Jaiporu porãkena ñane tiémpo
1 Ñambovyʼaségui Jehovápe ñamotenonde chupe opaite mbaʼe jajapóvape. Iñeʼẽ heʼi ñandéve ‘opa árape jaheka raẽ hag̃ua Ñandejára rréino’ ha ‘jaiporavo hag̃ua katuete umi mbaʼe iñimportantevéva’ (Mat. 6:33; Fili. 1:10). Mbaʼéichapa ikatu jajogua tiémpo Ñandejára Rréinope g̃uarã, ha ñamoĩ hag̃ua hendápe umi mbaʼe naiñimportanteguasúiva? (Efe. 5:15-17.)
2 Emotenondékena umi tembiapo Ñandejára Rréino rehegua. Emohenda porã ne tiémpo ani hag̃ua reiporupa umi mbaʼe iñimportanteʼỹvape. Oĩ umi oñepyrũvo káda més ojapóva iprográma ha omboykémava tiémpo osẽ hag̃ua opredika. Upéi oñehaʼã ani hag̃ua mbaʼeve ombyai pe prográma ojapovaʼekue. Ikatu jajapo upéicha avei jajogua hag̃ua tiémpo ñane rreunionkuérape g̃uarã, pe estúdio ñaneañohápe jajapóvape g̃uarã ha jaha hag̃ua ñane asambleakuérape. Heta oĩ oleéva la Biblia oñepyrũ térã opa hag̃ua hembiapokuéra káda diagua. Emboyke peteĩ tiémpo káda tembiapo iñimportántevape g̃uarã, ha ani reheja mbaʼeve iñimportanteʼỹva ombyai upéva ndehegui (Ecl. 3:1; 1 Cor. 14:40).
3 Ani reiporupa ko múndo oikuaveʼẽva. Heta tetãme umi depórte, entretenimiénto ha umichagua vyʼarã ikatu jatopa oimehápe. Oĩ heta oiporúva hetaiterei itiémpo omaʼẽhápe televisión térã oiporuhápe komputadóra. Péro, jajepyʼapyetereíramo umi vyʼarãre térã jaiporu hag̃ua katuete oimeraẽ mbaʼe pyahu ko múndo oikuaveʼẽva, katuetei ñañedesilusionáta (1 Juan 2:15-17). Upévare Ñandejára Ñeʼẽ heʼi ñandéve ani hag̃ua jaiporupaite ko múndo oikuaveʼẽva (1 Cor. 7:31). Rejapóramo pe marandu heʼiháicha, rehechaukáta Jehovápe remotenondeha nde rekovépe pe adorasión remeʼẽva chupe (Mat. 6:19-21).
4 Opa potaitéma pe tiémpo opytáva ko múndope. Umi omotenondéva Ñandejára Rréino ovyʼáta ha Jehová oguerohorýta chupekuéra (Pro. 8:32-35; Sant. 1:25). Upévare, jaiporu porãkena pe mbaʼe importanteterei jaguerekóva: ñane tiémpo.