PRIMERA KÁRTA DE PEDRO

1 Che, Pedro, aservíva Jesucristo apóstolramo,+ askrivi hína peẽ penesarambívape Póntorupi, Galacia, Capadocia,+ Asia* ha Bitíniarupi, peẽ peikóvape extranhéroicha ha Ñandejára oiporavo vaʼekuépe. 2 Haʼe hína Ñande Ru Ñandejára+ ha pendeporavo vaʼekue asegún upe odesidíma vaʼekue ojapotaha. Haʼe omeʼẽ vaʼekue peẽme espíritu sánto penesantifika+ hag̃ua. Haʼe ojapo upéva ikatu hag̃uáicha peẽ peneñeʼẽrendu chupe, ha penemopotĩ hag̃ua Jesucristo ruguy+ rupive:

Añemboʼe Ñandejára imbaʼeporãiterei hag̃ua penendive* ha tapenepytyvõ pendepyʼaguapy hag̃ua.

3 Toñemombaʼeguasu Ñandejárape, haʼéva ñande Ruvicha Jesucristo Túa. Haʼe ñandeporiahuverekoiterei rupi, ñande ñanase+ jey jaguereko hag̃ua peteĩ esperánsa oikovéva.+ Ha ñande jareko ko esperánsa, Jesucrístope oñemoingove jey rupi umi omano vaʼekue apytégui.+ 4 Ñandejára omeʼẽ peẽme peteĩ erénsia noñehundimoʼãiva ni noñembyaimoʼãiva.+ Upéva haʼe oñongatu peẽme g̃uarã yvágape.+ 5 Peẽme Ñandejára pendeprotehe hína ipodér rupive, pórke peẽ pejerovia. Ñandejára pendeprotehe hína ikatu hag̃uáicha pejesalva. Ko salvasión ningo ojehechaukáta pe tiémpo oñemohuʼã vove. 6 Upéicha rupi peẽ pevyʼaiterei hína, jepe peteĩ tiémpo mbykymíre tekotevẽ peñembyasy koʼág̃a pehaságui heta mbaʼe ijetuʼúva.+ 7 Koʼã mbaʼe oiko ikatu hag̃uáicha ojehechauka mbaʼeichaitépa imbarete pende jerovia,+ ha upe jerovia ovaleve órogui, oñehundíva oñembohasáramo* jepe tatárupi. Ha perekógui peichagua jerovia, peẽ peñembotuicháta, peñemombaʼéta ha pejerrespetáta ág̃a Jesucristo ojechauka vove.+ 8 Peẽ ndapehecháiramo jepe arakaʼeve Crístope, pehayhu chupe. Ndapehecháiramo jepe chupe koʼág̃a, pejerovia hese, pendepyʼarory ha pereko peteĩ vyʼa tuichaitereíva. 9 Ha vyʼápe peẽ perresivíta pe salvasión* pejerovia rupi.+

10 Umi proféta ningo oñeʼẽ vaʼekue Ñandejára mbaʼeporã ojehechauka vaʼekuére peẽme, oporandu meme vaʼekue ha ohesaʼỹijo porã vaʼekue oikuaaségui mbaʼépa heʼise ko salvasión.+ 11 Ñandejára oipuru vaʼekue ipodér* heʼíma hag̃ua chupekuéra de antemáno Cristo ohasa asytaha,+ ha upe rire oñembotuichataha chupe. Upévare haʼekuéra osegi ohesaʼỹijo oikuaa hag̃ua mbaʼépa oikóta kuri pe Cristo+ rehe ha arakaʼépa oikóta upéva. 12 Ñandejára oikuaauka vaʼekue umi profétape ndoprofetisaiha hína ijupekuéra g̃uarã, síno peẽme g̃uarã. Ha koʼág̃a ojepredikáma peẽme koʼã mbaʼe, umi oikuaauka vaʼekue peẽme umi notísia porã rupive. Haʼekuéra ojapo vaʼekue upéva oipytyvõgui chupekuéra pe espíritu sánto oñembou vaʼekue yvágagui.+ Umi ánhel jepe oikuaaseterei koʼã mbaʼe.

