KÁRTA A TITO

1 Che, Pablo, Ñandejára esklávo ha aservi hína Jesucristo apóstolramo. Che ajerovia ha ambaʼapo apóstolramo asegún pe jerovia orekóva umi oiporavo vaʼekue Ñandejára, ha aikuaa porã pe añetegua, ohechaukáva mbaʼéichapa jaadora vaʼerã Ñandejárape ñande pyʼaite guive. 2 Ha koʼã mbaʼe oñemopyenda pe esperánsa heʼívare jaikovetaha pára siémpre.+ Ñandejára ikatuʼỹva ijapu+ ymaitereíma opromete vaʼekue upéva, 3 péro pe tiémpo haʼe omoĩ vaʼekuépe, haʼe oikuaauka iñeʼẽ pe predikasión rupive. Ha Ñandejára, haʼéva ñande Salvadór, cheporavo vaʼekue aikuaauka hag̃ua upéva.+ 4 Askrivi ko kárta Títope, che raʼy teéicha chemoirũva pe jerovia mokõive jarekóvape:

Aipotaite Ñandejára, haʼéva pe Túa ha ñande Salvadór Cristo Jesús taimbaʼeporãiterei nendive* ha tomeʼẽ ndéve pyʼaguapy.

5 Che ningo roheja kuri Crétape ikatu hag̃uáicha rekorrehi umi mbaʼe oĩ vaíva* ha renombra hag̃ua umi ansiáno káda siudápe, amanda haguéicha ndéve: 6 pe ansiánore* ndojeʼéi vaʼerã ikondúkta vaiha, peteĩnte hembireko vaʼerã, ifamiliakuéra ojerovia vaʼerã ha ndojeʼéi vaʼerã hesekuéra oikoha iñakãre* ni irreveldeha.+ 7 Pórke pe ansiáno ningo Ñandejára siérvo* ha ndojeʼéi vaʼerã hese ikondúkta vaiha, ndaikaprichósoi vaʼerã,+ ndaipochyreíri vaʼerã,+ ndovaléi ikaʼu, naivioléntoi vaʼerã,* ndoikói vaʼerã oheka tarovaite umi mbaʼe chupe okonvenívante iplatarayhúgui.* 8 Upéva rangue, opororresivi porã vaʼerã,*+ ojapose vaʼerã voi iporãva, iñakãguapy vaʼerã,+ ihústo vaʼerã, ifiél vaʼerã Ñandejárape+ ha ojejokokuaa vaʼerã.+ 9 Oporomboʼe lája+ ohechauka vaʼerã oñakarama hatãha Ñandejára ñeʼẽ jajeroviávare,* ikatu hag̃uáicha oporomokyreʼỹ* oporomboʼévo umi enseñánsa iporãva*+ ha okorrehi+ umi oñeʼẽ vaívape upévare.

10 Pórke oĩ heta kuimbaʼe irrevéldeva, oñeʼẽmba reíva ha oporombotavýva, umíva apytépe oĩ umi kuimbaʼe heʼíva ojejapo vaʼerãha pe sirkunsisión.*+ 11 Nde rejurumboty vaʼerã koʼã kuimbaʼépe, pórke haʼekuéra ohundíma heta família kompletoitégui ijerovia, ha omboʼe umi mbaʼe noĩporãiva oikógui oheka tarovaite umi mbaʼe chupekuéra okonvenívante iplatarayhúgui.* 12 Peteĩ proféta upepegua heʼi vaʼekue voi: “Umi Cretagua ningo siémpre ijapu, ojogua hikuái umi animál salváhepe, iñaragán ha okaruhárente voi oiko”.

13 Upe heʼíva ningo siérto. Upéicha rupi, esegíkena eñemoñeʼẽ mbarete chupekuéra, ikatu hag̃uáicha ijerovia mbarete, 14 ha ani opena hikuái umi kuénto rei omombeʼúvare umi judío, ni umi mandamiénto oúvare umi kuimbaʼe orrechasávagui pe añetegua. 15 Entéro mbaʼe ipotĩ umi hénte ipotĩvape g̃uarã,+ péro umi ikyʼáva ha ndojeroviáivape g̃uarã mbaʼeve naipotĩri. Pórke haʼekuéra iménte ha ikonsiénsia kyʼa.+ 16 Haʼekuéra heʼi enterove renondépe oikuaaha Ñandejárape, péro umi mbaʼe ojapóva rupive omotĩ chupe,+ pórke haʼekuéra oporombojeguaru ha naiñeʼẽrendúi ha ndovaléi ojapo hag̃ua mbaʼeve iporãva.

