PRIMERA KÁRTA A TIMOTEO

1 Che ningo Pablo, ajeporavo vaʼekue aservi hag̃ua Cristo Jesús apóstolramo Ñandejára autorida rupive, haʼe hína ñande Salvadór, ha Cristo Jesús rupive, haʼéva ñane esperánsa.+ 2 Amondo ndéve ko kárta Timoteo,+ nde ningo che raʼy teéicha chemoirũ ñande Ruvicha servísiope:+

Aipotaite ñande Ru Ñandejára ha ñande Ruvicha Cristo Jesús taimbaʼeporãiterei nendive,* tandeporiahuvereko ha tomeʼẽ ndéve pyʼaguapy.

3 Ahátarõ guare Macedóniape ajerure vaʼekue ndéve repyta hag̃ua Éfesope, ha péicha avei koʼág̃a ajerure ndéve reñemoñeʼẽ mbarete hag̃ua unos kuántope anivéma hag̃ua oiko omosarambi umi enseñánsa japu. 4 Anive opena hikuái umi kuénto reíre+ ni ohendu umi lísta oĩháme umi ituakuéra ypykue réra, umíva ningo ndaideprovéchoi mbaʼeverã.+ Pórke haʼekuéra omboliga umi héntepe oñeʼẽ hag̃ua umi mbaʼe ndaikatumoʼãivare okomprova, omboʼe rangue chupekuéra umi mbaʼe oúva Ñandejáragui omombaretétava ijerovia. 5 Añetehápe, koʼã mbaʼe che amanda ndéve* ikatu hag̃uáicha jahayhu+ ótrope konsiénsia potĩ reheve ha jajerovia+ rupi Ñandejárare tovamokõiʼỹre. 6 Oĩ ningo umi oheja vaʼekue koʼã mbaʼe, ha oikóva oñeʼẽ rei.+ 7 Haʼekuéra omboʼese+ pe léi, péro nontendéi la heʼíva hikuái, ni umi mbaʼe mbaretépe omboʼéva.

8 Péro reikuaaháicha, pe léi ningo iporãiterei oñekumplíma guive hekopete, 9 avei pe léi noñemeʼẽi vaʼekue umi ihústovape g̃uarã, síno umi nokumplírivape pe léi,+ umi oikóvape iñakãre, umi mbaʼe vai apoha ha pekadórpe, umi oheja reíva hapichápe,* umi ndorrespetáivape umi mbaʼe sagrádova, umi ojukávape itúape, isýpe térã ótrope, 10 umi hénte hekovaívape,* umi kuimbaʼe orekóvape rrelasión sexuál kuimbaʼéndi,* umi oporosekuestrávape, umi ijapúva, umi nokumplírivape ohuráva* ha oimeraẽ oñemoĩvape g̃uarã pe enseñánsa porãre.*+ 11 Ko enseñánsa ou Ñandejára ovyʼávagui, asegún umi notísia porã ojajaipáva, upéva ningo haʼe oheja vaʼekue che kárgope.+

12 Aagradeseterei ñande Ruvicha Cristo Jesúspe, haʼe ningo omeʼẽ chéve podér ha ojerovia rupi cherehe omeʼẽ chéve peteĩ traváho sagrádo.+ 13 Yma che añeʼẽ vai vaʼekue Ñandejárare, apersegi ipuévlope ha cheorgullóso vaʼekue.+ Péro che ndaikuaáiguinte ajapo vaʼekue umíva ha ndajeroviái rupi Ñandejárare, upéicharõ jepe Cristo cheporiahuvereko. 14 Ñande Ruvicha katu imbaʼeporãiterei chendive ha tuichaiterei chepytyvõ ajerovia ha ahayhu hag̃ua chupe, pórke che hína Cristo Jesús disípulo. 15 Ko haʼéva ningo siertoite hína ha omerese jajerovia hese ñande pyʼaite guive: Cristo Jesús ou vaʼekue ko múndope osalva hag̃ua umi pekadórpe.+ Umíva apytégui che hína pe ipekádo vaive vaʼekue.+ 16 Upéicharõ jepe Cristo cheporiahuvereko, pórke che hína pe ipekádo vaive vaʼekue. Péicha che rupive Cristo Jesús ikatu ohechauka ipasiensiaitereiha. Péva peteĩ ehémplo entéro umi ojeroviávape hína hese ohupyty hag̃ua jeikove opaveʼỹva.+

