PRIMERA KÁRTA A LOS TESALONICENSES

1 Che Pablo, Silvano,*+ ha Timoteo,+ romondo ko kárta pe kongregasión oĩvape Tesalónicape, haʼéva Ñandejára pe Túa mbaʼe ha ñande Ruvicha Jesucristo mbaʼe:

Aipotaite Ñandejára mbaʼeporã* ha ipyʼaguapy toĩ penendive.

2 Ore siémpre roagradese Ñandejárape oremanduʼa jave penderehe ore ñemboʼépe,+ 3 ha siémpre oremanduʼa ñande Ru Ñandejára renondépe pe tembiapo pejapóvare pejerovia rupi, ha mbaʼeichaitépa peñehaʼã peporohayhu rupi, avei peaguanta heta mbaʼe perekógui esperánsa+ ñande Ruvicha Jesucrístore. 4 Pórke Ñandejára ningo penderayhu che ermanokuéra, ha roikuaa haʼe pendeporavo hague. 5 Ha ore roikuaaukárõ guare peẽme umi notísia porã ndorojapói upéva ore ñeʼẽ rupivénte, síno orepytyvõ rupi pe espíritu sánto. Ore roĩ vaʼekue segúro siertoha upe roikuaauka vaʼekue peẽme ha ore mensáhe tuichaiterei penepytyvõ hague. Ha peẽ peikuaa porã umi mbaʼe rojapo vaʼekue penderehehápe. 6 Peẽ pesegi ore ehémplo+ ha ñande Ruvicha ehémplo,+ pórke heta pehasa asýramo jepe,+ pe espíritu sánto rupive vyʼápe perresivi Ñandejára ñeʼẽ. 7 Péicha pemoĩ ehémplo iporãva enterove Jesús segidorkuérape oĩva Macedonia ha Acáyape.

8 Añetehápe, ndahaʼéi Macedonia ha Acáyape añónte peẽ pemombeʼúva Jehová* ñeʼẽ, síno oparupiete. Ha entéro lugárpe umi hénte ohendu pejeroviaha Ñandejárare,+ upévare natekotevẽvéima ore roʼe mbaʼeve. 9 Pórke haʼekuéra osegi omombeʼu mbaʼéichapa peẽ orerresivi Tesalónicape, ha mbaʼéichapa peheja umi dios raʼanga+ ikatu hag̃uáicha peservi esklávoramo Ñandejára teete ha oikovévape, 10 ha pehaʼarõ yvágagui Itaʼýrape,+ upe haʼe omopuʼã vaʼekue umi omanóva apytégui. Péva hína Jesús, haʼe ñandesalváta Ñandejára pochykue oúvagui hína.+

2 Che ermanokuéra, peẽ ningo peikuaa porã ndorohoreíri hague pene rendápe.+ 2 Pórke peẽ peikuaaháicha primerorã heta rohasa asy Filípospe+ ha rojetrata vai. Ha upe rire Ñandejára orembopyʼaguasu* romombeʼu hag̃ua peẽme umi notísia porã,+ rombohováiramo jepe heta mbaʼe ijetuʼúva.* 3 Ore roñemoñeʼẽ peẽme, ndahaʼéi orejapuségui peẽme, oreintensión vaígui ni pombotavységui. 4 Upéva rangue, ore roñeʼẽ peẽme Ñandejára oreporavo rupi roñeʼẽ hag̃ua umi notísia porãre. Ore noroñeʼẽi ropyta porãségui kuimbaʼekuérandi, síno Ñandejárandi, haʼe ohechapaite hína mbaʼépa oĩ ore korasõme.+

5 Peẽ peikuaa porã ore arakaʼeve napombotavýi hague pombojuruheʼẽvo, ni ndoroikói hague orerovamokõi rokonsegi hag̃ua álgo pendehegui.+ ¡Ñandejára oikuaa porã upeichaha! 6 Avei ore ndoroipotái kuimbaʼekuéra orembotuicha, ni peẽ ni umi ótro. Ore ningo ikatu kuri rojerure peẽme pepaga hag̃ua oréve álgo orepytyvõ hag̃ua, ore haʼe rupi Cristo apóstol.+ 7 Péro upéva rangue ore orembaʼeporã penendive, peteĩ sy omokambu ha omokunuʼũháicha imembyʼípe.* 8 Ore ningo pohayhueterei,+ upévare vyʼápe roikuaauka peẽme umi notísia porã oúva Ñandejáragui, ha romeʼẽ voi ore rekove*+ jepe poipytyvõ hag̃ua.

