Ñandejára amigokuéra ojapo iporãva

Jaguereko vove peteĩ amigo jahayhúva ha ñamombaʼéva, ñañehaʼã jaiko haʼéicha. “Ñandejára niko imbaʼe porã ha imarangatu”, heʼi la Biblia (Salmo 25:8). Jaiko hag̃ua Ñandejára amigo ramo, tekotevẽ ñane marangatu ha jaguata karẽʼỹme. La Biblia heʼi: “Taʼýra ojehayhúvaicha, peñehaʼãke pejapo Ñandejáraicha, ha peguata joayhupápe” (Efesios 5:1, 2, NM). Koʼã mbaʼe ikatu jajapo ñahaʼã hag̃ua Jehovápe:

Ñaipytyvõ tapichápe. “Jajapóke pe iporãva opavavére.” (Gálatas 6:10, NM.)

Ñambaʼapo kyreʼỹme. “Pe imonda vaekue, anive omonda ha toñemoĩ tombaʼapo. Toheka hembiaporã hekópe ombaʼapo hag̃uáme.” (Efesios 4:28.)

Ñanepotĩ ñande rete ha ñande rekópe. “Tekotevẽ ñane potĩ opa mbaʼe ikatúva ñane mongyʼágui, ñande retépe ha ñande espíritupe, ha Tupã [...] [kyhyjépe, NM] ñañehaʼã jahupyty teko marangatu oĩmbaitéva.” (2 Corintios 7:1.)

Ñamombaʼe ha jahayhu ñane famíliape. “Opáichavo, ména kuéra tohayhu hembirekópe ojehayhuháicha ijupe voi, ha tembireko kuéra tomombaʼe iménape. Peẽ taʼýra ha tajýra kuéra, pemombaʼéke pende ru ha pende sýpe.” (Efesios 5:33-6:1.)

Jahayhu opavavépe. “Yayoayhu vaerã, pe mborayhu niko ou Tupã Ñandeyáragui.” (1 Juan 4:7, VP.)

Ñaneñeʼẽrendu ley heʼívape. “Maymáva oñemoĩ vaerã mburuvicha poguýpe.[...] Pemeʼẽ peteĩteĩme imbaʼerãva.[...] Umi pehepymeʼẽ vaerãha impuesto, pehepymeʼẽ.” (Romanos 13:1, 7.)