¿Mbaʼépa ojapóta nderehehápe Ñandejára Rréino?

Oiméne rehechakuaáma umi ótro artíkulope ore testígo de Jehová romombaʼeha Ñandejára Rréino, ha iñimportanteterei oréve g̃uarã. Ha ikatu voi oime ndegusta umi promésa, péro haʼete ku ijetuʼu léntova reguerovia hag̃ua pórke ja iporãitereíma.

Ha añetehápe ningo iñimportánte rejasegura siértopa hína upe ojeʼéva, upéi reguerovia hag̃ua (Proverbios 14:15). Upéicha ojapo vaʼekue umi kristiáno Bereagua.a Haʼekuéra primera ves ohendúrõ guare umi marandu oñeʼẽva Ñandejára Rréinore, ndahaʼéi oaseptántemava upepete. Síno “ohesaʼỹijo porã Ñandejára Ñeʼẽ ohecha hag̃ua añetépa upe ojeʼéva” (Hechos 17:11). Haʼekuéra okompara umi mbaʼe ohendúva la Biblia heʼívare, ha upépe ae oguerovia ha oasepta umi mbaʼe ouha Ñandejáragui.

Ore testígo de Jehová roipotaite avei nde rejapo umi kristiáno Bereagua ojapo haguéicha, ha rekompara umi mbaʼe roʼéva la Biblia heʼívare. Upearã ore rojapo kúrso vívliko gratiete, omeʼẽtava ndéve oportunida rekompara hag̃ua umi mbaʼe roʼéva Ñandejára Rréinore, la Bíbliape heʼívare.

Restudiávo la Biblia orendive reaprendéta umi mbaʼe ojapótava Ñandejára Rréino. Péro ndahaʼéi upéva añónte, ikatúta avei rembohovái heta porandu iñimportánteva. Por ehémplo:

• ¿Mávapa ñandeapo raʼe?

• ¿Maʼerãpa jaikove?

• ¿Mbaʼérepa Ñandejára opermiti jahasa asy?

• ¿Mbaʼépa oiko umi omano vaʼekuégui?

• ¿Oñehundínepa ko yvy?

• ¿Mbaʼéichapa ikatu javyʼa ñande rogapýpe?

Ha iñimportanteveha katu, restudiáramo la Biblia, reñemoag̃uivéta Ñandejárare (Santiago 4:8). Ha amáske reñemoag̃ui hese, reikuaavéta umi mbaʼe porã ojapóva Irréino nderehehápe koʼág̃ama voi ha umi mbaʼe ojapótava amo gotyove avei. Jesús heʼi vaʼekue voi Itúvape: “Umi hénte ohupyty hag̃ua jeikove opaveʼỹva, tekotevẽ ndekuaa porãve ohóvo, nde Ñandejára teete ha peteĩetévape ha Jesucrístope, upe nde rembou vaʼekue” (Juan 17:3).