9 Katuete penemanduʼáne ermanokuéra mbaʼéichapa heta roñehaʼã ha rombaʼapo pohýi. Ore rombaʼapo ára ha pyhare, ani hag̃ua oiko orehegui peteĩ kárga+ peẽme g̃uarã ropredikárõ guare peẽme umi notísia porã oúva Ñandejáragui. 10 Peẽ ermanokuéra ha Ñandejára avei ohecha mbaʼeichaitépa ore orefiél, orehústo ha ndorojapói mbaʼeve ivaíva poipytyvõ hag̃ua. 11 Peẽ peikuaa porã mbaʼéichapa káda únope ore rosegi romokyreʼỹ ha romombarete, ha roʼe jey jey peẽme mbaʼéichapa peiko vaʼerã,+ ojapoháicha peteĩ túa+ ifamiliakuérandi. 12 Ore rojapo upéva ikatu hag̃uáicha peẽ pesegi peiko Ñandejára oipotaháicha+ haʼe ningo pendeporavo peike hag̃ua Irréinope+ ha haʼe penembotuicha+ hag̃ua.

13 Añetehápe upévare ore siémpre roagradese Ñandejárape,+ pórke peẽ pehendúrõ guare orehegui Ñandejára ñeʼẽ, peguerovia upéva añetehápe haʼeha Ñandejára ñeʼẽ ha ndahaʼéi kuimbaʼekuéra ñeʼẽnte. Ha upe ñeʼẽ penepytyvõ hína. 14 Pórke peẽ ermanokuéra, pesegi kuri pe ehémplo omoĩ vaʼekue umi kongregasión kristiána oĩva Judéape, haʼéva Ñandejára kongregasionkuéra. Peẽ peñepyrũ vaʼekue avei pehasa asy umi pende vallegua poguýpe,+ ombohasa asyháicha umi judío umi ermáno oĩvape Judéape. 15 Haʼekuéra ningo ojuka vaʼekue ñande Ruvicha Jesúspe+ jepe, ojuka haguéicha umi profétape, ha oréve avei orepersegi.+ Haʼekuéra ojapo umi mbaʼe Ñandejára ndoguerohorýiva ha upe ojapóva hikuái ndaideprovéchoi avavépe. 16 Pórke haʼekuéra oñehaʼã kuri orejoko ani hag̃ua ropredika umi hénte ótro tetãyguápe, ha upéva ningo ikatu kuri oipytyvõ chupekuéra ojesalva hag̃ua.+ Péicha haʼekuéra siémpre omboheta hetave ipekádo, péro koʼág̃a Ñandejára pochykue ou potaitéma hína hiʼarikuéra.+

17 Ermanokuéra, forsadoite pohejárõ guare sapyʼami, ore ndaikatúi kuri pohecha, péro rosegi oremanduʼa penderehe. Ha pohechasetereígui roñehaʼãmbaite kuri rojotopa penendive.* 18 Upévare rohose kuri pene rendápe, ha che, Pablo, 2 vése añehaʼã aha pene rendápe, péro Satanás orerapejoko. 19 Pórke ág̃a oĩ* aja ñande Ruvicha Jesús, ¿máva piko haʼéta ore esperánsa? ¿Máva piko orembovyʼáta, ha máva piko haʼéta ore prémio* orembopyʼarorýva henondépe? ¿Ndahaʼéi piko peẽ?+ 20 Añetehápe ore rovyʼa ha oreorgullóso pendereheve.

