirkunsidái haguére, péro Ñandejára penemoingove peime hag̃ua unído Cristo ndive.+ Ñandejára ningo pyʼaporãme operdona entéro ñane rembiapo vaikue.+ 14 Haʼe ovorra pe léi ojeskrivi+ vaʼekue ñane kóntrape,+ upéva ningo oreko vaʼekue hetaiterei léi.+ Ñandejára ohundi vaʼekue upe léi Cristo omano rupi pe yvyráre.*+ 15 Upéva rupive haʼe ogana umi goviérno ha autoridápe, ha ohechauka enterove renondépe haʼe ogana+ hague ha ogueraha chupekuéra prisionéroramo.

16 Upévare, aníkena avave pendehusga umi mbaʼe peʼu ha pemboyʼúvare,+ térã heʼi peẽme pemboarete vaʼerãha peteĩ fiésta, térã pe jasy raʼy+ fiésta, térã peteĩ sábado.+ 17 Koʼã mbaʼe ningo haʼe hína peteĩ sómbrante umi mbaʼe oútavagui,+ péro añetehápe umíva Cristo sómbra+ hína. 18 Pejekuidákena umi oñemoumílde guaʼúvagui ha umi oadorávagui umi ánhelpe,* pórke haʼekuéra ikatu pendejoko ani hag̃ua perresivi pe prémio.+ Peichagua kuimbaʼe oñemohatã umi mbaʼe ohecha vaʼekuérente ha oñemombaʼeguasu umi vyrorei opensávare. 19 Peichagua persóna noĩri en unida pe ñanemoakãvandi.+ Pe akã ningo omeʼẽ hetépe opa mbaʼe oikotevẽva ha ombojoaju hete umi ñúdo ha hajygue rupive. Ha haʼe osegi omongakuaa upe hete Ñandejára podér rupive.+

20 Peẽ ningo pemanóma Crístondi perrechasávo umi mbaʼe oñepensáva ko múndope.+ Ha oiméramo upéicha, ¿mbaʼére piko peẽ pesegi peiko peimeramoguáicha ko múndope? ¿Ha mbaʼére piko pesegi pekumpli koʼã mandamiénto:+ 21 “Ani rejagarra, ani retantea, ani repoko”? 22 Pórke koʼã mandamiénto oñeʼẽ hína umi mbaʼe oñehundívare ojepuru rire. Koʼã mandamiénto ningo yvyporakuéra omanda ha omboʼe vaʼekue.+ 23 Koʼã mandamiénto haʼetévaicha oporomoarandúva, péro noipytyvõi umi héntepe ipuʼaka hag̃ua umi mbaʼe ogustávare hetépe. Upéva oiko umi hénte odesidígui ijeheguínte mbaʼéichapa oadoráta Ñandejárape, haʼekuéra ningo ombohasa asy hete+ oipotágui umi hénte heʼi hesekuéra iñumildeha.

3 Oiméramo Ñandejára penemoingove Cristo ndive,+ upéicharõ pesegíkena peheka umi mbaʼe yvagapegua, upépe pe Cristo oguapy hína Ñandejára deréchape.+ 2 Pepensa memékena umi mbaʼe yvagapeguáre+ ha ani umi mbaʼe ko yvy ariguáre.+ 3 Pórke peẽ pemanóma ha pende rekove oĩ Cristo pópe, ha upéva oiko Ñandejára oipota rupi. 4 Pe Cristo omeʼẽva jeikove+ ohechauka vove ipodér,* peẽ pehechaukáta avei pekompartiha hendive ipodér.+

