¿Oĩpa avei ánhel iñañáva?

Si, oĩ avei. Péro, ¿mbaʼéicha rupi piko oĩ ánhel iñañáva? Ñanemanduʼa vaʼerã Ñandejára okreárõ guare umi ánhelpe, omeʼẽ hague chupekuéra liverta odesidi hag̃ua mbaʼépa ojapóta. Ñandejára ojapo riremi Adán ha Évape, peteĩ ánhel oipuru vai upe liverta ha omomýi chupekuéra opuʼã hag̃ua Ñandejárare. Ha osẽ la ijidéape (Génesis 3:1-7; Apocalipsis 12:9). La Biblia nomombeʼúi mbaʼéichapa héra ko ánhel ni mbaʼépa ojapo vaʼekue yvágape opuʼã mboyve Ñandejárare. Péro oiko rire upéva oñemoĩ chupe peteĩ herarã hoʼaitereíva hese, oñehenói voi chupe Satanás heʼiséva “Oñemoĩva ótrore”, ha Diablo heʼiséva “Otakýva ótrore” (Mateo 4:8-11).

Ha ñambyasýramo jepe Satanás omoñepyrũ vaʼekue ndopái kuri upépe. Noé tiémpope, hetaiterei ánhel omboyke hembiapo yvagapegua ha “oheja rei ilugár” Ñandejára família apytépe. Haʼekuéra ou ko yvy ape ári, oñembohete kuimbaʼéicha ha hekovaieterei hikuái. Ñandejára ningo ndokreái vaʼekue chupekuéra ojapo hag̃ua umi mbaʼe, upévare ivaieterei la ojapo vaʼekue hikuái (Judas 6; Génesis 6:1-4; 1 Pedro 3:19, 20).

¿Mbaʼépa oiko chuguikuéra upéi? Ñandejára oguerúrõ guare pe Dilúvio ko yvy ape ári, haʼekuéra oho jey yvágape peteĩ espírituicha. Péro Ñandejára ndohejavéima koʼã ánhel aña térã demónio oĩ jey hendivekuéra yma guaréicha, “síno okastiga chupekuéra opoívo pe Tártarope” (Judas 6; 2 Pedro 2:4). La Bíbliape oñehenói Satanáspe “umi demónio ruvicha”, upéva heʼise haʼekuéra oĩha ipoguýpe. Satanás ningo koʼág̃a peve oiko “oñemonde ánhel omimbipávaramo” (Mateo 12:24; 2 Corintios 11:14).

La Biblia ohechauka Ñandejára Rréino oñepyrũ hague ogoverna yvágape áño 1914-pe.a Oiko rire ko mbaʼe iñimportantetéva, oñemosẽ Satanás ha umi demoniokuérape yvágagui ha oñemombo chupekuéra ko yvy ape ári, péro ndaikatuvéima oiko hikuái yma guaréicha. Umi demónio ningo iñaña ha oñevengasénte voi, ha umi hénte oiko lájare ojekuaa oĩha koʼã demónio poguýpe. Upéicha rupi haʼekuéra hekokyʼa ha iviolentoiterei (Apocalipsis 12:9-12).

Upéicharõ jepe, ikatu jaʼe umi mbaʼe vaieta oikóva koʼág̃arupi ohechaukaha oñehundi potaitemaha ko múndo aña oĩva umi demoniokuéra poguýpe. Koʼẽrõitéma Ñandejára Rréino ojokóta mil áño aja chupekuéra ha ojapo jeýta ko yvýgui peteĩ paraíso neporãmba jepéva. Opa rire umi mil áño, ojepoi jeýta chuguikuéra peteĩ tiémpo mbykymíre omoĩ hag̃ua a pruéva umi yvyporakuérape. Upe rire oñehundietétama chupekuéra (Mateo 25:41; Apocalipsis 20:1-3, 7-10).