13 Upéicharõ, pepreparákena pene ménte pembaʼapo jejopy hag̃ua,+ peneakãguapýke pejapo jave entéro mbaʼe,+ pehaʼarõ pe mbaʼeporã ojehechaukátava peẽme ág̃a Jesucristo ojechauka vove ha pejerovia hese pende pyʼaite guive. 14 Peẽ ningo koʼág̃a Ñandejára raʼy iñeʼẽrendúva chupe. Upévare anive pejapo* umi mbaʼe vai pejapose vaʼekue yma ndapeikuaáirõ guare chupe. 15 Upéva rangue, peẽ penepotĩ vaʼerã* entéro mbaʼe pejapóvape,+ ipotĩháicha* upe penerenói vaʼekue. 16 Ñandejára Ñeʼẽ heʼi voi: “Peẽ penepotĩ vaʼerã,* pórke che sánto hína”.+

17 Ha peẽ peñemboʼéramo pe Túape, ndofavoreséiva avavépe ohusga+ jave káda únope hembiapokuére, pehechauka vaʼerã pekyhyjeha+ Ñandejáragui peiko lájare peime aja sapyʼami extranhéroicha ko múndope. 18 Pórke peẽ peikuaa ndahaʼeiha umi mbaʼe oñembyaíva rupive, tahaʼe pláta térã óro rupive, peẽ pejelivera*+ hague pende rekove ovaleʼỹvagui, ombohasa vaʼekue peẽme pende tuakuéra ypykue.* 19 Upéva rangue peẽ pejelivera vaʼekue Cristo+ ruguy iporãitéva rupive,+ ojoguáva peteĩ ovecha raʼyrusu ruguýpe ipotĩva+ ha ndorekóiva mbaʼeve ivaíva. 20 Añetehápe, Ñandejára oiporavóma vaʼekue voi Crístope ko múndo* oñepyrũ mboyve,+ péro penderehehápe haʼe ojekuaauka koʼág̃a oñemohuʼãvo koʼã tiémpo.*+ 21 Haʼe rupive peẽ pejerovia Ñandejárare,+ upe omopuʼã vaʼekue chupe umi omano+ vaʼekue apytégui ha ombotuicha chupe,+ ikatu hag̃uáicha pejerovia ha pereko esperánsa Ñandejárare.

22 Koʼág̃a peẽ peñemopotĩma* peneñeʼẽrendu rupi pe añeteguápe, ha koʼã mbaʼe rupive peẽ pejoayhu oñoermánoicha tovamokõiʼỹre.+ Upéicharõ, pejoayhuetereíkena pende pyʼaite guive.+ 23 Pórke peẽ ningo penase jey vaʼekue,+ ha napenaséi peteĩ semílla ikatúvagui omano, síno peteĩ semílla oporomoingovévagui ha ikatuʼỹvagui omano.+ Peẽ penase Ñandejára ñeʼẽ rupive, oikovéva ha opytáva pára siémpre.+ 24 Heʼiháicha Ñandejára Ñeʼẽ: “Enterove yvypóra ojogua pástope, ha iporãngue ojogua umi yvoty osẽvape ñúre. Pe pásto omano ha pe yvoty okúi, 25 péro Jehová* ñeʼẽ* opyta pára siémpre”.+ Ha ko “ñeʼẽ”* hína umi notísia porã ojekuaauka vaʼekue peẽme.+

2 Upéicharõ, peipeʼaite pendejehegui entéro mbaʼe vai,+ japu, tovamokõi, envídia, ha ani peñeʼẽ vai ótrore. 2 Umi mitãraʼy onase ramóvaicha+ oheka meméva isy pécho okambu hag̃ua, upéicha avei peẽ peñehaʼãmbaite vaʼerã peheka meme Ñandejára ñeʼẽ, ikatu hag̃uáicha upéva rupive pekakuaa ha pejesalva.+ Ñandejára ñeʼẽ ningo haʼete hína kamby puroite. 3 Ha peẽ ikatu pejapo upéva pórke peikuaa porã* ñande Ruvicha imbaʼeporãha.