5 Pejukáke umi mbaʼe vai oĩva pende pype,+ ani hag̃ua penderekovai,* penderekokyʼa, peneakãraku vai ha ndapejejokokuaavéi,+ ani pepensa umi mbaʼe vaíre, ha ani peipotaiterei mbaʼe ahéno,* upéva haʼe hína avei taʼanga jeadora.* 6 Ñandejára ipochyetereíta umi hénte ojapóvandi koʼã mbaʼe. 7 Peẽ ningo ymave pejapómi vaʼekue avei koʼã mbaʼe, peikórõ guare haʼekuéraicha.+ 8 Péro koʼág̃a ndapeikovéima vaʼerã pendepochy vai, perrenega vaipa, peneñaña,+ peñeʼẽ vai ojuehe+ ha pendejurutieʼỹ,+ peẽ peipeʼaite vaʼerã pendejehegui entéro koʼã mbaʼe. 9 Ani pendejapu ojupe,+ peipeʼaite vaʼerã pendejehegui peteĩ aóicha pene kondúkta yma guare,+ ha umi mbaʼe pejapo vaʼekue yma, 10 ha pemonde pendejehe peteĩ aóicha pe kondúkta pyahu,+ upéva Ñandejára omeʼẽ ñandéve jaikuaa porãramo chupe. Upéva penepytyvõta pembopyahu hag̃ua pene kondúkta ikatu hag̃uáicha ojoguave Ñandejárape.+ 11 Pe kondúkta pyahúpe ndaipóri diferénsia éntre griego ni judío, oñesirkunsidáva* ni noñesirkunsidáiva, extranhéro, escita,* esklávo ni orekóva liverta, síno Crístogui oiko entéro mbaʼe ñandéve g̃uarã ha enterove ñande ñaime unído hendive.+

12 Peẽ haʼe rupi Ñandejára oiporavo+ vaʼekue, itaʼýra ohayhuetéva ha penepotĩ rupi henondépe, pehechaukákena* upéicharõ peiporiahuvereko ha pehayhuha+ pende rapichápe, penembaʼeporã, peneumílde,*+ peikoha pyʼaguapýpe+ ha penepasiensiaha.+ 13 Pesegíkena peñoaguanta ha peñoperdona pende pyʼaite guive,+ oĩramo jepe penembopochýva peteĩ mbaʼére.+ Jehová* peneperdona haguéicha ipyʼaite guive, peẽ pejapo vaʼerã avei upéicha.+ 14 Péro pejapóramo jepe koʼã mbaʼe, pehechauka vaʼerã* avei peporohayhuha,+ pórke pe mborayhu oipytyvõ enterovépe oĩ hag̃ua unído oñondivepa.+

15 Avei Cristo pyʼaguapy togoverna pene korasõme,*+ pórke Ñandejára penerenói vaʼekue oiko hag̃ua pendehegui peteĩ kuérpontema ha peiko hag̃ua pyʼaguapýpe. Ha siémprekena pehechauka pendeagradesidoha. 16 Cristo omboʼéva tomyenyhẽmbaite pene korasõ, péicha ningo peẽ penearandúta. Pesegíkena pemboʼe ha pemokyreʼỹ pende rapichápe, upearã peipuru umi salmo,+ pemombaʼeguasu Ñandejárape, pepurahéi umi músika ojeadora ha ojeagradese hag̃ua chupe. Pegueropurahéikena Jehovápe* pende pyʼaite guive.+ 17 Oimeraẽ mbaʼe pejéva térã pejapóva, pejapo entéro mbaʼe ñande Ruvicha Jesús rérape. Haʼe rupive peagradese entéro mbaʼére Ñandejárape, haʼéva pe Túa.+

18 Peẽ tembirekokuéra, peñemoĩkena pene ména poguýpe,+ ojapo vaʼerãháicha voi ñande Ruvicha segidorkuéra. 19 Peẽ menakuéra, pesegíkena pehayhu pene rembirekópe+ ha ani perrenega vaipa* hesekuéra.+ 20 Mitãnguéra, peneñeʼẽrendúkena pende tuakuérape entéro mbaʼépe,+ pórke upéva ogusta ñande Ruvichápe. 21 Peẽ tuakuéra, ani pedesahusia* pene famíliape+ ani hag̃ua oñedesanima* hikuái. 22 Peẽ esklavokuéra, peneñeʼẽrendúkena entéro mbaʼépe pene patronkuérape,*+ ani pejapo upéva haʼekuéra omaña ajánte penderehe, pepyta porãséguinte kuimbaʼekuéra renondépe, síno pejapo upéva pende pyʼaite guive perrespeta* rupi Jehovápe.* 23 Oimeraẽ mbaʼe pejapóva, pejapo vaʼerã pende pyʼaite guive* ha pene mbaretekue omeʼẽmíva reheve, peserviramoguáicha Jehovápe*+ ha ndahaʼéi kuimbaʼekuérape. 24 Pórke peẽ peikuaa Jehová* omeʼẽtaha peẽme pe erénsia peteĩ prémioicha.+ Peservíkena esklávoicha pene Patrónpe g̃uarã, haʼéva Cristo. 25 Añetehápe, pe mbaʼe vai apohápe ojekastigáta hembiapo vaikuére.+ Ñandejára ningo ohusgáta enterove persónape, ha chupe g̃uarã enterove peteĩchapánte.+