3 Upévare, ndaikatuvéimarõ rohaʼarõ roikuaaségui notísia pendehegui, rodesidi ropytatanteha Aténaspe,+ 2 ha romondo pene rendápe Timotéope,+ ñane ermáno oservíva Ñandejárape ha oikuaaukáva umi notísia porã oñeʼẽva Crístore. Ore romondo chupe penemombarete ha penekonsola hag̃ua ha pende jerovia imbareteve hag̃ua, 3 ani hag̃ua avave ikangy* umi jehasa asy káusare. Peẽ ningo peikuaa voi enterove jahasa vaʼerãha koʼã mbaʼe.+ 4 Pórke ore roimérõ guare penendive, roʼéma vaʼekue voi peẽme jahasa asy vaʼerãha, ha upéva voi la oiko vaʼekue. Peẽ peikuaaháicha ore rohasa avei kuri koʼã mbaʼe ijetuʼúva.+ 5 Upévare, ndaikatuvéimarõ ahaʼarõ aikuaaségui notísia pendehegui, amondo Timotéope, aikuaa hag̃ua mbaʼeichaitépa pejerovia+ hína Ñandejárare, pórke che akyhyje kuri oimérõ g̃uarã pe Diablo+ pendereity raʼe iñuhãme pepeka hag̃ua. Ha oikórire upéicha ore rembiapo opyta reíta kuri.

6 Koʼág̃a katu Timoteo og̃uahẽ ramoite ore rendápe+ pendevisita rire, ha ogueru oréve notísia iporãitereíva pendehegui: haʼe omombeʼu mbaʼeichaitépa pejerovia ha peporohayhu. Heʼi avei siémpre penemanduʼa porãha orerehe ha orerechaseha, ore pohechaseháicha avei. 7 Upévare ermanokuéra, rohasa asy ha rojejopy vaíramo jepe,* tuichaiterei roñekonsola roikuaávo mbaʼéichapa peime ha mbaʼeichaitépa pejerovia.+ 8 Pórke oremokyreʼỹ* roikuaávo peẽ pejepytaso mbareteha ñande Ruvicha ykére. 9 Ore ningo roagradese Ñandejárape penderehe, pórke peẽ orembovyʼaiterei. 10 Ára ha pyhare ningo ore roñemboʼe ore pyʼaite guive pohecha hag̃ua,* ha ikatu hag̃uáicha poipytyvõ oimeraẽ mbaʼe peikotevẽvape pemombareteve hag̃ua pende jerovia.+

11 Ore roñemboʼe ñande Ru Ñandejárape, ikatu hag̃uáicha haʼe ha ñande Ruvicha Jesús orepytyvõ roho hag̃ua pene rendápe. 12 Avei roipotaite ñande Ruvicha penemyenyhẽ mborayhúgui, ikatu hag̃uáicha pehayhu ermanokuérape+ ha enterovépe, ore pohayhuháicha. 13 Ha péicha haʼe omombaretéta pende pyʼapy, ndaiporimoʼãi mbaʼeve ivaíva ojeʼe vaʼerã penderehe ha omopotĩta pene korasõ ñande Ru Ñandejára renondépe,+ ág̃a ñande Ruvicha Jesús+ oĩ* vove entéro umi ojeporavo vaʼekuéndi.*

4 Ermanokuéra, peẽ ningo peiko hína Ñandejára oguerohoryháicha, ore pomboʼe haguéicha.+ Péro koʼág̃a ñande Ruvicha Jesús rérape pomokyreʼỹ ha rojerure peẽme pesegi hag̃ua pejapo porãve upéva. 2 Pórke peẽ peikuaa porã umi mbaʼe romboʼéva* peẽme pomboʼe hague ñande Ruvicha Jesús rupive.

