JAIKUAAVE HAG̃UA
¿Mbaʼéichapa Jesús tiémpope oñemeʼẽ vaʼekue umi kontrivusión témplope g̃uarã?
Pe témplope oĩ vaʼekue peteĩ lugár hérava atrio de las mujeres, ha upépe oñemoĩmi umi kontrivusión pe témplope g̃uarã. Peteĩ lívro hérava El templo: su ministerio y servicios en tiempos de Jesucristo heʼi: “Pe atrio jerére oĩ vaʼekue peteĩ ogaguyʼi ha upépe pe paréd ypýpe oñemoĩ 13 káha [térã peteĩ mbaʼyru trompéta joguaha] ha upépe oñemoĩ vaʼekue umi kontrivusión”.
Umi káhape ojeʼe vaʼekue voi trompéta. ¿Mbaʼérepa? Pórke upe mbaʼyru yvy gotyo ipoguasuve ha pe ijuru gotyo ipoʼi ha ipukuve. Káda káhare heʼi moõpa ojeporúta pe kontrivusión oñemoĩva pype. Jesús oĩ kuri pe atrio de las mujérespe ohechárõ guare pe viúda mboriahumíme omoĩ ikontrivusión pe káhape (Lucas 21:1, 2).
Umi káha 1 ha 2-pe, oñemoĩ vaʼekue umi kontrivusión ojepaga hag̃ua umi impuésto upe añopegua ha pe ótro áñope guare rehe avei. Umi kontrivusión oñemoĩva káha 3-7-pe, ojeporu ojejogua hag̃ua umi tortóla, palóma, jepeʼa, insiénso ha umi váso de óro. Umi káha 8-12-pe, umi hénte omoĩ vaʼerã umi kontrivusión hembýva chupekuéra omeʼẽ rire iñofrénda ipekádore, ikúlpa rehe, ojogua rire umi guyra osakrifika vaʼerã, oñemonguera haguére chupekuéra lépragui ha oikuaveʼẽ rire sakrifísio inasareáto rehe. Pe káha 13-pe katu oñemoĩ pe kontrivusión voluntária.
¿Ikatúpa jajerovia umi lívro Lucas ohai vaʼekuére?
Lucas ohai kuri mokõi lívro oĩva la Bíbliape: Lucas ha Hechos. Haʼe heʼi ‘ohesaʼỹijo porãmbaite hague umi mbaʼe iñepyrũ guive’ ohai hag̃ua koʼã lívro. Upéicharõ jepe, heta oĩ ndogueroviapáiva umi istória haʼe omombeʼúva (Lucas 1:3). ¿Ikatúpa añete jajerovia hese?
Si, Lucas omombeʼu heta mbaʼe ikatúva oñekomprova siertoha, oñembojojáramo umi lívro de istória rehe. Ilívrope haʼe oiporu umi título ohechaukáva mbaʼe puéstopa oreko rakaʼe umi mburuvicha Romapegua. Por ehémplo haʼe heʼi: pretor (mburuvicha upe siudapegua) oĩva Filípope; politarca (intendénte) oĩva Tesalónicape; ha asiarca (kuimbaʼe omoakãva upe siuda) oĩva Éfesope (Hechos 16:20; 17:6; 19:31). Avei Herodes Antipas rehe heʼi tetrarca (governadór de distríto) ha Sergio Paulo rehe heʼi prokónsul de Chipre (Hechos 13:1, 7, nóta).
Lucas oiporu hendaitépe umi título oñeʼẽ jave umi mburuvicha Romapeguáre. Haʼekuéra ningo amáske tuichave ohóvo umi território ogovernáva, okambia avei ohóvo iherarkiakuéra. Peteĩ vivlísta hérava Bruce Metzger heʼi: “Lívro de Héchospe heta hendápe ojehecha oñekambiaha umi mburuvicha herarkía, okambia jave umi lugár ogovernaha ha avei pe áño”. Ha pe arkeólogo William Ramsay heʼi avei Lucas haʼeha “peteĩ istoriadór katupyry”.