Introduksión

KÓVA haʼe peteĩ lívro omombeʼúva istória añeteguáva. Oñeguenohẽ la Bíbliagui, pe lívro iporãvéva oĩva ko múndope. Umi istória omombeʼu umi mbaʼe oikovaʼekue Ñandejára ojapo ñepyrũ guive ko múndo koʼag̃aite peve. Omombeʼu avei mbaʼépa ojapóta Ñandejára tenonderã.

Ko lívro ohechauka ndéve mbaʼépa oguereko la Biblia. Oñeʼẽ umi hénte la Bíbliape oĩvagui ha mbaʼépa ojapovaʼekue hikuái. Ohechauka avei pe esperánsa iporãitéva Ñandejára omeʼẽva la héntepe, oikotaha hikuái opa ára g̃uarã peteĩ paraísope ko Yvy ape ári.

Oĩ 116 istória ko lívrope. Oñembojaʼo ocho hendápe. Oñepyrũvo káda párte, peteĩ páhina omombeʼu mbykymi mbaʼérepa oñeñeʼẽta. Umíva oñemohenda oikohagueichaite pe istóriape. Upéva nepytyvõta reikuaa hag̃ua arakaʼépa oikorakaʼe koʼã mbaʼe rembojojávo umi ótro istória oñemombeʼúvare.

Koʼã istória oñemombeʼu hag̃ua ojeporu umi palávra ndahasýiva. Heta mitã ikatúta olee haʼeño jepe. Peẽ tuvakuéra pehecháta mbaʼéichapa pende raʼykuéra imitãvéva ovyʼa pelee jey jeývo chupekuéra koʼã istória. Pehecháta ko lívro oguerekoha heta mbaʼe porã, kakuaa ha mitãme g̃uarã.

Opávo káda istória oñemombeʼu moõpa la Biblia oñeʼẽ umi mbaʼégui. Iporãvaʼerã relee la Bíbliape koʼã istória oñemombeʼúva.