17 Koʼág̃a toñemombaʼe ha toñembotuicha pára siémpre Ñandejára peteĩetévape,+ haʼéva Rréi opa ára g̃uarã,*+ oikovéva pára siémpre,+ ha avave ndaikatúiva ohecha+ chupe. Amén.*

18 Che raʼy Timoteo, koʼã mbaʼe amandáva* aheja nde kárgope, asegún umi mbaʼe heʼi vaʼekue nderehe umi proféta. Koʼã ñeʼẽ nepytyvõta resegi hag̃ua reñorairõ ikatu hag̃uáicha rehupyty umi mbaʼe porã.+ 19 Ha rejapo aja upéva, esegíkena ejerovia ha nekonsiénsia potĩ,+ upéva ningo oĩ heta omboykéva, ha upévare oñehundi ijerovia oñehundiháicha peteĩ várko ochokáva itáre. 20 Umíva apytépe oĩ Himeneo+ ha Alejandro, chupekuéra che antregáma Satanáspe,*+ ojekastiga hag̃ua chupekuéra ojekorrehívo, anivéma hag̃ua omotĩ Ñandejárape.

2 Primeroite, ajerure peẽme peñemboʼe hag̃ua opaichagua persónare, pejerure asývo Ñandejárape penepytyvõ hag̃ua ha peagradese chupe. 2 Pejerure avei umi rréi ha enterove umi governántere,+ péicha ikatúta jaiko trankílo porãnte ha pyʼaguapýpe, ha jaservíta Ñandejárape ñande pyʼaite guive ha jajapóta entéro mbaʼe akãguapýpe porãnte.+ 3 Koʼã mbaʼe ningo iporã Ñandejárape g̃uarã haʼéva ñande Salvadór,+ ha haʼe oguerohory hína umíva, 4 haʼe ningo oipota opaichagua persóna ojesalva+ ha oikuaa porã pe añetegua. 5 Peteĩ Ñandejárante ningo oĩ,+ ha peteĩnte avei pe mediadór+ orekóva yvyporakuéra Ñandejárandi,+ upe kuimbaʼe haʼe Cristo Jesús.+ 6 Haʼe omeʼẽ hekove ha opaga pe présio oñekotevẽ vaʼekue orreskata hag̃ua enterovépe*+ pekádogui, ha itiempoitépe umi hénte oñeʼẽta ko mbaʼére. 7 Che ajeporavo vaʼekue apredika+ hag̃ua ko mbaʼe, ha aservi hag̃ua apóstolramo,+ ikatu hag̃uáicha amboʼe umi tetãnguérape+ ojerovia ha oikuaa hag̃ua pe añetegua. Che ningo pe siertoguávante haʼe, ndachejapúi hína.

8 Upévare che aipota umi kuimbaʼe oñemboʼe entéro lugár peñembyatyhápe,* tohupi ipo umi ojepytasóva Ñandejára ykére,+ ha ani ipochy+ ni ojodiskuti.+ 9 Upéicha avei umi kuña oñemoporã jave oñemonde porã vaʼerã, ohechauka vaʼerã opororrespetaha ha iñakãguapyha, ani oipuru peinádo ijexaherádova,* óro, pérla ni umi ao hepyetereíva.+ 10 Upéva rangue oñemoporã hag̃ua, haʼekuéra ojapo vaʼerã iporãva, ojapoháicha umi kuña omombaʼeguasúva Ñandejárape.+

