KO RREVÍSTAPE OÑEANALISA | ¿IKATÚPA JAIKUAA MBAʼÉICHAPA PE YVÁGA?
Mbaʼépa opensa jepi la hénte pe yvágare
Hetaiterei hénte oikuaase mbaʼéichapa oiméne pe yvága ha umi oikóva upépe. Ymaite guive umi hénte ojepyʼamongeta ha opensa heta mbaʼe upévare. Por ehémplo, algúno orovia upépe oikoha umi ijypykue omanóma vaʼekue ha tekotevẽha oñemombaʼeguasu chupekuéra. Oĩ avei heʼíva haʼeha peteĩ lugár ikatuhápe ojevyʼa ha ojeiko trankiloite, oikohápe umi ánhel ha ohohápe umi ivuénova omano rire. Ha ótro katu opensa haʼeha peteĩ lugár oikohápe hetaiterei dios.
Péro oĩ avei heʼíva ndaikatuiha jaikuaa mbaʼéichapa añetehápe pe yvága, ndaipóri rupi avave oúva yvágagui omombeʼu hag̃ua ñandéve la oĩva upépe. Péro upéva ndahaʼéi siérto. Jesús ningo oiko vaʼekue yvágape ou mboyve ko yvy ape ári. Ha heʼi voi kuri umi omoakãvape umi hudío rrelihión: “Che aguejy yvágagui ndahaʼéi ajapo hag̃ua che rembipota, síno upe chembou vaʼekue rembipota”. Upéicharõ, Jesús oikuaa porã vaʼekue mbaʼéichapa pe yvága, upévare ikatu kuri heʼi ijapostolkuérape: “Che Ru rógape oĩ heta lugár ojepyta hag̃ua” (Juan 6:38; 14:2).
Jaikuaaháicha, Jesús Túa hína Ñandejára. Haʼe héra Jehová, ha “hóga” oĩ hína yvágape (Salmo 83:18). Upévare Jehová ha Jesús ikatu omombeʼu porãve ñandéve oimeraẽvagui mbaʼéichapa pe yvága. Haʼekuéra ohechauka vaʼekue heta isiérvo yma guarépe umi visióna ñanemopirĩmbáva, ñanemboʼéva heta mbaʼe pe yvágagui.
La Biblia omombeʼu ñandéve mbaʼépa ohecha raʼe umi kuimbaʼe umi visiónpe, ha pe ótro artíkulope oñeanalisáta upéva. Eleévo Ñandejára Ñeʼẽme umi visión, nemanduʼa vaʼerã pe yvága ñañeʼẽha hína koʼápe ndahaʼeiha peteĩ lugár oĩva ko univérsope, oĩháme umi mbaʼe ikatúva jahecha térã japoko hese. Upévare Ñandejára ojevale umi visiónre oexplika hag̃ua umi mbaʼe oĩva yvágape ñande ñantende hag̃uáicha. Pórke oipurúrire umi palávra oipurúva umi oikóva yvágape voi, ndaikatumoʼãi kuri ñantende. Koʼã visión ñanepytyvõta ñantende hag̃ua mbaʼeichaguápa hína umi oikóva yvágape, oĩháme “heta lugár ojepyta hag̃ua”.
a Peteĩ visión haʼe hína peteĩ mbaʼe ojehechaukáva milágro rupive peteĩ persónape.