PRIMERA KÁRTA DE JUAN

1 Ore roskrivi peẽme roñeʼẽ hag̃ua upe oĩ vaʼekuére iñepyrũ guive,* upe ogueru vaʼekuére pe ñeʼẽ omeʼẽva jeikove.+ Chupe ore rohendu vaʼekue oñeʼẽrõ guare ha rohecha chupe ore resa teérupi, rojesareko hese ha ore porupiete ropoko ha roñandu vaʼekue chupe. 2 (Añete, pe jeikove opaveʼỹva ojehechauka vaʼekue oréve. Ore rohecha+ vaʼekue upéva, roikuaauka ha romombeʼu hína peẽme. Pe jeikove opaveʼỹva+ ou pe Túagui ha ojehechauka oréve). 3 Ore romombeʼúma peẽme umi mbaʼe rohecha ha rohendu vaʼekue,+ ikatu hag̃uáicha peẽ peime en unida* orendive, ore roimeháicha en unida pe Túa ha Itaʼýra Jesucristo ndive.+ 4 Upévare roskrivi hína peẽme koʼã mbaʼe ikatu hag̃uáicha ñanerenyhẽ vyʼágui.

5 Kóva hína pe mensáhe rohendu vaʼekue Jesúsgui ha roikuaaukáva peẽme: Ñandejára ningo lus+ ha haʼe ndorekói pype mbaʼevete iñypytũva. 6 Ñande jaʼéramo: “Ñaime en unida hendive”, ha jasegi jaiko pytũmbýpe,* upéicharõ ñandejapu hína ha ndajaikói pe añetegua heʼiháicha.+ 7 Péro jaikóramo pe lus rendýpe,* Ñandejára voi oĩháicha pe lus rendýpe, upéicharõ ñaime hína en unida oñondivepa, ha Itaʼýra Jesús ruguy ñanemopotĩ opaichagua pekádogui.+

8 Ñande jaʼéramo: “Ndajarekói ningo pekádo”, upéicharõ ñande ñañembotavy ñandejupe+ voi ha pe añetegua noĩri ñane korasõme. 9 Ñandejára ningo ifiél ha ihústo hína, upévare ñamombeʼúramo ñande pekádo haʼe operdonáta ñandéve ñande pekadokuéra, ha ñanemopotĩta entéro ñane rembiapo vaikuégui.+ 10 Ñande jaʼéramo: “Ndajarekói ningo pekádo”, upéicharõ jaʼe hína Ñandejára ijapuha, ha iñeʼẽ noĩri ñane korasõme.

2 Che raʼykuéra pohayhuetéva, askrivi peẽme koʼã mbaʼe ani hag̃ua pepeka. Upéicharõ jepe oĩramo opekáva, jareko peteĩ ajudánte* pe Túa renondépe, upéva hína Jesucristo,+ ha haʼe ihústo hína.+ 2 Haʼe ningo oñemeʼẽ sakrifísioramo+ ñande pekadokuérare*+ jaiko porã jey hag̃ua Ñandejárandi, péro ndahaʼéi ñanderehehápente, síno avei ko múndo kompletoitére.+ 3 Ñande jasegíramo ñakumpli imandamientokuéra, ojekuaa porãta ñanderehe jaikuaaha chupe. 4 Ha oĩramo heʼíva: “Che aikuaa chupe”, péro nokumplíri umi imandamientokuéra, upéva ijapu hína ha pe añetegua noĩri ikorasõme. 5 Péro oĩramo okumplíva Cristo ñeʼẽ, upéicharõ ojekuaa porãta hese añetehápe ohayhuha Ñandejárape.+ Jajapóramo avei péicha jahechaukáta ñaimeha en unida hendive.+ 6 Ha upe heʼíva oĩha en unida hendive, katuete osegi vaʼerã oiko Jesús oiko haguéicha.+