3 Peẽ penderekopotĩ+ vaʼerã ha perrechasaite vaʼerã pe tekovai,*+ pórke upéva hína Ñandejára rembipota. 4 Káda uno oikuaa vaʼerã mbaʼéichapa ipuʼakáta hetére*+ osegi hag̃ua hekopotĩ+ ha ojerrespeta. 5 Peẽ ndapeikói vaʼerã oikoháicha umi hénte ndoikuaáiva+ Ñandejárape oikoháicha, haʼekuéra ningo ndojejokokuaái ha itarovaite orekoségui rrelasión sexuál ha noñekontentái voi.*+ 6 Ani avave ojapo ivaíva iñermánore ha ojaprovecha hese koʼã mbaʼépe, pórke Jehová* okastigáta umi ojapóvape koʼã mbaʼe, upéva ningo ore roʼéma voi kuri peẽme ha romyesakã porãma avei peẽme. 7 Ñandejára ningo nañandeporavói kuri ñanderekokyʼa hag̃ua, síno ñanderekopotĩ hag̃ua.+ 8 Upéicharõ, pe persóna nopenáiva ko avísore, ndahaʼéi yvypórare opuʼãva hína, síno Ñandejárare,+ upe omeʼẽva peẽme ijespíritu sánto.+

9 Upéicharõ jepe, natekotevẽi roskrivi peẽme pejoayhu vaʼerãha oñoermánoicha,+ pórke Ñandejára penemboʼéma voi pejoayhu+ vaʼerãha. 10 Ha añetehápe peẽ pejapóma voi hína peikóvo upéicha entéro umi ermáno Macedoniaguáre. Péro koʼág̃a rojerure jey jey peẽme pesegi hag̃ua pejoayhuve. 11 Peñehaʼãmbaitéke peiko pyʼaguapýpe+ ha ani peñentremete ótro ojapóvare,+ ha pembaʼapóke+ ore pomboʼéma haguéicha. 12 Péicha peikóta hekopete umi hénte renondépe+ ha napeikotevẽmoʼãi mbaʼeve.

13 Avei ermanokuéra, roipota pentende mbaʼépa ohaʼarõ umi omano* vaʼekuépe,+ ani hag̃ua peñembyasy, ojapoháicha umi ndorekóiva esperánsa.+ 14 Pórke ñande jajeroviáramo Jesús omano ha opuʼã jey hague,+ upéicha avei ñande jajerovia Ñandejára omoingove jeytaha umi omano* vaʼekuépe Jesús rupive.+ 15 Umi mbaʼe roʼéva hína peẽme koʼág̃a, roʼe Jehová* ñeʼẽ rupive: umi oĩva ñande apytépe ha oikovétava gueteri ñande Ruvicha oĩ* aja, umíva oñemopuʼãta yvágape. Péro umi omanóma vaʼekue oñemopuʼãta púntape ha haʼekuéra rire ñande ñañemopuʼãta. 16 Ñande Ruvicha voi oguejýta yvágagui ha hatã osapukáita ojapoháicha peteĩ arkánhel*+ ha orekóta Ñandejára trompéta. Ha Cristo disipulokuéra omanóma vaʼekue oñemopuʼãta primeroite.+ 17 Upe rire, ñande jaikovéva gueteri jajegueraháta yvate pe araíre ñaime hag̃ua hendivekuéra+ ha jajotopa hag̃ua ñande Ruvichándi.+ Ha péicha siémpre ñaiméta ñande Ruvichándi.+ 18 Upévare, pesegíkena peñokonsola koʼã mbaʼe haʼe vaʼekue rupive.

5 Ermanokuéra, natekotevẽi ojeskrivi peẽme mbaʼe tiémpopa ha mbaʼe díapa ojeporavo vaʼekue oiko hag̃ua koʼã mbaʼe. 2 Pórke peẽ peikuaa porãiterei Jehová* ára+ outaha peteĩ mondaháicha pyharekue.+ 3 Ág̃a umi hénte heʼi vove: “¡Jaikóma pyʼaguapýpe ha segúro porã!”, upepete oñeimoʼãʼỹve jave oñehundíta hikuái. Upéva oúta hiʼarikuéra derrepentete,+ peteĩ kuña hasyháicha derrepentete imemby hag̃ua, ha ni mbaʼevéicharõ ndojesalvamoʼãi hikuái. 4 Péro peẽ che ermanokuéra napeiméi pytũmbýpe, upévare upe día nog̃uahẽmoʼãi pende ári peimoʼãʼỹve jave, koʼẽmbaháicha umi mondahágui derrepentete oimoʼãʼỹve jave. 5 Pórke peẽ peiko pe lus rendýpe ha de diakue.+ Ñande ndajaikói hína pytũmbýpe ni pyharekue.+

