‘Eñehaʼã memékena relee porã hag̃ua’

1. Mbaʼérepa iñimportánte jaleekuaa?

¹ Iñimportánte ningo enterovéva jaleekuaa, upéva ñanepytyvõta jaikuaa hag̃ua heta mbaʼe. Pór ehémplo, jalee hag̃ua la Biblia ha ñañemoag̃uive hag̃ua Jehováre (Santiago 4:8). Avei ikatúta ñamboʼe Ñandejára Ñeʼẽ hekopete ñande rapichakuérape. Apóstol Pablo ohechakuaavaʼekue iñimportantetereiha ko mbaʼe, upévare heʼi peteĩ ansiáno ikatupyrývape: ‘Eñehaʼã memékena relee porã hag̃ua’ (1 Tim. 4:13). Upéicha jahecha iñimportanteha jalee porã ha upévare ñañehaʼãvaʼerã.

2. Mbaʼe mbaʼépa ikatúta rejapo relee porãvéramo guaraníme?

² Aníkena reimoʼã natekotevẽiha reñehaʼãve relee porã hag̃ua guaraníme. Reñehaʼãvaʼerã ijetuʼúramo jepe. Upéicha ningo ikatúta rembaʼapo porãve Jehová servísiope. Avei ikatúta restudia ne famíliandi guaraníme ha upéva omombaretevéta pende jerovia. Ha epensamína mbaʼeichaitépa opokóta nde rapichakuéra korasõre repredikáramo chupekuéra guaraníme! (Embojojami Hechos 22:​1, 2 rehe.)

3. Mbaʼéichapa ikatu relee porãve guaraníme? Mbaʼépa iporã ojapo tuvakuéra?

³ Mbaʼéichapa ikatu relee porãve guaraníme? Upearã repraktika meme vaʼerã. Ikatu remboyke káda día 15 térã 30 minúto. Pyaʼeterei ningo rejepokuaáta! Tuvakuéra ohechavaʼerã arakaʼépa opyta porãvéta olee hag̃ua ifamíliandi. Upévare iporãta ojapóramo peteĩ prográma oñembokatupyryve hag̃ua hikuái. Pe tembiguái jeroviaha ha iñarandúva omeʼẽ ñandéve heta informasión guaraníme ñanepytyvõtava jalee porãve hag̃ua. Upéva rupi japraktika vove jaleéta kyreʼỹme ha vyʼápe.

4. Mbaʼépa ojapovaʼerã umi ansiáno oipytyvõ hag̃ua ermanokuérape?

⁴ Umi ansiáno ningo pyʼỹinte ohechavaʼerã mbaʼéichapa ikatu oipytyvõ umi ermánope olee porãve hag̃ua guaraníme. Pór ehémplo, oĩ voi peteĩ prográma oporombokatupyrýva upearã. Ha oiméramo pene kongregasiónpe tekotevẽ peñembokatupyryve, ojejapovaʼerã káda semána. Peñehaʼãkena enterovéva pepartisipa pelee syryryve hag̃ua! Pe ermáno omoakãva Eskuéla Jaiporukuaa Hag̃ua la Biblia oipytyvõvaʼerã ojejapo hag̃ua ko tembiapo ha ojesarekovaʼerã osẽ porã hag̃ua. Umi ansiáno púntape oñehaʼãvaʼerã olee porãve guaraníme. Upéicha omokyreʼỹta avei enterovépe oñehaʼã ha ohechakuaa hag̃ua tekotevẽha jajapo ko mbaʼe.

5. Mbaʼépepa nepytyvõta relee porãvéramo guaraníme?

⁵ Ñepyrũrã ningo ijetuʼúta relee syryry hag̃ua, péro rehóramo hese rehecháta mbaʼeichaitépa ideprovéchota ndéve ha umi nerendúvape, ha ni mbaʼeveichavérõ nerembyasymoʼãi. Aníkena nekangy nosẽpyaʼéi haguére ndéve (embojojami Gálatas 6:9 rehe). Ejerurékena Jehovápe tanepytyvõ relee porãve hag̃ua, ha emombeʼu chupe mbaʼérepa relee porãseve guaraníme. Haʼe ningo katuete nepytyvõta reñehaʼã haguére (1 Juan 5:14). Relee porãvéramo guaraníme nekyreʼỹ ha revyʼavéta restudia hag̃ua la Biblia. Avei reñemoag̃uivéta Jehováre, reñakãrapuʼãta iservísiope ha ndekatupyryvéta reipytyvõ hag̃ua ótrope (1 Tim. 4:​13, 15, 16).