¿Rejeroviátapa Ñandejárare?

ÑAMOĨ chupe peteĩ ne amígo remombaʼevéva ojapoha peteĩ mbaʼe, ndereikuaaporãiva mbaʼérepa ojapo. Oĩma voi opensa vaíva upe ojapóvare ha heʼi hese iñañaha. ¿Mbaʼépa rejapóta umícha jave? ¿Regueroviátapa chupekuéra térãpa rehendu raẽta mbaʼépa heʼi ne amígo? Ha noĩriramo upépe oñedefende hag̃ua, ¿rehusgátapa chupe térãpa rehaʼarõ raẽta reikuaa hag̃ua mbaʼépa heʼi haʼe?

Ñepyrũrã reñeporandu vaʼerã: “¿Aikuaa porã piko che amígope? ¿Mbaʼérepa amombaʼete chupe?”. Rembohovái raẽramo koʼã porandu, nderehusgavaimoʼãi ne amígope. Upéicha avei, ñapensáma rangue Ñandejára Jehová iñaña ha ipyʼahatãha, iporãvéta ñañeporandu raẽramo koʼã mbaʼe.

Ikatu ijetuʼu ndéve rentende hag̃ua mbaʼérepa Ñandejára ojapo térã oheja oiko peteĩ mbaʼe. Katuete oĩta voi heʼíva ndéve Ñandejára iñaña ha ipyʼahatãha, ha ndejopýva repensa hag̃ua haʼekuéraicha. ¿Mbaʼépa rejapóta upéicha jave? ¿Resegítapa rejerovia Ñandejárare nerentendéiramo jepe mbaʼérepa ojapo peteĩ mbaʼe? Upéva odependéta reikuaa porãramo chupe. Ikatu reñeporandu: “¿Mbaʼeichagua amígopa chéve g̃uarã Ñandejára?”.

Oiméramo hetáma rehasa asy, ikatu repensa Ñandejára ndahaʼeiha voi ne amígo. Péro, ¿ikáusare piko rehasa asy hína? ¿Ndahaʼéi piko Ñandejára upe omeʼẽva ndéve heta mbaʼe porã? Jahecháma haguéicha, Satanás hína “ko múndo ruvicha” (Juan 12:31, BNP). Upéicharõ ikáusare jahasa asy ko múndope. Ha sapyʼánte katu ñande voi jajavy térã oiko umi mbaʼe ñahaʼarõʼỹva, ha upe haguére ñaneprovléma.

Péro, ¿mbaʼépa jaʼekuaa Ñandejárare? La Biblia omombeʼu ñande Apohare Jehová ojapo hague yvága ha yvy; avei heʼi ñandeapo porãiterei hague ha ñande rekove oĩha ipópe (Salmo 124:8; 139:14; Daniel 5:23). ¿Mbaʼépa heʼise upéva?

Heʼise Jehová rupivénte jaikoveha (Hechos 17:28). Ñandejára omeʼẽ ñandéve heta mbaʼe porã, por ehémplo umi mbaʼe oĩva ñande jerére, ikatu japorohayhu, jareko heta amígo, ikatu jahecha, ñahendu, ñañandu ha hetave mbaʼe (Santiago 1:17). ¡Ajépa jahayhu ha jajeroviátamante voi peichagua Amígore!

Upéicharõ jepe, ikatu gueteri ijetuʼu ndéve rejerovia hag̃ua Ñandejárare. Ikatu ere ndereikuaaporãiha gueteri chupe; ha oñentende upéva. Koʼã artíkulope ningo ndojehechaukapái voi mbaʼérepa ikatu jaʼe Ñandejára naiñañái ni naipyʼahatãiha. Upévare iporãitereíta reñehaʼãramo reikuaave Jehovápe.a Upéicha katuete rehechakuaáta Haʼe naiñañaiha, síno haʼeha “mborayhu” (1 Juan 4:8).