Pe létra hebrea michĩvéva omombarete ñande jerovia

¿Ikatúpa ñaime segúro Ñandejára okumplitaha katuete opa mbaʼe oprometéva? Jesús oguerovia vaʼekue upéva ipyʼaite guive, ha umi mbaʼe omboʼéva rupive oipytyvõ avei umi héntepe omombareteve hag̃ua ijerovia. Ñapensamíntena por ehémplo Jesús heʼi vaʼekuére pe Sermón del Móntepe. Mateo 5:18-pe haʼe heʼi: “Añetehápe haʼe peẽme, yvága ha yvy ikatu ohasa, péro ni mbaʼevéicharõ ndopytareimoʼãi ni peteĩ letraʼi ni pe párte michĩvéva oĩva pe Léipe, oikopa peve opa koʼã mbaʼe”.

Pe létra hebrea michĩvéva ningo yod (י). Kóva hína pe primera létra orekóva pe Tetragrámaton, térã Ñandejára réra, Jehová.a Umi mboʼehára leipegua ha umi fariséo ningo omombaʼeterei vaʼekue umi palávra ha létra oĩva Ñandejára Léipe, ha umi letraʼi o “párte michĩvéva” jepe iñimportanterei vaʼekue chupekuéra g̃uarã.

Jesús heʼi vaʼekue ko yvy ha yvága jepe ikatuha oñehundi, ánte ke la opyta rei peteĩ detalleʼi jepe Jehová Léi heʼívagui. Ha la Biblia heʼi porã ko ñane planéta ha pe yvága oĩtaha pára siémpre (Salmo 78:69). Péicha Jesús ohechauka porãiterei katuete oñekumplitaha umi detálle michĩvéva jepe oĩva Ñandejára Léipe.

¿Iñimportántepa Jehovápe g̃uarã umi detálle michĩvéva jepe? Si iñimportánte. Por ehémplo, haʼe heʼi vaʼekue umi israelítape opreparávo pe ovecha raʼy Pascuarã nomopẽi vaʼerãha chugui ni peteĩva ikangue (Éxodo 12:46). Haʼetévaicha ningo naiñimportanteguasúiva upe detálle, ha umi israelita jepe oiméne nontendepái raʼe mbaʼérepa ndovaléi ojapo upéva. Péro Jehová oikuaa porã ko detálle iñimportanteha, pórke upéva ohechaukáta kuri pe Mesíasgui noñemopẽmoʼãiha ni peteĩ ikangue oñemosaingo vove chupe pe yvyráre (Salmo 34:20; Juan 19:31-33, 36).

Upéicharõ, ¿mbaʼépa ñanemboʼe Jesús heʼi vaʼekue? Ñande avei ikatuha jaguerovia ñande pyʼaite guive Ñandejára Jehová okumplitaha entéro umi mbaʼe opromete vaʼekue, umi detálle michĩvéva jepe. ¡Ajépa tuichaite omombarete ñande jerovia pe létra hebrea michĩvéva!