2 Nde katu resegi vaʼerã remboʼe asegún umi enseñánsa iporãva.*+ 2 Umi kuimbaʼe ijedáva ojejokokuaa vaʼerã entéro mbaʼépe, iñakãguapy vaʼerã, opensa porã vaʼerã odesidi hag̃ua, ijerovia mbarete vaʼerã, oporohayhu ha oaguanta vaʼerã. 3 Upéicha avei, umi kuña ijedáva ojapo vaʼerã entéro mbaʼe oñembotuicha hag̃ua Ñandejárape, noñeʼẽvaíri vaʼerã ótrore, ndoikói vaʼerã víno poguýpe, ha omboʼe vaʼerã iporãva. 4 Péicha haʼekuéra ikatúta oakonseha* umi kuña imitãvévape ohayhu hag̃ua iménape, imembykuérape, 5 iñakãguapy hag̃ua, hekopotĩ hag̃ua, iguápa hag̃ua hogapýpe,* imbaʼeporã hag̃ua ha oñemoĩ hag̃ua iména poguýpe,+ péicha avave noñeʼẽvaimoʼãi Ñandejára ñeʼẽre.

6 Upéicha avei, esegíkena emokyreʼỹ umi kuimbaʼe imitãvévape iñakãguapy hag̃ua.+ 7 Nde voi remoĩ vaʼerã ehémplo rejapo porãvo entéro mbaʼe. Remboʼe jave umi mbaʼe iporãva* rehechauka vaʼerã neakãguapyha.+ 8 Upearã reipuru vaʼerã umi ñeʼẽ iporãva* ani hag̃ua avave oñeʼẽ vai nderehe,+ péicha oñemotĩta umi oñemoĩva ñanderehe, pórke ndoguerekomoʼãi mbaʼeve ivaíva heʼi vaʼerã ñanderehe.+ 9 Umi esklávo oñemoĩ vaʼerã ipatronkuéra poguýpe entéro mbaʼépe.+ Oñehaʼã vaʼerã oñemoĩ porã hendivekuéra ha ndovaléi ijuruʼatã. 10 Nomondái vaʼerã chuguikuéra mbaʼeve,+ síno ohechauka vaʼerã ikatuha ojejerovia hesekuéra entéro mbaʼépe. Péicha umi esklávo omoporãvéta ñande Salvadór Ñandejára omboʼéva entéro mbaʼe ojapóva rupive.+

11 Pórke Ñandejára ohechauka vaʼekue imbaʼeporãitereiha,* ha upéva omeʼẽ salvasión opaichagua héntepe.+ 12 Upéva ñanemboʼe ñamboyke hag̃ua entéro mbaʼe oñemoĩva Ñandejára rembipotáre ha ani hag̃ua jaipota umi mbaʼe vai oĩva ko múndope.+ Ñanemboʼe avei ñaneakãguapy ha ñandehústo hag̃ua ha jaadora hag̃ua ñande pyʼaite guive Ñandejárape ko múndope.*+ 13 Ha upe aja ñahaʼarõ oñekumpli pe esperánsa ñanembovyʼaitéva,+ ha ñahaʼarõ Ñandejára Ipoderosoitéva ha ñande Salvadór Cristo Jesús tohechauka ipodér. 14 Cristo ningo omeʼẽ vaʼekue hekove ñanderehehápe+ ha péicha haʼe ñandelivera*+ opaichagua tembiapo vaígui, ha ñanemopotĩ oiko hag̃ua ñandehegui ipuévlo espesiál ojapóva iporãva ipyʼaite guive.+

15 Esegíkena emboʼe koʼã mbaʼe, emeʼẽ konsého* ha ehechauka ótrope mbaʼépepa ojavy, pórke nde reguereko voi autorida rejapo hag̃ua koʼã mbaʼe.+ Aníke eheja avave ndeapoʼi.