7 Che ermanokuéra pohayhuetéva, ndaskrivíri peẽme peteĩ mandamiénto pyahu, síno peteĩ mandamiénto itujáva, upéva peẽ perekóma vaʼekue voi iñepyrũ guive.+ Ko mandamiénto itujáva haʼe hína upe ñeʼẽ peẽ pehendu vaʼekue. 8 Upéicharõ jepe, askrivi jey peẽme peteĩ mandamiénto pyahu, peteĩ mandamiénto Jesús okumpli vaʼekue ha peẽ pekumplíva avei, pórke pe pytũmby ohasáma ohóvo ha pe lus teete ohesapéma hína.+

9 Pe heʼíva oĩha pe lus rendýpe, péro ndochaʼéi iñermánore,+ upéva oĩ gueteri hína pytũmbýpe.+ 10 Pe ohayhúva iñermánope opyta pe lus rendýpe,+ ha mbaʼeve nomoñepysangái chupe.* 11 Péro pe ndochaʼéiva iñermánore oĩ pytũmbýpe ha oiko hína pytũmbýpe,+ ha ndoikuaái moõ gotyopa oho,+ pórke pe pytũ onsiega chupe.

12 Askrivi peẽme che raʼykuéra pohayhuetéva, oñeperdonáma rupi peẽme pende pekadokuéra héra* rehehápe.+ 13 Askrivi peẽme tuakuéra, pórke peẽ peikuaáma upe oĩ vaʼekuépe iñepyrũ guive. Askrivi peẽme mitãrusukuéra, pórke peẽ pendepuʼakáma Satanás rehe.*+ Askrivi peẽme mitãnguéra, pórke peẽ peikuaáma pe Túape.+ 14 Askrivi peẽme tuakuéra, pórke peẽ peikuaáma upe oĩ vaʼekuépe iñepyrũ guive. Askrivi peẽme mitãrusukuéra, pórke peẽ penembarete+ ha Ñandejára ñeʼẽ opyta pene korasõme+ ha pendepuʼakáma haguére Satanás rehe.*+

15 Ani pehayhu pe múndo ni umi mbaʼe oĩva pype.+ Oĩramo ohayhúva ko múndo, upéva ndohayhúi hína pe Túape.+ 16 Pórke umi mbaʼe vai ojaposéva ñande rete imperfékto+ ha umi mbaʼe ñanderesatiráva+ ha jaiko jajechaukase* umi mbaʼe jarekóvare, umi mbaʼe ndoúi pe Túagui, síno ou pe múndogui. 17 Avei pe múndo ha umi deséo orekóva ohasa ohóvo,+ péro pe ojapóva Ñandejára rembipota oikovéta pára siémpre.+

18 Che raʼykuéra pohayhuetéva, ñaiméma hína pe última órape. Peẽ pehendúma kuri outaha pe oñemoĩva Crístore,*+ ha koʼág̃a oĩma heta oñemoĩva Crístore,+ ha upévare ñande jaikuaa ñaimemaha pe última órape. 19 Haʼekuéra oĩ vaʼekue ñande apytépe, péro osẽ oho ndahaʼéigui ñandeichagua,*+ pórke haʼekuéra haʼérire ñandeichagua opyta vaʼerãmoʼã ñanendive. Péro haʼekuéra osẽ oho, ikatu hag̃uáicha ojehechauka naentéroi haʼeha ñandeichagua.+ 20 Peẽme ningo pendeporavo* vaʼekue pe Dios Sánto,+ ha enterove peẽ peikuaa pe añetegua. 21 Che askrivi peẽme ndahaʼéi ndapeikuaáigui pe añetegua,+ síno peikuaágui upéva, ha avei ndaipóri rupi japu oúva pe añeteguágui.+

22 ¿Máva piko pe ijapúva? ¿Ndahaʼéi piko upe onegáva Jesús haʼeha pe Cristo?+ Kóva hína pe oñemoĩva Crístore,*+ upe onegáva pe Túape ha pe Taʼýrape. 23 Enterove onegáva pe Taʼýrape, upévape pe Túa ndoguerohorýi.+ Péro pe ojeroviáva pe Taʼýrare,+ upévape pe Túa oguerohory.+ 24 Pende kásope katu, peẽ pesegi vaʼerã pejapo umi mbaʼe pehendu vaʼekue iñepyrũ guive.+ Ha peẽ pesegíramo pejapo upe pehendu vaʼekue iñepyrũ guive, pesegíta peime en unida pe Taʼýra ndive ha pe Túa ndive avei. 25 Hiʼarive haʼe oprometéma ñandéve jaikovetaha pára siémpre.+