4 Umi kuimbaʼe orrechasa vaʼekue pe ita oikovéva,+ péro Ñandejára oiporavo vaʼekue chupe ha iporãiterei+ chupe g̃uarã. Ha peẽ pejeroviárõ guare hese, 5 umi ita oikovévaicha peẽ peñemopuʼã peteĩ ógaicha Ñandejára espíritu rupive,+ ikatu hag̃uáicha oiko pendehegui peteĩ grúpo de saserdóte sánto, peofrese hag̃ua sakrifísio+ Ñandejára espíritu oipotaháicha, ha oaseptáva Jesucristo rupive.+ 6 Pórke Ñandejára Ñeʼẽme heʼi: “¡Pemañamína! Che amoĩ Siónpe peteĩ ita ojeporavo vaʼekue, pe ita prinsipál* iporãitéva oĩva pe simiéntope, ha enterove ojeroviáva hese arakaʼeve nombyasymoʼãi* ojapo haguére upéva”.+

7 Upéicharõ, peẽme g̃uarã haʼe iporãiterei pejerovia rupi, péro umi ndojeroviáivape g̃uarã ndahaʼéi upéicha, Ñandejára Ñeʼẽme heʼi voi: “Pe ita umi alvañíl omboyke vaʼekue,+ pévagui oiko pe ita prinsipál”,*+ 8 ha oiko avei chugui “peteĩ ita umi hénte oñepysanga hag̃ua ha peteĩ ita ostorváva chupekuéra”.+ Haʼekuéra oñepysanga hína, pórke naiñeʼẽrendúi Ñandejára ñeʼẽme. Ha upearã voi ojeporavo vaʼekue chupekuéra. 9 Péro peẽ haʼe hína “peteĩ puévlo ojeporavo pyre, peteĩ grúpo de rréi haʼéva saserdóte, peẽ haʼe hína peteĩ nasión sánta,+ peteĩ puévlo Ñandejára oiporavo vaʼekue,+ ikatu hag̃uáicha pemombeʼu oparupiete Ñandejára imbaʼeporãitereiha”.*+ Ha haʼe hína upe penerenói vaʼekue pytũmbýgui ha penderresivi pe ilús ijojahaʼỹvape.+ 10 Pórke peẽ yma ndahaʼéi vaʼekue Ñandejára puévlo, péro koʼág̃a haʼéma ipuévlo,+ yma Ñandejára napendeporiahuverekói vaʼekue, péro koʼág̃a haʼe pendeporiahuverekóma.+

11 Ermanokuéra pohayhuetéva, peikóva extranhéroicha ha peikóva peteĩ tiémpore ko múndope,+ ajerure jey jey peẽme ani hag̃ua peñemeʼẽ pende rete imperfékto ogustávape,+ oñorairõva hína pene kóntrape.*+ 12 Siémprekena penderekoporã umi hénte ko mundopegua apytépe,+ péicha haʼekuéra heʼi vove peẽ haʼeha mbaʼe vai apoha, ohecháta umi mbaʼe porã peẽ pejapóva,+ ha upe haguére ombotuicháta hikuái Ñandejárape ág̃a haʼe ou vove oporohusga hag̃ua.

13 Ñande Ruvicha rehehápe, peñemoĩkena entéro umi autorida*+ yvyporakuéra omoĩva poguýpe, tahaʼe peteĩ rréi+ poguýpe, tuichave rupi pendehegui, 14 térã umi governadór poguýpe, pórke chupekuéra omoĩ vaʼekue pe rréi okastiga hag̃ua umi mbaʼe vai apohápe, péro ombotuicha hag̃ua umi ojapóvape iporãva.+ 15 Pórke Ñandejára oipota peẽ pejapo iporãva ikatu hag̃uáicha pejurumboty* umi kuimbaʼe nontendéivape mbaʼeve ha oñeʼẽva pene kóntrape ndoikuaáigui mbaʼeve.+ 16 Peikókena umi hénte orekóvaicha liverta,+ péro ani peipuru pende liverta pejapo* hag̃ua umi mbaʼe vai,+ síno peiko umi hénte oservívaicha Ñandejárape.+ 17 Perrespetákena entéro yvypórape,+ pehayhúkena enterove ermanokuéra+ oĩvape ko múndope, pekyhyje Ñandejáragui,+ pemombaʼe pe rréipe.+

