15 NOEMÍ HA RUT
Haʼekuéra ndojuejái ohasa asýrõ guare
SAʼIPAITÉRÕ guare la ojeʼu vaʼerã Israélpe, Noemí ména odesidi ovataha ifamiliakuérandi Beléngui Moábpe. Upéi ko kuimbaʼe ou omano, upépe hembireko ha umi mokõi itaʼýra opytáma haʼeño peteĩ lugár ni ndoikuaáivape. Tiémpo rire, Noemí membykuéra omenda umi moabítare, koʼã kuña ndoservíriramo jepe Jehovápe. Ohasa rire diez áñorupi, oikomi peteĩ mbaʼe ivaietereíva: ¡Koʼág̃a umi mokõi Noemí membyháma la omanóva! Hiʼarive ni naifamiliajepéi hikuái. Péicha anga Noemí opytáma iména ha imembykuéra reheʼỹ, ha ni esperánsama ndorekovéi onasetaha chupe inietorã mbaʼe. Umi desgrásia ojoapykueripaite ohupyty Noemípe ha nombopytuʼúi anga pe ikorasõmi.
Koʼág̃a Noemí opytámarõ haʼeño opensa opyta reitamaha Moábpe. Upévare odesidi oho jeytanteha ivállepe Belénpe. Upearã oviaha vaʼerã kuri una semánarupi. Ñepyrũrã oviaha hendive inuerakuéra Rut ha Orpá, péro Noemí ndoguerahaséi kuri chupekuéra mombyry ivállegui ha iparientekuéragui. Ikatu voi oime opensa raʼe inuerakuéra ohóramo hendive Israélpe ndaikatumoʼãveimaha omenda jey ha imemby. Ombyasyetereíta voi la ikáusare mbaʼe oikórõ hesekuéra upéicha. Haʼe ipyʼaguasu ha oñanima osegi la iviáhe haʼeñóntema. Upévare Noemí ojapo rangue la chupe okonvenívante, heʼi jey jey Rut ha Orpápe oho jeýnte hag̃ua isykuéra rógape. Upéi Orpá hasẽ ha odesidi oho. Rut hasẽ avei péro haʼe opyta Noemíndi.
Rut heʼi Noemípe: “Anivéna rerroga chéve roheja hag̃ua, [ ... ] pórke nde rehohápe che aháta, ha nde repytahápe reke che avei akéta upépe. Nde puévlo haʼéta che puévlo, ha nde Jára haʼéta che Jára avei. Nde remanohápe che amanóta, ha upépe añeñotỹta”. ¡Ajépa ipyʼaguasuete Rut! Ojekuaa ndohejaseieteha voi Noemípe ha odesidimaha oservitaha Jehovápe hendive.
Mokõi kuña oaguanta vaʼerã imbaʼembyasy ha oheka konsuélo Jehová puévlope
Ikatu hag̃uáicha oho Israélpe, Rut oheja vaʼerã ihentekuérape, ikostumbrekuéra ha umi idioskuéra oreko vaʼekue Moábpe. Rut ha Noemí og̃uahẽrõ guare Belénpe, unos kuánto kuña oñesorprende joa ohechárõ guare Noemípe, ni ndogueroviaséi hikuái mbaʼeichaitémapa okambia umi áño ohasa vaʼekuépe. Noemí heʼi koʼã kuñáme opyta hague oñamarga pórke Jehová oipeʼapaite chugui la oreko vaʼekue ha oheja chupe po nandi. ¿Oñembyasýpa raʼe Rut ohendúvo la Noemí heʼi vaʼekue? Ikatu kuri oñeñandu vai pórke haʼe ohejapaite la oreko vaʼekue opyta hag̃ua isuégrandi, péro la Bíbliape ndajatopái haʼe oñembyasy hague mbaʼe. Upéva rangue, haʼe oñepyrũ ombaʼapo ombyatývo seváda ikatu hag̃uáicha haʼe ha Noemí oreko la hoʼumi vaʼerã.
Upe tiémpope oiko vaʼekue avei peteĩ karai ipláta hetáva ha orekóva heta yvy. Ko karai haʼe vaʼekue Rahab memby ha héra Boaz. Haʼe ohecha Rut ombaʼapo kyreʼỹha pe kokuépe. Ha oñepyrũrõ guare oporandu hese, oikuaa mbaʼeichaitépa haʼe ojesakrifika oipytyvõ hag̃ua Noemípe. Upévare ofelisita chupe ojerovia haguére Jehová okuidataha hese ha isuégrare. Ha upéi omanda avei ipersonalkuérape ani hag̃ua ojapo mbaʼeve Rut rehe.