11 Pe kuña oaprende jave* okirirĩ* vaʼerã ha oñemoĩ vaʼerã kuimbaʼekuéra poguýpe.+ 12 Che napermitíri umi kuña oporomboʼe ni omanda kuimbaʼére, síno opyta vaʼerã kirirĩháme.*+ 13 Pórke Ñandejára ojapo raẽ vaʼekue Adánpe, ha upéi Évape.+ 14 Avei Adánpe noñembotavýi vaʼekue, síno Évape la oñembotavy+ vaʼekue ha opeka. 15 Upéicharõ jepe, pe kuñáme ideprovéchota imembýramo,+ pórke ojokóta chupe ani hag̃ua ojapo ivaíva.* Upearã haʼe* osegi vaʼerã ojerovia Ñandejárare, oporohayhu, hekopotĩ Ñandejára renondépe ha iñakãguapy.+

3 Koʼã mbaʼe haʼéva ningo siérto hína: peteĩ kuimbaʼe oñehaʼãmbaitéramo oservi ansiánoramo,+ ojapose hína peteĩ mbaʼe iporãva. 2 Pe ansiáno ikondúkta porã vaʼerã ani hag̃ua umi hénte oreko mbaʼeve ivaíva heʼi vaʼerã hese, peteĩnte hembireko vaʼerã, ojejokokuaa vaʼerã entéro mbaʼépe, iñakãguapy vaʼerã,+ oiko vaʼerã hekópe,* opororresivi porã vaʼerã,*+ ivale vaʼerã oporomboʼe hag̃ua,+ 3 ndaikaʼúi vaʼerã,+ naivioléntoi vaʼerã,* noñemohatãi vaʼerã haʼe heʼívapente,+ ndoikói vaʼerã ojodiskutise,+ ndovaléi iplatarayhu,+ 4 omoakã* porã vaʼerã hogapy, ha ifamiliakuéra iñeʼẽrendu ha ojeporta porã vaʼerã.+ 5 (Pórke peteĩ kuimbaʼe ndoikuaáiramo mbaʼéichapa omoakãta* hogapy, ¿mbaʼéicha piko oñangarekóta Ñandejára kongregasión rehe?). 6 Pe oservítava ansiánoramo ndahaʼéi vaʼerã peteĩ disípulo pyahu,+ ani hag̃ua oñemombaʼeguasu ha oñekondena chupe oñekondena haguéicha pe Diáblope. 7 Avei umi hénte noĩriva kongregasiónpe oñeʼẽ porã vaʼerã hese,*+ ani hag̃ua oñeʼẽ vai hese hikuái* ha hoʼa pe Diablo ñuhãme.

8 Upéicha avei umi siérvo ministeriál iñakãguapy vaʼerã, ndovaléi hovamokõi,* ndoʼurasái vaʼerã vevída,* ndoikói vaʼerã itarovaite oheka umi mbaʼe chupekuéra okonvenítavante iplatarayhúgui.*+ 9 Haʼekuéra oñakarama hatã vaʼerã pe jeroviáre, haʼéva hína peteĩ sekréto sagrádo, ha ikonsiénsia potĩ vaʼerã.+

10 Tekotevẽ avei ojehecha raẽ ikatupyrýtapa hikuái ojapo hag̃ua upe traváho, ha ndaipóriramo mbaʼeve ivaíva ojeʼéva hesekuéra,+ ikatu oiko chuguikuéra siérvo ministeriál.

11 Umi kuña avei iñakãguapy vaʼerã, noñeʼẽvaíri vaʼerã ótrore,+ ojejokokuaa vaʼerã entéro mbaʼépe ha ohechauka vaʼerã ijerovia entéro mbaʼe ojapóvape.+

12 Umi siérvo ministeriál peteĩnte hembireko vaʼerã, omoakã porã vaʼerã ifamiliakuérape ha hogapy. 13 Pórke oñeñeʼẽ porã umi kuimbaʼe ojapo porãvare hembiapo kongregasiónpe, ha haʼekuéra ndokyhyjemoʼãi oñeʼẽ hag̃ua pe jerovia orekóvare Cristo Jesús rehe.