18 Umi siérvo toñemoĩ ipatronkuéra poguýpe ha torrespeta chupekuéra ipyʼaite guive.+ Péro ani umi patrón ivuéno ha imbaʼeporãvape* añónte, síno ojapo vaʼerã avei upéva umi hasývape oñemeʼẽ hag̃ua gústo. 19 Pórke Ñandejára oguerohory umi oñehaʼãvape ikonsiénsia potĩ henondépe,+ umi oaguantáva heta mbaʼe ijetuʼúva* ha ohasa asývape ndorekóiramo jepe la kúlpa. 20 ¿Mbaʼe iporãva guaʼu piko pejapo oĩramo penembyepotíva pepeka haguére ha peẽ peaguanta upéva?+ Péro pehasa asýramo pejapo haguére iporãva ha peaguanta, upéva Ñandejára oguerohory.+

21 Añetehápe peẽ peñehenói vaʼekue pehasa asy hag̃ua ndaperekóiramo jepe la kúlpa, pórke pe Cristo jepe ohasa asy vaʼekue penderehehápe+ ha oheja peẽme peteĩ ehémplo pesegi porã hag̃ua ha pejapo hag̃ua umi mbaʼe haʼe ojapo vaʼekue.*+ 22 Haʼe ndopekái+ vaʼekue ha núnka ndaijapúi+ vaʼekue. 23 Umi hénte oñeʼẽ vaírõ guare hese,*+ haʼe ndojeréi oñeʼẽ vai avei hesekuéra.*+ Haʼe ohasa asýrõ guare,+ haʼe noamenasái vaʼekue umi ombohasa asývape chupe, upéva rangue ohejánte oñangareko hese pe Hués oporohusgáva+ hustísiape. 24 Haʼe ogueraha vaʼekue ñande pekádo+ hete ojeklavárõ guare pe yvyráre,*+ ikatu hag̃uáicha jajelivera pe pekádogui ha jaiko jajapo hag̃ua umi mbaʼe ihústova. Ha “umi ijerída rupive peẽ pekuera vaʼekue”.+ 25 Pórke yma ningo peẽ peiko ovecha okañy vaʼekuéicha,+ péro koʼág̃a peju jey pende pastór+ ha pene ansiáno rendápe, oñangarekóva hína penderehe.*

3 Upéicha avei peẽ tembirekokuéra peñemoĩ vaʼerã pene ména poguýpe,+ ha péicha oĩramo naiñeʼẽrendúiva Ñandejára ñeʼẽme, pene kondúkta+ rupive ikatúta iñeʼẽrendu pejeʼỹre chupe mbaʼeve. 2 Upéva oikóta haʼekuéra ohecha rupi penekondúkta porãha*+ ha ohecha rupi perrespetaha chupekuéra pende pyʼaite guive. 3 Ani peñemoporã umi hénte penderecha hag̃uánte, ha peipuru umi peinádo ijexaherádova,* adórno de óro,+ térã ao hepyetereíva. 4 Upéva rangue pemoporã vaʼerã upe perekóva pene korasõme, upévare peñemoporã vaʼerã pehechaukávo pendepyʼaguapy ha peneakãguapyha.+ Upéva ningo ovaleterei Ñandejára renondépe ha peichagua adórno noñehundimoʼãi. 5 Pórke péicha yma oñadorna vaʼekue umi kuña ifiélva* orekóva esperánsa Ñandejárare, ha oñemoĩ hikuái iména poguýpe. 6 Ojapo haguéicha Sara iñeʼẽrendúvo Abrahánpe, ha ohenói chupe “che karai”.*+ Ha peẽ ikatu hína pesegi Sara ehémplo, pesegíramo pejapo iporãva ha ndapehejáiramo mbaʼeve penemongyhyje.+

7 Upéicha avei peẽ menakuéra pentende porã vaʼerã pene rembirekópe* ikatu hag̃uáicha peiko oñondive akãguapýpe porã. Umi kuña ningo ikangyve hína pendehegui ha ojogua peteĩ váso helikadovévape,* upévare pemombaʼe+ vaʼerã chupekuéra, pórke Ñandejára imbaʼeporãgui omeʼẽ chupekuéra rregáloramo pe jeikove,+ peẽme omeʼẽ haguéicha avei. Ndapejapóiramo upéicha ikatu hína Ñandejára nohendúi pene ñemboʼe.

