Oñeporandúva jepi
Omombaʼépa Ñandejára peteĩ rrásape añónte?
▪ Nahániri, la Biblia heʼi: ‘Ñandejára ningo nomboykéi avavépe, oguerohory guei umi hénte hekojoja ha okyhyjévape chugui’ (Hechos 10:34, 35, NM).
Jaikuaa porã ningo ñande Apohare opensa lája ijyvateveha yvyporakuéra opensávagui. Heta hénte heʼi irrása iporãveha umi ótrogui. Charles Darwin avei opensavaʼekue upéicha, upévare ohai: “Koʼẽrõitéma ningo [...] umi rrása iporãvéva ohundipáta umi indíhenape, opyta hag̃ua haʼekuérantema”. Ñambyasýramo jepe, heta oĩ oapoʼíva hapichápe ipire kolór idiferénte haguére.
Péro, oĩ porãpa upéva? Ohechaukámapa umi sientífiko peteĩ rrása iporãveha ambuégui? Nahániri, upéva rangue Bryan Sykes, peteĩ genetista omboʼéva Universidad de Óxfordpe, heʼi: “Ndaipóri mbaʼeve ñane ADN-pe ohechaukáva peteĩ rrása iporãveha ambuégui. [...] Pyʼỹi oñeporandu chéve oĩpa peteĩ ADN griégo térã italiáno, ha che ahechauka chupekuéra ndaiporiha. Opavave ningo peteĩchapánte”.
La Biblia omboʼe avei upeichaha, heʼívo Ñandejára ojapo hague peteĩ kuimbaʼe ha peteĩ kuñáme añónte, ha opavave jajuha chuguikuéra (Génesis 3:20; Hechos 17:26). Upéicharõ jaʼekuaa Ñandejára renondépe opavave yvypóra peteĩchanteha.
Jehová ningo nomañái ñande pire kolór ni ñane píntare, síno peteĩ mbaʼe iñimportantevévare: ñande pyʼapýre. Haʼe voi heʼi: ‘Peẽ pemaʼẽ umi yvypóra rováre, che katu amaʼẽ ipyʼapy rehe’ (1 Samuel 16:7). Jaikuaávo upéva tuicha ñandepyʼaguapy, jahechamína koʼág̃a mbaʼérepa.
Tahaʼe haʼéva ñande pire kolór, ikatu nañandegustapaihína ñande rova térã ñane mólde. Ha añetehápe ndaikatúi jajapo mbaʼeve guasu ñakambia hag̃ua umíva. Péro ikatu ñakambia ñapensa lája ha umi mbaʼe oĩva ñande pyʼapýpe, upéva iñimportanteve jey hína (Colosenses 3:9-11). Ha ñande, ñapensápa ñande rrása iporãveha ambuégui térãpa ñande voi jajeapoʼi? Jaikuaa hag̃ua upéva iporãta jajepyʼamongeta. Ñandejára ningo ndoguerohorymoʼãi ñapensáramo upéicha, upévare ñañehaʼãvaʼerã jaipeʼaite umi mbaʼe ñande pyʼapýgui (Salmo 139:23, 24).
Ñañehaʼãramo ñapensa Jehová opensaháicha, haʼe katuete ñanepytyvõta. La Biblia heʼi voi: ‘Ñandejára omaña opa mbaʼe ko yvy ape ári oikóvare, oipytyvõ hag̃ua umi ojeroviávape hese ipyʼaite guive’ (2 Crónicas 16:9). Ajépa javyʼaite jaikuaávo ko mbaʼe oñekumpliha, tahaʼe haʼéva ñande pire kolór térã ñande rrása!