Oñeporandúva jepi
Jaiko porãvétapa oñembojeheʼapáramo umi rrelihión? Mbaʼépa heʼi testigos de Jehová?
▪ Peteĩ lívro heʼi “ko múndope oĩha diez mil rrelihión rupi” (World Christian Encyclopedia). Koʼãva apytépe oĩ tuicha ojoavýva heta mbaʼépe ha oĩ oimoʼãva oñembyatypáramo hikuái ikatutaha ohupyty pyʼaguapy ha enterove oikotaha peteĩ ñeʼẽme ko múndo añáme.
Mbaʼépa heʼi Ñandejára Ñeʼẽ? La Biblia ñanemokyreʼỹ jaiko hag̃ua peteĩ ñeʼẽme. Pór ehémplo, apóstol Pablo heʼi pe kongregasión ojoguaha ñande retépe, ‘opa mbaʼe oĩ porãmba ha ojoajupa ojuehe’ (Efesios 4:16). Upéicha avei apóstol Pedro heʼi ermanokuérape: ‘Peiko oñondive peikovaiʼỹre ha peñembopyʼa peteĩ’ (1 Pedro 3:8).
Umi kristiáno ypykue tiémpope oĩvaʼekue opaichagua rrelihión ha kostúmbre. Ha oĩ oimoʼãva iporãtaha umi kristiáno añetegua ojeheʼa ambue rrelihionkuérare. Péro Pablo oporandu chupekuéra: Ikatúta piko oiko peteĩ ñeʼẽme ‘pe ojeroviáva Cristo rehe ha pe ojeroviaʼỹva?’. Upéi heʼi: “Pesẽ ijapytégui ha pejei chuguikuéra” (2 Corintios 6:15, 17). Péicha jahecha Pablo ndoipotái hague kristianokuéra ojeheʼa ambue rrelihiónre. Mbaʼérepa?
Apóstol Pablo omyesakã porã upe rire heʼívo peteĩ kristiáno ojeheʼáramo peteĩ ojeroviaʼỹvare, haʼeteha ñamoĩva júgo guýpe vuéi ha vúrro, katuete otira joavýta (2 Corintios 6:14). Upéicha avei noĩporãmoʼãi peteĩ kristiáno ojeheʼáramo ambue rrelihiónre. Apóstol Pablo ningo peteĩ túvaicha ojepyʼapyvaʼekue hesekuéra. Pór ehémplo peteĩ túva katuete oñemoñeʼẽta itaʼýrape ani hag̃ua ojeheʼa ivesinoʼikuéra iñakãhatã ha itieʼỹvare. Oĩramo jepe ipochýva upévare, itúva ohechakuaa iporãvetaha ndojeheʼáiramo hesekuéra. Upéicha avei Pablo oikuaa iporãveha kristianokuéra ndojeheʼái ambue rrelihiónre ha tekotevẽha omboyke umi mbaʼe vai haʼekuéra ojapóva.
Añetehápe apóstol Pablo opensa Jesucristo opensaháicha. Jesús ningo omokyreʼỹvaʼekue umi héntepe oiko porã hag̃ua oñondive, péro arakaʼeve ndeʼíri oñembojeheʼavaʼerãha rrelihionkuéra ojehupyty hag̃ua upéva. Haʼe oikórõ guare ko yvy ape ári oĩvaʼekue heta rrelihión, pór ehémplo umi fariséo ha saduséo. Haʼekuéra ojoavýramo jepe heta mbaʼépe, oñemoĩvaʼekue peteĩ ñeʼẽme ohecha hag̃ua mbaʼéichapa ikatu ojuka Jesúspe. Péro Jesús ndoipotaivaʼekue hemimboʼekuéra ojeheʼa ambue rrelihiónre. Upévare heʼi porã chupekuéra ‘oñeñangareko hag̃ua umi mbaʼe fariséo ha saduseokuéra omboʼévagui’ (Mateo 16:12).
Mbaʼépa jaʼekuaa ko ñane tiémpope? Ñandépa jasegivaʼerã avei koʼã konsého jahechavaʼekue? Si jasegivaʼerã. Hetaiterei rrelihión ningo oĩ ko múndope ha tuicha ojoavy umi mbaʼe omboʼéva hikuái. Upévare ndaikatúi oñembojeheʼa umi rrelihión, haʼete voi y ha aséite. Ñapensamíntena, umi hénte opa rrelihionpegua oñemboʼe jave oñondivepa oĩ hag̃ua pyʼaguapy ko múndope, mávapepa oñemboʼe hikuái? Pe trinidápe, umi induísta járape térã Búdape?
Proféta Miqueas heʼivaʼekue “umi ára pahápe”, heta hénte opa tetãygua heʼitaha: ‘Jaha jajupi Ñandejára montáñape, umi Israelgua Jára rógape. Haʼe ohechaukáta ñandéve hape, ha hape rupi jaguatáta’ (Miqueas 4:1-4). Péicha opaichagua tapicha oĩva ko yvy ape ári oikóta pyʼaguapýpe ha peteĩ ñeʼẽme. Ha upéva ojehupytýta ojejerovia rupi Ñandejára añetegua ha peteĩetévare, ndahaʼéi oñembojeheʼapágui umi rrelihión.
[Nóta oĩva taʼanga ndive páhina 27]
Aty ojapovaʼekue umi rrelihión omoakãva áño 2008-pe
[Roagradese]
REUTERS/Andreas Manolis