8 Ipahápe, enterove peẽ peiko vaʼerã peteĩ ñeʼẽme,*+ peñemoĩ pende rapicha lugárpe, pejoayhu oñoermánoicha, pejoporiahuvereko+ pende pyʼaite guive ha peneumílde.+ 9 Ani pejapo ivaíva ótrore peñevenga hag̃ua,+ ni peñeʼẽ vai ótrore peñevenga hag̃ua.+ Upéva rangue, pejapo vaʼerã iporãva hesehápe,*+ pórke Ñandejára pendeporavo vaʼekue pevendesi hag̃ua ótrope, ikatu hag̃uáicha haʼe penevendesi.

10 Ñandejára Ñeʼẽme heʼi rupi: “Entéro oikoséva trankílo porã ha vyʼápe, ojokokuaa vaʼerã ijuru ani hag̃ua heʼi ivaíva,+ ha ndoikói vaʼerã ijapu. 11 Omboyke vaʼerã ivaíva+ ha ojapo iporãva.+ Tojapo ikatúva guive oĩ hag̃ua pyʼaguapy, ha toñehaʼã siémpre ojogueraha porã hapichándi.+ 12 Jehová* omaña umi hembiapo porãvare, ha ohendu chupekuéra ojerure asy jave.+ Péro Jehová* oñemoĩ umi iñañáva kóntrape”.+

13 Añetehápe, pejapóramo iporãva pende pyʼaite guive, ¿máva piko ojapóta penderehe ivaíva?+ 14 Péro pehasa asýramo pejapo haguére iporãva, peẽ lomímonte pevyʼáta.+ Upéicharamo jepe, ani pekyhyje umi mbaʼe omongyhyjévagui umi héntepe* ni pejepyʼapyeterei.+ 15 Upéva rangue, pembotuicha vaʼerã Crístope pende pyʼapýpe pende Ruvicháramo. Ha siémpre peime vaʼerã preparádo pedefende hag̃ua pene esperánsa oĩramo oporandúva peẽme hese. Péro pejapo vaʼerã upéva pyʼaguapýpe porãnte+ ha perrespeta pende rapichakuérape pende pyʼaite guive.+

16 Peñehaʼãkena siémpre penekonsiénsia potĩ,+ péicha oñemotĩta oĩramo oñeʼẽ vaíva penderehe,+ pórke peẽ penekondúkta porã haʼe rupi Cristo segidór.+ 17 Iporãve hína pehasa asy pejapo haguére iporãva,+ Ñandejára opermitíramo upéva, pehasa asy rangue pejapo haguére ivaíva.+ 18 Pórke Cristo jepe omano vaʼekue una vénte oñeperdona hag̃ua umi pekádo,+ peteĩ ihústova omano umi iñinhústovare,+ ikatu hag̃uáicha peiko porã jey Ñandejárandi.+ Haʼe omano vaʼekue yvypóraicha,+ péro Ñandejára omoingove jey chupe peteĩ espírituicha.+ 19 Ha upe rire péicha oho opredika umi ánhel oĩvape préso,+ 20 umíva hína umi naiñeʼẽrendúi vaʼekue Noé tiémpope.+ Upe tiémpope Ñandejára ipasiénsia vaʼekue* ha ohaʼarõ ojejapopa pe árka,+ ha upe árkape 8 persónante* ojesalva vaʼekue ohóvo pe y apére.+

21 Upe oiko vaʼekue orrepresenta pe vautísmo ha upéva pendesalva hína avei koʼág̃a, Jesucrístope oñemoingove jey rupi. Pe vautísmo ndeʼiséi ñande rete oñemopotĩha umi mbaʼe kyʼágui, síno heʼise jajerureha Ñandejárape jareko hag̃ua peteĩ konsiénsia potĩ.+ 22 Pe Cristo oguapy Ñandejára deréchape+ pórke oho yvágape, ha oñemoĩ ipoguýpe umi ánhel, autoridakuéra ha umi podér.+