14 Askrivi ndéve koʼã mbaʼe, jepe ahase voi hína ne rendápe koʼẽrõite. 15 Péro atarda mbaʼéramo, nde reikuaátama mbaʼéicha vaʼerãpa ne kondúkta Ñandejára rógape,+ haʼéva Ñandejára oikovéva kongregasión, upéva ningo ojoko ha omopyenda hína pe añetegua. 16 Añetehápe jaadora Ñandejárape ñande pyʼaite guive, haʼe hína peteĩ sekréto sagrádo iñimportantetereíva: “Jesúsgui oiko vaʼekue yvypóra,+ Ñandejára heʼi vaʼekue hese ihustoha ojapo jeýrõ guare chugui peteĩ espíritu,+ ha oho umi ánhel oĩháme,+ ha ojepredika vaʼekue hese umi nasionkuérape,+ umi hénte oĩva ko múndope ojerovia vaʼekue hese,+ ha Ñandejára orresivi chupe yvágape ha ombotuicha chupe upépe”.

4 Péro Ñandejára espíritu heʼi porã amo gotyove oĩtaha umi ndojeroviavéiva Ñandejárare, koʼãva ohendúta umi mensáhe japu haʼetéva oúva hína Ñandejáragui,+ avei ohendúta hikuái umi demoniokuéra omboʼéva. 2 Haʼekuéra ohendúta avei umi kuimbaʼe rovamokõi ijapúvape,+ koʼãva konsiénsia ningo iperepa oñemarkaramoguáicha iérro akúpe. 3 Haʼekuéra oproivíta umi héntegui omenda,+ ha omandáta chupekuéra ani hag̃ua hoʼu umi tembiʼu,+ péro Ñandejára ojapo vaʼekue koʼã hiʼupy,+ ikatu hag̃uáicha umi ojeroviáva+ ha oikuaa porãva pe añetegua hoʼu ha oagradese umívare. 4 Pórke entéro mbaʼe Ñandejára ojapo vaʼekue ningo iporãiterei,+ ha mbaʼevete noñemboykéi+ vaʼerã ojeagradeséramo pe tembiʼúre, 5 pórke pe tembiʼu oñesantifika Ñandejára ñeʼẽ ha ñemboʼe rupive.

6 Péicha reñemoñeʼẽramo umi ermánope, reservi porãta Cristo Jesúspe, reñalimenta porã rupi umi ñeʼẽ ñande jagueroviáva* rupive ha pe enseñánsa iporãva rupive. Umíva nde resegi porã kuri reikóvo.+ 7 Péro ani rehendu umi kuénto japu+ oheja vaíva Ñandejárape, umi g̃uaig̃ui omombeʼúva rehegua. Upéva rangue, eñehaʼãmbaite* vaʼerã ikatu hag̃uáicha rehechauka readoraha Ñandejárape nde pyʼaite guive. 8 Pórke pe ehersísio* ojapóva peteĩ persóna omombarete hag̃ua hete, saʼimínte ideprovécho. Péro ñandefiélramo Ñandejárape ñande pyʼaite guive ideprovécho entéro mbaʼépe, pórke ñanepytyvõ ñande rekovépe koʼág̃ama voi ha amo gotyove avei.+ 9 Ko haʼéva ningo siertoite hína ha omerese jajerovia hese. 10 Upévare ñande ñambaʼapo jejopy ha ñañehaʼãmbaite,+ pórke jareko esperánsa Ñandejára oikovévare, haʼe osalva+ opaichagua persónape,+ ha koʼýte umi ifiélvape.

11 Esegíkena emanda koʼã mbaʼe ha emboʼe chupekuéra. 12 Aníke arakaʼeve eheja avave ndeapoʼi nemitã haguére. Upéva rangue, remoĩ vaʼerã ehémplo iporãva umi ifiélvape, tahaʼe umi mbaʼe erévape, ne kondúktape, ne mborayhúpe, nde jeroviápe ha nde rekoporãme.* 13 Ag̃uahẽ meve, reñehaʼã meme vaʼerã relee opavave renondépe,+ emokyreʼỹ ótrope ojapo hag̃ua iporãva ha eporomboʼe. 14 Aníkena redeskuida pe rregálo Ñandejára omeʼẽ vaʼekue ndéve peteĩ profesía rupive, pe kuérpo de ansiáno omoĩrõ guare ipo nde ári.+ 15 Ejepyʼamongeta koʼã mbaʼére, ha epensa meme umívare, péicha enterove ohechakuaáta reñakãrapuʼãha rehóvo. 16 Siémprekena eñatende reiko lájare ha remboʼe lájare.+ Esegíkena ejapo koʼã mbaʼe, pórke rejapóramo péicha rejesalváta nde ha avei umi nerendúva.+

