“Peteĩ ñorairõ guasu oipeʼaitétava opaichagua ñorairõ”
“Apromete peẽme kóva ko gérrantema oikotaha.” WOODROW WILSON, PRESIDÉNTE ESTADOS UNIDOSPEGUA (1913-1921).
KOʼÃ mbaʼe ohaʼarõitereivaʼekue peteĩ presidénte opapotárõ guare pe primera guerra mundial, ojapóma noventa áño rupi. Upe gérra ningo ivaieterei vaʼekue, ha umi oganavaʼekue opensa oguerúne hag̃ua chupekuéra heta mbaʼe porã. Péro umi yvypóra gérra ningo nosolusionái jepi umi provlemaita. Ha koʼýte ndaikatumoʼãi oipeʼaite pe ñorairõ ymaite guivéma ojejapóva.
Veinte áño ko presidénte Wilson opromete rire pe mbaʼe porãite, oñepyrũma pe segunda guerra mundial. Kóva katu ivaivéntema ha hetaitereivéma oñemano upérõ. Añetehápe umi veinte áño ohasavaʼekuépe pe primera guerra mundial rire, heta mbaʼe pyahúma ojejapo ha upéicha rupi yvyporakuéra ikatupyryvéma avei umi jejuka guasurã. Upévare, pe segunda guerra mundial rire umi mburuvichakuéra oñoamenasáramo, ikatuhína oiko peteĩ ñorairõ.
Áño 1945-pe peteĩ mburuvicha Estados Unidosgua hérava Douglas MacArthur heʼi: “Ndajarekovéima ótra oportunida. Ndajajapóiramo peteĩ mbaʼe iporãvétava enterovépe g̃uarã, Armagedón mante ñane pohã”.
Ko mburuvicha oikuaa mbaʼépa oikovaʼekue ojepoírõ guare umi mokõi bomba atómica Hiroshima ha Nagasaki ári opapotaitépe pe segunda guerra mundial. Koʼã mokõi siuda ningo oñehundi vaieterei vaʼekue. Ha upévare ko mburuvicha heʼi mbaʼépa heʼise koʼág̃a Armagedón: peteĩ guerra nuclear ikatúva ohundiete opa mbaʼe oĩva ko Yvy ape ári.
Ojekyhyje gueteri oñembokapúrõ g̃uarã peteĩ bomba nuclear. Áño 1960 guive 1970 peve umi tetã imbaretevéva, oñomoirũ oporohundiete hag̃ua. Ha upearã ombyatyse hikuái heta vómba ikatu hag̃uáicha ojuka hetavépe. Ojukase hikuái 25% umi oikóva peteĩ tetãme ha ohundise 50% umi fávrika, ndahaʼéiramo jepe haʼekuéra omoñepyrũva pe ñorairõ. Péro añetehápe ko mbaʼe ojejapóva ojeiko hag̃ua pyʼaguapýpe, avavépe nombopyʼaguapýi.
Koʼág̃a rupi umi arma nuclear oĩ opárupi, ha ñorairõhápe ojejuka gueteri hetaiterei tapichápe. Upévare ikatu gueteri hína oiko peteĩ ñorairõ guasu oporohundietétava. Oĩningo heta oipotáva ojepeʼaite umi ñorairõ. Péro saʼi oĩ ogueroviáva ojepeʼaitetaha upéva peteĩ ñorairõ rupive, térã ambue mbaʼe rupive.
La Biblia katu heʼi oĩha peteĩ ñorairõ ndaijojaháiva oipeʼaitétava opaichagua ñorairõ. Péva hína “Armagedón”. Ko téra Armagedón ningo heta oĩ oiporúva oñeʼẽ hag̃ua peteĩ sarambi guasúre, ojapótava umi bomba nuclear. Mbaʼéicha piko Armagedón oipeʼaitéta opaichagua ñorairõ? Pe artíkulo oúvape jaikuaáta upéva.
[Roagradese oĩva páhina 3-pe]
Foto de DTRA
[Roagradese oĩva páhina 4-pe]
Nagasaki (Japón, 1945): foto de USAF