4 Upéicharõ, Cristo ohasa asy rupi yvypóraicha,+ peẽ pejeprepara vaʼerã avei pepensa* hag̃ua Cristo opensa haguéicha, pórke pe persóna ohasa asýva ndopekavéima,+ 2 ikatu hag̃uáicha haʼe oikove aja ojapo Ñandejára rembipota,+ ha ndoikovéima ojapo hag̃ua yvyporakuéra rembipota.+ 3 Pórke yma ningo peẽ hetaiterei tiémpore pejapo umi hénte ko mundopegua ojapóva,+ por ehémplo napetĩri vaʼekue penerembiapo vai hag̃ua,* pendetarovaite pejapose ivaíva, pemokõ rasa, pefarrea itarovávaicha,* pejapo fiésta pekaʼu hag̃ua ha peadora umi taʼanga oporombojeguarúva.*+ 4 Umi hénte nontendéi mbaʼérepa peẽ ndapejapovéima hendivekuéra umi mbaʼe vaiete, ha upévare haʼekuéra oñeʼẽ vai penderehe.+ 5 Péro Cristo ohusgáta koʼã héntepe, haʼe oĩma preparádo ohusga+ hag̃ua umi oikovévape ha umi omanóvape asegún umi mbaʼe ojapo vaʼekue. 6 Añetehápe, upévare umi notísia porã ojekuaauka vaʼekue umi omanóvape,*+ upéicha ojehusgáramo jepe chupekuéra yvyporakuérape ojehusgaháicha, haʼekuéra ikatu oiko Ñandejára espíritu poguýpe.

7 Péro hiʼag̃uimbaitéma entéro mbaʼe oñemohuʼã hag̃ua. Upévare peneakãguapýkena+ ha siémpre peime preparádo* peñemboʼe+ hag̃ua. 8 Ha koʼýte pejoayhu vaʼerã pende pyʼaite guive,+ pórke pe oporohayhúva siémpre oĩ operdona hag̃uáicha hapichápe.+ 9 Pejorresivi porãkena pende pyʼaite guive* pejeplageaʼỹre.+ 10 Asegún pe rregálo perresivi vaʼekue káda uno Ñandejáragui, peipurúkena upéva peservi hag̃ua ótrope, pórke peẽ ningo siérvo* ivaléva perresivi vaʼekue Ñandejára mbaʼeporã* ojechaukáva heta hendáicha.+ 11 Oĩramo ivaléva oñeʼẽ hag̃ua, oñeʼẽ vaʼerã omombeʼuramoguáicha umi mensáhe oúva Ñandejáragui. Oĩramo oservíva ótrope, tojerovia pe fuérsa Ñandejára omeʼẽvare,+ ikatu hag̃uáicha entéro mbaʼépe oñembotuicha+ Ñandejárape Jesucristo rupive. Toñembotuicha Ñandejárape, haʼe oreko podér pára siémpre ha opa árare. Amén.*

12 Ermanokuéra ahayhuetéva, ani peñesorprende pehasa haguére koʼã mbaʼe ijetuʼuetéva ojoguáva tatápe,+ ku oikoramoguáicha penderehe peteĩ mbaʼe ipyahúva. 13 Upéva rangue, pevyʼa+ vaʼerã pehasa asy haguére Cristo ohasa asy haguéicha,+ ikatu hag̃uáicha pendepyʼarory ha pevyʼaiterei avei ág̃a og̃uahẽ vove pe tiémpo ohechaukatahápe ipodér.+ 14 Oñeñeʼẽ vaíramo penderehe* Cristo réra rehehápe, peẽ pevyʼa+ vaʼerã, pórke upéva ohechauka peẽ perekoha pe espíritu ijojahaʼỹva, upéva hína Ñandejára espíritu.

15 Upéicharõ jepe, ndaipotái avave pende apytépe ohasa asy oiko rupi chugui peteĩ asesíno térã mondaha, ojapógui ivaíva térã oñentremete rupi ótro ojapóvare.+ 16 Péro oĩramo ohasa asýva kristiáno haguére, ani otĩ,+ síno osegi vaʼerã ombotuicha Ñandejárape ha oiko peteĩ kristiánoicha. 17 Kóva hína pe tiémpo ojeporavo vaʼekue oñepyrũ hag̃ua pe huísio Ñandejára rógape.+ Ha ñanderehe raẽve voi oñepyrũramo,+ ¿mbaʼépe piko opáta umi naiñeʼẽrendúiva Ñandejára notísia porãme?+ 18 Pórke Ñandejára Ñeʼẽme heʼi: “Pe kuimbaʼe ihústova apenaite ojesalváramo, ¿mbaʼépa oikóta pe kuimbaʼe aña ha pe pekadórgui?”.+ 19 Upéicharõ, umi ohasa asýva ojapo haguére Ñandejára rembipota, tosegi tojapo iporãva ha tomoĩ* hekove* ñande Apohare pópe, hese ningo ikatu jajerovia.+

