17 JAEL
“Pe oñevendesivéva kuñanguéra apytépe”
SÍSARA oime vaʼerã ni ndogueroviaséi raʼe la oikóva. Haʼe ningo ogueraha pe gerrahápe hetaiterei soldádo ha 900 kárro de gérra oporomongyhyjéva. Umi israelitakuéra katu yvýrupinte oho chupekuéra, haimete voi ni árma ndoguerahái hikuái. Upéicharõ jepe, Sísara ndaipuʼakái hesekuéra. Upévare haʼe okrusa Jezreel Ñu osẽ hag̃ua pe ñorairõgui ha ohejapántema isoldadokuérape tomano haʼeño rei upépe. Koʼág̃a ohecha vaʼerã moõpa ikatu okañy ani hag̃ua ojejuka chupe, upémarõ osẽ oho oikoha gotyo Héber pe quenita.
Umi israelita ha umi quenita ojogueraha porã vaʼekue, upéichama vaʼekue voi Moisés tiémpo guive. Moisés rembireko haʼe vaʼekue voi peteĩ quenita. Sísara oikoha tiémpope, umi quenitakuéra oiko vaʼekue Israel territóriope. Péro Héber ndahaʼéi vaʼekue umi ótro quenítaicha odesidíva oipytyvõ umi israelitakuérape, upéva rangue haʼe oapoja pe rréi cananeo Jabínpe. Upévare Sísara opensa ikatuha okañy hógape, pórke haʼe oservi avei Jabínpe. Péro Sísara ndoikuaaiete kuri mávapepa oapojáta Héber rembireko.
Upe moméntope Héber ndaipóri kuri hógape, hembirekónte la oĩva, hérava Jael. Haʼe ohechárõ guare Sísara oñemoag̃uiha oúvo, pyaʼe odesidi vaʼerã mbaʼépa ojapóta. Katuete haʼe oikuaáma kuri mbaʼe apohápa Sísara ha mbaʼeichaitépa iñaña. Jehová heʼíma voi kuri Débora rupive, Sísarape ojukataha peteĩ kuña ha ndahaʼéi peteĩ kuimbaʼe. Péro upéva oime vaʼerã Jael ndoikuaái raʼe. Upéicharõ jepe, Jael posívlemente oikuaámane raʼe mbaʼépa Jehová oipotáta haʼe ojapo upe kásope. ¿Mbaʼérepa jaʼe upéva?
Jael oikuaa vaʼekue Sísara haʼeha Jehová enemígo ha heséntema odependeha oñekumpli hag̃ua la Jehová oipotáva. Oikopárõ guare pe ñorairõ, Débora ojapo vaʼekue peteĩ purahéi heʼíva péicha: “Jael hína pe oñevendesivéva kuñanguéra apytépe, haʼe hína pe quenita Héber rembireko. Chupe oñevendesive entéro kuñanguéra oikóvagui óga kárpa guýpe”. Upéicharõ, Jael ndahaʼéi vaʼekue peteĩ kuña iñañáva ha itraisionérava, oĩháicha heʼíva hese. Upéva rangue, Jael haʼe vaʼekue peteĩ kuña ipyʼaguasúva ha ndokyhyjéiva ojapo hag̃ua Jehová volunta. Ojapo haguéicha Rahab, Jael odesidi oapojataha Jehovápe ha oñemoĩtaha Ijára enemigokuéra kóntrape. ¿Mbaʼéichapa ohechaukáta upéva?
Sísara haʼe vaʼekue peteĩ gerréro vale ha imbareténe raʼe. Upévare Jael oikuaa vaʼekue oñemoĩ reitaha hese. Sísara og̃uahẽrõ guare, haʼe oinvita chupe ohasa hag̃ua hógape ikatu hag̃uáicha opytuʼu ha oñembopiroʼy. Ko kuimbaʼe oike, oñeno ha ojetapa peteĩ frasáda omeʼẽ vaʼekuépe chupe Jael. Ha Sísara ijuhéirõ guare, Jael ombohasa chupe kamby. Upéi Sísara omanda chupe opyta hag̃ua pe óga entrádape ha teʼi oimeraẽ oporandúvape hese avave ndaiporiha hógape. Upéi Sísara opyta okemanoite.
