¿Mbaʼéichapa ojetrata kuñanguérape?

PE MITÃKUÑA heʼíva ohechauka mbaʼéichapa ojetrata kuñanguérape ha umi mitãkuñaʼíme ko yvy tuichakuére. Chupekuéra ningo oñemaltrata ha ojeapoʼi. Jahechamína mbaʼéichapa:

• Oñemboyke chupekuéra kuña haguére. Ásiape ojeguerohoryve onaséramo peteĩ mitãkuimbaʼe. Peteĩ infórme Naciones Unidas oguenohẽvaʼekue 2011-pe ohechauka oĩha saʼive kuña Ásiape, haimete 134 millones oĩgui oitykáva imemby, ohejarei térã ojukáva.

• Saʼi oñembostudia chupekuéra. Ko yvy tuichakuére, 70 pór siénto rupi oĩ kuña ha mitãkuñaʼi ohóva eskuélape tercero térã cuarto grádo pevénte.

• Ojeviola. Oĩ 2.600 millones rasa kuña oikóva umi tetã ndojekastigaihápe umi kuimbaʼe ojopývape hembirekópe oguereko hag̃ua rrelasión sexual.

• Ndojeguerahái doktórpe. Umi tetã imboriahuvévape káda dos minúto omano peteĩ kuña imembykuévo térã hyeguasúpe ndojeguerahái rupi chupekuéra ospitálpe.

• Noñemeʼẽi chupekuéra ijyvyrã. Ko yvy tuichakuére umi prodúkto osẽva apytépe hetaiteve oĩ umi kuña oñotỹvaʼekue. Upéicharamo jepe, heta hendápe ndojehejái chupekuéra oreko ijyvyrã ni noñemeʼẽi chupekuéra erénsiaramo.

Enterove ningo oreko derécho ojetrata porãvo, ¿mbaʼérepa upéicharõ kuñanguérape ojetrata diferentete? Heta hendárupi oĩ rrelihión heʼíva kuña tembiguainteha voi ha tekotevẽrõ ikatuha ojekorrehi ha oñemaltrata. Peteĩ diário oñeguenohẽva Fránciape omombeʼu mbaʼépa heʼi peteĩ avogáda hindú hérava Chandra Rami Chopra: “Enterovete rrelihión oĩva ko yvy ape ári oapoʼi kuñanguérape”.

¿Ndépa repensa avei upéicha? ¿Regueroviápa la Biblia haʼeha ótro lívro oapoʼíva kuñanguérape? Oĩ heʼíva upeichaha nontendeporãigui umi téysto oñeʼẽva upe témare. ¿Mbaʼépa Ñandejára heʼi la Bíbliape kuñanguérare? Ijetuʼúramo jepe ñañeʼẽ ko mbaʼére, iporãta ñahesaʼỹijo hekopete.