Upe pyharépe, Rut omombeʼu Noemípe Boaz imbaʼeporãiterei hague hendive. Upévare Noemí ovyʼaiterei, oime vaʼerã opensa voi: “¿Ndaikatúi vaʼerã piko Boaz omenda Rut rehe?”. Boaz ningo iparientekuéra ha haʼe ikatúta kuri omenda Rut rehe, pórke Ñandejára léi heʼi umi viúda imitãva ikatuha omenda jey imenakue pariéntere. Upéva ojejapo vaʼekue ikatu hag̃uáicha upe viúda imemby imenakue rérape, péicha pe mitã okakuaáta haʼeramoguáicha imenakue família tee. Ko mitã rupive pe viúda menakue réra ndopytamoʼãi tesaráipe ha pe erénsia ndohasamoʼãi avei ótra famíliape (Deut. 25:5, 6). Upévare, ohasa rire peteĩ tiémpo, Noemí oñepyrũ oexplika Rútpe mbaʼépa ojapo vaʼerã.
Koʼãicha mbaʼe ningo ndojejapóiva Moábpe, upévare oiméne omongyhyje lénto raʼe Rútpe la Noemí heʼíva chupe ojapo hag̃ua. Upéicharõ jepe haʼe oasepta. Upe pyharépe haʼe oho pe lugár oñemopotĩháme semílla. Ojejapo jave koʼãichagua traváho umi kuimbaʼe upépentema oke jepi pe seváda atýra ykére. Rut oñemboja ñemihaitépe Boaz oñenohápe, omboguyʼimi pe ifrasáda, oheja chugui ipy okápe ha oñeno ipy gotyo. Boaz opáyrõ guare ha otopa hese, Rut umíldemente omomanduʼa chupe mbaʼépa heʼi Jehová léi ha mbaʼépa haʼe ikatu ojapo hesehápe. Boaz oiméne ohechakuaa raʼe Rut ochuchupaite hague heʼírõ guare chupe upéva. Osorprendéne raʼe avei chupe mbaʼeichaitépa Rut ipyʼaguasu ha ohayhueterei Jehovápe ha Noemípe. Upémarõ Boaz heʼi Rútpe ojapotaha la ojeruréva chupe, péro primero ojasegurase raẽ haʼépa ikatúta ojapo upéva.
Upe koʼẽme, Boaz oho umi ansianokuéra Belenpegua rendápe ha ojapopaite la omandáva Ñandejára léi ko kásope. Upéicha omenda Rut rehe. Kon el tiémpo, Rut ou imemby ha ombohéra chupe Obed. Péicha Noemí orekóma la inietorã ha ohayhueterei voi chupe. Rréi David haʼe vaʼekue Obed familiare ha upéichante avei pe Mesías, ou vaʼekue hetaiterei áño upe rire (Mat. 1:5, 6, 16). ¡Jehová joʼa joʼa ovendesi vaʼekue Noemí ha Rútpe ipyʼaguasu haguére!
¿Moõpa oñeñeʼẽ hesekuéra la Bíbliape?
¿Mbaʼépa ere chupe?
¿Mbaʼérepa jaʼekuaa Noemí ha Rut ipyʼaguasu hague?
Einvestigamína
1. Pe léi heʼi vaʼekue umi imboriahúva ikatuha oho omonoʼõ umi mbaʼe hembýva pe koséchagui. ¿Mbaʼérepa upe léi ndaijojahái vaʼekue upe sónape? (ia 45 párr. 23, nóta). A
Taʼanga A
Taʼanga A
2. ¿Mbaʼérepa jaʼekuaa Rut ndojapói hague mbaʼeve ivaíva ohórõ guare oñeno Boaz py gotyo? (ia 53, 54 párr. 17-18).
3. Boaz heʼi vaʼekue Rútpe: “Che rajy”. ¿Mbaʼépa ñanemboʼe upéva chugui? (Rut 2:8; w16.11 3).
4. ¿Mbaʼérepa fuláno nomendaséi vaʼekue Rut rehe orekóramo jepe pe derécho? ¿Mbaʼérepa jaʼekuaa Boaz nopensái hague ijehénte odesidírõ guare omenda Rut rehe? (w23.03 14). B
Taʼanga B
Ejepyʼamongetamína ndejehe
Rut ningo iguápa ha ijagradesída vaʼekue. ¿Mbaʼéichapa iñehémplo ikatu ñanepytyvõ ñandesogue jave? C
Taʼanga C
Noemí oĩ vaietérõ guare Rut oipytyvõ chupe oaguanta hag̃ua imbaʼembyasy. ¿Mbaʼéichapa Noemí ehémplo ikatu ñanepytyvõ jaasepta hag̃ua pe ajúda omeʼẽva ñandéve ermanokuéra? ¿Mbaʼéichapa ikatu jasegi Rut ehémplo ñaporomokyreʼỹta jave?
¿Mbaʼéichapa ikatu ndepyʼaguasu Noemí ha Rut ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Noemí ha Rútpe Jehová omoingove jey vove chupekuéra?
Reikuaave hag̃ua
¿Mbaʼéichapa pe lívro de Rut ñanemboʼe japorohayhukuaa hag̃ua ha mbaʼéichapa ikatu jajapo la ñaaprendéva chugui?
Eipurumína ko istória bíblica ilustráda eipytyvõ hag̃ua ne famíliape oñeimahinamba hag̃ua la oiko vaʼekue ko rrelátope.