¿Mbaʼéichapa nepytyvõta reikuaáramo Ñandejárape?

Koʼa peve jahecháma umi mbaʼe ñanepytyvõva jaikuaa hag̃ua mávapa Ñandejára. Jahecha haguéicha, la Biblia heʼi Ñandejára heraha Jehová ha ñanderayhuetereiha. Jahecháma avei umi mbaʼe ojapo vaʼekue ñanderehehápe ha umi mbaʼe ojapótava amo gotyove. Heta mbaʼe ningo oĩ ikatúva ñaaprendeve Ñandejáragui. Péro ikatu oime eñeporandu, ¿mbaʼéichapa ideprovéchota chéve añehaʼãramo aaprendeve chugui?

Jehová opromete ‘rehekáramo chupe, haʼe ojejuhukataha ndéve’ (1 Crónicas 28:9). Rejapóramo upéicha, oikóta ndehegui “ Jehová amigoite” (Salmo 25:14). ¿Mbaʼéichapa nepytyvõta oikóramo ndehegui Jehová amígo?

Revyʼa añetéta. La Biblia heʼi voi Jehová haʼeha “Ñandejára ovyʼáva” (1 Timoteo 1:11). Reñehaʼãramo reiko iñamígoramo ha resegíramo iñehémplo, añetehápe revyʼáta. Ha upéva ojapo porãta nderehe entéro mbaʼépe (Salmo 33:12). Ñandejára ikatu nepytyvõ avei reheja hag̃ua umi mbaʼe ojapo vaítava nderehe, rejagarra hag̃ua umi kostúmbre nepytyvõtava ha rejogueraha porã hag̃ua nde rapichakuérandi. Rejapóramo koʼã mbaʼe, katuete eréta ko salmísta heʼi haguéicha: “Che katu añemoag̃ui Ñandejárare, ha ndaipóri mbaʼeve iporãvéva upévagui” (Salmo 73:28).

Oñangarekóta nderehe. Jehová opromete iñamigokuérape: “Che tódo el tiémpo amaña nderehe. [...] Ameʼẽta ndéve konsého iporãva” (Salmo 32:8). Upéva heʼise Jehová okuidaha káda únore ha omeʼẽha káda uno umi isiérvope umi mbaʼe oikotevẽva (Salmo 139:1, 2). Oiko vove ndehegui Ñandejára amígo, rehecháta haʼe siémpre oĩha nde ykére nepytyvõ hag̃ua.

Rehupytýta amo gotyove heta mbaʼe iporãitereíva. Koʼág̃ama voi Jehová nepytyvõta reiko hag̃ua vyʼápe ha opromete avei ndéve peteĩ futúro iporãitereíva (Isaías 48:17, 18). La Biblia heʼi voi umi oikuaa porãvéva ohóvo Ñandejára tee ha peteĩetévape ha Jesucrístope, upe haʼe ombou vaʼekuépe, ohupytytaha jeikove opaveʼỹva (Juan 17:3). Pe esperánsa Ñandejára omeʼẽva ningo haʼete “peteĩ ánkla ñande rekovépe g̃uarã, oĩ hatãva ha ikatúva jajerovia hese”, ha upéva ñanepytyvõ jagueropuʼaka hag̃ua koʼã tiémpo ijetuʼuetéva (Hebreos 6:19).

Koʼápe michĩmínte oñemombeʼu umi mbaʼe ikatúva rehupyty reikuaa porãvéramo Ñandejárape ha reikórõ iñamígoramo. Reikuaasevéramo mbaʼépa ikatu rehupytyve, eñeʼẽ peteĩ testígo de Jehovándi, térã eike ko direksiónpe Internétpe: www.jw.org/gug.