Jaikuaave hag̃ua

¿Mbaʼérepa Jesúspe g̃uarã naiporãi vaʼekue ojehura?

PE LÉI mosáika opermiti vaʼekue umi judíope ojapo huraménto. Por ehémplo, haʼekuéra heʼími vaʼekue: “Ahura ndéve Ñandejárare”; térã “ahura ndéve Jehová rérare”. Péro Jesús tiémpope umi judío ohura vaʼekue oimeraẽ mbaʼe reíre. Haʼekuéra ojapo upéva ikatu hag̃uáicha ojegueroviave la heʼíva. Péro Jesús 2 vése voi okondena la ojapóva hikuái. Haʼe heʼi: “Pejéramo pejapotaha peteĩ mbaʼe, pejapo vaʼerã, ha pejéramo ndapejapomoʼãiha, anítei pejapo” (Mat. 5:33-37; 23:16-22).

Peteĩ diksionário oñeʼẽva rrelihiónre omombeʼu pe Talmud ohechaukaha mbaʼéichapa ojepokuaa vaʼekue umi judío ohura ikatu hag̃uáicha ojeguerovia la heʼíva. Pe Talmúdpe ningo ojexplikapa voi mbaʼeichagua huraméntopa oñekumpli vaʼerã katuete, ha mbaʼeichaguápa ikatu ojehasa reínte.

Ndahaʼéi ningo Jesúspe g̃uarãnte la ivai vaʼekue pe kostúmbre orekóva umi judío. Por ehémplo, pe istoriadór judío Flavio Josefo oñeʼẽ vaʼekue peteĩ sékta judía ndohuráivare. Ko sékta opensa pe huraménto ivaiveha pe japúgui. Chupekuéra g̃uarã peteĩ persóna tekotevẽramo ohura ojeguerovia hag̃ua la heʼíva, katuete pe persóna ijapu hína. Peteĩ lívro ikonosídova umi judío apytépe hérava Eclesiástico, térã Sabiduría de Jesús Ben Sirá, heʼi: “Peteĩ kuimbaʼe ohuraitereíva, henyhẽ hína mbaʼe vaígui” (23:11). Jesúspe g̃uarã naiporãi vaʼekue ojehura oimeraẽ mbaʼére. Ñande kásope, siémpre jaʼéramo siertogua, natekotevẽmoʼãi jahura umi ótro oguerovia hag̃ua la jaʼéva.