26 Koʼã mbaʼe askrivi peẽme oĩgui oñehaʼãva pendegueraha tape vaíre. 27 Peẽme katu Ñandejára pendeporavo pe espíritu sánto rupive,+ ha pe espíritu opyta pende pype, ha upévare napeikotevẽi avave penemboʼe. Ha Ñandejára oipuru upe espíritu penemboʼe hag̃ua entéro mbaʼe,+ ha upéva añetegua hína ha ndahaʼéi japu. Ha pesegíkena peime en unida hendive,+ pe espíritu penemboʼe haguéicha pejapo hag̃ua. 28 Upévare koʼág̃a che raʼykuéra pohayhuetéva, pesegíkena en unida hendive, ikatu hag̃uáicha ñañeʼẽ kyhyjeʼỹme+ ág̃a haʼe ojechauka vove, ha ani ñatĩgui ñañemomombyry chugui ág̃a haʼe oĩ* vove. 29 Peẽ peikuaa rupi haʼe ihustoha, peikuaa porã avei entéro umi ojapóva umi mbaʼe ihústova haʼeha itaʼýra.+

3 ¡Pepensamína mbaʼeichaitépa pe Túa ñanderayhu!+ Haʼe ñanerenói itaʼýra+ ha añetehápe ñande itaʼýra* hína. Upévare pe múndo nañandekuaái,+ haʼekuéra ndoikuaái rupi chupe.+ 2 Che ermanokuéra pohayhuetéva, koʼág̃a ningo ñande Ñandejára raʼy hína,+ péro ndojekuaaukái gueteri ñandéve mbaʼéichatapa ñande rekove amo gotyove.+ Péro jaikuaa ningo jajoguataha chupe, pórke ág̃a haʼe ojechauka vove jahecháta mbaʼéichapa haʼe. 3 Enterove orekóva ko esperánsa hese, oñemopotĩ ijupe voi,+ pórke haʼe ningo ipotĩ.

4 Enterove opeka meméva nokumplíri hína pe léi, upéicharõ pe pekádo heʼise nañakumpliriha pe léi. 5 Peẽ peikuaa avei Jesús ou hague oipeʼa hag̃ua ñande pekadokuéra,+ péro haʼe ndorekói ni peteĩ pekádo. 6 Enterove osegíva oĩ en unida hendive, ndoikói opeka meme,+ ha ni peteĩ persóna opeka meméva ndoikuaái chupe ni ndojeroviái hese. 7 Che raʼykuéra pohayhuetéva, aníkena avave penembotavy, pe ojapo meméva iporãva ihústo hína Jesús ihustoháicha. 8 Pe opeka meméva ou pe Diáblogui, pórke pe Diablo opeka iñepyrũ guive.*+ Upévare Ñandejára Raʼy ou vaʼekue ohundi hag̃ua pe Diablo rembiapokue.+

9 Entéro haʼéva Ñandejára raʼy ndoikói opeka meme,+ pórke oreko ipype pe espíritu sánto,* ha haʼe ndaikatúi opeka meme haʼégui Ñandejára raʼy.+ 10 Péicha ikatu jaikuaa mávapa hína Ñandejára raʼy ha mávapa pe Diablo raʼy: enterove umi ndojapomeméiva umi mbaʼe iporãva ndahaʼéi Ñandejára raʼy. Ha pe ndohayhúiva iñermánope ndahaʼéi avei Ñandejára raʼy.+ 11 Kóva hína pe mandamiénto peẽ pehendu vaʼekue iñepyrũ guive: jajoayhu vaʼerã.+ 12 Ani jajogua Caínpe, haʼe ningo haʼe vaʼekue pe Diablo* raʼy ha ojuka iñermánope.+ ¿Ha mbaʼérepa ojuka raʼe chupe? Pórke haʼe hembiapo vai vaʼekue,+ péro iñermáno ojapo iporãva.+

