Jaiporupañaína ñande lívro Razonamiento?
1. Mbaʼéichapa oporomboʼevaʼekue Jesús ha apóstol Pablo?
1 Apóstol Pablo oñehaʼãvaʼekue oipytyvõ hapichakuérape ‘oiporúvo Ñandejára Ñeʼẽ’ (Hech. 17:2, 3; 18:19). Jesús avei pyʼỹinte oiporumivaʼekue Ñandejára Ñeʼẽme oĩva ha oiporu avei ehémplo ikatu hag̃uáicha umi ohendúva chupe ontende mbaʼépa Ñandejára rembipota (Mat. 12:1-12). Pe lívro Razonamiento a partir de las Escrituras ñanepytyvõta ñaporomboʼe hag̃ua Jesús ha Pablo ojapo haguéicha.
2. Mbaʼéichapa ñanepytyvõ lívro Razonamiento japredika hag̃ua?
2 Mbaʼéichapa ikatu ñañepyrũ ñañemongeta. Pe lívro Razonamiento-pe páhina 9 guive 15 peve omombeʼu mbaʼépa ikatu jaʼe ñañepyrũ hag̃ua ñañemongeta ñande rapichándi. Upépe jahechakuaa máva mávapa ikatu jaiporu ha tekotevẽramo ñakambia mimi vaʼerã umi mbaʼe jaʼétava, koʼýte pyʼỹi japredikáramo ñande territóriope. Ha jahecha rire mbaʼépa oipyʼapy pe óga járape ikatúta ñañeʼẽ chupe upévare. Upéicha hetavéndi ñañemongetáta ha ñandekatupyryvéta predikasiónpe. Jaiporu jave teléfono térã pe intercomunicador, ikatu voi jalee oĩhaichaite pe lívrope.
3. Mbaʼépa oĩve ñande lívro Razonamiento-pe ikatúva ñanepytyvõ?
3 Mbaʼépa ikatu jaʼe umi ñane ñeʼẽ jokosévape. Ñapensamína mbaʼépa heʼi jepi umi hénte ñande territóriope ñane ñeʼẽ joko hag̃ua. Ha ñasẽ mboyve japredika ikatu jahecha jey sapyʼami ñande lívro Razonamiento páhina 16 guive 21 peve. Upéicha jaikuaátama mbaʼépa jaʼéta oĩramo ñane ñeʼẽ jokoséva. Oĩpa ñande territóriope peteĩ budista, hindú, judio térã musulmán? Oiméramo upéicha, ikatu jahecha mbaʼépa heʼi ñande lívro Razonamiento páhina 21 guive 24 peve.
4. Mbaʼéichapa ikatu jaiporu pe lívro Razonamiento oĩramo oporandúva térã oñeʼẽva ñandéve peteĩ téma hasývare?
4 Mbaʼéichapa ñambohovaikuaa oñeporandúva ñandéve. Ñande lívro Razonamiento ñanepytyvõta avei oĩramo oporandúva ñandéve peteĩ mbaʼe térã oñeʼẽramo peteĩ téma hasývare. Péicharõ ikatúnte jaʼe pe óga járape jahechaukaseha chupe peteĩ mbaʼe iñimportantetereíva ha upépe ñanohẽma ñande lívro. Jahechakuaa páhina 5, jaheka pe párte oñeʼẽva pe témare ha jahecha umi porandu oĩva létra hũvévape. Ndajatopapyaʼéiramo pe informasión ikatu jahecha pe índise oĩva opakuévo ko lívro. Jatopa vove katu, pe lívrogui voi ikatu jalee. Oñeporandúramo ñandéve peteĩ téystore, jahecha pe párte heʼíva “Textos bíblicos que suelen aplicarse mal” oĩva páhina 445-pe.
5. Mbaʼéichapa ikatu avei jaiporu ñande lívro Razonamiento?
5 Mbaʼéichapa ikatu avei jaiporu. Oĩ ogueraháva pe lívro Razonamiento eskuélape térã itravahohápe, oiporu hag̃ua oĩ jave oporandúva chupe “Mbaʼérepa ndajafestehái heta fiésta”. Heta mitãrusu ha mitakuña katu oiporu koléhiope umi párte oñeʼẽva “Creación” ha “Evolución” rehe. Jahátaramo javisita peteĩ hasykatúvape térã peteĩ ihénte manóvape, ikatu jahecha pe párte heʼihápe “Estímulo”. Upépe jajuhúta heta téysto vívliko ikatúva jaiporu ñaporokonsola hag̃ua. Pe lívro Razonamiento ñanepytyvõta avei japrepara jave ñande diskursorã ha ñamoakãvo pe aty oñesẽ hag̃ua ojepredika.
6. Mbaʼépa jahupytyse japredika jave?
6 Japredika jave ndahaʼéi jaháva ñamombeʼúnte hag̃ua umi mbaʼe jaikuaáva ni ñambohovái hag̃ua umi odiskutisévape. Ñaipytyvõse guei ñande rapichakuérape jaiporúvo Ñandejára Ñeʼẽ. Ha upéva jajapóta jaiporu porãramo ñande lívro Razonamiento. Upéicha avei jajesareko porãta umi mbaʼe ñamboʼévare (1 Tim. 4:16).