5 Ani reñeʼẽ pohýi peteĩ kuimbaʼe ijedávape.+ Upéva rangue, reñeʼẽ vaʼerã chupe reñeʼẽramoguáicha nde túape, ha umi imitãvévape reñeʼẽramoguáicha ne ermánope, 2 umi kuña ijedávape reñeʼẽramoguáicha nde sýpe, ha umi kuña imitãvape reñeʼẽramoguáicha ne ermánape, ha retrata vaʼerã chupekuéra tekopotĩme.

3 Emombaʼe ha eñangareko umi viúda añetehápe oikotevẽvare.*+ 4 Péro peteĩ viúda orekóramo imemby térã iniéto, haʼekuéra primero ohechauka vaʼerã oadoraha Ñandejárape ipyʼaite guive oñangarekóvo hogayguakuérare.+ Haʼekuéra omeʼẽ vaʼerã itúa ha ijavuelokuérape upe omereséva+ hikuái, upéva ningo Ñandejára oguerohory+ hína. 5 Pe viúda añetehápe oikotevẽva ha opyta vaʼekue mbaʼeveʼỹre, oreko esperánsa Ñandejárare,+ ha ára ha pyhare osegi oñemboʼe ha ojerure asy+ chupe. 6 Péro pe viúda oñemeʼẽva umi deséo* orekóvape, omanóma oikovéramo jepe. 7 Upévare, esegíkena emanda chupekuéra koʼã mbaʼe, ani hag̃ua avave oñeʼẽ vai hesekuéra. 8 Añetehápe oĩramo nomantenéiva* ifamíliape, ha koʼýte umi oikóvape hógape, upéva omboykéma ijerovia ha oĩ vaive hína peteĩ ojeroviaʼỹvagui.+

9 Toñemoĩ lístape oñepytyvõ hag̃ua umi viúda ohasámavape 60 áño, ha peteĩnte iména vaʼekuépe. 10 Umi hénte oikuaa vaʼerã chupe ojapo hague iporãva,+ por ehémplo omongakuaa porã hague imembykuéra,+ opororresivi porã hague,+ ombojepyhéi umi ojeporavo vaʼekuépe,*+ oipytyvõ umi ojejopy vaívape,+ ha oñehaʼãmbaite hague ojapo opaichagua mbaʼe porã.

11 Péro ani remoĩ lístape umi viúda imitãvape, pórke haʼekuéra iñakãraku jave kuimbaʼére, upéva ojoko chupekuéra oservi hag̃ua Crístope ha odesidíntema omenda hikuái. 12 Ha oñekondenáta chupekuéra, pórke nokumplíri pe promésa ypykue ojapo vaʼekue. 13 Ha ojepokuaa avei hikuái hekorei, okorre óga ahénorupi, ha ndahaʼéi hekoreínteva, síno avei ichismósa, oñentremete ótro ojapóvare+ ha oñeʼẽ oñeʼẽʼỹ vaʼerãre. 14 Upévare aipota umi viúda imitãva tomenda,+ taimemby,+ ha toñangareko hógare, ani hag̃ua omeʼẽ oportunida pe enemígope oñeʼẽ vai hag̃ua. 15 Añetehápe, oĩma voi umi viúda oheja vaʼekue pe tape porã ha osegi Satanáspe. 16 Peteĩ kuña ojeroviáva orekóramo ihénte haʼéva viúda, haʼe oñangareko vaʼerã pe viúdare, ha ndohejái vaʼerã pe kongregasión kárgope. Upéicha pe kongregasión ikatúta oipytyvõ umi viúda añetehápe oikotevẽvape.*+