13 Che ermanokuéra, ani pehecharamo ko múndo ndaijaʼéiramo penderehe.+ 14 Ñande jaikuaa ñamanóma hague, péro koʼág̃a jaikove+ pórke jahayhu ñane ermanokuérape.+ Pe ndohayhúiva iñermánope omano hína.+ 15 Enterove ndaijaʼéiva iñermánore haʼe hína peteĩ asesíno,+ ha peẽ peikuaa ni peteĩ asesínope noñemeʼẽmoʼãiha jeikove opaveʼỹva.+ 16 Ñande jaikuaa mbaʼépa heʼise pe mborayhu, pórke Jesucristo omano* ñanderehehápe.+ Ha ñande jareko avei pe ovligasión ñameʼẽvo ñande rekove* ñane ermanokuéra rehehápe.+ 17 Péro oimeraẽ orekóva heta mbaʼe oñemantene hag̃ua ha ohecha iñermáno oikotevẽha, ha upéicharõ jepe ndojaposéi mbaʼeve oiporiahuvereko hag̃ua chupe, ¿mbaʼéicha piko upéicharõ haʼe heʼíta ohayhuha Ñandejárape?+ 18 Che raʼykuéra pohayhuetéva, aníkena ñande jurúpente jaʼe japorohayhuha,+ síno jahechauka+ vaʼerã upéva umi mbaʼe jajapóva rupive ha ñanesinséro+ vaʼerã.

19 Péicha jaikuaáta ñande jarekoha pe añetegua, ha jagueroviáta* ñande pyʼaite guive Ñandejára ñanderayhuha, 20 ñane korasõ ñanekondenáramo jepe heta mbaʼére, ñanemanduʼákena Ñandejára tuichaveha ñane korasõgui ha oikuaaha entéro mbaʼe.+ 21 Che ermanokuéra pohayhuetéva, ñane korasõ nañanekondenáiramo ikatu ñañeʼẽ Ñandejárape kyhyjeʼỹme.+ 22 Ha oimeraẽ mbaʼe jajeruréva chupe, haʼe omeʼẽ ñandéve,+ pórke ñande ñakumpli umi imandamientokuéra ha jajapo umi mbaʼe haʼe oguerohorýva. 23 Añetehápe kóva hína imandamiénto: jajerovia vaʼerã Itaʼýra Jesucristo rérare,+ ha jajoayhu+ vaʼerã haʼe omanda haguéicha ñandéve. 24 Avei pe okumplíva imandamientokuéra osegi oĩ Ñandejárandi, ha Ñandejára oĩ hendive.+ Ha haʼe omeʼẽ rupi ñandéve ijespíritu jaikuaa haʼe osegiha oĩ ñanendive.+

4 Che ermanokuéra pohayhuetéva, ani peguerovia entéro profesía ojeʼéva* ouha Ñandejáragui,+ síno pehecha raẽ añetehápepa umíva* ou hína chugui.+ Pórke heta proféta japu osẽ ko múndope.+

2 Péicha peikuaáta pe profesía ouha Ñandejáragui: entéro profesía heʼíva Jesucristo ou hague yvypóraicha, ou hína Ñandejáragui.+ 3 Péro entéro profesía heʼíva Jesús ndoúi hague yvypóraicha, ndoúi Ñandejáragui.+ Avei upéva hína pe profesía omombeʼúva pe oñemoĩva Crístore,*+ peẽ pehendu kuri haʼe heʼíta hague umi mbaʼe, ha koʼág̃a oñeñeʼẽma hína umívare ko múndope.+

4 Che raʼykuéra pohayhuetéva, peẽ peju Ñandejáragui ha pendepuʼakáma umi proféta japúre,+ pórke Ñandejára oĩ en unida penendive,+ haʼe ipoderosove hína pe Diáblogui oĩva en unida ko múndondi.+ 5 Koʼã proféta japu ou ko múndogui,+ upévare umi mbaʼe heʼíva hikuái ou ko múndogui, ha ko múndo ohendu chupekuéra.+ 6 Ñande katu jaju Ñandejáragui. Pe oikuaáva Ñandejárape ningo ñanerendu ñandéve,+ ha pe ndoúiva Ñandejáragui nañanerendúi.+ Péicha japilla mbaʼe profesíapa añetegua ha mbaʼe profesíapa japu hína.+