6 Upéicharõ, aníkena jake umi ótro ojapoháicha,+ síno japyta japayhápe+ ha jasegi ñapensa hendaitépe.+ 7 Pórke umi okéva, oke jepi pyharekue, ha umi okaʼúva, okaʼu jepi pyharekue.+ 8 Péro ñande jaikóva de diakue jasegi vaʼerã ñapensa hendaitépe, ha jerovia ha mborayhúpe ñamoʼã ñande pytiʼa peteĩ soldádo armadúraicha. Ha ñamoĩ ñane akãre peteĩ káskoicha pe esperánsa jajesalvataha.+ 9 Pórke Ñandejára nañandeporavói ñandekastiga hag̃ua,* síno ñandeporavo ñandesalva+ hag̃ua ñande Ruvicha Jesucristo ojapo vaʼekue rupive. 10 Jesús ningo omano ñanderehehápe+ ikatu hag̃uáicha jaiko hendive, jaikove térã ñamanóramo jepe.*+ 11 Upéicharõ, pesegíkena peñomokyreʼỹ* ha peñomombarete,+ pejapoháicha voi peikóvo.

12 Koʼág̃a rojerure peẽme ermanokuéra perrespeta hag̃ua umi ombaʼapo jejopývape pende apytépe, umi pendegiávape* ñande Ruvicha servísiope ha oñemoñeʼẽvape peẽme. 13 Pehechaukákena pemombaʼe ha pehayhuha chupekuéra pe itraváhore.+ Peikókena pyʼaguapýpe oñondive.+ 14 Ha peẽme ermanokuéra roʼe jey jey peakonseha mbarete* hag̃ua umi naiñeʼẽrendúivape,*+ peñeʼẽkena pekonsola hag̃uáicha umi oñedeprimívape,* peipytyvõkena umi ikangývape ha penepasiénsiakena enterovére.+ 15 Peñatendékena ani avave ojapo ivaíva ótrore oñevenga+ hag̃ua hese, upéva rangue pesegíkena pejapo upe iporãva pene ermanokuérare ha enterove umi ótrore.+

16 Siémprekena pevyʼaiterei.+ 17 Peñemboʼékena kontinuadoite.+ 18 Peagradesékena Ñandejárape opa mbaʼére.+ Koʼã mbaʼe hína Ñandejára rembipota Cristo Jesús segidorkuérape g̃uarã. 19 Aníkena pejoko pe Ñandejára espíritu ojapóva penderehe.*+ 20 Aníkena pedespresia umi profesía.+ 21 Pehechákena siértopa hína entéro mbaʼe,+ ha peñakarama hatãkena pe iporãvare. 22 Perrechasákena opaichagua mbaʼe vai.+

23 Che añemboʼe Ñandejára omeʼẽvape pyʼaguapy tapendeaparta iservísiope g̃uarã. Avei pende espíritu, pende rekove* ha pende rete toñemantene ipotĩ, ha tahesãi enteroite mbaʼépe ñande Ruvicha Jesucristo oĩ* aja.+ 24 Upe penerenói vaʼekue ningo okumpli katuete iñeʼẽ, ha haʼe katuete ojapóta upéva.

25 Ermanokuéra, pesegíkena peñemboʼe orerehe.+

26 Pesaludákena enterove ermánope ha peañuã chupekuéra.*

27 Ñande Ruvicha rérape ajerure asy peẽme pelee hag̃ua ko kárta enterove ermánope.+

28 Ñande Ruvicha Jesucristo taimbaʼeporãiterei penendive.*