17 Umi ansiáno oporogia* porãvape+ ojerrespetave+ vaʼerã, koʼýte umi ombaʼapo jejopývape oñeʼẽ hag̃ua Ñandejára Ñeʼẽre ha oporomboʼe hag̃ua.+ 18 Pórke Ñandejára Ñeʼẽ heʼi: “Napemoĩri vaʼerã vosál pene rymba guéire* pemopotĩ jave pende trígo semílla”,+ ha heʼi avei: “Pe ombaʼapóva oreko derécho orresivívo isuéldo”.+ 19 Ani reguerovia oĩ jave oakusáva peteĩ ansiánope,* noĩriramo mokõi térã mbohapy testígo ohecha vaʼekue la oikóva.+ 20 Ekorrehi+ pe kongregasión renondépe* umi opeka memévape,+ ha péicha umi ótro okyhyjéta avei opeka hag̃ua. 21 Ha ankarga ndéve Ñandejára renondépe, Cristo Jesús ha umi ánhel ojeporavo vaʼekue renondépe rejapo hag̃ua koʼã mbaʼe amandáva hína, ehesaʼỹijo porãkena entéro mbaʼe redesidi mboyve ha ani refavorese avavépe.+

22 Aníkena arakaʼeve rejapura renombra hag̃ua peteĩ kuimbaʼépe,*+ ha ani avei remoirũ avavépe ipekádope. Siémprekena nderekopotĩ.

23 Anive reʼu y,* síno heʼu michĩmi víno, upéva ou porãta nde pyʼápe ha avei nepytyvõta pórke nde pyʼỹi nderasykatu.

24 Oĩ umi opekáva ha enterovete voi oikuaa upéva, upévare pyaʼe oñekondena, péro oĩ umi opekáva ha upe rire ae ojekuaáva upéva.+ 25 Upéicha avei oĩ umi mbaʼe porã ojejapóva ha enterovete voi oikuaa upéva,+ péro umi mbaʼe porã ojejapóva ha ndojekuaáiva jepe ndaikatúi opyta kañyháme.+

6 Umi haʼéva guive esklávo, siémpre orrespeta vaʼerã ipyʼaite guive ipatronkuérape,+ ani hag̃ua arakaʼeve oñeñeʼẽ vai Ñandejára rérare ni umi mbaʼe haʼe omboʼévare.+ 2 Avei umi esklávo orekóva ipatrón haʼéva avei kristiáno, ani ou ndorrespetavéi ipatrónpe haʼe haguére iñermáno. Upéva rangue ombaʼapo jejopyve vaʼerã chupe, upe hembiapo ideprovécho rupi iñermáno ohayhúvape ha ojeroviávape avei.

Esegíkena emboʼe koʼã mbaʼe ha emokyreʼỹ chupekuéra ojapo hag̃ua umíva. 3 Oĩramo peteĩ kuimbaʼe oikóva omosarambi umi enseñánsa japu idiferénteva umi enseñánsa porãgui,*+ umi oúva ñande Ruvicha Jesucrístogui, ha avei umi enseñánsa ohechaukávagui mbaʼéichapa jaadora vaʼerã Ñandejárape ñande pyʼaite guive,+ 4 upéicharõ upe kuimbaʼe oñemombaʼeguasu hína ha nontendéi mbaʼeve.+ Haʼe ningo itavyete voi oñorairõségui ha ojodiskutiségui umi ñeʼẽre.+ Upéva káusare umi hénte iñenvidióso, ojodiskuti, oñeʼẽ vai ótrore,* nokonfiái avavére. 5 Koʼã mbaʼe omomýi avei umi iménte kyʼávape ha nontendéivape pe añetegua manterei ojodiskuti vaipa hag̃ua vyroreíre.+ Haʼekuéra oimoʼã oadora haguére Ñandejárape ipyʼaite guive ikatuha ogana álgo imbaʼerã.+ 6 Añetehápe, tuicha ideprovécho hína ñandéve jaadoráramo Ñandejárape ñande pyʼaite guive+ ha javyʼa jarekomívare. 7 Pórke mbaʼeve ningo ndajaguerúi vaʼekue ko múndope ha mbaʼeve avei ndaikatúi jagueraha.+ 8 Upéicharõ, jarekóma guive jaʼumi vaʼerã* ha ñande aorã,* javyʼáma vaʼerã koʼã mbaʼére.+