7 Che ermanokuéra pohayhuetéva, jasegíkena jajoayhu+ pórke pe mborayhu ou Ñandejáragui, ha entéro oporohayhúva haʼe hína Ñandejára raʼy ha oikuaa Ñandejárape.+ 8 Pe ndoporohayhúiva ndoikuaái Ñandejárape, pórke Ñandejára ningo mborayhu.+ 9 Péicha ojehechauka Ñandejára mborayhu ñande kásope: Ñandejára ombou Itaʼýra peteĩetépe+ ko múndope, ikatu hag̃uáicha haʼe rupive jahupyty pe jeikove.+ 10 Pe mborayhu ndeʼiséi ñande jahayhu hague Ñandejárape, síno haʼe la ñanderayhu vaʼekue ha ombou Itaʼýrape oñemeʼẽ hag̃ua sakrifísioramo+ ñande pekadokuérare,*+ jaiko porã jey hag̃ua hendive.

11 Che ermanokuéra pohayhuetéva, Ñandejára ñanderayhúramo péicha, ñande jareko avei pe ovligasión jajoayhúvo.+ 12 Avave ndohecháiva arakaʼeve Ñandejárape.+ Jasegíramo jajoayhu, Ñandejára oĩ gueteri ñanendive ha imborayhu henyhẽ ñande pype.+ 13 Haʼe omeʼẽ rupi ñandéve ijespíritu, ñande jaikuaa jasegiha ñaime en unida hendive ha haʼe oĩha en unida ñanendive. 14 Avei ñande voi jahecha vaʼekue ha ñamombeʼu pe Túa ombou hague Itaʼýrape osalva hag̃ua ko múndope.+ 15 Ha oĩramo ogueroviáva Jesucristo haʼeha Ñandejára Raʼy,+ Ñandejára oĩ hendive en unida ha haʼe oĩ en unida Ñandejárandi.+ 16 Ñande ningo jaikuaáma ha jaguerovia Ñandejára ñanderayhuha.+

Ñandejára ningo mborayhu,+ ha pe osegíva oporohayhu oĩ en unida Ñandejárandi ha Ñandejára oĩ en unida hendive.+ 17 Upévare pe mborayhu henyhẽ ñande pype, ikatu hag̃uáicha ñañeʼẽ kyhyjeʼỹme*+ pe día de huísiope, ñande jajogua rupi Crístope ko múndope. 18 Pe ohayhúva Ñandejárape ndokyhyjéi,+ pórke pe mborayhu ikomplétova* ñanepytyvõ ani hag̃ua jakyhyje. Añetehápe, peteĩ kuimbaʼe okyhyjéramo, upéva ojoko chupe ha ndaikatúi ojapo heta mbaʼe. Pe kuimbaʼe okyhyjéva mborayhu naikomplétoi.*+ 19 Ñande katu japorohayhu, Ñandejára raẽve ñanderayhu rupi.+

20 Ha oĩramo heʼíva: “Che ahayhu Ñandejárape”, péro ndohayhúi iñermánope, upéva ijapu hína.+ Pórke pe ndohayhúiva iñermáno+ ohechávape, ndaikatúi ohayhu Ñandejára ndohecháivape.+ 21 Ko mandamiénto haʼe omeʼẽ ñandéve: pe ohayhúva Ñandejárape ohayhu vaʼerã avei iñermánope.+

5 Entéro ogueroviáva Jesús haʼeha pe Cristo, haʼe Ñandejára raʼy,+ ha entéro ohayhúva Ñandejárape, ohayhu avei Ñandejára raʼykuérape. 2 Péicha ñande jaikuaa jahayhuha Ñandejára raʼykuérape:+ jahayhúramo Ñandejárape ha ñakumpli imandamientokuéra. 3 Pórke jahayhu Ñandejárape heʼise ñakumpli imandamientokuéra,+ ha imandamientokuéra ndahaʼéi la hasyetereíva ñakumpli hag̃ua.*+ 4 Pórke entéro haʼéva Ñandejára raʼy, ipuʼaka ko múndore.+ Ha ñande ñandepuʼakáma ko múndore ñande jerovia+ rupive.