4 Peẽ patronkuéra, pendehústokena pende esklavokuérandi ha petrata chupekuéra hekoitépe, peikuaágui peẽ perekoha avei yvágape pene Patrón.+

2 Peñemboʼe memékena,+ ani penderesarái peñemboʼe hag̃ua ha peagradese+ Ñandejárape. 3 Peñemboʼe avei orerehehápe,+ Ñandejára omeʼẽ hag̃ua oréve peteĩ oportunida ikatu hag̃uáicha roikuaauka pe iñeʼẽ ha pe sekréto sagrádo oñeʼẽva Crístore, upéva rehehápe ningo che aime hína préso,+ 4 ha peñemboʼe ikatu hag̃uáicha che añeʼẽ ha apredika oñehaʼarõháicha voi ajapo.

5 Pesegíkena penearandu petrata jave umi hénte ndahaʼéivape kongregasionpegua. Ha peipuru porãke pene tiémpo.*+ 6 Umi mbaʼe pejéva siémpre iporã ha ijuky vaʼerã,+ peikuaa hag̃ua mbaʼéichapa pembohováita káda persónape.+

7 Tíquico,+ ñane ermáno jahayhuetéva, ifiélva ha oservíva ñanendive esklávoramo ñande Ruvichápe, omombeʼúta peẽme mbaʼetekópa che aime hína. 8 Amondo hína chupe pene rendápe peikuaa hag̃ua notísia orehegui ha avei penekonsola hag̃ua. 9 Amondo hendive Onésimope,+ haʼe hína ñane ermáno ifiél ha jahayhuetéva, haʼe ningo oĩ vaʼekue voi pende apytépe. Haʼekuéra omombeʼúta peẽme entéro mbaʼe oikóva koʼápe.

10 Aristarco,+ oĩva préso chendive, oguerahaka peẽme salúdo ha avei Marcos,+ haʼéva Bernabé prímo (ore ningo roʼe vaʼekue peẽme perresivi porã hag̃ua chupe+ haʼe ohóramo pene rendápe), 11 ha oguerahaka avei peẽme salúdo Jesús oñehenóiva Justo. Koʼãva oĩ hína umi oñesirkunsida vaʼekue* apytépe. Haʼekuéra añoite chemoirũ ambaʼapo hag̃ua Ñandejára Rréino rehehápe, ha tuichaiterei chekonsola hikuái.* 12 Oguerahaka peẽme salúdo Epafras,+ haʼéva Cristo Jesús esklávo oĩva avei pende apytépe. Haʼe ningo siémpre oñemboʼe ipyʼaite guive penderehehápe, ikatu hag̃uáicha pesegi pejepytaso mbarete* ha pejerovia mbarete entéro mbaʼe Ñandejára ojapótavare. 13 Pórke che aikuaa porã mbaʼeichaitépa haʼe ombaʼapo jejopy penderehehápe, ha avei umi Laodicea ha Hierapolisgua rehehápe.

14 Oguerahaka peẽme salúdo ñane ermáno jahayhuetéva Lucas,+ haʼéva doktór, ha avei Demas.+ 15 Saludomi umi ermáno oĩvape Laodicéape ha ñane ermána Nínfape, ha pe kongregasión oñembyatývape hógape.+ 16 Peleepa rire ko kárta, pemondo pe kongregasión oĩvape Laodicéape ojelee hag̃ua avei upépe,+ ha pejerure pe kárta amondo vaʼekue chupekuéra ikatu hag̃uáicha pelee avei peẽ. 17 Pejemi avei Arquípope:+ “Eñehaʼãmbaitékena ekumpli porã hag̃ua pe rresponsavilida* rerresivi vaʼekue ñande Ruvichágui”.

18 Che, Pablo, askrivi ko salúdo che porupiete.+ Penemanduʼa memékena añeñapytĩha kadénape ha aimeha préso.+ Ñandejára mbaʼeporã* toĩ penendive.