5 Che haʼe rupi avei ansiáno peẽicha, ha ahecha vaʼekue mbaʼéichapa ohasa asy Cristo ha añembotuicháta avei umi ojeporavo vaʼekuéndi ág̃a enterove ñañembotuicha vove,+ upévare umi ansiáno oĩvape pende apytépe ajerure jey jey* ko mbaʼe: 2 ojapoháicha peteĩ pastór, peñangarekóke Ñandejára ovechakuérare+ oñenkargáva peẽme peservívo ansiánoramo,* péro ani pejapo upéva oĩgui pendeovligáva ni ndapeikói vaʼerã peheka tarovaite umi mbaʼe peẽmente okonveníva pendeplatarayhúgui,*+ síno pejapo vaʼerã upéva vyʼápe ha kyreʼỹme Ñandejára renondépe.+ 3 Ani pemanda guasu umi haʼévare Ñandejára mbaʼe,+ upéva rangue peẽ ehémplo vaʼerã pe ovecha atýpe g̃uarã.+ 4 Ha ág̃a pe pastór prinsipál+ ojechauka vove, peẽ perresivíta pe prémio* ijojahaʼỹva ha noñembyaimoʼãiva.+

5 Upéicha avei peẽ kuimbaʼe penemitãvéva, peñemoĩ vaʼerã umi kuimbaʼe ijedavéva* poguýpe.+ Péro enterove peẽ peneumílde vaʼerã pejotrata jave,* pórke Ñandejára oñemoĩ umi ijorgullósovare, péro imbaʼeporãiterei* umi iñumíldevandi.+

6 Upéicharõ, peneumíldekena ha peñemoĩ Ñandejára tuichaitéva ha ipoderosoitéva* poguýpe, ikatu hag̃uáicha haʼe penembotuicha og̃uahẽ vove pe tiémpo.+ 7 Ha pemoĩ ipópe entéro mbaʼe pendepyʼapýva,*+ pórke haʼe ojepyʼapy penderehe.+ 8 Penearandúkena ha peñatende porã.+ Pene enemígo pe Diablo okorre hína oikóvo pende jerére, haʼete peteĩ león okororõva hína ha oñehaʼã omokõ oimeraẽvape.*+ 9 Péro peẽ peñemoĩ mbarete vaʼerã ikóntrape+ ha pejerovia mbarete, peikuaágui enterove pene ermáno oĩva ko múndope oaguantaha avei koʼãichagua jehasa asy.+ 10 Péro pehasa asy rire sapyʼaitemi, Ñandejára henyhẽva opaichagua mbaʼeporãgui, penerenói vaʼekue ikatu hag̃uáicha peime en unida Crístondi ha peñembotuicha pára siémpre,+ omohuʼãta pene entrenamiénto. Haʼe penemombaretéta+ ha penepytyvõta+ pesegi hag̃ua pendefiél ha pejepytaso mbarete hag̃ua. 11 Pe podér imbaʼe hína pára siémpre. Amén.*

12 Silvano,*+ haʼéva peteĩ ermáno ifiélva, chepytyvõ askrivi hag̃ua peẽme ko kárta. Mbykymínte askrivi peẽme ikatu hag̃uáicha pomokyreʼỹ ha aikuaauka peẽme Ñandejára añetehápe imbaʼeporã hague penendive. Peñakarama hatãkena upévare. 13 Oguerahaka peẽme salúdo pe ermána* oĩva Babilóniape, ojeporavo vaʼekue avei peẽicha, ha che raʼy Marcos.+ 14 Pesaludákena enterove ermánope ha peañuã chupekuéra.*

Aipotaite pendepyʼaguapy enterovete peẽ Cristo disípulo.