Jehová ojevale peteĩ kuña oĩvare haʼeñomi ojuka hag̃ua peteĩ gerréro iñañaitereívape
Jael ohechávo Sísara opyta hague oke, oikuaáma og̃uahẽ hague pe moménto okuʼe hag̃ua. Upémarõ haʼe ojagarra peteĩ martíllo ha peteĩ estáka. Koʼã erramiénta oiméne de madéra raʼe ha posívlemente Jael ojepokuaa voi oipuru. Oreko rire ipópe koʼã mbaʼe, oike mbeguekatu asy Sísara oĩháme. Upéi oñesũ ijykére, omoĩ pe estáka iñakã ariete ha oprepara imartíllo. ¿Mbaʼépa oikóta ojavýramo térã ipoíramo la iñerramiéntagui? Oikóramo upéva amóntema Jael, Sísara ojukaitéta chupe. Péro Jael ndojavýi, haʼe omovandea pe estáka isiénere ha ojukaite chupe. Peteĩ sapyʼaitépe oikopáma.
Upéi Barac og̃uahẽ upe sónape Sísara rekávo. Jael osẽ oho hendápe ha heʼi chupe: “Eju koʼápe ha ahechaukáta ndéve moõpa oĩ pe kuimbaʼe rehekáva hína”. Barac oikévo Jael rógape, ohechakuaa oñekumpli hague la Débora heʼi vaʼekue: “Jehová ontregáta Sísarape peteĩ kuñáme”.
Peteĩ purahéi rupive, Barac ha Débora ohechauka vaʼekue omombaʼetereiha la Jael ojapóva. Oikopa rire koʼã mbaʼe, noñeñeʼẽvéima la Bíbliape Jael rehe. Upéicharõ jepe, iñehémplo ñanepytyvõ gueteri koʼag̃aite peve, ohasámarõ jepe mas de 3.200 áño. Jehová siervokuéra koʼag̃agua ndohovéima gerrahápe ni ndoipuruvéima árma. Upéicharõ jepe koʼag̃aite peve osegi ogerrea Satanás ha idemoniokuéra kóntrape ko múndo añáme. Upéicha rupi, koʼytevéntema tekotevẽ ñandepyʼaguasu Jael ipyʼaguasu haguéicha.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Jael ipyʼaguasu hague?
Einvestigamína
1. ¿Mbaʼérepa ñanemanduʼa Armagedón rehe jaleévo umi israelitakuéra oñorairõ hague Sísara kóntrape ha mbaʼépa ñaaprende? (w19.09 8, 9 párr. 3-6).
2. Jael ména hérava Héber, odesidi vaʼekue oipytyvõ Israel enemigokuérape. Péro, ¿mávapa rakaʼe Héber pariénte? (it “Héber” Núm. 2-wcgr).
3. ¿Mbaʼe situasiónpepa ojecha vaʼekue umi israelitakuéra heta áño upe rire? ¿Ha mbaʼéicha oipytyvõ chupekuéra imanduʼávo pe ehérsito israelita ipuʼaka hague Sísara ha Jabín rehe? (w08 15/10 14, 15 párr. 12-15).
4. Débora omombaʼe Jaélpe la ojapo vaʼekuére. ¿Mbaʼérepa jahecharamoite upéva? (w15 1/8 15 párr. 2). A
Taʼanga A
Taʼanga A
Ejepyʼamongetamína ndejehe
Peteĩ ermána orekóramo iména ndahaʼéiva Testígo, ¿mbaʼérepa tekotevẽ ipyʼaguasu Jael ipyʼaguasu haguéicha?
Jael ndahaʼéi vaʼekue profetísa Déboraicha ni ndahaʼéi vaʼekue soldádo Barac haʼe haguéicha, upéicharõ jepe haʼe ojapo la ikatumíva. ¿Mbaʼéichapa iñehémplo ñanepytyvõkuaa oimérõ ijetuʼu ñandéve jajapo hag̃ua entéro mbaʼe jajaposéva? B
Taʼanga B
¿Mbaʼéicha javépa ikatu avei rehechauka ndepyʼaguasuha Jael ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Jaélpe Jehová omoingove jey vove chupe?
Reikuaave hag̃ua
Ehechamína ko vidéope mbaʼéichapa Jael ehémplo omokyreʼỹ peteĩ mitãkuñáme opredika hag̃ua.
La Bíbliape oñeñeʼẽ Jael rehe ha hetave kuña rehe. Eleemína la ohasa vaʼekue hikuái reaprende hag̃ua heta mbaʼe.
¿Mbaʼépa ñaaprendekuaa umi kuña oñeñeʼẽvagui la Bíbliape? (ijwbq artíkulo 161-wcgr).