5 ¿Mávapa ikatu ipuʼaka ko múndore?+ ¿Ndahaʼéi piko pe ogueroviáva Jesús haʼeha Ñandejára Raʼy?+ 6 Jesucristo hína pe ou vaʼekue y ha tuguy rupive, ndahaʼéi y rupive añónte,+ síno y ha tuguy+ rupive. Ha pe espíritu sánto ohechauka siertoha upéva,+ pórke pe espíritu oikuaauka pe añetegua.* 7 Oĩ hína mbohapy mbaʼe oikuaaukáva mávapa Jesús: 8 pe espíritu,+ pe y+ ha pe tuguy,+ ha mbohapyvéva oĩ peteĩ ñeʼẽme.

9 Jagueroviáramo kuimbaʼekuéra heʼíva, upéicharõ ñande jaguerovia vaʼerã avei Ñandejára heʼíva, upéva ningo tuichave mbaʼe hína, pórke Ñandejára voi oikuaauka mávapa Itaʼýra. 10 Pe ojeroviáva Ñandejára Raʼýre ohechauka oguerekoha ikorasõme umi mbaʼe Ñandejára omboʼe vaʼekue chupe. Pe ndojeroviáiva Ñandejárare heʼi hína hese ijapuha,+ pórke haʼe ndogueroviái umi mbaʼe Ñandejára heʼi vaʼekue Itaʼýrare siertoha. 11 Ha Ñandejára oikuaauka ñandéve ko mbaʼe: haʼe omeʼẽha ñandéve jeikove opaveʼỹva,+ ha jarresiviha upe jeikove Itaʼýra rupive.+ 12 Pe ogueroviáva pe Taʼýrape, ohupytýta jeikove opaveʼỹva, pe ndogueroviáiva Ñandejára Raʼýpe, ndohupytymoʼãi jeikove opaveʼỹva.+

13 Askrivi peẽme koʼã mbaʼe peikuaa hag̃ua peguerekoha jeikove opaveʼỹva,+ peẽ pejeroviáva Ñandejára Raʼy rérare.+ 14 Ha jajeroviakuaa* ko mbaʼére: oimeraẽ mbaʼe jajeruréva Ñandejárape,+ oĩ porãramo hembipotándi, haʼe ñanerendúta.+ 15 Avei jaikuaáramo haʼe ohenduha oimeraẽ mbaʼe jajeruréva chupe, jaikuaa katuete omeʼẽtaha ñandéve umi mbaʼe jajeruréva chupe.+

16 Oĩramo ohecháva iñermáno opekaha, péro ndojapói peteĩ pekádo oporogueraháva ñemanóme, upéicharõ haʼe oñemboʼe vaʼerã hese ha Ñandejára omeʼẽta chupe jeikove.+ Péva péichata ndahaʼéiramo peteĩ pekádo oporogueraháva ñemanóme.+ Péro oĩ hína peteĩ pekádo ñandegueraháva ñemanóme. Ha che ndaʼéi hína avavépe oñemboʼe hag̃ua upe ojapóvare peichagua pekádo. 17 Opaichagua inhustísia ningo pekádo,+ péro oĩ peteĩ pekádo nañandegueraháiva ñemanóme.

18 Jaikuaaháicha, entéro haʼéva Ñandejára raʼy ndoikói opeka meme, síno Ñandejára Raʼy* oñangareko hesekuéra ha Satanás* ndaikatúi ojagarra chupekuéra.+ 19 Jaikuaa ningo ñande jajuha Ñandejáragui, péro ko múndo kompletoite oĩ pe aña poguýpe.+ 20 Péro ñande jaikuaa Ñandejára Raʼy ou hague,+ ha haʼe omeʼẽ ñandéve entendimiénto* ikatu hag̃uáicha jaikuaa Ñandejára teépe. Ha Itaʼýra Jesucristo rupive ñande ñaime en unida+ hendive. Añetehápe, kóva hína Ñandejára tee ha pe omeʼẽva jeikove opaveʼỹva.+ 21 Che raʼykuéra pohayhuetéva, peñemomombyrýkena umi dios raʼangágui.+