9 Péro umi ojedesidímava ipláta hetataha, hoʼa ñuhãme, peteĩ lásope+ ha oiko heta vyrorei ha deséo oporoperhudikáva rapykuéri, ha upéva ogueru chupekuéra heta sufrimiénto ha oñehundiete hikuái.+ 10 Pórke pe platarayhu ogueru opaichagua mbaʼe vai. Ha iplatarayhúgui oĩ heta ohejáva ijerovia ha oike opaichagua akã rasýpe ha heta ohasa asy.+

11 Péro nde reservíva Ñandejárape, ediparáke koʼã mbaʼégui, ha eñehaʼãmbaite ndehústo, eadora Ñandejárape nde pyʼaite guive, ejerovia, eporohayhu, eaguanta, ha neakãguapy.+ 12 Eñorairõ pe ñorairõ iporãva redefende hag̃ua Ñandejára omboʼéva. Eñakarama hatãke pe jeikove opaveʼỹvare, Ñandejára ningo ndeporavo vaʼekue rehupyty hag̃ua upéva, ha nde remombeʼu porãma upéva heta héntepe.

13 Amanda ndéve Ñandejára renondépe, haʼe hína upe omoingovéva entéro mbaʼe, ha Cristo Jesús renondépe, haʼe ningo pyʼaguasúpe oñeʼẽ vaʼekue ijeroviáre Poncio Pilato+ renondépe, 14 amanda ndéve rekumpli hag̃ua umi mandamiénto hekoitépe ha ani avave heʼi nderehe mbaʼeve ivaíva, ág̃a ñande Ruvicha Jesucristo ojechauka peve.+ 15 Ha pe tiémpo ojeporavo vaʼekuépe upearã, ojechaukáta pe Governánte Ipoderosoite ha ovyʼáva. Haʼe hína pe Rréi omandavéva entéro umi ótro rréigui ha Governánte omandavéva entéro umi ótro governántegui.+ 16 Haʼe añoite hína pe ikatuʼỹva omano,+ oikóva peteĩ lugár omimbipávape*+ avave ikatuʼỹháme og̃uahẽ, chupe avave ndohechái vaʼekue ha ndaikatúi ojehecha.+ Toñembotuicha chupe, ha ipodér toĩ pára siémpre. Amén.*

17 Emanda* umi ipláta hetávape koʼág̃a ko tiémpope,* ani hag̃ua oñemombaʼeguasu,* ha ani ojerovia umi rrikésa ikatúvare oñehundi.+ Upéva rangue tojerovia Ñandejárare, omeʼẽ rasapáva ñandéve entéro mbaʼe ñanembovyʼáva.+ 18 Ere chupekuéra tojapo iporãva, si, haʼekuéra ojapo vaʼerã heta mbaʼe iporãva, ipojera, ha ikyreʼỹ vaʼerã okomparti hag̃ua ótrondi umi mbaʼe orekóva.+ 19 Péicha ojapóramo ombyatýta umi rrikésa oúva Ñandejáragui, ha omoĩta hikuái peteĩ simiénto iporãva tenonderãme+ g̃uarã, ikatu hag̃uáicha oñakarama hatã pe jeikove añetetévare.+

20 Che raʼy Timoteo, eñangareko porãke upe ojeheja vaʼekuére nde kárgope+ ha ani rehendu umi kuénto japu oheja vaíva Ñandejárape, ni umi mbaʼe heʼíva umi hénte oimoʼãva iñaranduha, pórke umi mbaʼe oikuaáva hikuái okontradesi pe añetegua.+ 21 Oĩ umi ohechaukáva orekoha peichagua arandu ha upévare oheja ijerovia.

Ñandejára taimbaʼeporãiterei penendive.*