3 Esegíkena emomanduʼa umi ermánope iñeʼẽrendu ha oñemoĩ vaʼerãha umi goviérno ha autoridakuéra poguýpe,+ oĩ vaʼerãha preparádo ojapo hag̃ua entéro mbaʼe iporãva, 2 ndovaleiha oñeʼẽ vai avavére, ndoikói vaʼerãha ojeplagea, noñemohatãi vaʼerãha haʼekuéra heʼívapente+ ha siémpre ohechauka vaʼerãha ipyʼaguapyha enterovéndi.+ 3 Ñande jepe yma ñandevýro vaʼekue, nañaneñeʼẽrendúi Ñandejárape, umi hénte ñanembotavy, jaiko umi mbaʼe ñandegustáva ha ñanembovyʼáva rapykuéri, ñaneñaña, ñaneenvidióso, umi hénte ijeguaru ñandehegui ha ndajachaʼéi ojuehe.

4 Péro ñande Salvadór Ñandejára ohechauka vaʼekue imbaʼeporã+ ha ohayhuha yvyporakuérape. 5 Haʼe ñandesalva ñandeporiahuvereko+ rupi, ndahaʼéi jajapo haguére umi mbaʼe ihústova.+ Haʼe ñandesalva vaʼekue ñanemopotĩrõ guare ha upéva ñanemoingove,+ ha avei oipurúrõ guare ijespíritu sánto ñanembopyahu hag̃ua.+ 6 Haʼe ningo hetaiterei omeʼẽ ñandéve ijespíritu ñande Salvadór Jesucristo rupive.+ 7 Haʼe ojapo upéva ikatu hag̃uáicha jareko esperánsa jarresivitaha+ jeikove opaveʼỹva,+ upe haʼe opromete vaʼekue. Ñande ikatu jahupyty upéva haʼe imbaʼeporãiterei rupi ñanendive,*+ ha upéva rupive haʼe ñanderecha ihústovaramo.

8 Umi mbaʼe ojeʼe vaʼekue siérto hína, ha aipota nde rehechauka iñimportanteha koʼã mbaʼe, ikatu hag̃uáicha umi ojeroviáva Ñandejárare osegi ojepyʼamongeta mbaʼéichapa ojapóta umi mbaʼe iporãva. Koʼã mbaʼe ningo iporã ha ideprovécho kuimbaʼekuérape.

9 Péro aníke reñentremete umi oikóvare ojodiskuti vyroreíre, oñeʼẽséva umi lístare oĩháme umi ituakuéra ypykue réra, ha ojodiskuti ha oiko vaíva pe léi rehe, pórke umi mbaʼe ndovaléi mbaʼeverã ha ndaideprovéchoi avavépe.+ 10 Oĩramo peteĩ kuimbaʼe omoñepyrũséva peteĩ sékta,+ eakonseha mbarete* chupe 2 vése,+ ha nanerendúiramo errechasa+ chupe. 11 Pórke nde reikuaa upe kuimbaʼe osẽ hague tape porãgui, opeka ha oñekondenamaha ijupe voi.

12 Ág̃a amondo vove ne rendápe Ártemas térã Tíquicope,+ eñehaʼãmbaitékena eju che rendápe Nicópolispe, pórke che adesidíma ahasataha upépe pe inviérno. 13 Ejapókena ikatumíva entéro reipytyvõ hag̃ua Zénaspe, haʼe hína upe oikuaa porãva pe léi, ha avei Apólospe, ani hag̃ua ofalta chupekuéra mbaʼeve iviaherã.+ 14 Péro ñane ermanokuéra oaprende vaʼerã avei ojapo meme iporãva, ikatu hag̃uáicha oipytyvõ umi oikotevẽtereívape,+ péicha ndoikomoʼãi chuguikuéra peteĩ ndoprodusíriva mbaʼeve.+

15 Oguerahaka ndéve salúdo entéro umi oĩva chendive. Saludomi avei entéro umi ñanderayhúvape ha ojeroviávape.

Ñandejára taimbaʼeporãiterei penendive.